زوجي مغرور57
ماتخليني.. انا نعاقب ف روحي عشانك..
خذا السير وقعد يضرب ف ظهره.. وقعد يكرر ف الضرب كان صوت الضرب مرعب ومخيف..
واخيرا تحركت مسكت بكل قوتي السير ونترجى فيه: وقف وقف.. ماتديرش ف روحك هك..فيصل الله يخليك وقف.. ووووقف..
صوت دق ع الباب قوي متواصل مصر..
تباعد عليه فيصل كأنه ناض م حلم وهويبحت ف الدار
سحبت روحي وخشيت للحمام وقفلته.. وقمعزت ع الارضيه ونا نبكي.. مندري غفيت او متت او اغمى عليه كأني سمعت صوته يبكي ويترجى ويردد : أسف أماني.. غصبا عني..
ونا نتمنى مانوعى بكل.. كله م الحقير اللي اسمه طارق اتشمت ياطارق واضحك.. ف حالي الصعيب.. اليوم..
________
ليلى..
بعد المغرب جا كنت نحس بألم فظيع لكن ماتكلمت.. شق الفلوس الله يشق معدته.. خشيت للمستشفى بكرسي متحرك وطلعت منه بكرسي متحرك.. لكن فيه قيله ف السياره.. وصلنا للفيلا نزل وفتح بابي وعطاني القيله.. وقال بصوته الغريب : حاولي تستخدميه وتو نساعدك..
مسكتها ورميتها :جيب كرسي متحرك..
زفر بضيق وهو يشيلها من جديد ويقول بصبر : الدكتور قال الافضل لك تستخدميها هي..
هزيت راسي باستهجان وعناد: لا..نبي كرسي متحرك..
رد بحمق :باهي.. بس خوذيها عشان نخش...تجمدنا م السقع..
رديت بعناد : نعرفش نستخدمها..
عصب اكثر : حاولي.. جربي واحكمي..
لفيت وجهي للجهه الثانيه: نبيش..
سحبني بسرعه نزلت ع كراعي السليمه وحط القيله تحت ايدي قلت : ا ا ا ا ه..
فعلا كانت طيحتي ع كراعي السليمه وبمجرد ضغط بسيط ع كراعي الاخره مؤلم.. قعدت فتره نحاول نحافظ ع توازني.. بس وقفت ع أرضيه صلبه وجهه له نظره قلت ونا نتمنى نضربه : ياغبي..
ابتسم بفتور مشيت خطوتين ونا نستخدم ف القيله ف الخطوه الثالثه الارض كان تزلق ف ثواني تهاويت.. طحت ع الارض بألم..
سمعت صوته خلفي : بسم الله عليك.. اذكري الله..
مسكت ايده خصري ورفعني بسرعه وابتسم : المهم حاولتي..
هو يضحك ونا نعاني عمري ماتخيلت روحي ف هالموقف ..لو مش ساندني كان لي رد فعل ثاني بلعت كلماتي قبل نطلقها عليه.. استندت عليه كأنه القيله.. وصلني لداري وطلع..
كانت الدار معبيه شكاير ف الزاويه.. تسندت ع الساس.. كانت عباره حاجات م الصيدليه.. ولبس وشناطي.. ودبله وطاقم ذهب..
وقفت ومشيت للسرير.. ف العياده ما إقدرت نرقد كل شوي خاشه عليه ممرضه..رميت روحي ع السرير وارقدت.. بعدها بساعتين نضت خشيت دوشت شفت اللبس اللي جابه هو سراويل وقونه قصيره وقونه طويله هضا شنو ..خش عليه ونا نبكي صرخت فيه جايب كل اللبس سراويل.. ونا كراعي مجبسه..طلع جاب مقص وخذا سروال اسود وقصه م جهة اليمين لعند الفخد وخذا فانيليه صوف بلون بيج وفيها أسود وقف وسندني لعند الحمام وقالي ماتقفلي الباب.. خشيت دوشت دوش ساخن.. وطلعت وصلني للكرسي..وعطاني ظهره وقال : انا طالع نجيب عشاء صلي وبعد نص ساعه نكون هنا..
طلع عنده حق يهرب.. ونا نشوف شكلي ف المرايه تحفه شعري مبلول ولاصق ف الجلده وهو اشعيرتين واشعيره
وبشرتي شاحبه..فتحت كريم مبيض وخافي العيوب عطتهن ليه فاديه ..
استخدمته ومرطب شفايف وقلم رسمت بيه عيني.. مشطت شعري وخليته مفلول..بحتت ف شكلي كان وااااو..
_________
ياسر..
لما سكرت ضربتها مسكينه بعد الفجر وقريب خنقتها.. لو ماهربت للدار الاخره كان خنقتها..
واخيرا اقدرت نخش كانت وقفتها شامخه اللي نعشقها.. كبرياء وعزة نفس لفدوى وبس..
لكن مااقدرت نسيطر ع الموقف تقدمت لها ونظرة عينها توقعتها.. نظرة
كره
بغض
حقد
نفور
خوف
رعب
رفعت ايدها وكأنها تمنعني م الاقتراب وخرت وهي وخرت هاربه مني..
قمعزت ع الكنبه وبحركه انيقه أراحت ساق فوق ساق..
تكلمت بشجن وجديه وصوتها يغرد: ليلة أمس كبرتني عشرين سنين قدام.. أنا درت فيك معروف.. الله يرحم والديك اعتقني ورد معروفي.. طلقني ياسر..
رديت عليها معروفك ع عيني وراسي.. لكن عطيني فرصه ثانيه..
رفعت نظرها كأنها قاضي وانا مجرم يستنى حكم اعدامه : ياسر انت مش محتاج زوجه.. انت عايش لذاتك.. ولاشباع شهواتك..
رديت عليها بسرعه صح هو اللي جاها مني مش شويه لكن : مستحيل..
قالت بقوه : خلاص..انتهينا..
رديت عليها بقوه أكبر : لافدوى.. نحن لبعضنا.. مستعد نتغير..
قطعتني ودمعه ساخنه نزلت منها : ياولد الناس.. مش بالغصب العيشه معاك.. انا قرفت.. حقدت.. توجعت.. اعتقني تكسب فيه اجر.. عد روحك لقيتنيش.. وكمل حياتك بدوني.. اعتبرني مت أمس..
قطعتها بمحاولة اقناع احسن م الغصب : انتي حيه.. والعيشه معايه غصب.. ياتدفنيني ياندفنك.. ومع العشره يمشي القرف.. والحقد خوذي حقك مني..
بكت وتقدمت لها وقمعزت ركبه ونص وهي حطت وجهها بين كفوفها : نجيب المصحف ونحلف عليه.. عشان تصدقيني.. ندير اللي تبيه..
هزت راسها علامة الرفض وخاتمي يلمع ف صبعها حسدت الخاتم : باهي.. ايش ندير عشان تصدقيني..
مسحت بصبعها عينها السوده الذباحه.. ولفت وجهها للجهة الثانيه بضعف.. مسكتها من ذقنها : شنو يرضيك.. ونا نديره..
قالت اخيرا بصوت مبحوح مجروح غاضب : تحلف بالله تنفذ ..ويكون بيننا .....
زوجي مغرور58
ويكون بيننا عهد ومواثيق واللي يخون لها الاخر يتصرف كيف مايبي..
وافقتها : لك ماطلبتي.. عهد علي والعهد غالي معاد نشرب..
لكن هزت راسها بحزن : نبيك..
قطعتها بفخر :عليه العهد نصلي.. انا نصلي من مده..
تنهدت وكأنها تذكرت شيء محزن : نعرف لكن..
قطعتها : عهد عليه ووعد ونقسم ماناخذ حقي الشرعي الا اذا طلبتيني.. وقلتي "تعال ياسر" تذكري هالكلمه ﻷنها كلمة سر .. وح نستنى لين تبرى جروحك مني..
كشرت بقرف.. ماالومها ..قالت بتعب : ياسر..
قطعتها ونا نذكر طلبها الدائم : نخليك تزوري خواتك..
فاديه..
بقلبي نار.. نار مشتعله.. الغيره تقطعني واساميهن تدور وتلف ف دماغي ونتخيل فيهن.. كل مابنتكلم قطعني.. واخيرا سنحت ليه الفرصه ونفثت اللهب ونا نمسك وجهه بيديه عشان يعطيني فرصه نتكلم : اوعدني ماتعرف غيري بالحرام ابدا..
قطعني بصدمه وثقه وحسم :وعد عليه مانعرف لا بالحلال ولا بالحرام .. انتي وبس..
وقفت وهو مازال مقمعز ونا نهدد من قلب مازال فيه قهر: توا نبداء من جديد ونتسى الماضي لكن.. واللي خلقك ياياسر لو تخوني.. نخليك نص راجل.. حاول تسيطر ع الغريزه الوحيده الفعاله عندك وواضح انها تقودك..
وقف مذهول ومسك إيدي ببسمة تهديد مرعبه : انا كللي لك.. كلك ع بعضك.. لكن ارفقي بحالي..
مسحت دمعتي ورديت نهدد ونأكد : كلك ليه..ملكي.. ونا مانحب اي كائن حي يشاركني فيك.. لو خنتني.. نخليك تمنى لو قتلتني..
حط عينه ف عيني فيها عنف مشابه لعنفي واقوى : كللي لك..وكلك ليه.. لكن لو خنتيني..
قطعته مستنكره: استحاله نخونك.. لا ديني ولاتربيتي ولا أخلاقي..
سكتني بنظره مرعبه: الخيانه لها أشكال.. من ضمنها تسيبيني وتخليني وانتي تعرفي إن روحي مرهونه باسمك..
قطعته بألم: وروحي اسيرة روحك.. نسيبك ونهرب منك.. وين نمشي..
نزل صبعه البارد يتلمس ف رقبتي ونا نطبق ع كفه البارده بخفه..تلمعت عيونه بجنون : تمام اتفقنا.. انا أسيرك وانتي أسيرتي.. نمشي الدرب للنهايه.. لكن لو خنتيني..الموت.. نخليك تمني الموت وماتوصلي فيه..
صرفت نظره ع تهديد وكأنه مش موجود ﻷنه مستحيل نتخلى عليه هو اكسجيني.. فيه حد يهجر أكسجينه.. باعدت ايده ع رقبتي.. هذي اليد الأنيقه كم لمست من بنت..غصبا عني بان العذاب ع وجهي.. تباعد عليه عشان نظرتي: بيننا مواثيق وعهود.. اتفقنا.. وبما إن اتفقنا.. لابد من مصافحة سلام..
رفعت ايدي ببرائه سحبني كلي لحضنه..
ياسر..
حضنتها ع نفسي تهدى..وروحي وروحي ترد لي.. وماسلب مني يرد لي.. بصوتها المتزن المتعب وف نظرها قرف جارح : ياسر ألمتني..
كان عندي سؤال يدور بقوه ف راسي شنو صار أمس.. لكن منعا لتقليب المواجع اجلتها لوقت آخر..
سألتها : تبي شيء..انا طالع نجيب عشاء
ردت : ردني لحوشنا
قعدت واقف مكاني مصدوم من الكلمه.. مواثيق وعهود.. وتوا تقول ردني لحوشنا.. قلبي وقفت كررت كيف المسجل : حوشنا..
ردت بخمول بدون ماتلاحظ ردت فعلي :حوشنا.. البيضاء.. شغلك...
رديت بسرعه ونا نتمني نحضنها نكسر ضلوعها : بكرة.. اليوم كلنا تعبانين..
هزت راسها موافقه..
كانت جاكة طارق معايه وفيها كل شيء مهم له.. وكان لابد من نعطيها له.. والصباح رباح..
وبنطلع نشري لها بانيه لأنها تموت ف البانيه..تمناه فطورها وغداها وعشاها بانيه..ا ا ا ه يافدوى..
________
فاديه ..
مش جيعانه بس فاجأني بعشا بانيه وكنافه.. ضحكني.. كليت مجامله له.. وقعدت نبتسم وماكل انا وهو..
بعد كلينا حسيت بقول شيء مخجل او مخل بالأدب سألني وعينه مركزه ف عيني وكأنه ينومني مغناطيسيا: امس شنو صار.. لأني مانذكر اي شيء..
انا ضاع مني كل شيء..
قرب مني وبنفس النظره : خل نبدأ م البدايه.. ليش فتحتي الدار ونا متأكد إني قفلت الباب..
كيف توقعت منه ينسى ومايجي يسأل والمشكله انا مش مجهزه الاجابات.. جاوبته بنبره صادقه فيها خوف : توقعتك نتحرت او متت.. كنت تحكي وتحكي وفجأه سكتت..
انطلقت عينه بمسح شامل لوجهي ﻹلتقاط اي إشاره أو علامه ع الكذب.. وقال بقوه : هضا درس لك السكران كيف الحيوان يطلق عنان غرائزه ويتبعها... وصدقيني الحيوان مايقتل روحه..
هزيت راسي موافقه ع كلامه..
سأل وهو يهمس : شنو صار بعدها..
كنت محتاره نقول له ع اعترافاته او... لكن لا الأفضل يظن اني ماعرفت شيؤ لو حب ف يوم يقولها ليه بكل قواه العقليه.. قلت ووجهي سخن وقعد احمر : كنت سكران و...
قطعني وقمعز ع الارض ومسك إيدي: شفري اللقطات المخله .. قلت لك شيء.. انا معروف إن نهدرز وانا..
جاوبته : لاااا.. ماحكيت الا كلام مش مفهوم.. صورتك وانت سألني باستغراب : صورتيني !!
جاوبت ونا خايفه من العواقب: بتليفونك.. صورتك بعد ما...
طلع التليفون وفتحه وبعدم تصديق قلب.. سمعت صوت المقطع..
شد ع ايدي ونزل راسه ع ركبتي.. ايدي امتدت لشعره وهو يقول : انسي فدوى.. حاولي.. انتي صغيره والنسيان لك ساهل.. ومازال ماشفتي م الدنيا شيء.. لو حبيتي تكلمي ف اللي صار انا جاهز وصدقيني تو انسيك.. ﻷني م كل قلبي نبيك.. لكن ساعديني واصبري علي.. ومع العشره تو نحترموا بعضنا..
زوجي مغرور 59
"نحترمك" انا غارقه ف بحر هواك وانت تقول مع العشره رفعت راسه ع ركبتي قبل نفضح بحالي عطاني نظره من يستنى ف رد..
: نعسانه..
رماني بابتسامه حزينه وناض..
مشيت بسرعه كنت خلاص بنرقد لكن ماطاوعني قلبي.. اخر مالمحته من ياسر هو ببسمه حزينه.. طلعت لقيته مقمعز ف مكاني.. سألته : كم الساعه..
نزل عينه لمعصمه الايسر لساعته : عشره ونص..
قلت بخجل قبل نفر هاربه : تصبح ع خير..
بس لمحت بسمته اللعوب اللي يرتجف لها القلب من جمالها وانسحبت.. خشيت للدار ورحت ف نومه عميقه..
بين طيات نومي الثقيل سمعت صوت يشبه صوته يصرخ ويستنجد ..نطيت قافزه من سريري ومازال الصوت.. طلعت ندور عليه لقيته راقد ع بطنه فوق الكنبه "والنومه هذي نومة الكوابيس" ويتمتم بخوف : محمود.. جمال.. علي.. لاااااا... لااااا... يوسف ماتت فدوى.. صورتني بدل ماتهرب.. او تطلب هلها..صورتني..
هزيت كتفه لكن ماوعى.. طريت للمطبخ وجبت كوب اميه بارده.. ومسحت ع وجهه ونا نسمي عليه.. فتح عينه ومازال يتمتم : ماتت فدوى.. ندفنها تحت التراب ياكلها الدود..
مسكت وجهه : انا حيه ياسر..حيه.. شوفني..
قعد يبحت فيه وعيونه تدور ع ملامحي كأنه يحفظ كل تفصيل دقيق فيها مد ايده يتلمس وجهي ورغم برودة ايده مابعدتها..همس بخوف وتعب : ماتسيبينيش..
حضنته ﻷول مره من قلب ونا نقول: مش ح نسيبك.. انا جنبك..
قعد متمسك فيه كأنه طفل متعلق ف أمه.. بعدها بفتره رقد.. نزلت راسه وطلعت لكن ازعجني كوني احد كوابيسه..
________
ياسر..
كنت راقد مازلنا ف الليل.. نضت ع صوتها : ياسر.. نوض صلاة الفجر..
نضت لكن قعدت ف مكاني.. مسكتني من إيدي بإيدها الناعمه شالتني للحمام ..ودفتني جوه بقوه وهي تبرطم : اف منك.. الميه ساخنه توضا كويس.. انا مجهزتها لك.. بسرعه قبل تفوتك الصلاه..
فعلا فتحت الميه نزلت ساخنه ..كانت مجهزتها ليه..
طلعت م الحمام وبنصلي جت ومعاها ع ذراعها لبس وتقول : ألبس.. الصلاه مازال ماقامت.. صل ف الجامع..
طاوعتها كانت مجهزه سروال أسود وتيشرت ابيض وجاكه شتويه سوده..
طلعت نجر ف كرعيه للجامع والمفاجأه كنت انا اول الواصلين بعد الإمام ..صليت وبنطلع سمعت صوت يقول: ياسر..
كان يوسف واقف مذهول كأنه شاف عجائب الدنيا تقدم وحضني ..
بدون صبر شطحت فيه :خير.. شايفني بعد 20 سنه..
ضحك وهو يقول : سبحان الله.. جيت هنا عشان متعود.. وتحت شقتي..والإمام غصبا عنك تخشع معاه.. لكن ماتوقعت..
قطعته والأخلاق عندي منتهيه : انا كافر.. مستحيل نصلي قصدك..
مازال ماسك ضحكته :مش قصدي.. نخليك ترد ترقد..
قلت بنفس خايسه : اسمع.. نكسرت طاوله بالشقه.. وكم تحفه.. والفرشه الكبيره تبي غسل..
قطعني وع وجهه نفس الإبتسامه : ياصاحبي.. حاول تحافظ ع السيسان لاتهدها.. وغيره مقدور عليه..
عمرك كان عندك كيف هالنوع م البشر كل ماطحت شالك.. ماتعرف ليش يصاحبك ويحبك ويعزك ويوقف جنبك.. وهو كان استحقلك مايلقاك ومع هضا كله عادي.. تحس روحك ماتستحقه وماتعرف شنو يجذبه فيك.. هضا حالي مع يوسف.. اشكالنا المتشابهه مش سر تجاذبنا.. السبب طيبه وحنية وقلب يوسف الذهب.. ونذالتي..
__________
ليلى...
الحمدلله إقدرت إنوض للفجر توضيت وصليت.. بعد الفجر ونا راقده خش يوسف بحتت الساعه لقيتها 8 حط لي كوب اميه والفطور بدون يبحت فيه وطلع.. بعدها الغداء نفس الشيء حط الغداء وطلع.. انا يتيألي ولا صح الاخ يبحتش فيه بكل..
ع المغرب خش وقال : الدار اللي مقابله مفرشه .. القيله مش ح تزلق بك ..شن رايك تنقلي لها مؤقت..
فعلا هضا احسن حل خير من الطيحه كم مره ونا نطيح : تمام..
نقل لي حاجاتي غادي الدار مفروشه بلون سماوي والسيسان سماويه وسريرين بورغانات كحليه مطبوع عليها صور سيارات.. وقطع صغيره عليها صور سوبرمان.. كانت دار اطفال مفروشه جديده لكن مش مستعمله..
معقوله يكون عنده أطفال.. اذا كان مش ولد اشعيب من يكون.؟ يكون عنده مره وعيال.. وإمرته هي اللي مأثثه الفيلا.. مطلق أو أرمل.. بيطلع سألني تبي شيء.. أمورك تمام..
قلت له : تمام..
قبل يطلع قال : هذي دار مؤقته.. بكره نحيب لك كتالوج بالوان وانواع الفرش وانتي إختاري.. نفرش لك دارك..
سألته بفضول وبدون تفكير: إنت ليش مفرش كل الفيلا..
جاوبني مباشره وهو يبحت ف الدار كأنه أول مره يخشلها : مش أنا.. صاحبها الأول..
إرتحت..كأني بعد عطش شربت إميه بارده.. يعني أنا مش ساكنه ف حوش إمرته الأوله.. لكن زاد عندي الفضول : كان محتاج لفلوس باعها بأثاثها..
جاوب وهو يركز نظره ف عيوني.. ارتجفت وعرقت : بناها وأثثها هو وولده وعيال ولده.. لكن ولده توفى ف حادث قبل يسكنها.. فباعها.. يقول منتخيل روحي ساكنها وولدي مش معايه.. كرهها من بعده..
سألته باهتمام : غاليه ؟
ابتسم أول مره يبتسم من قلب قدامي : غاليه.. مخططها كان أول مخطط ناجح لي كمهندس معماري.. منطلق يدايتي ونجاحي.. كانت مقفوله من سنه وزياده.. ﻷني نسكن ف شقه.. انتي أول أنثى يسكنها من بعد من أثثها..
القصه عاطفيه.. تأملتها ونا نتخيل شكل أصحابها يأثثوا..
