زوجي مغرور
8
وهو قمعز ع كرسي الزيانه
عماد : كيف خواتي معاك
ابتسام : حبوبات يخشن الخاطر
عماد : اي عارفه خواتي ع نياتهم مايعرفن يلفن ويدورن
" هضا شنو قصده "
عماد : وامي كيف معاك ؟
ابتسام بدا ضغطها يرتفع هضا لشنو يبي يوصل : الحمدلله ماشفت منها الا كل خير بس ف بداية الكلام اللي قالته ..يعني مافهمت شكلها غالطه
عماد بعصبيه متعمد التخويف المحترف كضابط : شنو غالطه احترمي ألفاظك واحسبي كويس هذي أمي يعني تاج راسك هي ديما الصح وانتي الغلط ..واقسم لو سمعت هالكلام مره ثانيه يصير لك شيء مايرضيك.. الا باتي وامي لهم العزه والكرامه وانتي مالك شيء بعدهم ..
ابتسام
هضا شنو.. انا شنو اللي قلته وعليش شاطت ناره وشنو ه الاسلوب
عماد ولا كأنه قال حاجه : باهي شن رايك ف حوشنا ؟
ابتسام تكلم زيه من طرف خشمها : كيف يعني من أي ناحيه ؟
عماد ماعجباته طريقة ردها : من كل النواحي
ابتسام ببرود : كويس
عماد رافع حاجبه : وانتي معنطزه شنو اللي مش عاجبك ف الحوش يامدام ابتسام ؟
ابتسام رقتلها من وانتي معنطزه قالت بدلع متنرفز : انا قايله شيء يعصب .. امممم كل شيء حلو ف الحوش الا شيء واحد مش حلو.. وركزت عيونها البنيه ف عيونه : هو إنت
عماد رقتله ع الاخر : انا مش عاجبك 😠 وانتي اصلا مش عاجبتيني خذيتك عشان تصبيره ليوم عرسي وحده لقيتها تباع بفلوس وليش نخليها ؟
ابتسام خنقتها العبره هضا متعمد يحط م قدرها : بابا ماغصبك على مااعتقد وحاسب روحه شرا راجل وكانك تشوف فيه رخيصه بيع وشرا من توا شيل حطني ف حوش عمي بلا تصبيره بلا تخرييط
ناضت ولبست عبايتها وهو مقمعز ويبحت فيها
ناض وتمدد ع السرير وعطاها ظهره ورقد
فتحت باب الدار بحمق وطلعت نزلت لوطه لقت باب العماره مقفول مافيش باب اخره تطلع منه ..قمعزت تبكي شنو هالوقح اللي طحت فيه ..نحن كيف متزوجين وهك قال امالا بعدين ايش يقول ..اكيد خواتي طاحوا طيحه مسقمه مش كيفي طحت ف هالعطيب..قال تصبيره قال .. حست بحد وراها التفتت لقتها شهد
شهد بصوت حزين : عماد زعلك ؟ ..هو ديما يزعل فيه بعدها يرضي فيه حتى انتي تو يرضيك
حست بألم ناضت وركبت وشهد وراها بتخش للدار تفكر تخش وهي متزلطه ..
شهد : امتى بتجي ترقدي معايا ؟
بحتت فيها باستفهام
شهد : تعالي توا عماد يحبش حد يديرله ازعاج وهو راقد
فعلا ماعندهش نيه ف خلقته خشت للدار لقت البنات يهدرزن اول ماشافنها فتحن فمهم ع الاخر لا إراديا ضحكت ع اشكالهم
بشرى : كنك تضحكي وكنك لابسه عبايتك ؟
ابتسام : نضحك ع اشكالكم شوي ويطيح حناكم ع الارض
شهد قطعت الكلام : ولابسه عبايتها عشان عماد زعلها وبتعدي لباتها عشان يضربه
عبير : جديات
ابتسام ببسمه مائله حزينه : اها..بس لقيت الباب مقفول
عبير بحنيه : عماد طيب بس لازعل زعل كلامه مش محسوب فصبري عليه ومشيها هالمره
بشرى : اصلا عماد مايغلط ع حد الا لسبب
ابتسام ما رفعت عينها للسقف ونزلتها : انتوا خواته فأكيد بكون طيب معاكم وبتوقفن ف صفه لو كان ظالم او مظلوم لكن انا بنت عرب مش ملزوم يكون طيب معايا وانا مش ملزومه نصبر عليه..
" تحس ف روحها حزينه بكل مسيبه هلها ومش عارفه باتها شنو صار معاه وخواتها..وخاشه لعالم ثاني ماتعرف فيه حد ..بدل مايوقف جنبها ويراعي شعورها يجرحها بدون أسباب"
البنات حبن يغيرلها جوها بمواضيع اخره
عبير : بسومه تعرفي تستشوري لي شعري
ابتسام : ليش بتستشوريه شعرك حلو وناعم
عبير : شيء بكره الصبح بنمشي مشوار نبيه مستشور
ابتسام : ولازم انا مانستشور ف شعري بكل نغسله ونجففه فقط
عبير : معقوله شعرك هك مش مستشور
بشرى بتحيز : شعرك خفيف وقصير بكل عشان هك مايستحق استشوار
بدت تستشور لعبير شعرها وزعاته وخذت تستشور خصله خصله ف نص ساعه كملت
عبير بفرحه : واااااو ايهبل ..تسلم ايدياتك ..انا ساعه واكثر نقعد فيه ..نقنك مبدعه
ابتسام بدلع : انا كوافيره ناجحه 😊
بشرى : ع طاري الشعر وعماد استحاله يسمح لك تقصيه ﻻنه يحب الشعر الطويل ..
_____________
أماني
فيصل إنسان حساس وطيب بكل وفيه الخجل غير طبيعي وحنون وهذي الصفه كانت واضحه من نظرة عيونه بس فيه اضطراب خفيف وقلق وديما يلتفت وراه كأنه حد يلاحق فيه
تغدينا ف الحوش وقمعز معايا للمغرب بعدها عدى يصلي ف الجامع القريب ورد طلب عشا مالمطعم يوصل مع الساعه 9
حكالي ع هله وشكلهم طيبين بكل وفهمت منه ان حالتهم الماديه فوق الريح وقالي باته مسافر ومتزوج اثنين الاولى غنيه بكل وعندها اربع عيال عيلين وبنتين والثانيه عندها فيصل بس ومتوفيه
عدى صلى العشاء وجا جاب العشا وتعشينا بس ماجا شوري بكل ولا لمسني وانا كنت منحرجه منه بس بعدها تكلم بجديات قالي : خوذي لك دار فوق وكان تخافي خوذي دار جنب داري ..الصراحه فتحت فمي بس شنو بنقول ممكن هضا تدبير مؤقت وفهمت م اول الكلام انه مش ناوي يرقد معايا
ركبت نجري فوق ندور ف الديار فتحت اول دار لقيتها دار نوم الرئيسيه كبيره كل شيء فيها فضي بالابيض فتحت البلكوني يفتح ع الجهه الخلفيه من الفيلا مليانه شجر
زوجي مغرور ..9
مليانه شجر عطره فايح ف الهوا ومسبح كبير وعاكس عليه ضي الفيلا
فتحت الحمام كبير وفيه جاكوزي وساونا ومفروش
شكل الفيلا اللي مخططها مهندس ذكي او من برا
طلعت كل مره نلقى مربع فيه دار لكن المربع هضا مختلف ع الديار الاخرات الباب اسود حتى زخرفته تختلف ع الاخرات
فتحت الباب الدار كلها اسود ف اسود الا السقف زئبقي الدار حسيتها كئيبه شكله صاحبها سوداوي وغريب الاطوار نفجعت لما لقيت ع الشماعه دبش تيشرتات وسراويل وبلايز مطرطشه ع الارض وف الدولاب اللي بدون بيبان كأنه الدار فيها اعصار والدرج الاخيري احذيه رياضيه ايطاليه ..والزيانه عطورات وكريمات رجاليه
شكله مهتم بنفسه وبس ..وفيها بلازما كبيره وبلايستيشن ودسكات عرررررم بكل .. وسرير كبير مش مرتب كأنه صاحبه قبل دقايق ناض منه
معلق صوره كبيره لشابين واقفين جنب بعضهم قريب من عمر بعضهم واحد مبتسم بتكبر وغرور والثاني بسمته فيها لمحه وعبث
باقي الديار مش مفرشات ..قررت ناخذ الدار البيضا لأنها عجبتني ونقضي وقتي ف اكتشاف الفيلا لأنه واضح ان اصحابها وهم هل فيصل مسيبين اثاثهم ودبشهم ..
قلت لفيصل ع اختياري او وافق رفع شنطتي لفوق رغم ضخامة جسمه لكن دهش واجد كأنه دار جهد كبير وهي مجرد شنطه ركبها للدور الثاني ..
نزل وخلاني وحدي خشيت للبلكوني ليل وهدوء وكان منظر المسبح حلوو ونسمات الهواء البارد تلعب ع شعري قمعزت فتره ع كرسي هزاز مصنوع م الخيزران ..
نضت خشيت للدار دوشت وصليت ورميت روحي ع السرير خطرن عليه خواتي كيف مدايرات ؟
____________
فاديه ..مقمعزه طول الليل ع الصلايه والنوم جفاها وتحس جسمها متكسر أخيرا أذن الفجر ..ناضت توضت وصلت ..فكرت تنوضه او لا شرقت الشمس ..وجت الساعه ثمانيه ..
ياسر ..فتح عيونه بضيق والصداع مهبله له سنه بالحال هضا ..تحرك للشنطه خذا دبش نظيف دوش وطلع يدور فيها ..لقاها مقمعزه ع الارض ..أمرها بصوت هادي : جهزي روحك بنطلع توا ونفطروا ف الطريق ..
فاديه .. تحركت بدون صوت هضا يبيش يصلي ! انا مالي دخل مش فرخ نقعد نجري ف جرته وننصح ..ياويل حيلك يافاديه راجلك مايركع لله.. وووووه ع بختي الاسود تعال شوف يابابا من زوجتني واحد شره ع الكل مايصلي وصايع وبدون أخلاق وربي عالم ليش تزوجني ..ربي يستر..ع فكره هضا وين ماشي كان عنده حوش ف بنغازي راهوا امس بات فيه شكله مش من هل بنغازي.. وممكن عنده حوش بس يمهد لهله ف الموضوع قبل يفاجأهم بقصة زواجه..باهي وين ماشيين ف هالصبح !
ركبت ف السياره وانا جيعانه نوم غفيت وانا واصله حدي مع ليله من الارق ..
ياسر ..بطرف عينه بحت فيها لقاها راقده بعمق وصوت شخيرها بدا يرتفع طلع باكوا دخان ولع وحده تسكت الصداع وتصفي تفكيره ..لازم نأجر شقه مفروشه ..لا لازم نشري حوش من الفلوس اللي زادن من شقة بنغازي..
وقف عند مطعم صغير قبل مايطلع م بنغازي وشرا سندوتشين طعميه وثنين شاهي مع انه يكره أكل المطاعم بس الجوع كافر ..هو له الشاهي والطعميه لعروسته المأكله بدل العشا ضرب ..تذكر كلامها والتفت يكشخ عليها لقاها غاطسه ف النوم كان مامسك روحه كان قتلها امس ع كلامها ..هضا وهو متزوج هك ..امالا كلن خاطبها وجاي لها مخصوص وجايب هله وعزوته وداير عرس كبير مطنطن ممكن تقول اكثر من هك ..واضح انها ام لسان طويل لكن تو نقصه لها ..شكل موتها ع ايده..يالله مافي حد يأخذ حقها حتى لو وراها يعني يهم وانا ياسر ..
فاديه ..
فتحت عيونها وتحركت بعدم راحه الدخان غابق السياره وبدت تكح بالقوه فتحت الروشن بدون فايده مابى يفتح حست انها بترجع وزوج الغفله مجرد ماشاف ايدها ع فمها وبترجع ف سيارته وقف السياره ع جنب ونزلت بسرعه تنفس هوا صافي ونقي وبارد طاحت ع ركبتها وفتحت نقابها ورجعت الشيء الوحيد اللي هو عصارة المعده.. حقدت عليه م قلب هضا يدخن الله ياخذك..
كانت شيشة الميه ممدوده قدام وجهها بتهور ضربت ايده طاحت الشيشه ..ماتحرك م مكانه وهي نفس الحاله مدت ايدها وخذتها م الارض وغسلت وجهها ..
ياسر ..شكلها عندها مرض هضا اللي ناقص نتورط فيها ..
لاحظ كل ماتمر سياره عيون الركاب ع إمرته اللي جنب السياره ورافعه نقابها وبياض بشرتها مع سواد عبايتها كيف الشمعه ..تقدم لها ونزل نقابها ف اقل م ثواني حولت النقاب بكل وقفت بتحدي تبحت ف عيونه ..
قال بصوت هادي ينذر بالشر : بسرعه اركبي ف السياره
تكلمت بعناد معروفه فيه : ردني لبنغازي
عرفت انها طلعت م بنغازي وقريب توصل للمرج ..يعني بتسافر بس وين مندري ..ف بنغازي باتها غادي صح ف السجن باتها بس خير من برى البلاد ..وخواتها قريب منها ..وهضا واخذها وماتعرف وين بيشيلها ..
مسكها م معصمها بالقوه وجرها وراه ورماها ف السياره وقفل الباب ..ركب وهو يغلي غضب صرخ بصوت عالي : غطي وجهك اللي ماحلاه ربي ..
تكلمت بهدوء : ردني لبنغازي ..
شغل السياره وانطلق مودع بنغازي وكأنه ماسمع شيء
فقدت سيطرتها وصرخت فيه :ردني انت ماتسمعش يا..
وقف..وقف
هالمره تقمص البرود : افرضي لو رديتك وين نحطك ..وبهزوه : ف السجن
زوجي مغرور 10
فاديه : ردني بس ومالك دخل فيه
ياسر بهزوه وغضبه خمد لأنها غطت وجهها : لااااا انتي زوجتي كيف مالي دخل فيك
فاديه : انت تعرف معنى الزواج نزلني عند امي مش مشكله
ياسر : وليش م البدايه مامشيتي لأمك وباتك زوجك بهالطريقه !!
فاديه : بابا غصبني..مش بجوي ..توقعت نتزوج انسان يعبد ربه ويخافه طلع زوجني ...
《تعمدت ماتكمل ويفهم الفهيم 》
فجأه انحرفت السياره ع الخط وقف والتفت عليها
ياسر بأسلوب اكسبه وصار طبع وتعود عليه بهزوه : الموضوع فيه غصب...عندك علم انا تزوجتك كجاريه فقط ..طبخ تنظيف غسيل وهضا مايمنعش انك تكوني للمتعه ..لكن كأم عيالي لا ﻷنك ماتشرفيني ..مالكش عندي أي حقوق كان عطيتك شيء تشكريني ..وكان ماعطيتك تسكتي .. عاجبك اهلا وسهلا مش عاجبك انزلي فلعنه تلعنك نعتبر المبلغ اللي دفعته فيك راح ولا نسرق..
بصدمه تستوعب ف كلامه بتفتح الباب وتنزل لكن لسانها خانها قالت بصوت مرخي : لا ياوقح
كمل : انا لو نبي زوجه مش واعر نخطب بنت عرب ..مش وحده باتها عارضها ف الجامع ..حتى فرح بسبط ماطلب ولا سأل من انا ..والله أعلم شنو فيك من مصيبه ..وانا مستحق خدامه ..
معاد تحملت فتحت الباب ونزلت وقفت بعيد ع السياره وياسر حط الدخان ف فمه ووجه المرايه عليها ..
____________
نردوا الاحداث امس الليل
عماد ..بيرقد لكنها تأخرت وهو متأكد ان البيبان مقفوله
وشوي وترد لكن بكرة البيبان بتنفتح وبيكون ف عمله ويمكن تطلع وتمشي لعيال عمها ..اللي ماداراته اليوم تديره بكرة مافي شيء يمنعها الا حاجه وحده ..
طلع يدور عليها سمع هدرزه ف دار خواته خش لقاها مقمعزه ع سرير عبير وشهد ف حضنها وعطيته ظهرها
ابتسام : شعري من وأنا صغيره قصير وماعمري خليته يطول اكثر من هك حتى بابا وهو اغلى غالي عليه كان مانع فاديه وأماني من قص شعرهم وانا مخليني ع راحتي
عبير شافت خوها : لكن هضا راجلك ولازم طاعته
ابتسام بضيق : هو مش خاطب بنت عمك
بشرى باستغراب : ايوه خاطبها والمفروض عرسهم الصيف اللي فات وتأجل للصيف الجاي
بصوت شامت : كويس وصيها لاتقصه ..اما أنا ماحد يوصيني
فجأه ابتسمت بهزوه والتفتت لورا لانه م البدايه لمحاته ف مراية الدولاب وكملت كلامها عشان تغيظه ولما شافت تعابير وجهه وكيف رقتله ابتسمت ..
عماد يكلم خواته : ماتبنش ترقدن وراكم مدرسه بكره ..وانتي خليهم يرقدوا
شهد بعفوية الاطفال : عماد خلاص بنرقدوا بس انت اطلع
ونزلت وطفت الضي والجميع يراقبها ومسكت ايد ابتسام : تعالي ارقدي معايا السرير يكفينا نحن الاثنين
عماد قريب يفجر قنبله صرخ : وعليش ان شاء الله ترقد ف سريرك !
شهد : عشان بنات عمي ديما يرقدن مع عبير وبشرى وانا المره هذي سبقتهم ترقد معايا ابتسام
بشرى شدت ضحكتها ودفنت وجهها ف المخده اما عبير طلعت وقالت بنمشي نشرب اميه
اما ابتسام عطته ضحكه ف الظلام
عماد : اطلعي ابتسام نبي شهد بكلمه
طلعت ابتسام وهي كارهته وخشت لداره
بعد دقايق خش للدار وقفل الباب بالمفتاح
بصوت هادي : ماتبيش تغيري دبشك
ابتسام بدت تتوتر وعقلها يحذرها مازالت بلبسة اللي جت بها لابسه قفطان ناعم موف هادي طويل : عنديش نيه نغير
اقترب منها بهدوء : خشي دوشي وغيري لبسك شنطك جبتها لك
بدون ماتلفتت : قتلك نبيش نغير
عماد مشى للسرير : براحتك
طفا الضي ورقد بحتت ف الدار فيها كنبه والروشن كبير الضي الشارع مسلط عليه
قمعزت ع الكنبه نص ساعه شافاته ف وسط الظلام واقف ومتجه لها ناضت بسرعه وسط الباب لكن ايده مسكت معصمها بالقوه وايده الثانيه ع فمها يمنع صراخها رفساته عضاته غرزت اظافرها فيه لكن هو كتفها بطريقته ..
___________
أماني
طيبه ورقه نحسه طفل ف جسد راجل
ف الصبح سأل : فيه شيء ناقصك ؟
قلت له : لا الحمدلله
برقه : وليش حزينه ؟
قلت بصوت حزين : نفكر ف خواتي وبابا شنو صار معاهم
بابتسامه : نطلع ونغير جو ..وانتي اختاري مطعم
وقفت مبتسمه وفرحانه كانت طريقه لتغيير مزاجي
___________
ابتسام ..بعد تأكدت منه طلع كرت روحها كر للشنطه
ودموعها وشهقاتها طلعت لبسها مش الشنطه وخشيت للحمام نكد ف روحي تمنيت كلوركس ينظف به جلدي تمنيت روحي حيه نبدل جلدي ونتخلص منه.. كملت بعد نص ساعه ..طلعت وصليت ودعيت عليه بالشر.. بعد تذكرت كلمته 《كان بتمشي لهلك امشي 》..هضا بعد خذا حاجته عرف نقطة ضعفي.. ليش م الاول ماخلى روحه طيب ولين مثل كل عرسان جت ليلتنا حلوه..وهو م الاول اوامر وجروح وكلام مسموم ..آ آ آ ه ياربي..
خش للدار وضحكته ع الجنب : السلام عليكم
ابتسام لارد
بصوت ناعم : صباح الخير
ابتسام لارد
اضطر ياخذ بدلته وبعدين يتفاهم معاها لبس لبسته ولقاها مقمعزه ع الكنبه : انزلي افطري معايا
ابتسام قلبي مليان حقد وكره له نتمنى نفش غللي فيه كم نكرهه وكم نحتقره
عماد : كان جيت ومالقيتك بنطلقك ومالكش رجعه للحوش هضا بكل وكان لقيتك ابشري بكل خير ..ولك الخيار
طلع وخلاها تمددت ع الكنبه مع الافكار السودة رقدت لين سمعت دق ع الباب فتحت لقتها شهد
شهد باستفهام :........
