رفعت وجهي بخوف ..يارب استر ..شنو بيقول توا لأن الكابوس استنزفه واجد وأثر عليه ..
كمل بجديه : بنسألك سؤال ..مافيش بين الراجل ومرته خجل ..حسيت قلبي طلع م مكانه ..بما إن سؤال وخجل وكلمة مرته شكله فرحان بها ..اكيد السؤال مهم .. واكيد شيء ضروري وجدي ومحرج ..منعه من الهجوم ع الأكل ..حمر وصفر وزرق وجهي من الانفعال لين حسيت ايدي تقطر عرق
كمل بصوت جدي واثق : هو موجود من سنين ..اختراع اسمه المشطه.. تعرفيه !! ليش ماتستعمليه .. كيف استعماله بسيط ومش معقد خششيه ف شفاشيفك ونزليه تحت وديري الطريقه هذي كم مره .. مش ح نسألك ع الاستشوار واجرحك ﻷنه احتمال ماوصلك
الوقح ..المريض ..المعلول ..ثقيل الدم ..ليش نوجع ف راسي برايه ..قلت وانا خاطري إنه هو بنت كيفي ونجر شعره الناعم الفرحان به ونتفه له : تعرف ..قاعدات ف شعري توا 4 امشاط ..وراحن فيه 9 ..ونكسرن 100 وانا نمشط فيه ..تصدق مفروض عندي واحد بس ياريت يكون من ذهب مقاوم للكسر .. وكان راح ندوره بكاشف المعادن ..
ابتسم ..يتسلى ويدير ف الطروحات انا لعبته الجديده .. قال بثقه قبل ياكل : ابشري.. ماطلبتي شيء.. كله حمايه لذوق العام ..
-----------------
ابتسام ..
بتخطيط محكم م الراس المدبر وهو انا واعضاء عصابتي عبير بشرى شهد ..استنفذت صبر عماد ..ماظني طاب ع نار هاديه ..الا نحرق وانتهى..لدرجة الهروب م الحوش.. كنت نغسل ف الإماعين ..كان اتفاقي انا والبنات تجميع عدد اكبر من التباسي ..ماقصرن كان الحوض مليان لو حركت شيء طاحن الباقي ..يعني نفذوا بأمانه ..كان القصد من الحركه إغاظة عماد ..يعني فرصه ونسهر بعيد عليه ..لكن خطتي نقلبت ضدي ..عماد طلع وهرب يسهر مع اصحابه ف الإستراحه ومايدري عني ..وفجأه اصبحت عمتي مهتمه بمستقبل البنات التعليمي ودزتهم غصب يرقدن ..وانا سمرت وحدي مقابله الحوض ..من كثر الوقفه قعدن ظهري وكرعيه يوجعن.. لكن ضروري نكمل الغسيل ..قعدت نغني خليجي بدل مانذكر الله عشان الوقت يمشي بسرعه
علمني شلون انساك وأنام
وأنا اللي لك صاحي أيام وأيام
شاغلني ف بالك شوقك ولايروح
صاحي أنا ونايم مايروح مايروح
علمني ...
التفتت ع خصري يد رجوليه قويه وخشنه وشدتني للخلف برقه وهمس صوت مدغدغ لودني : مش معلمك.. ولاتخافي..غير ممكن تنسيني وترقدي بدوني
ضربته بكوعي : يامغرور ..فجعتني ..
قال : مش غرور هذي ثقه ..
درت وجهي له ..ريحته بخور والجو سقع اااه ..رشيته بالصابون ع وجهه ضحك ومسح الصابون وووه م ابتسامته تدوخ ..وهو يغمز : عقابك بعدين ..ف الدار ..
ضحكت : انت اركب وغير لبسك ..شوي وانا معاك
بحت ف الماعين : الشغل واجد عليك
كشخت بضيق ورديت نغسل خططي الفاشله مع بوراس عنيد : لا عادي ..
تحرك وشمر كمامه وقف جنبي :وخري انا نغسل وانتي امسحي وردي ف الدولاب ..كان قعدنا ع شغلك نرقدوا هنا..
ضحكت وعطيته المهمه براحبة صدر..وقامت المعركه بينه وبين التباسي ..اللي تخدشت واللي نكسرت واللي نشقت ..حي عليه من أمه وحي ..قريب يكمل قال : الله يعين ..كل هضا ليوم واحد
استغليت الفرصه وعصرت كل رقه نملكها : انا مش مقطع قلبي شيء الا اني مش قادره نقمعز معاك ..من كثر الحوسه..
ابتسم..معقوله كاشفني ..قال بهدوء : مقطع قلبك اهاء.. انا خاطري نعرف شنو هالحوسه اللي ماتجي الا عقاب الليل ..وتسهرك للفجر..متعاونه انتي وخواتي ..انا مش غبي ﻷني ساكت ..بس كنت
زوجي مغرور 29
بس كنت بنعرف لوين توصلي..الحكايه فيها إن ..
خلاص عش عندي حيل للف والدوران : اممم..تزعلش.. الحوش كبير واجد والحوسه تكملش وبصراحه...نبوا شغاله..
قال ببرود : مستحيل ..بلاويهم واجد ..وانا ف غنى عليها
وقفت مواجهه له ..وبكل لطف ناقشته : منطقك غريب.. توا هي جايه من بلادها عشان تسحرك وتدير اي شيء ..ولا عشان لقمة العيش ..بعدين عرب واجد عندهم ..وماشاء الله عليهم عايشين تمام ..القليل منهم كان اسأت معاملتها تنتقم ..ونحن نحاولوا نتعاملوا معاها كويس ..ونوعدك نراقبها ونعلمها ..قول اي عذر ثاني بس يكون مقنع ..
قال بنرفزه وحمق يحاول يكبته : ماصدقتي فتحت القصه.. قبل امي كانت مشغوله ف العيال وعليها شغل الحوش وماشكت ..وانتي ماعندكش لاقرايه ولا طفل وكل ثانيه تشكي..
من غير احساس نزلت دمعتي ورعش جسمي وخرت مبتعده عليه وطار الكلام مني بحتت فيه بصدمه ورعب كأنه طعني ..
رمى من ايده شيء ..وبحمق اكبر : وبعدين ابتسام ..متزوج فرخه انا ..انتي ودموعك ..سلاحك كل ماتناقشنا ..خلاص يابنت الحلال ..
قلت بشهقه : انت ماتبي راحتي ..عاجبك تعبي ..قلت لك تو نراقبها ونعلمها ..
قعد فتره ساكت قال ببرود : تو نجيب شغاله م المكتب ..راضيه ..
بشهقه وانا نمسح ف دموعي ونهز ف راسي : لا كلفت ع روحك ..عش نبي ..فش داعي تقدم ..
قال بتنهيده : من بكرة نسألك ..حظك ف هضا وسيط "شير ع صدره " وانا مش مقتنع ..قلقني كل مانزل من عيونك الدموع ننتفض ..
دفيته وانا نمسح اخر دمعه : ماتعرف تنكت ..
كرعيه يوجعن فيه بكثره ..قمعزت وهو كمل غسل اماعين..من اول جوله وافق..غريبه ..لكن ندريش ليش مش حاسه بخلاوة الإنتصار..قلبي كان يرفرف فيه إحساس تحرك ..لا ياابتسام ..لايلعب عليك بلسانه الحلو ..عماد عمره ماكان لك عماد لسلوى.. وانتي من لك !! ليه الله ..بس غصبا عني نميل له ..بلا ميل خرابيط.. هضا اللي شراك عشان يغيظ بنت عمه ..فتحي عينك بلا احلام ورديه ..
عماااااااااد
قطعني من افكاري صوت مستنكر ينادي باسم عماد ..كانت عمتي ..تحركت بوزنها الكبير ف اتجاه طفلها الصغير الضعيف ومعتديين ع حقوقه .. باعداته ع الحوض وخطفت اللي ف ايده وهي تقول بضيق وحسره : الله يهديك ..
" ليش هو ارتكب معصيه عشان يهديه هو ساعد زوجته"
فزيت وانا نقول : كنك ياعمتي ..
لو لعيون تقتل راهو انا مستلقيه ع الارض غارقه ف بركة دم ونلفظ ف نفسي الاخير من سهام عيون عمتي .. كوكتيل من احتقار مع اشمئزاز قالت بحمق وقريب تضربني باللي ف ايدها : كان غسلتي انتي شنو بصير
قال عماد بضحكة دلع : عادي يا امي الله يخليك ليه ..
شهقت بصدمه : عادي تخدمها ..
ضحك اخره بمتعه : نساعدها ياامي ..الرسول عليه السلام كان يساعد ف زوجاته
احساس طفولي تسلل لي من غيره وحسد ..امه تحبه بعكس أمي ..وخايفه عليه من انثى ضعيفه ..وانا اني ماتدري عليه وين بكل..وع اي حال ..وماظن يهمها ..
____________
فاديه ..كنت نتقلب بهناء ف حضن فراشي الدافي .. ياحبي للنوم ف الجو البارد ..الوقت الوحيد اللي نغيب فيه ع العله ..ولما نرقد نومي ثقيل يصحبه الروايق وشخير وتقلب غير متوقف .. كانوا خواتي يرقدن ف دار وحدهم وانا ف دار وحدي ..بسبب الازعاج .. يرحم هذكنا الايام رقدت وانا نتذكرها ..حسيت بإيد تهز كتفي اكيد اماني تبيني نلعب معاها بلايستيشن او ابتسام تبيني نحضر معاها فيلم هندي سخيف .. دفيت ايدها ونا نشخر وقلت : نبي نرقد ..
اهتز كتفي اقوى بإيد تضغط بقوه لدرجة الوجع .. فتحت عيني بشويه عشان يطيرش النوم من عيني لأني برد نرقد بعد مانتفاهم مع هالمزعج ..كان مقمعز قدامي بركبه ونص وايده لاصقه ف كتفي ..
ياسر ..
كلمني يوسف قبل شوي سهران والنوم مجافيه ..بعمري هو.. يقولي اليوم فاتحته ويمكن ياخذ زوجته ..فرحتي مالهش حد ..النذل ماقاليش ..لولا اتصالي ..خايف عليه م الطريق !! لكن ماشي له لو كان فيها موتي ..هضا يوسف
صداقتي ليوسف بمثابة النور لحياتي ..
بس كان لازم نخبر ..المدام ..كانت راقده والوقت متأخر ..الساعه الفجر توا ..نعطيها الخبر ونمشي بسيارتي .. اف نومها ثقيل مصحوب بضجه من خشمها وفمها المفتوح وشعرها المشفشف وخدها حمر مطبوع عليه اثر المخده ..وأخيرا ناضت ..فاتحه عين ومسكره عين ..ريحتها فراوله ..وبجامتها مايله ع كتفها ..لكن عليها جمال سبحان الخالق ..ولما تزعل ياحبي يزيد يكمل جمالها ..وابتسامة الشماته هذي حكايه بروحها لها أسنان تقول من الماس لو ابتسمت برقت وعمتني .. ولما نضربها بدل ماتسكت وتهرب ..تضرب وتحاول تنتقم .. لين قعدت نتجنب نضربها.. لها كرامه وعزه مش كيف زينه.. نخاف يوم من الايام تحط لي سم فيران ف اكلي انتقام او بحجة إني كافر ..
قلت : نوضي خوذي المفاتيح ..اقفلي البيبان ورايه .. انا مسافر لبنغازي
ثاوبت وفتحت فمها بنعومه للاخر وتمغطت بكسل وهي تقول بصوت مبحوح م النوم : مشيه بلا رجعه ..
من حظها كان مزاجي رايق ..وقحه حتى وهي راقده ..
: نوضي ..مرات نتأخر ..مروح بكرة ..اليوم متراجيني ..
صحصحت وقعدت مركزه..
زوجي مغرور 31
أماني ..
ارتفع صوت الهرجه واختفى ف الصالون سكر الباب وراهم.. كان فيه صوت راجل عميق هو أكثر ارتفاع وسيطره..وفيه صوت حنون يهدي الوضع ..لكن ليش نسمعش ف صوت فيصل !!
قربت م الباب نصنت ..وسمعت الصوت العميق يقول بثقه : تعرف ليش تزوجاتك..حبتك !!وشنو تحب فيك ؟
وجهك هضا..ومرضك هاد حيلك ..واضحه وضوح الشمس..لو انت فقير كان حسم الموضوع ..يعني انت بدون فلوس ولاشيء ..صفر كيف رصيدك .. ورب البيت لو ماتطلق تفلس.. وانت واخذ مني دين كبير.. نقدم الاوراق للشرطه ..ونجبرك تسدد دينك واللي لوتبيع كل ماتملك ماتقدره.. وقتها اول من يتخلى عليك هي ..الفرخه الطايشه ..
كل مافيه استنفر ..جريت للدور الفوقي وانا نفكر ..لبست عبايتي ..ونزلت نجري درجتين درجتين ..
وقفت قدام الباب ناخذ نفس قبل نفتح الباب سمعت صوت حنون كأنه يقنع طفل مشاغب يتخلى ع لعبته الجديده المؤذيه : إنت خايف عليها.. متخافش عليها .. اكتب حوش باسمها ..لكن طلقها.. فكها وفك روحك .. بكرة يزيد مرضك ..بعد ماتشفط اكبر قدر من ثروتك تمل وتسيبك ..
كأنه يتكلم ع حيوان أليف ..مش بشر من لحم ودم وكرامه..
فتحت الباب بقوه وخشيت ونا نحس بنار تشعل فيه .. وقف فيصل ..اما الرجاله فما تحرك حد فيهم .. كان الشايب ضخم وبكرشه وتزين وجهه لحيه فضيه.. أما الشاب بحتش فيه لكن لمحت سرواله من طرف عيني.. ركزت نظرتي ع الشايب : زارتنا البركه..
الشايب له وجه خادع من يشوفه يظن إنه حنون طيب .. وهو ذئب متنكر ..لكن نعرف معدنه المغشوش ..بحت فيه : الله لا يبارك فيك .....
قطعته : .. انا وفيصل مايفرقنا الا الموت ..
بحت ف ولده المقمعز ع طرف الصالون وعلى وشك يهجم عليه بعدها بحت ف فيصل : اطلبي ونعطيك ..
بكل ثقه وصبر واحترام مايستاهله : كلك نظر صراحه ..لكن تحاولش ..
رد بحت ف ولده كأنه يتطمن إنه ماطار او ذاب او طمر ف بطني : حوش وسياره وراتب شهري ..
عضيت لساني قبل نقول " انت تساومني الله يأخذك أخذ عزيز مقتدر " : قلت لك لا..
ضاق خاطره وان شاء الله ديما متضايق وبحت ف نجله العزيز بمعنى تدخل ..وفعلا تدخل .. صوت فخم خشن وقح واثق مغرور ..إكرهته وإكرهت صاحبه الغبي : نزيدك.. ليش مانزيدك.. مية ألف كاش وحوش وسياره ..وماتحاولي تساومي أكثر لأني مش زايد ..اتفقنا..
الحقير الخسيس البليد ..كل هضا وراجلي منكس راسه وعيونه للأرض ..وربي حسيت روحي انا الراجل وهو المراه ..التظاهر بالقوه ماينفع مع هضا الشخص وخاصه ف ايده ورقه رابحه ممكن تودر فيصل ف داهيه ..فيصل مديون له ..إنسان بدون رحمه من كلامه وتجريحه ..ممكن يطحن خوه بدون رحمه ..مالي الا التظاهر بالغباء والضعف والحاجه ..هو ف موضع قوه .. والمثل يقول إذا حاجتك عند الكلب ......
عصرت عيوني ياليت نقدر نستعير عيون ابتسام تقوم بالمهمه الشاقه وقلت بصوت باكي من غير دموع : نقدرش نخليه ..
انبسط الصوت العميق ع حالتي : وليش ماتقدري .. يعني م الحب ..خلك من الطمع وخوذي ماجاك ..قبل تطلعي وجيبك فاضي..
كان خاطري نكسر التحف ع راسه او تطيح عليه الثريا ويزول من الوجود ..يصير العالم أنظف : نقدرش نخليه.. ﻷني ..ﻷني حامل ..
فز واقف وارتفع راس باته بحده اما فيصل فضح بيه بصراخه المصحوب بصوت خوه اللي مش مصدق : حااامل ..
حطيت ايدي ع بطني لا إراديا ..خايفه مرعوبه ..انا شنو قلت ..
___________
إبتسام ..
جسمي كله مدقدق ..حرارتي مرتفعه ..نضت م الفجر نبشر البنات بموافقة عماد بيجيب شغاله م المكتب .. واتفقنا ف الليل نحتفل ..رقدت بعد الغدا ونضت الساعه تسعه ..ونا نحس بخمول فضيع ..اف رقدت واجد..فش حد وعاني ..طلعت ونزلت ..
فيه اصوات مرتفعه وضجه وبكى وشهقه ..خشيت وانا مرعوبه شنو القصه ..حد ميت لاسمح الله ..وشفت العائله كلها الا عمي ..انتبهت للكلمات المندفعه شوري وحاولت نفهمها ..كانت عمتي تكلم ف عماد : من يوم تزوجتها وانت متغير علينا ..نسيت انك ونسيت خواتك .. راقده من الظهر عادي ..لكن اختك نست السكر قلبت الدنيا ..
زفر بضيق : ليش تخششي ابتسام ف القصه ..بنتك مانستش السكر.. تعمدت تنساه.. لاني قطعت عليها المسلسل ..وفضحت بيه قدام الراجل..
قطعته امه : وليش ماتقوم إمرتك .. لكن لااااا.. هذي ماتشتغل لازم تجيب لها شغاله تخدمها.. او انت تخدمها ..كويس ياعماد جيب لها شغاله.. وبكره تقول لك اطلع م الحوش وسيب هلك ..وانت تمشي وراها..
بغضب بارد : ولا ألف مراه تغيرني ..
قمعزت امه ع اقرب كنبه : هذي سوسه.. ليش فاتحه عينك هك ..حسبي الله ونعم الوكيل فيك..
اندفعت تهاجم من جديد : انتي ماتخافي ربي .. وانا نعامل فيك بالحسنى ..حتى درتك كيف وحده م بناتي ..وشريت لك ذهب ورفعت قدرك ..وهضا جزاتي تشوشي الولد ع خواته وبكره ع امه وباته ..
لا تعليق خليتها تكمل كلامها واول ماكملت قلت : بارك الله فيك ..
كان ولدها ع وشك يتدخل ويمسح ف كرامتي الارض لو إغلطت ف أمه ..
طلعت وركبت لداري .. سمعت صوته وهو طالع يقول : ساهر مع الشباب ماتراجونيش ..
" صعبه الولد يتزوج بدون رضا والديه " ..
زوجي مغرور 32
" صعبه الولد يتزوج بدون رضا والديه..وابتسام نحطت ف موقف من باتها.. صارت الحنش جيعان والضفدع مسكينه "..
_________
فاديه..
احساس متأخر بندم يحتويني..تو نعترف بجريمتي .. بعد رضى ياسر نسافر معه رفض بقوه ناخذ شنطتي معاي ..ونحط دبشي مع دبشه ف شنطه وحده ..عذره ان السياره ضيقه ونحن مش مطولين .. كان معبي الشنطه ومخليلي مساحه صغيره ..ف لحظة غضيت عزقت كل دبشه برى الشنطه ..وفيه جلاليه غريبه ..فيها لمعه فضيه والياقه مطرزه ..والجيب بخيط فضي فاتح شكلها غريب من وين حصلها.. عزقتها هذي بالذات لابعد مسافه ..هذا تلتبسش..ممكن وقت نوم ..خليت سروال اسود وبلوزه بيضا وحده وداخلي ..وباقي الشنطه لبسي..
درت شاهي ف ترمس وخذيت معلبات وخبز للفطور .. من اول ركبت السياره كان معصب بس يصارخ ..بشويش ع الباب ..اربطي الحزام " ع اساس البلاد مهتمه " حركتك واجده..شكيت بعد شوي يقولي ردي بالك تنفسي.. حشا مش شايلني ف سياره تقول شايلني فوق ظهره.. داهمني النوم وبديت ننعس ..
بصوت زعلان : ماترقديش.. لو رقدتي عزقتك م السياره .. هدرزي ..لو رقدتي نرقد..
عدلت تقمعيزتي ونا نتاوب : نبي نرقد ..توا مش وقت سفر..
حط الدخان ف فمه ناوي يدخن ..مديت ايدي وسحبته من فمه : دخان لا.. عندي ضيق تنفس منه ..ومباشره نرجع ف سيارتك ..
رد باكو الدخان ف جيبه وضحك بثقل : انا اليوم رايق ..
ومش مخليك تقلبي مزاجي ..وعشان خاطرك مش مدخن ..لكن هدرزي ..
سكت لكن قطع السكوت ..غريبه شكله مستانس .. سأل بفضول : انت لعند وين قاريه ؟
بهزوه : للابتدائي بعدها وقفت ..
التفت بسرعه بعدها رد يبحت ف الطريق وهو عاقد حاجبه : خاطرك تكملي قرايتك !
مسكت ضحكه : لا
غير سرعة السياره وتلمس حاجبه الدقيق يرتبه ..سبحان الخالق : لازم تكملي قرايتك..الابتدائي ماتنفعش.. خاصه وانتي ذكيه ..
والله الاخ يوزع ف نصايح ..انصح روحك قبل : خايفه بعدين ماتعتقني ..
بكل برود وهدوء : يمكن مااعتقك أبدا ..
ضحكت من غير نيه : مش بجوك ..
قاطعني بثقه كأنه يقرر أمر واقع : لا بجوي ..انتي ملكي ..
هضا كذب كذبه وصدقها ..يقولي انتي جاريه وهو يملكني.. اللي يسمعه يقول مجنون ..
برواقه كأنه ماقال شيء : اسمعي بدل هالدوشه ..نعتبرك واحد من اصحابي ..ﻷن كل جنس حواء نحتقره .. ماعدا وحده وانا مع خلاف معاها حاليا.. فخلينا أصحاب .. ونعتبر اسمك فادي..كويس..
سخيف ..كان رايق يبي الكل يروق ..ضغطت ع كل حرف : انا أنثى ..عجبك باهي ..مش عاجبك اشرب البحر ..واسمي فاديه.. لا فادي ولا فدوى..ف ا د ي ه
ضحك بغرور يادوب فتك فمه تقول خايف ع بشرته تجعد مرض يخلخل سنونك : انا نعرض صداقتي .. واجدين يطلبوا فيها .. ماترديني ..كأنا اول مره نتقابل .. ممكن !!
لو حب يقعد مؤدب صار منه ..بدل ووقح وبليد ..سكت والسكوت علامة الرضا ..
كح يصفي صوته : اسمي ياسر ..وانت شنو اسمك ؟
ومد ايده يسلم ..عطيته ايدي ضغط عليها وسيبها ..
ضحكت : انت كان قعد رايق لازم العالم يروق ..
ابتسم ابتسامه حزينه مايله لجهة اليسار : انا نروق يوم ف السنه ..ماقلتليش انت شنو اسمك ..
بحتت ف الروشن وهمست : اسمي فاديه ... على فكره قريت للثانوي ..
______
ابتسم بمتعه : كنت ننجح بالدف او الغش ..كنت نشغل ف دماغي ف حاجات اخره اهم مالقرايه ..ومنها كنت مبدع ف ابتكار الغش وكتابة الحجابات ..
كان يتكلم ع أيام الثانويه ..وعندي فضول نعرف وظيفته عقلي رافض فكرة يكون دكتور .. ضحكت : ياغشاش .. انت وصلت للجامعه كيف نجحت ؟
زفر بضيق وتغيرت معالم وجهه : شغلت دماغي ..والغربه تعلم .. القرايه ساهله بصراحه ..واهم م كل شيء ..كان عندي رغبه ف النجاح ..خاطري نحقق لغيري طموحه ..
تليفونه رن بحت فيه رد بعد ماعطى التليفون بسمه عذبه رقيقه نادره !!
_هلا بالعربس
_...... ف الطريق جايك
_...... لامانجري
_.......اممم..معاي المدام
_.......مندري ..لكن ف العاده دبله وطاقم..
ف هذي اللحظه كان يتأمل ف إيدي ..بنفس الخجل اللي مندري شنو يبي.. حطيت ايدي تحت عبايتي ..بين ماهو رفع عينه يبحت ف عيني وهو مبتسم..
_..... اسمعني يوسف انا نعرف ندبر أموري ..
_ضحك بثقه :..... مابه مشاكل ..
_...... حليت مشكلتي مع طارق خلاص
_ضحك : .......شكلك خايف يقولوا اي واحد العريس
_.....شقتك...بس ..لا ..معقوله ..تمام
_......تمام
_...... مع السلامه
سكر تليفونه ورده لجيبه ..
سأل بفضول مزعج : باتك عطاك مهرك ؟
تعكر مزاجي ..ممكن خاطره يرد فلوسه ..يحسابني كيف زينه ..او ممكن يلمح لشيء ثاني ..ايا كان ..السيره كلها ماله حق يفتحها.. ببرود : لا
صوته مع السكون مخدر للأعصاب همس : تلعبي معايه لعبه..
صوته يهبل وهو يهمس .. نلعب وليش لا : نلعب
شال ايده اليسار ع الدركسيون : نتحداك تسحبي الخاتم هضا من صبعي ..كان قدرتي تسحبيه ..هو لك ..
ف البدايه ضحكت ع النكته ..بعدها ايده ممتده قدامي كيف الحشره السامه فيها الخاتم له فص أحمر براق .. كأنه يشتعل بنار متوهجه وحارقه كيف صاحب الخاتم .. لكني قويت قلبي ..
زوجي مغرور 33
لكني قويت قلبي ومسكتها ..مسكتها وانا نخطط للانتقام..ايد اللي معذبني ..
________
طارق..
طفح الكيل..قعدت مش مسيطر ع الوضع ..حامل ..تبكي والأخ مش مصدق ومصدوم ..ليش ..شنو كانوا متوقعين بعد الزواج ..لعب عيال هو ..ع وشك يموت ومفلس ماديا وعقليا ..وفي إنتظار طفل ..مافكر ف المستقبل..والمصيبه طفله..
المتخلف ..مشيت شوره ناوي نطلع اللي ف قلبي .. رميته ع الارض لكن باتي وقف بيني وبينه.. ويحميه كيف كل مره..مع ذالك كنت ناوي نبرد ناري ونكمل هالمره ع الاقل ..لكن وقفني صوت باكي ..ضعيف .. انثوي .. قمعزت عند راسه ترفعه م الارض ..
إمرته الحامل ..الغبيه ..الساذجه والداهيه ف نفس الوقت : إنت لو راجل ..تضربش واحد مريض ..لكن جبان وخايس ..الله لايوفقك ..انشاء الله مرض يشلك شل ..
فيصل ..فيصل..
لو قمعزت دقيقه زياده ارتكبت جريمه ..
همست : لي رده ..
نفضت ايدي وعدلت لبسي ..والقيت نظره اخيره ع المنطرح ع الرخام ومقمعزه بجسمها التافه عند راسه ..مصاصة دماء ..خليها تمص كل مايملك ..بإيده جاب الهم ..حاولت ننقذه من براثنها ..لكن ولأول مره يتمسك بشيء بقوه ..راد لكم ومسود عيشتكم ..لكن اصبروا عليه ..طلعت وباتي معايه ..
أماني ..
صعبه ..تحس بالعجز ع أخذ ثارك ..كان نفسي نموت ولا نشوف إذلال فيصل ..طلع طلعت روحه التافه .. وانتفض فيصل اخيرا ..لكن ع الشخص الخطأ ..
وقف بصعوبه وهو يتعثر بإيده المهتزه وكراعه : حاااامل !! ....من ؟.... قولي ... كنت عارف ..ليش يا أماني والله أنا نحبك ..
قطعته بغضب تفجر فيه بسبب ضعفه قدام خوه وشوفتي لمشهد إذلاله ..ولسكوته ع مسخرة هله .. ولشكه الدائم بدون اساس فيه :أنا أشرف منك..ومن هلك كلهم ..أنا مش حامل ..حجه قويه عشان نقعد معاك .. كلمه وطلعت.. وعدتك مانتخلى عليك ..بالعقل هي ..نحمل من داري يعني.. انت مش عاطيني فرصه حتى نتنفس ..
صدره ينخفض ويرتفع بضيق : كيف نعرف صدقك من كذبك ..
ياربي ألهمني الصبر رديت بتعب : نعرفش ..اختار طريقه
قرب وبكل جرئه : نديروا تحليل حمل ف المختبر ؟
ا ا اه ..حدش يلومني لو إكرهت حياتي : هيا نمشوا وخلصني ..
________
فاديه..
سحب ايده من ايدي مسببه اضرار وخدوش ف ايده .. عشان يمسك الدركسيون ويغير السرعه بتخطى شاحنه كبيره قدامنا.. حرك إيده بألم بدون صوت تأوه.. لكن ربحت التحدي والخاتم صار ف إيدي .. بعد تقطيع حاد ﻹيده كامله ..تعمدت نغرس أظافري فيها قريب حتى قطعتها بسنوني عشان نسبب اكبر قدر م الوجع .. وصبعه الصغير خاصه تمنيت نقطعه .. واضح كان لابسه م فتره طويله لين مسبب علامه ف إيده ..كان فيه طريقه اخره عشان نطلع الخاتم من ايده ندير مرطب بس نذاله فيه تجاهلتها بعمد.. وقف السياره ع جنب ..الشمس ع وشك تشرق.. وفتح ضي السياره : عطيني الخاتم ..
كنت متوقعه م البدايه راح يرد الخاتم ..الغالي والغريب والفريد من نوعه..كانش متوقع يطلع من إيده ..كان عندي خيارين ..الأول الخاتم من السياره ونتحمل العواقب ..الثاني نعطيه الخاتم ونرمي له كلمتين نتحمل اكبر قدر من الإهانات ..فتح كفه ..ببطء عطيته.. قبل انفذ افكاري..مسك ايدي اليسار برقه وفي صبعي البنصر خشش الخاتم ..كان ضيق بس خش بقوه غير متوقعه .. سحبت ايدي بألم بس كان الخاتم مستقر ف صبعي ..
ببسمة انتصار : كيف كل شيء فيك مايجي الا بالقوه ..
حاولت نحوله ونرميه ف وجهه بعصبيه : افرض مانبي نلبسه.. اكيد مايسوى فعطيته ليه ..
ناظره بغموض يتأكد من استقراره ف صبعي بأمان .. ورد شغل السياره ..بدل مايمشي ع الطريق خش بنا ف مكان شكيت فيها الغابه ﻷن من قبل مش زايرتها ولاشايفتها الا ف الصور ..بخوف سألته : وين ماشي.. راه نريحوا ..
رد بهدوء : نصلي ..ونفطر.. ونكمل
فتحت نقابي وبصبعي تلمست الخاتم : عليه لمعه ..تشبه الألماس ..يشع ف الظلام عاكس للأضواء الخافته .. بعدين لونه غريب كأنه ينذر للخطر ..بلون الدم ..
ابتسم من غير نيه : من " شوبارد" chopard
تنحيت وعصبت اكثر : الخلاصه ..هضا اسم المحل ولا اسم اللي يبيع ..او كيف ..
تبسم اكثر عض طرف شفته يحاول يمسك ضحكته بعدها طربق ضحك وضربتي ع كتفي ..بمزح ثقيل مصدق روحه مع واحد م الشباب ..ضربه قريب طلعت قلبي م صدري : وربي عليك تفكير رايح فيها.. اها اسم اللي يبيع ..شريته م الخليج..
يابصارة فروخ ..نزلت كنت متوضيه فصليت مباشر.. بعدها قمعزت ع كراسي الخشب ..خذيت الشاهي والخبز وفتحت المعلبات بنظره ﻹيدي ..سبحان الله قمة التناقض ..ف إيدي اليمين حرقه منه ..وف ايدي اليسار خاتم ضخم جميل منه ..
كانت رائحة هواء الغابه ومنظر الشجر والشمس طالعه منظر يقطع القلب .." تعرفوها انتوا الغابه وجوها الحلو" .. خصوصا ف الشتاء مع انها بارده البرد قارص ..
لكن .. مايكون ياسر اللي ماخرب الجو والمنظر الطبيعي بريحة السجاير ..الله يقرفك.. الدخان بين ايديه ووووه ..
ياسر ..
قمعزت جنبها ..نظرة قرف واضحه وضوح الشمس .. بدون ادنى مجاملات او محاوله ﻹخفائها ..تحسسني كأني كائن مقرف ومنفر ..غريبه .. رغم ثقتي..
