زوجي مغرور 40
طلعت فتحت ال تي في ..من زمان ع ال تي في .. من عيوبي ناكل بحوسه حتى لوكان سندوتش.. بالإضافه الى إني جيعانه.. يعني حوسه ع مستوى عالي.. قضمت اكبر قدر من الساندوتش وكنت قريب نغص فيه خش الأمير.. تقدم يمشي ونا نحاول نبلع لقمتي.. بحت ف الهديه خذا الورد ف إيد والصندوق ف إيد الاخره.. وقمعز جنبي بروق ولا كأنه أمس قريب فتح راسي بمفاتحيه.. يمكن هو عنده عادي حد يراقبه وهو يأكل لكن أنا لا..
ارتفع ضغطي وهو ماتحرك.. بلعت لقمتي وأمرته : تبحتش..
ابتسم بثقه ومد إيده ومسح طرف فمي بصبعه.. رفع صبعه كان فيه مايونيز نزلت عيني باحراج وانا ندور ف كلينكس.. تكلمت باحراج : نحوس وانا ناكل..
شغل روحه بالتفريج ع ال تي في وهو يحاول يمسك ضحكته.. بين ماكملت نضت غسلت وجيت وكلمته : امتى تشيلني نزور خواتي..
تجاهل سؤالي : تعال قمعزي جنبي..
رديت : نسمعك وانا هنا..
ضرب ع الكنبه بجنبه وقال : تعالي...
مشيت ونا نحاول نمسك روحي قمعزت ف طرف الكنبه شم الورد يعني داير روحه رومانسي يااي.. وعطاني خذيتها بعدها عطاني الصندوق ف خذيته.. كان نفسي نعزقه ع وجهه.. لكن مازال اثار ضربة امس ف راسي..
ابتسم بثقل : عجبك الورد.. افتحي الهديه..
بحتت ف الورد وشلته ف يدي.. مصدومه الهديه ليه.. ع أساس سخفته.. ابتسمت ونا نبحت فيه وسألته : من جدك هضا لي..
تقرب أكثر بحركه بطيئه مدروسه وبحركه محترفه قعدت بين يديه همس بصوت عذب : الورد للورد..
حسيت جسمي يشتعل نار.. تبسمت زياده.. بحت ف الورد بحيره كأنه يدور ع شيء.. صحححح الكرت.. رفع ذقني بصبعي وصتفلي الكلام اللي مكتوب ف الكرت..
طلع حافظ الكلام .. ليش يبي يطيب خاطري.. أكيد وراه شيء.. انتهى وهو يرسل نظرات ولهانه خادعه..
سألته ونا نتظاهر برقه مايعه :شنو الهديه..
ابتسم بعظمه وتفاخر.. خذا الصندوق ف إيده : افتحيه..
درت طروحات فتحته وصرخت بهبال : وااااااو..
بحت فيه بترقب وضمني اكثر وهو يهمس بأثاره: ميك آب.. مكياج..
يعرف ف الصبايا لهدرجه.. نسنونجي ويكره الصبايا ف نفس الوقت.. خذيت الماسكرا وسألته : هضا شنو ؟
مسكها وفتحها وبغرور يتفلسف : تطول رموشك وتكثفها مع إنها طويله وكثيفه.. ماتستخدميهش.. ﻷنك ماتستحقيلهش.. استخدمي هضا
أحمر شفاه باللون الأحمر الصارخ من ديور ..يمكن شايفه ع وحده من شاكلته .. ماقلت لي ع الكلام اللي ف الكرت .. بصوت كله احتقار : العب لعبتك مع زينه.. لكن تجربهش معايه..
تجمد وضاقت عينه.. وقفت ورميت الورد ف حضنه.. وضربت الصندوق بيدي تبعثر اللي فيه ع الأرض.. قمعز ف مكانه وعينه ع هديته المهانه..
وقف وشير بإيده.. وبجديه واثقه : لميها.. بسرعه..
كل الديار والاماكن الآمنه وراه عشان نهرب لازم نتعداه فيه حل استفزه ونخليه يتقدم بعدها نجري للدار ونقفلها.. رفعت جلابيتي لنص ساقي استعداد للجري بأقصى سرعه : تعال اجبرني.. كلامات غزل غبيه كيفك.. احيان تلين وبعض الاحيان قاسي هههه.. مايمدني ياقاسي حاجه وحده حن عليه.. راسك مرفوع.. عشان شنو..
وقف مكانه ولاتحرك وبنفس خطتي هاجمني : متهوره.. كيف باتك الطايش..
قدرتش نمسك روحي بدل مايجيني انا جيته.. بأقصى قوه رفعت إيدي وقبل توصل خده مسكها ولفها ورى ظهري بقوه.. حسيت يدي طارت م كتفي واظطريت نوقف ع روس صوابعي بسبب طوله كان يشد إيدي للأعلى : جيتي وربي جابك.. فادي ناوي تضربني..
كنت نتعافر نحاول نفك روحي وانا فيه رغبه للإنتقام ضرب ع الوتر الحساس " خواتي وبابا ".. الواطي سب بابا حاولت نضرب كراعه : إلا بابا.. إلا بابا..
شدني من مسكة إيدي : بعد اللي داره مازلتي تدافعي عليه.. أكيد يطي يوم وتدافعي عليه..
صرخت فيه :ليش بابا شنو دار..
زاد شدني : ماجاوبتي.. يجي يوم وتدافعي عليه..
ماجاوبت سكتت.. الاحتقار كويس.. شد إيدي فطلع بلا إراده مني صرخة ألم.. سألني :خايفه !! كان خايفه قولي ياسر ..ونفكك..
نفسه يذلني.. ناورته : يسور.. أنت مريض تلذذ بتعذيب البشر.. مكانك الأصلي ف شهار.. وحتى لو تسبب لي إعاقه او تقتلني مش خايفه.. نخافش الا م اللي خالقني.. رخى من شدت إيدي وسأل :انا مريض.. وانتي شنو تكوني.. بنوته حلوه م الخارج لكن شرسه ومتأهبه وف إيدها بلجيكي ورافضه لمسه من إيد زوجها.. ليش؟
للبلجيكي قصه لكن استحاله نقولها له ..رديت : ليش رافضه..اسأل روحك.. خاف الله فيه أنا أمانه عندك.. ارحمني من اول يوم خذيتني فيه وانا عندك كيف اللعبه.. تضرب وتسب.. انا انسانه عندي صبر لكن للصبر حدود.. وعندي إحساس وكرامه..حس فيه.. لكن صح كيف تحس فيه وانت إنسان ميت..
لفني لوجهه وسألني بحمق : كيف !
زوجي مغرور 41
مش نمشوا كيف المستعجلين.. حتى لو ماعندهم عمل وقرايه ..ممكن مايبوا حد يجيهم ماتنسيش خواتك متزوجات مش بروحهم.. بتحكي لراجلها وبترتب أمورها قبل..
زفرت بضيق ودلكت إيدي نخفف م الألم.. أقنعني.. فقلت: بكرة من الصبح تعطيني التليفون ونكلمهم..بعدها نزورهم..
وقف بكل برود : بكرة ماشي لطرابلس.. عرس خويا بكرة..
فتحت عيني بصدمه.. لا.. لا.. نقعد ف بنغازي ومانزور خواتي..ونمشي وماشفتهم..
قطعني ونا نفكر نجيب ساطور ف المطبخ ونهدده به.. قطع تفكيري الإجرامي : يوسف بيمشي معايه..
الغبي بيمشي ويخليني : وتخليني بروحي..
بضيق :لا.. مش حنقدر ناخذك معايه.. اقعدي عند مرت صاحبي.. وبعد بكرة نروح وناخذك ..وقبل نمشوا للبيضاء تزوري خواتك..
____________
يوسف..
ف صباح اليوم نضت وصليت الفجر ودرت لي كوب قهوه سوده وشربته بعجله..وتوجهت للعمل بنفس روتيني اليومي..ماكأن أمس تغير شيء في حياتي وارتبط اسمي بإسم آخر..وهجرت حياة العزوبيه.. الساعه ثمانيه تذكرت الفطور ..انا مش معترف بالفطور بس تذكرت الكائن الحي الموجود ف حوشي..شريت فطور ورديت لها.. وقدام باب الدار حطيت الفطور ودقيت مرتين بعدها رديت للشغل.. وصليت الظهر شريت غداء من النطعم اللي متعود عليه ورديت للحوش.. وعند باب دارها كل شيء قاعد ف مكانه مالمست منه شيء.. معقوله تكون راقده.. دقيت الباب مرتين وثلاثه سمعت صوت ..مشيت وانا مش مطمن..
ليلى..
رقدت أمس.. ف الايام اللي فاتت كان النوم مجافيني.. من الخوف والألم وعدم تصديق الواقع.. لكن خلاص مرت المحنه رغم إن الألم ساكن جسمي لكن ع الاقل زال الخوف.. مر الأسوء ايش ممكن يكون اسوء من يرميك هلك بكل احتقار ع إنسان.. هه حتى من غير شنطة لبس.. نمت بعمق ..ف ساعه مبكره م الصبح سمعت دق ع الباب واختفى.. بعدها تكرر الدق ع الباب ف الظهر نضت ومش عارفه شيء.. بعد صليت ..استغربت ليش يدق الباب معقوله يكون حد غيره.. ماعتقدش حد يسكن هنا غيري أنا وهو.. فتحت الباب لقيت شكاير قدام الباب.. وحدات مازالن ساخنات واضح قبل دقايق شاريهن.. خذيت شكاره كان فيها خبزه وخليت الباقي عند الباب.. يعني داير روحه طيب ورحوم..
___________
ياسر..
كان عندي مبلغ ..لو فكرت صح ماكان صرفت مليم لفدوى.. اهنت نفسي وعطيتها علامه ع رغبتي ف نيل رضاها.. صرفت اللي عندي ع هديتها.. نطلب من يوسف دين..لكن متدين منه واجد.. المشكله كان وحدي عادي لكن معايه شخص آخر يعتمد ع في كل شيء.. لكن نلقى حل بسرعه.. وبعد شريت الهديه صار اللي صار..
_________
ابتسام..
الصبح كنت ف العياده عند دكتورة نساء وولاده ..بعد التحاليل طلعت النتيجه حامل.. بعد فتره استدعت الدكتوره عماد وبدت تكلم فيه وتعطيه ارشادات محرجه.. بكل ثقه وفخر وبدون خجل كان عماد يناقش ويطمن الدكتوره بالتزامه بالإرشادات.. بعد طلعنا حسيت روحي بنهرب منه قبل يرمي كلمه وفعلا صبر حتى فتح باب السياره بعد ماسكر باب السياره بعنف هز السياره بلهجه بارده : كنت قريب نطمنها ونعفيها م الإرشادات.. ونطمنك حتى انتي.. اول شهور الحمل بنكون مش معاك.. انطلق السؤال مباشره : ليش وين بتكون ؟
عطاني نظرة هزوه : عرض عليه ترقيه لكن أول شهرين فيها لازم نداوم خارج بنغازي.. وانا قبلتها..
بان المستور.. هضا اللي يحبني وين يشوف دمعتي ينتفض قلبه.. وضح صدقه من كذبه.. وانا مصدقه تمثيله وعلى بالي نشيل الإنتقام وغيره ونعيش معاه بسعاده.. جسدي الشيء الوحيد اللي عاجبه فيه وبعد صار اللي صار صرت اععع... اااه ياقلبي ان شاء الله فيها خيره.. وربي يعوضني بحب يملى ع حياتي " حب ولدي او بنتي"..
وصلنا للحوش كانت امه وخواته مقمعزين وسط الحوش .. وبمجرد خشينا استقبلتنا امه بالأسئله.. وين كنتوا.. وليش تأخرتوا.. وليش ماعطيتني خبر قبل تطلعوا..
وهو ماصدق خبرهم : ابتسام حامل
ناضت فرحانه وتبارك له وبدون حتى تلتفت ف وجهي قالت : مبروك يا ام خالد
رديت : الله يبارك فيك..
وكمل الإحراج لما خش عمي ..
ضحكت بشرى وهي تقرب منه : ابتسام حامل..
انشرح وجهه وابتسم بفرحه صادقه : مبروك عماد.. مبروك ابتسام..
انسحبت بهدوء.. كيف كان شعور بابا لو عرف اكبر بناته حامل.. نزلت دمعه وراها دموع.. زواجنا مش بفرحه ولاحتى حملي بفرحه.. الحمدلله.. كان فيه حد يمشي وراي وتعداني كان عماد دار نظره سريعه ع وجهي وتابع سيره.. سألنيش ليش تبكي ولا ايش مضايقك..
انا غبيه اللي نصدق.. هو يتضايق لما يشوف دموعي وتو يشوف الدموع شنو هنا.. خشيت للدار مش قاعد أكيد ركب فوق خشيت للحمام غسلت وجهي.. طلعت م الحمام لقيت البنات مقمعزات ع السرير ضحك وهدرزه.. ودرت جو معاهن..
لين قالت عبير : خلي نطلع قبل يجي عماد ويطردنا ..
ضحكت بشرى وهي تمدد ع السرير : اقعدي عماد قال لي ونسن ابتسام ..
اهاااااااا.. داز خواته.. اسلوب جديد لكن حلو..
__________
خشيت بعد نص ساعه ..شخيرها قالب الدنيا ف الظلام.. انا متأكد هالصوت صادر ع لحميه او.... غير مهم سبب شخيرها.. خشيت كيف السراق مع العلم رغبتي الأساسيه ..
زوجي مغرور 42
مع العلم رغبتي الأساسيه النوم.. مع ان النوم حلم بعيد المنال عني.. انا نسهر يرافقني الأرق وحتى عند النوم ترافقني الكوابيس المتعبه.. مخلفه صداع وارهاق نفسي..
رقدت بين الأغطيه اللي هيه واخدتهم كلهم لنتنعم بالدفا مريح عاطيها ظهري.. بعد فتره قصيره حسيت برفسه قويه مؤلمه ع قفاي .. نطيت م السرير وفتحت الضي ونا بنسحبها م السرير ونعزقها ف الحمام عقابا لها.. لكن كانت تظاهر بالنوم.. قعدت ع حالها معناها راقده.. طفيت الضي ورديت رقدت.. حوسه ف نومها وف أكلها.. لكن كانت قمة الجاذبيه ف عيني.. وكنت ع وشك بنرقد اصطدمت إيدها ف وجههي صفعه ع عيني.. ووووه هذي منو مسلطها عليه.. كتفتها بطريقتي قعد شخيرها ف وذني.. ومع ذلك رقدت نومه مانمتها من أيام الطفوله البريئه.. سبحت ف احلام رائحة الفراوله..
نضت الساعه ثمانيه وما اشبعت من النوم بسبب الجسد اللي ف جنبي.. راقده ومسنده راسها لكتفي فاتحه فمها وسعابيلها ع بلوزتي..
سحبت روحي وانا واعدها برجوع قريب لتذوق اللي ما ذقته.. انا اليوم شفت بس وماذقت شيء ..
__________
بصوت هادي : هو متدين مني..
قطعه باته بسيطره : طارق هو متدين منك من زمان.. ليش توا قعدت مش صابر..
الوالد يعرف ليش لكن يحب كل شيء بالصوت العالي : فيصل حاليا يلعب بالفلوس.. وعنده شيء واجد يقدر يستغنى عليه.. خله يبيعها ويسدد دينه.. أحسن من يبيع كل شيء ويعطيه لزوجته ..أنا احق من غيري خله يسدد ديني وبعدين يلعب ع كيفه.. بكرة يسجل كل شيء باسمها وهو ضامني..
قطعه باته لكن هالمره بعصبيه : ماتبالغ ياطارق.. يمكن فيصل مريض لكن مش مجنون عشان يسجل كل شيء لوحده ماعرفها الا من شهر.. بعدين حتى لو سجل كل شيء باسمها.. تقدر تاخذ دينك..
طارق يحاول يمسك روحه : يعني كيف؟
وقف وهو يضرب ولده ع كتفه :خوك عاقل خله يعيش حياته.. بعد امرضه ظنيت إنهار لكن ربي ستر وارسله بنت حلال ترعاه.. وبكرة يكون عنده عيال يساندوه.. اصبر عليه وهو يعطيك بروحه.. وشيل م راسك الوسواس..
قبل يطلع هدد وعينه ف عين باته : بكرة نذكرك بنت ابليس مش مخليه معاه قرش.. وبعد ماتفلسه من كل شيء تسيبه.. وقول طارق قال.. لكن مش مخليها في حالها..
____________
فاديه..
جسمي يوجع فيه.. نعرفش من شنو.. بذات إيدي م الكتف..
الساعه ثلاثه العصر خلاص بننزل م السياره.. مسك إيدي حطلي فيها تليفون صغيرون " بيله " وهو يقول : فيه رقمي.. كان ضايقك شيء او استحقيتي شيء رني عليه.. ولاتردي ع اي رقم..
حركت راسي كأني طرشه بمعنى "حاضر" وانا خاطري ناخذ تليفونه الآيفون ونعطيه التليفون هضا.. صاح ليش هو معاه تليفون كبير ولماع وغالي وانا معايا الصغير ويحشم.. يحب لروحه الأحسن..
سألني : عندك فلوس ؟
سكتت فش داعي من وين لي الفلوس.. يمكن يبي يتسلف ..يموت ولا نسلفه حتى لو معايه مال قارون..
طلع المحفظه وطلع منها 200 جنيه ولمحت مازال فيه 100 او مبلغ هك .. خذيتها ودسيتها ف شنطتي..
قال : ﻷوقات الطوارئ.. واصلا معاك التليفون.. كان استحقيتي لشيء كلميني.. بلجيكي معاك..
حركت راسي بمعنى"نعم"
قال بهزوه: مش كان بصرت معاك المراه او تضايقك بكلمه تهوري وتستخدميه..
نكته بايخه طنشت ولا كأني سمعت شيء..
تنرفز وبعصبيه : كنك ساكته.. لو نبيك تسكتي ماسكتي.. قلت : وطي صوتك العرب تسمع فينا.. توا بترد فماله داعي كل اللي درته.. وتو تسمع صوتي وقتها تمنى نسكت..
رد : ف الليل مروح مش متأخر ..
حنيت عليه : حاول ماتشرب شيء.. امممم وتمشي وتجي .. بدون اصابات..
ضحك ضحكه ترد الروح : ما أظن.. انزلي قبل نغير رايي وناخذك معايه لطرابلس..
نزلت مش عشان تهديده ﻷني عارفه من الأفضل لنا الأثنين نقعد ف بنغازي حتى عند مرت صاحبه..
______________
أماني ..
الميت يحس قبل موته بقرب منيته ؟ ﻷن نحس بتصاعد روحي ..والهواء عش يملى رئتي.. عش نحس بطعم الحياه.. كل اللي حولي جماد مش بشر.. قطع التليفون وبالتالي اتصلاتي لخواتي.. وتليفون الحوش حتى النت رغم فتره قصيره اللي عرفته فيها الا إني درت به جو.. وفجر عندي مواهب.. وتوا مكبله روحا وعقلا..
حالته الصحيه سائت واجد.. فنصحه الطبيب بعدم مزاولة اي عمل مرهق او التفكير بأي شيء يعكر صحته النفسيه.. ونبهني الى ان صحته النفسيه قد تسوء كتأثير جانبي لبعض العقاقير الطبيه..
سألته ع دين خوه فرد : دين قديم وعنده أوراق تثبت لكن مش أكيده مافيش أي شهود.. يعني ينقعها ويشرب اميتها..
صدمني تصريحه بوجود دين وف نفس الوقت تصريحه بنسبه عدم رده ولسبب وقح..
بيتش ناقشه محافظه ع حالته النفسيه المترديه..
قعدت عش نقدر نبتعد عليه كظله.. نطعمه ونحافظ ع مواعيد الأدويه.. ونحاول نروف عليه بقدرتي.. ملازمتي له قعد يغار من التفريج ع ال تي في خاصه لما يظهر ف الشاشه راجل حتى لو كانت قناه دينيه.. يطلب مني تغيير القناه او نطفي ال تي في..
____________
فاديه..
مازال واقف قدام الباب مشيت متردده ونلتفت وراي نتطمن من وجوده.. مرت صاحبه ممكن تكون حبوبه وعندها عيال.. واضح علاقته ف اصحابه قويه..
