زوجي مغرور
3
واصغر وحده فاديه خشت للمدرسه قبل سنها بسنه وقرت مع اماني ..وكمل الثانوي السنه اللي فاتت هنا الثلاثه مع بعضهم ..
امهم اطلقت م ناصر وتزوجت والبنات تعلقن اباتهم مع ان صاحب مشاكل وحقودي مع العرب بس مع بناته مايرفضلهم طلب ومدللهم حتى الشناطي كل وحده حط لها شنطه كويسه معبيه بحاجات ماركه وحاجات مستوره .. بس هالمره حس بروحه قريب يموت فزوجهم بالطريقه هذي وهنا رضن وسكتن هضا قدرهم مافي مايديرن ومافش وحده فكرت تمشي لأمها اللي ماتدري عليهن حيات او ميتات ورفضن عيال عمهم...او وصاهم فش ولا وحده تزوره ف السجن او تتصل به كل وحده تلبد عند راجلها وتسكت .. باتهم كان ابغض خوته وافقرهم وراسه يابس ومتسرع لأبعد حد ..يعني ليش مزوج بناته ل عيال عمهم اللي خاطبين خطبه محترمه ومعروفين شباب كويسين ..يعني مكره ف خوته يزوجهم بالطريقه هذي اللي يأذي بها بناته ..كل وحده ركبت مع راجلها بعد سلمن ع باتهم وع بعضهم وطلعن م الحوش او ودعنه ..
ناصر ودع بناته ودمعه خاينه ف طرف عينه بسبب العذاب اللي يحس فيه ..خاف م بناته بعد يسلم روحه للشرطه يمشن لأمهم اللي من يوم تزوجت وهي مشغوله بعيالها وراجلها.. وخاف ع بناته ينحرفن وهنا حلوات مايرحموهم عيال الحرام ..فكر احسن طريقه يزوجهم ويتهنى عليهم " ع اساس كان ماسلم نفسه بتدوره الشرطه او مابيرحموا حاله هو بات بنات بدون خوت بس هو راس يابس اي شيء عوج يديره "..
دعا لكل وحده ربي يهنيها ويسعدها مع زوجها وطلع وسكر الحوش..
ابتسام كانت خايفه م راجلها يكون مصاص دماء متأثره بالافلام ..مسكين عماد ..
اما اماني وفاديه فكانن متطمنات عليها لان ابتسام عندها الشك وتأثر واجد ودمعتها تطيح وتوقع ف حاجات قبل تصير يعني موسوسه ..
___________________
إبتسام
ركبت ف السياره وهو خذا الشناطي وحطهن ف الكرسي الخلفي وانا لصقت ف الباب وركزت قدامي ..تباعدت السياره ع الباب شكله حوشهم ف وسط بنغازي ..مشت السياره بعدها عماد قطع الصمت
عماد : كيفك ابتسام ؟
لمحته بطرف عينها ونربط لسانها اول مره تكون مع راجل وحدها حتى راسها ماحركاته عينها بس تحرك..
اما عماد حس روحه نخدع وخاف تكون ماتسمعش وقرر يخليها تحكي يشوفها تسمع او لا.. ومايحسابش متحشمه منه ..
عماد : كان انتي ماتبيش تدوي انا بندوي من وين نبدأ..ايوه شن رايك نتعرفوا ع بعضنا اسمي عماد وعمي هو اللي سماني ..وانا اكبر واحد عمري 27 وضابط ف الشرطه ..عندي 3 خوات وخو صغير ..توا بنسكنوا مع هلي ف نفس الحوش ..
ابتسام لا رد
هنا قعد العقل يلعب به " انها طرشه " فعلا وهضا سبب ماحد تقدم لها مسكينه حرام.. لكن مش مهم اهم شيء تكون ديكور جنبه عشان يعلمهم ماحد يعانده بعد هك..
وقفت السياره جنب عماره فخمه من 3 ادوار شكلها جديده طفا السياره والتفت لها
تكلم بوضوح : اسمعي يابنت لك مني كل اللي تبيه ..وانا اللي نبيه منك الطاعه واحترام هلي ..مهما يديروا مفهوم ..
ركز بعيونها وكمل : لما نخش للحوش نبيك تبوسي راس امي وباتي وتوقفي ساكته وانا نكمل الباقي ..
نزل ونزلت وراه تكر ف روحها كر " لحد الان ماقال شيء غلط ..تخافيش ..من حقه احترم اهله"..
خش للدور الارضي خشوا ع وسط الحوش واسع وكبير وفيه دروج يركبن للدور الاول ومقمعزين راجلين كبار ف السن ومراه كبيره ف السن حتى هي سمينه ومرشقه بالذهب تصب ف القهوه واول ماشافتهم تجمدت مكانها اما الرجاله واحد وقف والثاني قعد ف مكانه مصدومين
تقدم عماد : السلام عليكم
ماحد رد عليه
عماد تكلم بهدوء وهو يفجر قنبله : نعرفكم ع ابتسام مرتي سلمي يا إبتسام ع باتي وامي ..
تقدمت ببطء عشان تنفذ اوامره لكن سمعت شهقه ع الدروج رفعت عيونها كان ع الدروج بنتين وحده يدها ع فمها ووجها قعد طماطم صرخت : تزوجتها ياعماد
اما البنت الثانيه وقفت مصدومه
تكلم خالد بات عماد : انت تبصر من جدك تزوجت وحده من ### وكيف بتأمنها ع حوشك وعيالك ..وجايبها لحوشي ..الله ياخذك يا ملعون ..طلعها م حوشي ..
ظلمت الدنيا ف عيونها " هضا شنو مفهم هله عليا هالغبي" التفتت له ولا كأنه داير حاجه قالت بصوت واطي وبخوف : انت شنو قايل لهلك عليه ؟
فرح بس مابين طلعت تسمع كيف ماتوقع كان برد عليها بس جاها صوت امه : قال لنا حقيقتك صايعه وضايعه وصاحبة مكالمات آخر الليل ..عندك علم انه حالف يعاقب بنت عمه بزواجه منك العام هضا لانها أخرت العرس للسنه الجايه عشان تكمل قرايتها ..وبعدين يطلقك ويزوجها ويرميك من وين ماجيتي ..كيف ترضيها ع روحك انتي ماعندك كرامه ..
كان حامق وراقيتله ع الاخر بس عشانها : انا حر نتزوج اللي نبيها والوقت اللي نبيه ..محد يقدر يمنعني ..هذي بنتكم انتوا احرار فيها لكن انا محد يدخل فيه .. مش قلتولي منو المراه اللي بترضى بك تزوج ومتشاور حد ..عليش تحسابوني نبصر معاكم ..
حست بالدنيا تدور بها قاعده ف غربه ومحد بيحميها..
صرخ عمه : خلونا نطلع نصلي توا وقت صلاه مش وقت هرجه ودوه وانت " شير ع عماد " شيل زوجتك لدارك وتعال نتفاهم ..
طلع باته وعمه وهو وراهم .
زوجي مغرور
4
طلع باته وعمه وهو وراهم ويخبط ويكشخ كأنها دارت له سو
حست بروحها ف وسط النار ومحد قاد يطفيها وبدت تبكي فكرت تهرب وترد لباتها هو اللي ورطها مع هالغبي
مشت ببطء وانكسار للكنبه قمعزت عليها..قمعزت جنبها نفس المراه الكبيره ف السن ونفس الشكل لام عماد : اشربي اميه وتريحي
قالت بصوت مبحوح : عمتي انا مش اللي ف بالك والله انا حتى تليفون ماعندي ونرضش ع روحي بهالكلام ..
" ناصر مانع بناته من التليفون مفش ولا بنت عندها تليفون حتى لما زوجهم تزوجن بدون تليفون "
المراه : ماعليك يابنتي ام عماد زعلانه عليك..لانه ولدها ميت ع بنت عمه وانتي خذاك عشان يغيظها عارفها غيوره ولأنها هي سبب تأجيل الزواج..
ابتسام قعدت تحس ف روحها ف مسلسل مطرشق فيه اكشن مع رومانسيه : انتي مش ام عماد ؟
المراه ببسمه : لا انا اختها التؤام وراجلي خو راجلها
ابتسام حست ببطنها تلوي : ممكن تدليني ع الحمام
ام سلوى : ندلك ع دار زوجك وفيها حمام ..من هنا
عدت للدار وغسلت وجهها وتوضت وصلت ..
خش للحوش بسرعه لقاها مش قاعده اخته الصغيره شهد : البنت الجديده ف دارك ..
عدى لداره لقاها مقمعزه ع طرف السرير بيضا وشعرها لونه بني فاتح وقصير بكل رقبتها طويله وملامحها جميله فمها صغير وعيةن ناعسه وحزينه وخشمها وردي م البكى ..
قمعز ع الكرسي يتأملها جسمها رقيييق واجد ..
قالت بنعومه وفيها عبره : ليش تزوجتني ؟
عماد بصدمه مفتعله : وليش العرب تتزوج !
رفعت عيونها فوق للسقف ورجعت علي وجهه بحركه تدل ع الاستخفاف : لا عاد... باهي شنو قايل لهلك عليه..
عماد : سوء فهم م طرفهم ..لأني مهددهم بنتزوج وحده كنت نكلم فيها..وتو نصصح لهم بعد شوي..
وقف وطلع م الدار ..
خلاها وحدها مع أفكارها هذي البدايه سوء فهم وسب من جهتهم كيف بعدين !! وهالغبي ليش ما مهد الموضوع م الاول ..
____________
أماني
فتحت الباب السياره وقمعزت التفتت للي يتسمى زوجها طويل واجد ومليان شوي لونه وردي مع اسمر كأنه محروق او يعاني م مرض جلدي وعيونه اللي تحت النظاره صغاار وخشمه فاطس وفتحت خشمه كبيره وشوارب مش مليانه منتف يعني ببساطه الجمال ف جهه وهو ف جهه ..
التفت لها كأنه حس بنظراتها قال بصوت حنون : مبروك أماني ..
ارتاحت لابتسامته وقالت بصوت خفيف : الله يبارك فيك ..
فيصل بحنيه : عارف انك خايفه ومرتبكه لكن وعد ماتشوفي مني الا اللي يفرحك والله يقدرني ونسعدك ..
بعد فتره قال : نتغدوا ف مطعم ولا الحوش..القرار بإيدك..
تكلمت بصوت منخفض ونعوم وهي تتصنع الخجل : بكيفك..كله واحد
قال بضحكه : خلاص امالا مفش غدا طالما بكيفي ﻷني بصراحه بخيل ..
ابتسمت وسكتت واماني تحس بالحاجه قلبها دليلها ونادر مايخطي ..
فيصل بعد فترة سكوت ابتسم : كان عندك اي سؤال تفضلي..
اماني : وين تسكن
فيصل : هنا
وقف السياره جنب فيلا من دورين
نزل وفتح الباب وبعدها خشش السياره جوا ونزل وهو يقول : تفضلي هضا حوشك ياعروسه
خشت للحوش جوا خياااال فيلا حلوه من جوا ومن برى اثاث حلو وقالت : ماشاء الله حلو
كأنه طفل عطوه هديه الفرحه مش سايعته : عجبك جديات .. الفيلا مش حلوه انتي اللي حليتيها ..
قمعزت ع الكنبه وحولت عبايتها
غاب فتره وجا وقف مبهور وفي ايده كوبين عصير سيطر ع روحه ..خاف ترتبك وتكلم : واحلى عصير من يد الشيف فيصل
ضحكت وهي تقول : وشنو مكوناته ياشيف
كان يتأملها طويله بشعر طويل وناعم بلون بني بخصلات ذهبيه مظفور ومخليته ع كتفها اليسار بعيون ناعسه وفم صغير لون بشرتها برونزي طبيعي تشبه لأختها ابتسام لكن ع البرونزي..
ابتسمت وهي تشوف فيه يتأمل فيها قربت كوب العصير م فمها واول ماعرفت انه عصير فراوله نزلت دمعتها جرت وراها جيش وانقلب مزاجها
وقف مفجوع يحساب خافت م نظراته وحاول يهديها يتحملش الدموع : ماتبكيش ..يرحم والديك ..تو نطلع غير ماتبكيش ..ليش نقلب مزاجك يابنت الحلال ..
أماني : فاديه تحب الفراوله
فيصل : خلاص معش نشروه ولا يجي لحوشنا ...نخل وه ل فا دي ه ..كويس بنقطعه طول العمر ..
أماني تمسح دموعها : انا نحب التفاح
ابتسم لها الحمدلله طلعها م حزنها
تفكيرها راح لفاديه ..عريس اختها ماعجبها ابدا هضا غير ان فاديه سيدة العناد والتحدي الله يستر..
___________
فاديه
ركبت ف السياره وعجبتها السياره كانت الكراسي جلد ابيض فخم اما عدادات السياره والدركسون خشب لامع شكله يفتح النفس والقزاز مظلل من قدام والخلف وقزاز البيبان تظليل كاتم ..مستحيل حد يشوف اللي جوا السياره ..ريحة السياره دخان معقوله دكتور ويدخن لكن يمكن السياره مش له ..
التفتت تتأمل الدكتور ابيض ورقيييق بشكل فضيع لدرجة عظامه بارزات وعروق وجهه وتحت عيونه سواد وشعره طويل لعند رقبته وخشمه شامخ وحاد وف صبعه اليسار الصغير خاتم فضي فيه فص أحمر فيه بريق غريب..وف معصمه اليسار ساعه كبيره تلمع لونها ذهبي ..وف معصمه اليمين حديده فضيه مكتوب عليها كلام بالE ..واضح يحب الاكسسوارات هه..واظافره مقصوصه بشكل حلو ..يمكن هكي اصابع الاطباء ومش ..
