زوجي مغرور 26
بصدق فيصل ..عطيني تفاصيل هلك كل شيء فرد فرد نفسي نتعرف عليهم
بحزن بلع ريقه وكأنه يعترف بجريمه : باتي تزوج ام طارق هي الاولى من غير رضا جدي ..عشان يرضيه تزوج امي بنت عمه اليتيمه ..والوريثه الوحيده لباتها ..امي .. كزوجه ثانيه ..ماكان يطيقها .. لأنه فرضت عليه غصب .. وكانت بلا شخصيه عكس زوجته الاولى .. كل حبه واعترافه وفخره بزوجته الاولى وعيالها ..وانا وامي كنا متهمشين ..
قعد يركز ف ملامحي ..قلت نبيه يكمل : وبعدين !!
بألم وحزن : سكني ف نفس الفيلا ..كان يفرق بيني وبين عياله الاخرين ..هم لهم الدلع والحب والبسمه ودوم مفتخر بهم ..وطلباتهم اوامر وعايش معاهم بالروح والجسد ..وانا..
" كانش له داعي يحكي ملامح وجهه وصلت الفكره "
تنهدت : الله يسامح باتك ..انت كنت طفل ..امك ايش كان ردة فعلها ؟!
ضحك بمراره : يتيمه مكسوره ..اظنها تموت فيه ..صح ماقالتها بس لكن تصرفاتها تقول ..وبعينها معندش عيوب ..حتى من حبها له حبت زوجته الاولى وعيالها..
قلت بقرف : ياقلبي 💔..يلعن هالحب طالما ناوي يذلني ..نطلع قلبي ونعفص عليه ونرميه ..وكيف تصرف ضرتها معاها ؟
رد : عادي.. تعرف تصرف ..تعامل من تحت لتحت ..وربة عيالها ع نهجها ..
قلت بنقمه : هالافعى هذي ..لكن انت غبي ليش ماحاولت تكسب خوتك ..
قال بألم وكره : ما ألعن من الأم الا العيال ..كانوا سبب العذاب ف حياتي ..
كل مافيه تعاطف معاه : كيف يعني ؟!
مسح وجهه بإيده وخذا نفس : تعرفي العيال لما تكون عندهم قوه يستضعفوا غيرهم ويخلوه محط مقالبهم وسخريتهم ..يقللوا من قدره وقيمته عند الكل وعند نفسه ويكره حاله ..خاصه انه باتي يموت فيهم ..وانا غلطة حياته ..
بحمق وانا نتخيل الموقف : وليش ماتضربهم ..انت ماشاء الله طويل عريض تقدر تضرب اثنين مش واحد ..امسكهم و..
تبسم بفرحه لمدحي لجسمه : كانوا اذكياء ..من تحت لتحت ..كيف ماحبسني ولدها الكبير طارق ف الخزان الارضي .. هز راسه وملامحه تنطق بالألم ..قلت باستغراب : كيف يحبسك ف الخزان ؟ وين امك وباتك ؟ قال : الخزان كان ف فيلا جديده ..خزان ارضي ..وطارق كذب ع باتي قاله منعرفش وين ماشي ..وامي تحسابني مع باتي ..قعدت محبوس ف الخزان يوم كامل ..ظلام دامس ..مانسمع غير ف نبح الكلاب .. والقطاطيس.. صغير ياأماني محبوس ..
نزلت دمعتي مسحتها بقفا ايدي : كان صرخت استنجدت كم كان عمرك ؟
قال : طفل : تقريبا عمري 10 او 11 سنه ..وين نصرخ.. كانت الفيلا عظم ..والحي جديد ..معظمه فيلات تبني .. نقولك كان سكان الفيلا الجديده كلاب وقطاطيس ..
قلت بغصه : ليش قلت ع هلك طيبين ..وهما ..
ابتسم بحزن : بنقولك هلي يكرهوني ويتمنوا موتي ..لو يعرفوا ع زواجي خربوه ..نخاف تسيبيني ..
بكل ثقه : استحاله نخليك ..ماقلت ليش كيف عاقب باتك طارق لما عرف اللي داره فيك ؟
ضحك بدون نفس كأن نكته بايخه : ماصدقونيش .. يحسابوني نكذب ..مادارله شيء ..بالغكس عطاه هديه عشان هو اللي نقذني ..
قمعزنا ساكتين بعدها كمل : امي ماتت وانا ف العشرين .. لكن قبل تموت سجلت كل أملاكها باسمي ..ورصيدها ف البنك.. تحول لي حسابي ..امي ورثث من باتها كل شيء.. حتى الفيلا هذي لامي بس الارض لباتي ..وهما يبو يقتلوني..هما يكرهوني ..لكن موتي قرب من غير تدخلهم
قلت بحمق : لاسمح الله ..بعد عمر طويل ..
بعدها قلت : انت مش قلت مرت باتك غنيه ....
قاطعني : مرت باتي غنيه اي ..لكن اللي يشغل ف فلوسها خوها.. وبعدها عيالها.. قصدي ولدها ..طارق .. لكن طارق مش مالي عينه شيء.. ناوي يغم حتى ع فلوس باته .. واللي نملكه انا ..لكن مش مخليه ..علي جثتي ياخذها لين نموت ..
قلت ودموعي تنزل : لا ..تقولش نموت ..نساعدك ...عش تقول هالكلام ..تو تعالج وتكبر ونقعدوا شايب وعجوز انا وانت..
التفت وراه كالعاده وبضعف شخصيه وخوف وتردد ورعشه اول مره نلاحظها ف ايده اليمين : مش تاركك .. لكن الموت غصب تاخذني ..لكن قبل نموت يمكن نعجز ع الحركه والكلام ..او وقتها منعرف ايش يدير خويا ولا باتي ..نبيك تساعديني ..
مسحت دمعتي للمره المليون : كيف !
قام من جنبي وقعد يمشي للصالون ويجي ..رعشه واضحه ف ايده ..كيف قبل مش منتبهه لها : تو نكتب كل املاكي باسمك ..ونحول رصيدي لحسابك ..
شهقت بعنف ..تقول جابولي خبارته انو ميت ..انا صغيره ع هالهم ..يابابا وينك ..تعال شوف تفاحتك ..
-------------
بعد ساعتين بالضبط وقبل المغرب فتح باب الحمام وعطاني ظهره وطلعت ودمي يغلي ..
قلت باستفزاز :لو انا راجل راهو إقدرتش تدير فيه اللي درته ..ننقنك جبان ..
بحتت فيه لابس بلوزته الفسفوريه اللي ف الصبح امرمده ومغبره ..وشعره مريش ..تجمد بس شكله سمعنيش ..ضحكت بشماته ..تسلم ايده اللي ضربه وانشاء الله يمينه ماتخش للنار ..برد عليه الله يبرد عليه.. والمصيبه موزع مشاكله برى وجوه الحوش ..احسن خله يضرب رجاله كيفه ..
قطع تأملي وقال : ديري حاجه ناكلها انا جيعان من أمس ..
خشيت للمطبخ ودرت مكرونه بالباشميل وعدلت درجة الحراره وحطيتها ف الكوشه ..ومشيت لداري
زوجي مغرور 27
مشيت لداري.. هو له ساعه مختفي ف داره ..
كان صوت صراخه مرعب ف غرفته ..عمرك سمعتي صوت راجل فخم مرعب ..الله لايسمعك ..نقبض قلبي بجنون ومشيت نجري لداره ..فتحتها لقيته راقد..
ياسر بصوت مهووس : لالا..محموووود ..يامجنون ..لا ..سااالم ..علي ..جمال ..
لاااااااااا
خشيت وقمعزت قدامه ..هزيته مافي فايده ..ملامح وجهه تقول غارق ف ألام وعذاب ..كابوس مرعب لياسر
مشيت للمطبخ نجري خذيت قارورة اميه بارده م الثلاجه ..ورديت له كان مقمعز صدره عاري وعيونه مفتوحه ع الاخر برعب ونظره مثبت ع السقف .. وصدره يعلى ويهبط وضيق ف التنفس ..واضح مازال راقد.. صبيت الميه البارده ف ايدي ومسحت بها ع وجهه وانا نقرا اية الكرسي عشان يهدى.. حول ايدي وعينه ف عيني بقوه ..صبيت اميه اخره ومسحت ع وجهه وانا نقرأ ف القرءان ..
همست له : ياسر هضا كابوس ..بسم الله عليك ..
حرك راسه وسنده ع صدري ..وخرت ..استثر راسه ع صدري م جهة اليسار ..قلبي قعدت تقول طبل ..كملت قراية المعوذات..وبرفق وخوف قعدت نمسح ع شعره الناعم ..تصدقوا شعره تقول وبرة قطوس شيرازي ..تخيلت شكله بكل جبروته لو يعرف ع منو شبهته غصب عني مسكت ضحكتي ..لحظه انا ضامه عدوي ..وقفت ع القرايه ومسكت راسه تقول قنبله ع وشك الانفجار ..وحطيته ع مخدته..فتح عيونه وحط راسه ع مخدته ..عارفه مش وقته بس لازم نبرد حرتي والفرص نادره..والشماته فيه واجب ..تحركتش لين فتح عيونه بكسل
استغليت الفرصه وابتسمت بشماته ..عقد حواجبه باستغراب وخمول وقال بخمول : ممكن تطلعي
تبسمت اكثر : بدون شكرا ..مشكوره..تشكرات
رد بكسل : اقلبي وجهك
قلت بهزوه : ع الاقل انت تشوف ف الكابوس ف نومك بس ..بس انا كابوسي معايه ديما ف نومي ونا واعيه واللي هو انت ..
مال فمه لجهة اليسار وقال : لكن احلى كابوس صح
وقفت وعطيته ظهري وقلت : ابشع كابوس وانت الصادق نوض هضا وقت نوم..المغرب أذن توضأ وصلي..وادعي لربي يباعد عليك الكوابيس ..
-----------------
ليلى ..
المكان مظلم ومقرف ..رغم الوقت الصبح وأشعة الشمس ف الرواشن ..المكان تقول مكتوب لي يكون سجني ومقر تعذيبي ..نحس ف جسمي مكسر ومهدود حيلي ..جيعانه وعطشانه..ليه يومين ع هالحال ..مش مهم اهم شيء كرامتي ..وامنيتي الموت ..وتنكشف برائتي.. عندي امل وثقه بالله مش مضيع حقي ..
دبشي مشبع بالدم ..
جسمي متشبع بالجروح ..
قلبي متشبع بالذل والإهانه ..
كنت نتأمل ف وضعي المزري ..نقول اني بريئه وخوتي مع الوقت ح يعرفوا.. حسبي الله ونعم الوكيل ف من تبلى عليه..من ؟ وليش ؟ انا عارفه روحي ننفعل ونتهور ف الكلام ..بس مجرد كلام وقت نحمق ..نحب ناخذ حقي اول بأول لكن مش من النوع الحقود ..لكن عمري ما أذيت حد لدرجة يتبلى عليه ف شرفي.. وليش خوتي يصدقوا بسرعه لهدرجه معدومة الثقه ..او عشان انثى ضعيفه..متوقع منها الغلط ..
فتح الباب بسرعه ف نفس اللحظه وسمعت صوت شهقه عرفتها اكيد ..رفعت راسي وجت عيني عليها.. رفيده ومعاها امي ..نزلت لي الاكل ع الاكل ..وبسرعه حضنتني بحنيه وشوق ..وتمسح ع شعري بنعومه وتلمست وجهي برقه وهي تقول :سلامتك ياعمري ..
لكن عيني معلقه ف اللي وقفت جنب الباب وماتحركت من مكانها..امي ..قلت بضعف : يا أمي
هبطت عينها لعيني وعطتني نظرة احتقار قاسيه : بسرعه رفيده ..اطلعي قبل يجي خوك ..
لا ..امي ..مستحيل تصدق ..امي تعرفني..هي ربتني وعلمتني ..
قلت بترجي: يا امي حتى انتي صدقتي ؟
قالت : كلمة امي معش بنسمعها منك ..اسكتي يالكذابه.. تحسابي ماسمعتك وانتي تقولي وتحلفي تنزفي ع غيره قبل هو ينزف ع إمرته..عشان تحرقي قلبه.."وبدموع حزينه مفرطه وهي تشير ع قلبها " لكن حرقتي قلبي قبل تحرقي قلبه ..مافكرتي فيه لا في خوتك وخواتك.. هذي تربيتي ياليلى ..هضا جزاتي ..ولد شعيب.. مالقيتي غيره .. توسخي سمعتك به..سيرته مانمحت من كل لسان تجي انتي تغطي عليها ..حلال عليك ولد شعيب.. لكن انسي ان لك ام وخوت ..هضا اختيارك ..وتحملي تشكي بعدين.. هيا رفيده ..
ماعترضت ولابكيت ..طلعت رفيده وامي ونا مش منتبهه لهم ..ف سجني وظلماتي ..حطيت ف الفراغ
ولد شعيب
ولد شعيب
ولد شعيب
رن الاسم ف عقلي .. شعيب وطاريها.. حكايه عنرها طويل ..اكبر مني.. حوالي 30 سنه ..نقطه سوده ف تاريخ هلها ..من ونا صغيره نسمع الذم فيها ..الحكايه بكل بساطه لبنيه صغيره سموحه ..وقتها باتها كان شيخ القبيله وله هيبه ع الكل وشخصيه وامها نفس الشيء بنت شيخ القبيله وخوتها يضرب لهم الف حساب ..والبنت هذي من دون خواتها الكل يخطب فيها لجمالها الشايب الشاب المطلق الارمل المتزوج ..لكن كل واحد يردوا فيه لسبب معين ..حتى عيال عمها تفرقوا من بعضهم ..بعدها تزوجت واحد ..معروفه امه ومش معروف باته ..يعني لقيط.. كان يشتغل عندهم ف المزرعه ..فيه منو يقول انه هو دار لها سحر..وفيه منو يقول غلط معاها برضاها..وفيه منو يقول غصبا عنها .. وفيه منو يقول خطط ولعب عليها واستدرجها بوسامته وهي صغيره تعرفش ..وفيه منو يقول وفيه منو يقول كثر الكلام
زوجي مغرور 28
كثر الكلام ومش معروف الحق م الباطل ..الخلاصه انها تزوجت وجابت له ولد وتوفى بعد فتره قصيره ..ترملت وردت لحوش هلها.. ومره ثانيه كثروا خطابها كيف قبل واكثر ..ومن ضمنهم باتي ..رفضت الكل وساندها باتها رغم ضغط خوتها ..حجت مع باتها ف نفس السنه اللي توفى فيها راجلها ..روحت م الحج مريضه بعدها توفت ..يقولوا ماوصلت للعشرين ..كانت صغيره .. فرخه لكن قلبت المعايير وثارت العرب بقصتها ..وعندها ولد معروف ..هذي قصة شعيب اللي نعرفها ..والعرب ماترحم حد ف حاله ..
تجمدت ..تيبست ..إكرهت حالي ..
صرخت بقهر من قلب : لاااااااااا
انا ليلى بنت شيخ قبيله ناخذ واحد من غير أصل.. ولد حرام ..الموت عليه أهون ..امي ..وامي تشك فيه ..تذكرت كلامي لما عثمان اللي عبدالعزيز رفضه خطب دلال قلت بلحظة غضب وجبروت وبدون وعي نحرق قلبه قبل يحرق قلبي وباقي الكلام ..انا مش قاصده المعنى يعني أول خطيب يجيني نوافق عليه ..لو نفذت كلامي راهوا وافقت ع فتحي ..خلاص زوجوني فتحي ..او اي شايب اخر ماعندي مانع ..إلا هضا ..إلا هضا ..ثغدت ندعي عليه مافيه دعوه مادعيتها عليه ..
ياربي ا ا ا ا ه ..رحمتك يارب ..
-----------
فاديه ..
بعد صلاة المغرب طابت المكرونه وناديته يتسمسم .. اهم شيء عنده معدته ..قمعز قدامي ع الطاوله مش مبين عليه التعب والألم قوي ..العصر طحنه وبعدها كابوس.. اف هو كابوس بس مش عركه ..الله يشفيه ..
لكن يستاهل ماجاه خله يعرف انه فيه من اقوى منه ..
ويعذبه بأهون سبب..كابوس..اضغات أحلام ..
نزلت عيني ع وجهه..المفروض ياكل لكن ماتحرك قال بجديه : بجد
