زوجي مغرور 46
ف وسط الحوش واقفين ثلاث اشباح طويله ورابعهم قزم ..
صرخت رمانه صرخه هزت الحوش ورمت بطانيتها وركبت تجري بنذاله وخلتني وراها.. انا كعادتي تجمدت ومن غير اي صوت .. كل اللي قدرني عليه ربي غطيت وجهي ببطانيتي..
كنت خايفه مرعوبه انا ف لحظات الرعب حتى فمي ما إقدرت نفتحه ..بعد لحظات طويله تشجعت ورفعت طرف بطانيتي الاشباح مختفيه الا القزم مازال واقف .. شجعت نفسي وتحركت كرعيا ببطانيتي توجهت لدار فيصل.. خشيت غريبه فيصل واعي وف إيده التليفون ونظرة استغراب ف عينه.. تكلمت بخوف ونا نشير لبرى : فيصل.. فيصل بسرعه.. فيه ثلاث حاجات تمشي ومعاهم قزم .. خوفوني.. بسم الله الفيلا مسكونه.. نقنها مسكونه..
قطعني وهو يحاول يهديني : هذوما خواتي وامهم
ومعاهم الشغاله..
اختفى الخوف وحل محله حمق مدمر : هضا مش حوش هضا شارع.. اللي يخطرله يجي.. حتى بدون دق الباب او يتصلوا.. يقتحموا المكان .. كان قعدت مجنونه معناها من ورى روس خوتك عديمي الذوق..
وفكرت جديا ف تغيير اقفال الفيلا.. هذوما ماعندهم أدب مايفهموا الا بالوقاحه..
__________
ابتسام..
اف .. ملل نزلت ولقيت خالت عماد أم هادي هو اسمه عبدالهادي لكن تصغير للاسم سموه هادي .. مع إن عبد الهادي أحلى..
بعد تقمعيزتي بفتره تفاجأت بعمتي تقول بثقه : لو جابت ابتسام بنت.. نزوجها هادي
ردت أمه بضحكه : ونحن نلقى أحلى من بنت عماد وابتسام..
تنرفزت يزوجو بنتي لولدهم ثقيل الدم .. هه شكلهم زوجوا عناد بهالطريقه..
_________
فاديه ..
بعد الفجر اتصل ياسر وكان مستعجل
بسرعه تحركت وعطيت ليلى الميتين اللي عطاهم ليه ياسر ..وحطيت لها من المكياج اللي هداني له ياسر الا الروج الاحمر ﻷني نحب الألوان الصاخبه.. بصراحه هي أحق بها شفايفها جافه محتاجه مرطب بشرتها جافه وايدها حتى هي..
عطيتها نصيحه أخيره : اهتمي بروحك.. محد نافعك لو صارلك شيء لا قدر الله.. وكان دارلك حاجه انتقمي ف وقتها.. مش تكتميها .. ولو حبيتي تكلميني قولي له.. ما أظن يرفض..
كان الصبح غريب السماء مغيمه .. سكني ضيق خاطري نعطي ليلى من لبسي بس كيف !! ع الاقل نقدرش نعطيها ناخذها للمستشفى مع ياسر " اتصل ياسر وقال بلهجه جافه بسرعه اطلعي
طلعت ونا نفكر .. لكن ياسر كان ف الصور واول ماشافني عطاني ظهره .. هضا كنه يكونش مستبدل ف طرابلس..
وقفت وراه ونا نقول : قايل بتجي الليل طلع الصبح واخيرا حضرت.. اسمع كان صاحبك بتأخر .. خل ناخذ المراه للمستشفى ﻷنها مريضه بكل..
لكن قعد واقف عاطيني ظهره كأني نكلم ف روحي.. شكله شارب شيء طير شوية العقل اللي فيه.. بعدها التفت وخرت ع ورى ونا نضرب ف صدري ونسمي بهمس .. كان يشبه ياسر طبق الأصل نسخه مزوره ومرعبه .. قطعني من ذهولي وهو يلتفت بصوت غريب : ياسر يستنى فيك ف السياره..
طلعت ونا نحس برعب.. نسخة ياسر شكله توئمه..
_______
يوسف..
وصلت وياسر شكله مشتاق لزوجته .. وشكله تعبان وواصل حده.. خشيت ع طلوع عامود الضي طويل بس شافتني هجمت عليه وهي تقول : قايل بتجي الليل طلع الصبح واخيرا حضرت.. اسمع كان صاحبك بتأخر .. خل ناخذ المراه للمستشفى ﻷنها مريضه بكل..
______
ابتسام ..
خشيت للمطبخ وانا خاطري ف جالكسي وعصير راني.. كانت بشرى ف المطبخ سألتها : عندك جالكسي
ضحكت : لا
سألتها : باهي عصير راني
قالت بقرف : ان شاء الله غير مش توحمي ع جالكسي وراني حبيبات اععع قرف
قطعتها : لا
ردت تدوي : قولي لعماد قبل يصير ف ولده او بنته شي
قطعتها : تقوليش لعماد شيء
قمعزت ف الصاله الجو كئيب وفيه مطر .. وكملت لما فجأه انقلب الحوش يدوروا ع عبدالهادي.. امه تبكي وعمتي تعارك فيها وعماد ركب سيارته وطلع يدور فيه.. رغم ان الولد طويل لسان وعريس غير مرحب فيه لبنتي الا إني خفت عليه.. ربي يرده ﻷمه طيب حرام هضا وحيدها.. شهد تبكي وعبير وبشرى صامت بس هزاز.. الولد مفقود من صلاة العصر لحد الآن مالقوه..
بعدها بفتره جا مع عماد.. وين كان.. كان ف سوبرماركت بعيد.. شنو يشري.. جالكسي وعير راني حبيبات.. طاحوا فيه الكل حضن وبوس .. الا عمتي وعماد هزبوه هزيبه ماينساها طول عمره.. ركبت لداري وبعدها بشوي كان دق ع الباب .. شهد ف ايدها جالكسي مفتوح وموكول نصه ونصه سايح ومتغير شكله وعصير راني.. ونبشركم مسكر شكله يحبش..
قالت بطفوله : من هادي
وطلعت وخشت بشرى تضحك وهي تقول : حركات هادي من توا يدفع المهر..
ضربتها ونا نقول : حرام عليك عرف ان خاطري فيها
______
يوسف..
من قالت : قايل بتجي الليل طلع الصبح واخيرا حضرت.. اسمع كان صاحبك بتأخر .. خل ناخذ المراه للمستشفى ﻷنها مريضه بكل..
كنت حاس .. قلت لها تاكل اكيد جوعت روحها.. التفتت لزوجة ياسر عشان نقوللها انا مش زوجك.. اكيد احتاست.. الكل يلخبط بينه مش زوجه من شهر .. لكن انتبهت وهي ترسل نظرات رعب وضربت صدرها وهي تسمي بالله.. قريب جتها سكته قلبيه.. لكن استجمعت قوتها بسرعه فقلت : ياسر يستنى فيك ف السياره..
بعدها خشيت للحوش.. ولدارها مباشره.. دقيت الباب وخشيت وأمرتها...
