زوجي المغرور (منقوله )

الحلقات 💙

زوجي مغرور 13

دعت بصدق ولهفه لمن زال كربها : الله يعطيك ويرزقك من اوسع أبوابه ..ويفتحها ف وجهك يارب 👐
________
ليلى
مقمعزه ف غرفتي نصحح اوراق الامتحانات هالبنات خطوطهم تقول خرابيش دجاج ..
خش عليه ف هاللحظه خويا الكبير عبدالعزيز " اللهم اجعله خيرا " عزيز مايخش الا وعنده سبب قوي
قمعز ع السرير المقابل وسأل : كيف المدرسه معاك !
جاوبته بسرعه : الحمدلله تمام
خل نوصف لكم عبدالعزيز عشان تعرفوا احساس الخوف اللي ساكن داخلي والسبب منه ..
ضخم مربوع الجثه بشوارب ولحيه كثيفه ..وايده كبر الطنجره ..عارفه روحي نبالغ بس كبيره واجد ..عيونه تقعد حمره وتفتح اقصى حد درجه لو زعل
رفض ولد عمي عثمان بطريقه مباشره بطريقه غبيه لانه مش عاجبه .. بيتزوجه هو ولا أنا ..المهم توا معايا ف داري وواضح معاه قصه ..
قال بعد فتره تأمل فيها وجهي : خطبك فتحي ولد فلان الفلاني من ولد عمك وقاله تفضل ..وخطبك مني وقتله تفضل ..وانا نقول خوذيه ..
عش سمعت شيء ..انا لعبه ف ايديكم ..حسيت دمي يغلي ف عروقي ..هضا صح راجل او ولد عايله ..لكن عمره ف نص الاربعين او أكثر ..وعنده ولدين ..خطبني قبل هالمره لكن عثمان وقف ف وجهه ..وعثمان توا بيتزوج بنوته حلوه وانا نتزوج شايب معروف شين بأخلاقه وعصبيته .. ياخويا ترد الشاب وتفضل الشايب الاقشر ..الله يصرفها هالحاله عليه ..
قالت وهي ترجف بزعل : نبيشي
مصدوم عمره وحده من خواته ماتحداته ورفضت له راي قال باستفسار قبل يكسر لها راسها : ماسمعتك عاودي
كررت وهي توخر عشان تهرب : نبيشي..ومحد يقدر يغصبني عليه
ف هاللحظه خش عبدالله صاحب النظره الحنونه والوجه السمح : انت سمعت رايها ماله داعي تعاود
بنظرة وعيد : من امتى البنات لهم راي تاخذه وهي تضحك
عبدالله واقف قدام ليلى يحميها من جنون خوه وبأسلوب اقناع يعرف التحدي ماينفع مع عزوز : ماعشنا ان غصبنا خواتنا ع شيء مايبنه ..
عبدالعزيز بأسلوب ترهيب : وعليش رفضت ..اكيد عندها واحد ثاني تفكر فيه وتبيه ..
قالت بثقه وتعرف عزيز وطبعه ف التشكيك والاتهام وعبدالله معاها واقف : ماجابته امه من تفكر فيه ليلى
بحت فيها عبدالله بحب وسحب عزيز معاه : إمشي عبدالعزيز الله يهديك ..الراجل ماعجبني كان اختك مارفضاته انا نرفضه ..انا طاح من عيني يومتها من كلامه الشين ..هذك اليوم عطه لولده كف قدام الرجاله عشان كب فنجال القهوه ..
طلعوا الاثنين م الدار
قمعزت ع سريرها عاجزه ع تفكير خوها يبي يزوجها راجل عطى لولده كف قدام الرجاله..امالا هي كيف ؟
___________
فاديه بعد نحرقت يدها دفت ياسر بقوتها وخشت وقفلت عليها الحمام تحس ف الحرق وحطت ايدها تحت الميه المسقعه ودموعها كيف الشلال من اللي لقتها ف الشنطه ..
روح للحوش... بعد كمل اتصاله من يوسف مشى للصيدليه وشرى مرهم حروق وشرى م المحل ورغان لفاديه
خش للحوش الديار كلهم مفتوحات خش لدارها دغري لقاها راقده ع جنبها وايدها ممدوده .. ايدها صغيره مربربه بيضا بأظافر مقلمه ..قصتها شمس زارقه روايقها نازله علي مخدته ..مخدته 😨 ..سرقت مخدته 😲.. شخيرها واصل للباب الخارجي ..راقده بسبات ..حسدها ع رقدتها الهنيه مش زي رقدته ..فتح كفها فيه الحرق وردي مكرمش ..رقتله مش درجة يحرقها ..حركت عيونها حاولت تسحب ايدها لكن هو مسكها بقوه ..رغم هضا كلها ماناضت ..عقم الجرح وحط عليه المرهم ولف عليه الشاش ..باس كفها وشامتها اللي ع خدها اليسار ..كانت مرتفعه حرارتها والسبب معروف ..واخده كل البطاطين متاعهها ومتاعه ..ماطاوعه قلبه ياخذها ..خذا الورغان الجديد يعني الورغان الوردي صار له ..تمنى يرقد جنبها لكن يعرف كان تنوض وهو جنبها تفريه بالبلجيكي ..ناض وهو متأكد من نومته مش ح يتعنى بها ﻷنه الكوابيس بتلحقه ..تمنى النوم جنبها لكن ليس كل مايتمناه المرء يدركه ..
فاديه ..
يقولوا ماترقد زعلان ..تنوض زعلان ..وهضا حالي نضت قبل أذان الفجر كالعاده ولاحظت الشاش ع ايدي ..الزفت يجرح ويداوي ..غريبه ماخذش بطانيته ومخدته .. احسن اكيد امس رقد يطقطق م البرد هنا البيضا بردهم قارس ..اااح ياريتني شفته عشان نتشمت فيه ..بس مازال ماشفيت غليلي ..
صليت وكملت صلاتي وخشيت للمطبخ وماخاطري نشوف وجهه سمعت صوته يقول : كان تبي نشيلك المستشفى ..
طنشته ومشيت لداري ..عليش يسأل كان تبي نشيلك للمستشفى ..شن بدير المستشفى بيرد اللقطه اللي قبل يحرقني يعني وتصير معجزه ويجي سوبرمان وينقذني .. ياعليك عبيطر يدير فيه..
قبل ننطرح ونرقد خش للدار ..استغفر الله ياربي نزل عليه الصبر ..
زوجي مغرور 14
داير روحه ضميره معذبه ..هضا عنده ضمير أصلا .. تي هضا قرد حشاكم ..يمشي ورا غريزته وشهوته ..لكن فيه فرق..هضا ثرد مغرور ناطق ..
قال بغروره المعفن : شكله مافي شيء يوجع فيك
لا رد
كمل وكأني جاوبته : خلي الدرس هضا ينفعك ..مش من صالحك تنصحي وتحاولي تحكمي في حياتي ..وانتي تعرفي كان رقتلي نفقد الكنترول ع تصرفاتي ..
سحيقه تسحقك ان شاء الله حارقني بالولاعه حرقه شينه ومازال ينفذ ف سمومه ..
_________
ابتسام
كنت مقمعزه ف الصاله الفوقيه نتفرج ع ال تي في
جتني شهد وقتلي ماما تبيك
نزلت بسرعه قتلني الفضول عمتي شنو تبي مني لقيتها مقمعزه وجنبها صندوق من المخملي الاسود
قالت بجديه وأمر : تعالي قمعزي ..قمعزت
قالت بنفس الأسلوب : هضا ذهب شراه لك عماد ..قبل مالحق يشريه لك ..وكان ماعجبك خبريني ..
فتحت الصندوق فيه طاقم داماس ساعة رولكس ودبله من ذهب ابيض وسلسله فيها حرف E منقوش ..نزلت دموعي لكن م الفرحه مش زعل .. مافكرت ف شيء بكل الذهب غالي والساعه بالألوفات ..هضا اهتم ..يعني فكر فيه..وجاب لي هديه حلوه بذوقه ..بذل جهده عشان يفرحني ..وانا متنرفزه منه ..ياالله عماد انت حساس ومرهف ..كان بوضح ان انا غاليه بكل عنده ..
باهي ليش ماعطاني هديته بإيده ..وليش عطتني عمتي .. شكله تعقد مني ..من يلومه ..لكن خلاص تو نصلح الحال ..إبتسمت للبنات ولعمتي الجاده والحازمه ..مسكينه شكلها مش راضيه ع تصرف ولدها وهديته .. نجك لي اللي مزعل الكل عشاني ..تفهمونيش غلط مازلت بنطلع كلام عنادي م عيونه لكن ع مراحل واول مرحله تم تأجيلها .. لكن كيف ماقدم عربون أسف
قررت نتقبل برحابة صدر ومكافئته ..
خشيت لداري وقررت كيف ماوريته وجهي النحيس نوريه وجهي المحب ..
دوشت بجل معطر ولبست قفطان ابيض قصير للركبه منسدل بنعومه فيه شريط وردي تحت الصدر ولبست معاه كعب ابيض ..وعشان نحبش المكياج ماكثرت ..ظل وردي خفيف او روج وردي ..وعشان يشوف هديته لبست الساعه والدبله والسلسله ..
خش متأخر بعد صلاة الفجر بفتره وماانتبه خذا دبشه وخش للحمام ..نضت وزدت الروج والعطر ..طلع م الدوش وجا للسرير بتعب ..
عماد
بمجرد جت عيني عليها كان ف عيني الف سؤال ..كنها واعيه لتوا ..وليش متزينه ومفتلكه !!
الى جانب سحرها وجمالها ملفت للانتباه ..الساعه الواسعه ع ايدها والدبله تلمع ف اصابعها مطليه بالوردي زاد جمالها ..تلمست عقدها وبعدها اكتشفت انها تلمس ف الحرف الاول من اسمي ..وبمجرد تفسير الحركه حسيتها لمست قلبي وقعد نبضه مش منتظم ..
ابتسام ..
انا خجوله وهو زودها بنظراته قلت بابتسامه مرتجفه : نديرلك فطور
قال باستغراب : فطور !! تسلمي معنديش نيه ..
قطعت السكوت بخجل وقلت : شكرا ..ذوقك روعه ..
ابتسم كيف من شاف معجزه وقال وهو يتقرب : اهم شيء عجباتك بسومه ..
______
أماني
ملابسي كثرت لين صارت عندي عقده من ذوقي السهل البسيط صار صعب معقد..عنايتي بشعري وجسمي قعدت تشغل وقتي ..النت ديما مفتوح عندي قعدت ادمن لكم قروب ..هضا كله عشان نباعد فكري ع حاجتين .. الاول لغز فيصل صحته من ملاحظتي له مش تمام..ينفي اي عله صحيه ملصقه به ..التعرق عنده بكثره ..الادويه ديما ف جيبه ..لكن متأكده هو بيخبرني بنفسه ولحظتها بنوقف معاه ..ومش ح نخيب ظنه ابدا ..نصير له عون وسند له.. ﻷنه كان ليه الاب والاخ والصديق.. برد له جميله ..
والثاني أفكار وأحلام الطفوله ..زوج قوي صبور محب وسيم ..أب ﻷولادي..بيت صغيرون..أسره سعيده ..
________
فاديه .. جيعانه موت نضت ندير ف الغداء الفطور خفيف ما إشبعتش ..درت بإيد وحده لان ايدي الاخره توجع فيه بسبب الحرق الله يحرق شعره 《حاقده ع شعره لانه شعره ناعم واجد 》..
وعناد فيه ماني مطيبه وجبه مبوخه درت مكرونه سريعه وساهله ومش محتاجه جهد ..كملت وفكره شيطانيه تدور ف راسي ..مع ان جيعانه .. قسمت المكرونه ع مكانين ..وخذت تبسي تاعه صبيت فيه فلفل اكحل خليه ينحرق بلعومه ..خش حط حاجه ع الاماعين وقال : تعالي هنا
مع ان متحمسه لمقلبي فيه مشيت له وصلت لعنده وبحتت ف الشيء اللي ماسكه بيده لقيته قفاز بلاستيك غليظ ولونه أصفر قال وهو مصدق روحه ويشرح : تستعمليها لغسل الاماعين ..والدبش 《القهره مش دايرلي غساله 》الصابون والكلور مضره للايد ..خاصه ايدك ..مفروض تستعملي مرطب لإيدك ..عندك ولا نشري لك ..كيفها ايدك..
حاول يمسك ايدي لكن سحبتها وحطيتها ورا ظهري
بحت فيه وعيني ف عينه ابتسم ..معتوه.. ونا متشوقه غصب لانتقامي قلت : الغدا برد
وقعدت نتخيل فيه ينحرق لسانه ويصرخ م الحراره ..او يرجع الاكل ويشرب اميه ..ويصرخ ويشتم ..وانا نضحك ونشمت فيه ..
قمعز ع كرسيه وهو معنقر وحطيت تبسي تاعه قدامه والعصير ..وقمعزت مقابله له ..ضاقت عيونه تعبير له ع عدم رضاه ..خذا الشوكه وقرب العصير وشرب منه ..
سأل باستغراب : وين غداك ؟
رديت : شبعانه
قال وهو يشفط : يعني متبيش تاكلي معاي ..لايكون حاطيلي شيء
لا رد .قلت ف نفسي كأنك حاس بمصيرك ..واقتربت لحظات الانتقام وانا
زوجي مغرور 15
وانا ع أعصابي ..
قرب الشوكه م فمه ومكرونه خشت لفمه ..تحرك فكه ف حركة مضغ انيقه من غير صوت وبرتيبه ثابته ..نزلت م بلعومه ..مد ايده وشرب م العصير وشرب منه ..
نقهرت هضا ماتحرق ولا صرخ قت خلي شوي كمل نص التبسي وانا عيوني يبحلقن فيه ..
تجمدت مش مصدقه صبيت وانا جيعانه ..حي ان شاء الله غير مش عطيته تبسي تاعي ياهمي ..خذت تبسي تاع وناخذ منه فم وبعيدا عنكم شيطني حرقني ..بحت فيه ..حظي المنحووووس ..كرامتي طااارت ..وانا دوروا عليه ماتلقوني ..بنطلع مريت من جنبه مسكني م ايدي وبضحكه محبوسه بشماته وغروره : نجيب لك غدا م المطعم .. فكيت ايدي منه وطلعت حبست روحي ف داري واكرهت غبايه ..
_____
ابتسام ..مش متريحه ..اشتقت لبابا وخواتي حتى ماما الناسيه عندها بنات اشتقت لها .. نفسي نرد بنت صغيره وهمي لعبتي والحلوه .. ا اه يابابا نفسي نزورك نفسي نزوره او نكلمه لكن هو رفض وأكد ..مضايقه ماهو بإيدي غصبا عني يضحك معايه ويبصر معايه لكن واضح من كلامه وتصرفاته فيه حاجه شاغلته ..لأنه مايعبر ع مشاعره وشكله نادم ع زواجه مني ..شرالي تليفون وشفره برقم مميز كهديه ..مصدق اني رضيت عشان هداياه وخليته ع عماه .. رغما ان واضح ف بعض تصرفاتي نفوري منه ..ليش مايصارحني بكل مافي قلبه وعن وضعه مع بنت عمه ..انا كل تفكيري محصور ف وقت طلوع بابا م السجن مش قاعده "مازالت مصره ع رايها " لكن الحياه ماشيه لليوم قاعده ع قلبه ..
نزلت لوطه بعد العصر قمعزت ع الصالون وعمتي وعبير وبشرى مقمعزات وأول ماقمعزت قالت لي عمتي : بكرة فيه عزومه عند اختي وانتي معزومه
ابتسام : عليش العزومه ؟
عمتي : باتهم رقد ف المستشفى ايام والحمدلله طلع بالسلامه
ابتسام : يصير خير نسأل عماد قبل
بصراحه ماتحمست نمشي لأعدائي بكرعيه ..لا وألف لا هذي فرصتي نمشي لأماني ..كان تفكيري بعذي البساطه عرب مايحبوني عليش رازه فيسي عندهم هما عزموني مجامله عشان ماحد يلوم ..وانا بنرفض بأدب وذوق وخلاص ..نبذه عن هل خطيبة عماد من طراطيش الكلام ..لان البنات يتجنبن يحكن حدايا عليها لمشاعري ..وانا الكليمات اللي لقطتهم وفهمت منهم هنا ثلاث بنات ..اكثر ذكر هي منى وحسب ظني ان هي خطيبة عماد ..وحسب ظني اخره ان باتها اللي هو عم عماد ماعنده عيال معتبر عماد ولده ويحبه اكثر من بناته وله فضل كبير عليه..
لما جا عماد م الشغل فتح نفس الموال
عماد : ابتسام بكرة عزومه عند عمي وعازمنا
بتمهيد لفكرتي : اها قالت لي عمتي ..لكن نبيش نمشي
عطاني نظرة استغراب : وليش ان شاء الله
ابتسام شكله اقناعه صعب : عنديش لبسه حلوه نمشي فيها كان قالوا بدري راه مشيت للسوق وشريت لبسة عرايس
قال بتفكير : معقوله شنطك الكبيره مافيهش لبس عزومه ..هالمره دبري شنو تلبسي وبعدها امشي للسوق اشري اللي ناقصك
قلت بترجي : بصراحه عماد مش هضا السبب نبيش نمشي تربح تجبرنيش ع المشي
عماد : كنت متوقع ..عطيني سبب واضح
ابتسام : ببساطه ..هم مالهم نفس يشوفوني فش داعي نمشي
عماد رقتله : منو قالك هالكلام ..عبير..بشرى ..
ابتسام بسرعه : لا محد قالي حاجه ..بس انا فهمت هك
مش هلها...
قاطعني : بتمشي ولا تكثري كلام
خلاص حكم القاضي ..رقدت وانا زعلانه ماعندي خلوق نمشي لهم وماعنده حق يجبرني اوف ..
وثاني يوم اعلنت مقاطعة عماد وماكلمته اما هو فكان رده الوحيد الابتسامه كل ماشافني .. جا العصر وبديت نجهز ف روحي كان مشيت للسوق شريت قفطان مازلت عروسه جديده بس لبست لبس بسيط قونه سوده فضفاضه شوي ومفتوحه م الجنب من قدام عدت طبقات ومفتوحه وقت نمشي تنفتح ومن الخلف طويله وكت فضي ورقبته مسكره وفيها وفيها فتحه ف الصدر
والظهر نصه عريان ولاصقه ع جسمي ولبست اكسسوار اسود رسمت عيوني بالاسود ودرت ظل اسود زادت لون عيوني البنيه وضحت مع الاسود وروج ولبست ساعة رولكس خش عماد
عماد ببسمه نطقت بعيونه باﻹعجاب قبل لسانه : وتقولي ماعندك لبسه ..بس بالغتي بصراحه .. بعدين لبسك عاري
شكله يبيني نصير اقل م خطيبته : لا مافيه مبالغه ..هذي لبسه بسيطه ..المفروض شريت قفاطين مشيت بقفطان ..وبعدين مش عاري ..
بجدية ضابط : اقري الاذكار ع روحك والبسي نقاب
ماناقشته لبست عبايتي ونقاب وركبت مع عمي وعمتي والبنات وعماد بروحه بيجي متأخر وصلنا وانا ع أعصابي خشينا وسلمت ع بنتين قمحيات مملوحات وامهم واقفه بجلابيه فخمه اما حوشهم مانحكيلكم ..فيلا فخمه من دورين ف قمة الفخامه ريحت الحوش البخور الخليجي مع الوشق قمعزت وانا ع نار وينه خطيبة عماد ..
من حظي قمعزت جنبي وحده اسمها تركيه ثرثاره قلبت الدنيا بالهدرزه ضاع الوقت معاها كانت مسافره لاوربا تذكر ف عيوبها وميزاتها وانا مركزه معاها باهتمام ﻷن فيه وحده مركزه فيه تقول طاعنتها بموس ولا مفريتها بكلاشن 😂 ومقمعزه ع قلبها سألت تركيه من البنت صاحبة القفطان الابيض ؟
قالت بعدم اعجاب : هذي منى واختها سعاد
قلت باستفهام : اين وحده خطيبة عماد ؟
《بصراحه توقعتها منى ﻷن عمتي ديما تمدح فيها وطلعت حليوه البنيه》
زوجي مغرور 16
تركيه بضحكة هزوه : لا ياحنه خطيبة الضابط سلوى مازالت ماجت هذينا خواتها.. شفتي يابتي هالوقح مافي وجهه خير تزوج وحده م الشارع
بصراحه نصدمت ديما الحكي ع منى وطلعت سلوى هي خطيبته ..عمرهم ماجابوا سيرتها ..اكيد زعلانه ﻷني خربت ع اختها ..واقسم لو خواتي هنا مانضمن تصرفهم بذات فراوله ياحبها للانتقام ..لكن لحظه قالت ف المقطع الاخير وحده م الشارع ؟!!
قلت وانا خانقتني العبره لكن مسكتها : ومن قالها
تركيه بثرثرثها وحماستها : امه قالتها كانت هنا بعد زواج عماد بيوم واعتذرت من اختهت وامي قاعده عندهم وتقول ان ام عماد تقول ولدها ف الجامع لقى راجل يبيع ف بناته اللهم احفظنا .. ففار دمه وتقدم وخطب وحده يقول ياخذ فيها اجر ..كان خلاها لغيره يفزع لها .. لا وتقول امه انه رفض يشتري لها ذهب او يسكنها ف حوش بروحها يقول ماتستاهل لكن امه اجبراته يشتري لها ذهب عالاقل ..لان البنت ماكان عندها هل فلازم تفرح كيف اي عروس ع الاقل بذهب ..وشوفي أمه شرت لها الذهب ..خاطري نعرف شنو شكلها عروس عماد ؟يقولوا اليوم جت
قلت وانا خاطري نرفع ايدي ونعطيها كف : تخسي والله
سكتت مصعوقه م ردي
وانا مندري ع روحي ايش قلت طلعت مني هالكلمه وكل من المقمعزين سكتوا وصرت محط للانظار من حظي كلهم بنات فش صبايا كبار نضت ودمعتي ف عيني الله ياخذه هو وهله ..انا غبيه طاوعته وجيت ..واخرتها صار اللي صار ..خذيت عبايتي وتليفوني ف ايدي وبرن عليه هالواطي اللي شوه سمعتي يجي ياخذني ونمسح به الوطا..وقبل نطلع خبطت ف وحده وطحت..بنت حنطيه مع شعر برتقالي لامع مركز الصبغه ف الوسط شكله مضحك وانف طويل مكسور من الوسط لكن واضح وحده ظريفه من رسمة وجهها وضحوكه ..مش جديه ..
مسحت دمعتي ونلم ف شنطتي : اسفه اعذريني
مدت ايدها وتمسح ف دمعتي وتحكي بصوت هادي : ليش تبكي حد إغلط فيك ؟
قلت وانا بس بنطلع من هنا : بنطلع من هنا
قالت بنبره فيها حزم وسلطه : أطلعي ..بس نوضي وتعالي معايه..تخليش الصبايا يشوفنك هك
ساعدتني انوض كانت اطول مني وأعرض مشينا للمطبخ قمعزتني ع الكرسي وعطتني كوب اميه وقالت بضحكه : لو تشوفي وجهك تموتي ضحك
طلعت المرايه م شنطتي ..فعلا رايح فيها
قالت لي بانبهار : وااااو ظل بودي شوب صح
قلت وانا نواسي ف مكياجي والنفسيه زفته لكن هالبنت عسل : اها..لو عجبك مايغلى عليك
قالت بضحكه : تسلمي يارب ..تطلعي من حوشنا تبكي وناخذ مكياجك شينه هذي
ابتسمت غصب ..خشت عمتي المطبخ وع وجهها انزعاج وهي تكلم بالتليفون وراها عبير وبشرى وبنات اختها قالت بحمق لهم وهي تسكر التليفون : بسرعه انتي وياها امشن جهزن السفر عماد مولع يقول بسرعه !!
استغربت هضا ف حوش العرب ويضيف ليش ؟
قالت البنت : خلاص نحن طالعين
وقفت جنب الدولاب ومسحت اطراف فمها وزادت روجها البرتقالي وحركت راسها ولبست ايشارب كان ع كتفها وفتحت الباب الثاني للمطبخ وطلعت ووراها عمتي والبنات وسمعت صوته غاضب وعالي وصوت ام شعر برتقالي يرد عليه بغضب كيفه هه حاله والله ..
هديت أعصابي نوعا ما وقررت نتعشى معاهم وكأن ماصار شيء وبعد العشا نروح معاهم الحوش ونتفاهم انا اكيد المنحوسه الوحيده بين خواتي لو هنا مكاني راهو قلبن الدنيا الفوقي ع اللوطي مش انا صابره وساكته ع الإهانه ..
رديت قمعزت مكاني الاول وقمعزت ساكته ع جنب ناضوا كلهم للعشا جبرت روحي نتعشى معاهم حسيت روحي ناكل ف التراب عيون الكل عليه اوف عمرهم ماشافوا انسانه غريبه عليهم ..لا أكيد يقولوا هذي البنت اللي مشريه م الجامع ..نعنك حطيطه وعظامك في برويطه ياعماد ..بعد العشاء رديت للصالون وأخيرا انتبهت عمتي اني قاعده وحدي قالت بدهشه : ياامي كنك مقمعزه وحدك ..نوضي قمعزي مع البنات وسعي خاطرك بالتهدريز
نضت مش عشان كلامها لا ﻷني مش طايقه وجهها نخاف ننفصل عليها قدام العرب ونطلع اللي مخبيته يعني تلمع صورة ولدها ع حساب سمعتي تشري لي ف الذهب وترطبلي ف لسانها ..ونا اللي نخدعت فيها ..دورت ع البنات طلعت من باب المطبخ اللي طلعن منه البنات قبل العشا مقمعزات يهدرزن قبل نطلع سمعتهم
بشرى : سلوى شنو هالصبغه الحلوه
بحتت عشان نمتع نظري بسلوى هانم وانصدمت ﻷن سلوى كانت ام شعر برتقالي قمعزت جنب الباب ونا اراقب فيها ..
قالت بضحكه ومرح : اصلا اللون الاصلي أشقر ..لكن باتي شافه قالي شبتي يابنتي وانتي صغيره ..فحنيته قعد احمر..ومع الغسل راح اللون وصار اورنج ..
ضحكت م قلب عليها وع تدرج الالوان دمها خفيف وحرام واحد ثقيل دم كيف عماد يخطبها ..رن تليفوني وكان عماد سبحان الله ادوي ع القط يجيك ينط ..
عماد :السلام عليكم
ابتسام : وعليكم السلام
عماد : بسمه ..يالله اطلعي انتي وامي
ابتسام : باه
عماد : بسومه ....
سمعت صوته يقول ف كلام لكن قفلت الخط ف وجهه ونضت ندور ع عمتي نادتني بشرى : ابتسام ..منو كنتي تكلمي ؟
قلت وانا نهرب من نظرات الكل : عماد 《رفعت عيني لسلوى 》
تركيه مقمعزه تغير وجهها اما سلوى فشهقتها حبستها ف صدرها وسكرت عينها بحركه عصبيه ...