Legend of Divine God [Vol 3: Cold War]

Chapter XVII

Chapter XVII: Knowing the truth

Kinaumagahan sa Alchemist Association, lahat ng mga miyembro nito ay abala pa rin sa kani-kanilang ginagawa.

Dalawang araw na ang nakararaan simula noong ipabatid ng Adventurer Guild ang balitang buhay si Finn Doria. Kakaunti lang sa buong Alchemist Association ang nakakaalam dahil ang iba ay wala namang karapatan na malaman ang kamangha-manghang balitang ito.

Sa isang silid, isang magandang babae ang nakaupo habang ang kaniyang sampung daliri ay magkakadikit. Nakasuot ito ng magarang berde na bistida at mayroon itong kaunting kolorete sa mukha.

Makikita sa kaniyang ekspresyob ang labis na pag-aalala at pag-iisip. At ang magandang babae na ito ay walang iba kung hindi si Elder Alicia.

Kahapon lang, nakatanggap si Elder Alicia na nawawala sa kaniyang silid si Hitch Dreo. Hindi naman ito humingi ng pahintulot sa pamunuan ng Alchemist Association kaya naman imposibleng nag-eensayo ito ng pangmatagalan.

Mahigpit din ang mga gwardyang nagbabantay sa tarangkahan at sigurado namang hindi makalalabas ng basta-basta ang mga core members. Higit pa roon, kilala ni Alicia si Hitch Dreo, sumusunod ito sa lahat ng patakaran ng Alchemist Association at pinapahalagahan niya ang opinyon ng mga Elders lalong-lalo na ang kay Association Master Morris.

Gayunpaman, hindi lang ito ang gumugulo ng sobra sa utak ni Elder Alicia. Bilang pangalawa sa pinakamaimpluwensyang Elder ng Alchemist Association, nakatanggap din siya ng balitang buhay at nagbalik na si Finn Doria.

Nakaramdam ng kaunting pag-aalala si Elder Alicia dahil wala siyang naitulong na kahit ano sa Azure Wood Family. Gusto niya talagang tumulong ngunit sangkot ang Crown Prince sa digmaang ito. Kahit na isang Alchemy Master si Association Master Morris, na kaniyang Guro, hindi pa rin maikukumpara ang impluwensiya nito sa Crown Prince. Kaya naman hindi sila maaaring makialan dahil wala naman silang ugnayan sa Azure Wood Family.

Tok! Tok! Tok!

Habang nag-iisip, bigla na lang napabalik sa kaniyang ulirat si Elder Alicia nang marinid niya ang ilang malalakas at magkakasunod na katok. Naramdaman niyang seryoso ang bagay na ito kaya naman agad siyang tumayo at binuksan ang pinto.

Agad na bumungad sa kaniya ang Punishment Elder ng Alchemist Association at malinaw na mababakas ang sobrang pagkabalisa sa mukha nito.

"Elder Wan balisang-balisa ka. Mayroon bang problema?" nagtatakang tanong ni Elder Alicia sa lalaking nagngangalang Elder Wan.

Pinagpawisan ng sobra si Elder Wan at hindi ito makatingin ng diretso kay Elder Alicia. Agad itong yumuko at nagwika, "Elder Alicia...! Ang iyong Guro... Si Association Master Morris ay lubhang napinsala habang patungo siya sa palasyo! Hinatid siya rito ni Lord Helbram at wala pa rin siyang malay hanggang ngayon!"

Natigilan si Elder Alicia nang marinig niya ang mga salitang binitawan ni Elder Wan. Agad na bumalot ang sobrang gulat sa kaniyang mukha. Hindi siya makapaniwala na mayroong mangangahas na umatake sa kaniyang Guro na isang 3rd Level Sky Rank! Higit pa roon isang Alchemy Master ang kaniyang Guro! Hindi masamang sabihin kung walang mangangahas sa buong Sacred Dragon Kingdom na atakihin ang kaniyang Guro dahil ito ang pinakatanyag na Alchemy.

Tumingin siya sa mata ni Elder Wan at balisang nagtanong, "Elder Wan, totoo ba ang sinasabi mo?! Pero.. Asan ang aking guro?!"

Nabigla naman si Elder Wan sa biglaang pagsigaw ni Elder Alicia. Agad siyang huminahon at mabilis na naglakad paalis sa lugar na 'yon.

Sinundan naman siya ni Elder Alicia hanggang sa huminto sila sa isang silid. Agad na binuksan ni Elder Alicia ang pinto at agad na inilibot ang kaniyang paningin sa isang maliit na silid.