السر

1

الووووه ايوة يا امي انتي قلتي لي اجيب بصل وتاني شنو ؟
_الووووو ... الوووو .. يا سجمانه ّ
اي يا امي سامعاكي قلت ليكي اجيب شنو تاني مع البصل ؟
_الوو..وو..وو يااا بت
يا امي والله سامعاكي ياخ اتحركي في حته فيها شبكة ..
_البت الغبيانه دي اخير اقفل
يا امي انا سامعاكي كويس الووو الووو
ااااخ قفلت 💔
طيب حتسوي شنو يا زينب ، ااف ياخ حفضل طول عمري غبيه و خايبه شوية طلبات ما قادرة عليهم اوف ياخ اتصرف كيف اسي بصل وتاني شنو ، بصصل و ... و .. ليمون ! لالا ياخ ما قالت ليمون ، ايوة ايوة عجور ! ياخ برضو لا بسم الله " اللهم رب الضاله رد لي ضالتي ، اللهم رب الضاله رد لي ضالتي " * باك فلاش *
يا ابوي انا انت عارف انا نمن اكبر نفسي ابقي طياره ، هههههه لكن يا زنوبا البنات ما بقبن طيارات ، الطيارات ديل الرجال ، والبنات مضيفات ، لالالا يا ابوي انا بث عايزة ابقي طيارة و اجيب ليكم قروش كتييييييررررررة
بعدين يا ابوي انت مش وعدتني تشتري لي عجله ، يا بتي ، انتي بت تلعبي بالعرايس و تسرحيهم و تلبسبهم ، العجلات والعربات للاولاد ،بس انا بحب اللعب بيهم ، ليه ما تبقي زي اختك و تلعبي بالعرايس و تلبسي الفساتين ، ابوي انت بس قول ما عايز تجيبا لي ، بجيبا ليكي بعد ارجع من السفررر ، هيبيييبه 👏 يلا انتي اكبري لينا و الباقي كلو هين ، ثمح ، انت عارف يا ابوي قبيل رسمتا رسمة حلوة شديد المعلمة عملت لي فيها نجمه كابيييييرة، وريني ليها ، امممممم
ما متزكرة لكن ختيتا وين ، سمح قولي وراي ّ"اللهم رب الضالة ، رد لي ضالتي "
* نرجع للاحداث *
اااااخ يا حليلك يا ابوي ، يا الفتا خليتنا ، ما معروف حي ولا ميت ، ربنا يرحمك و حلقاك يا ابوي اوعدك وين ما تكون انا حوصلك ،
( اعرفكم بي )
انا زينب عمري 18 سنة و تلاته شهور بس من كتر ما نفسي اكبر بسرعه بقول عمري 19 مرات 20 و بحب الكراتيه👊 و افلام الرعب ، عصبيه و بتاعت مشاكل و مسترجلة في تعاملي ، و دي غريزة فيني من صغري ، عندي اخوي اسمه اسامة عمرو 26 سنة معاق ( من غير تفاصيل المهم جليس كرسي متحرك) و دا بكر امي وابوي ، لانه امي وابوي بقربو لبعض و دي وحدة من مشاكل زواج الاهل ، و عندي اختي اصغر مني بي سنه اسمها اريج ، و اختي اكبر مني بسنتين اسمها هاجر ... تابعو

واقفه عند بتاع الخضار منتظرة الفرج واتزكر امي دي قالت عايزة شنو و انا كرهتي المراسيل بكرها ، واقفه جو ولدين مارين بي جمبي ، واحد فيهم عاين لي و قال لصحبو " وووووااااااشناتك " انا بعد شفتك يا احمد كرهتا النضارات ، ياخ شناتك دي ما لاقتني في (ناشينوال جوغرافيك ابوظبي)=قناة الحيوانات .. طبعا انا عرفتا ان الكلام دا ، و ابشركم عارفه و مقتنعه ان الشمبانزي احلا مني و ما فيني ذرة انوثة شكلياً كداا و بعد دا كلو واثقه في نفسي و علي العلي قليلة ادب ولساني طووويل ، قعدت اضحك قلت ليهو و مقارنتاً بالقرود رايك في الموضوع شنو ؟ قال لي ااخ ظلمتي القروود ،
م عارفه ليه حرقتني وانا الرديت ليهو في حين ان كان ممكن اطنشهم ، بس و مشيت علي الولد دايرة ادقوو كان ما حجزونا وعادي بمد يدي ، لمن انا سكت و هديت هو رجع اتكلم تاني وحاول يستفذني ، يعاين لي هو وصحبو و يضحكو زي الحاجه المقرفه ، انا عارفه حقيقه نفسي لكن الاستفزاز لمن يجي من ولد والله حارة ، لان مهما كنت انا كدا بس جواي أنثى و ممكن تتكسر ،
قبلت منهم و لقطت لي خضار عشوائي
ورجعت البيت ، و دموعي في عيوني ، رنيت الجرس ، فتح لي زول انا بكرهو شدييييد(حتعرفو لقدام)
خشيت من غير لا سلام لا كلام ، بقيت بنادي في امي ،
يا اميييييي اميييي ، جاتني مارقه بالمفراكه ، هي بسم الله يمة في شنو
في شنو شنينه كم مرة كلمتك ما تخشي لي البيت دا بالزفت الفي رجلك دا كله زفت و بلاوي ، امشي انجري و امسحي اثر رجلك دا ، طيب براحه هدا قلعتووو
م حسيت الا بالمفراكة في نص راسي ،
قالت لي ما هنا يا بقرة يا ولادة الندامة الله لا جاب باقيكي ياخ ،
حتكبري و تعقلي و تبقي مرة و ست بيت متين انا ما عارفة ، استغفر الله يا رب ، سمعت صوت بيقول : هاها مش لمن تبقي شبه البنات اول ، اتلفت لقيتو الوش العشت سنين معاه تحت سقف واحد بكرهو و بيكرهني والاتنين عارفين كدا كووويس ،
قلت ليهو ما تدخل ! امي هرشتني قالت لي احترمي عمك ، طوالي شلت جزمتي في يديني و مشيت ، مسحتا و نضفتا مكان وسختا ، و خشيت الغرفه ، الغرفه دي متقاسماها انا و اريج اختي الاصغر مني ،
خشيت استحميت و صليت ، جات اريج داخله و انا مارقه ، قالت لي دا شنو دا اقيفي اقيفي ، امشي لملمي ملابسك و حاجاتك دي الغرفه دي ما جيتي لقيتيها كدا ،
نضافه عارفنك ما بتنضفي قلنا خير ، كمان حتوسخي لا كدا اوفر .. ( طبعا اريج دي في عقليتا واسلوبا و اهتماما بنفسها البشوفا بقول هي اكبر ، و هاجر برضوو ، انا بعتبر امي عندها بتين و ولدين بي😪 )
طبعا غلطانه م بقدر اتفاصح طوالي مشيت شلت حاجاتي و حشرتهم في الدولاب ، و هي واقفه تعاين لي ،
قالت لي كدا لميتيهم ، قلت ليها يا زوله مالك ختيتهم في دولابي م شغلتك بي ، قالت لي مقرفه ، قلت ليها ثانكيووو و طلعتا ..
مشيت لغرفه اسامة اخوي ، طبعا اسامة دا اقرب شخص لي هو سبحان الله من اتولد جليس ونموه كامل حمدلله ، درس جراحه طبعا حياتو كلها في الغرفه دي عشان ما يكلفنا بيمشي الجامعة في الايام المهمة بس و الامتحانات و عنده صحبه انس دا الانتيم بتاعو بيجيب ليهو الحاجات المهمة و كل خميس بطلعو و يرجعو ، باختصار هو صديقي و بحسو فاهمني و دايماً بعزز جواي الثقه ، المهم خشيت لقيتو نايم و الغرفه كاتمة ، فتحت ليهو الشباك اول مرة ينوم لمن العصر ، اسوومة اصحااااا
دا شنو الكسل دا ، اسااامة قوم غلاي انا ،
عاينت جمبو في التربيزه شفت صينيه و مويه و شريط من حبوب علاجات حقتو ، قلتا غريبه الجاب الحبوب دي شنو هنا و الشريط كامل ناقص حبتين ، وووووووب وووب ، اسامة اصحا ، اسامة
عاينت الكبايه لقيتا فاضيه جري مشيت مشيت المغسله الجمب غرفتو ، فتحت الماسورة لقيت المويه قاطعه ، جريت المطبخ مليت الكبايه مويه و جيت بيها جري لمن اتزحلقتا ، بقيت برشو بالمويه ، اسامة قوم
رفعت راسو بالمخدة و بقيت بضرب فيهو لمن بقي عين مغمضه و عين مفتحه ،
حمدلله حمدلله انك بخييير صحصح اسامة ، اسامة لالا ما تغمض ، فتح فتح
ايوة كدا فتح عيونك فتح ايوة عاين لي ، عاين لي شايفني ، اسامة شايفني ؟ اقيف اغسل ليك وشك ، اتكي اتكي
جسمك كلو عرقان يا اسامة الله يهديك بس كلمتك علاحاتك انا مسؤله عنها ، سنو بيخليك تاخدا براك و قبل مواعيدااا ، اسي لو لا قدر الله حصلت ليك الحاجه الحبوب دي قويه ، فجاه اتزكرتا ....
اسامة العلاجات دي كانت في التلاجه !!!!!!
وصلت لحد هنا كيف ؟؟

استككانة ~🐒

يتبع ...