السر

16

انس ، طوالي قام بس قبل ما يطلع قال للظابط محتاج نسخه من ملف القضيه عشان حوكل محامي ولازم الملف عشان بدرسو وما فضل زمن للمحكمة ، قاليهو ما تتعب نفسك و توكل محامي لاني حعمل المستحيل عشان تتحكم و تتأدب ، طبعا انا لساني دا يوم المو علي الا يكون اتقطع او اتخرصتا ..
قلت ليهو : ان نوائب الدنيا تدور و يلقي كل شامتاً بما شمت ، الله فوق وانا هنا وانت صفر علي الشمال ، يعني لو اتحاكمت واتسجنت ولا لا دي حتكون ارادة رب العالمين ما ارادتك انت ، و ثم تانياً العملتو معاي حتلقاهو في اقرب الاقربين ليك وانا ما بقوليك كدا عشان تراجع نفسك ، لالا انا بقوليك كدا عشان تستمو في الطريق الاغبر الانت بتمشي فيهو لان متاكدة وثقه في رب العالمين حيجي يوم و تاخد جزاك علي اكمل وجه ،، و كلام حقولو ليك قدام الناس دي ، لو انت فعلا راااجل هااا و قدر المكان الانت فيهو دا ، واجهني في المحكمة انا بأقوالي و ادلتي و انت بأقوالك و ادلتك بس الحقيقيه من غير ما تزيد ولا حرف بس بمجرد انك تنتقم مني ، و حتي لو حتزيد حاجة انا حقوليك زيد بس اتحداني و واجهني و ما خفي اعظم يا حضرت جنابك .. اتحركت براي رجعت مكان بقعدوني ،
طبعا خليتهم زي المسامير وكل واحد مذهول فيني ، بعد طلعو من عندي انس شال ورقه االكشف الطبي دساها ..
وانا هنا بفكر اصل لغرفة امي كيف ، الليله انتهي رغم طولو وانا اصلا من جيت المكان دا ما بتذكر اني نمت لي نومة مريحه ،،
فجاه الباب فتح ، و هو داخل عكس النور في ضهره ما شايفه كويس ، استغربت لانو الزمن متاخر شديد ، انا مع حركة الباب قمت قعدتا ، قام قال لي اخدي راحتك ، طبعا عرفتو من صوتو ، ما رديت عليهو
قرررب مني خطوة خطوة ، خطوة خطوة ، قام قعد قصادي ، قال لي تصدقي اني منبهر بيكي ، اغلبية البنات الاقيتهم و عرفتهم جبناء و بكاييين ، الا انتي رغم ان الحاصل ليكي دا صعب بس كنتي صبورة و قوية شديد لا و من اول وهلة هاجمتيني من غير ما تعايني انا منو ولا شنو ،
( لحفظ الحقوق : السر بقلم/سحرسمير)
انا معجب بشخصيتك و دا ما تفتكري بسبب كلامك انه هزاني ولا اثر فيني ، قبلت وشي منه قلت ليه يعني انت اسي مكلف نفسك و جاي لحد هنا و في المواعيد دي عشان تسمعني الكلمتين ديل ؟ ياخ والله سبحان الله صحي فارغه منك شكلك قاعد هنا ما لاقي ليك قضايا تشتغل فيها ف ما صدقت لقيتني صيدة قدامك لكن ابشرك وقعت مع الزوله الغلط انا ممكن بالكتير اتسجن لكن الدور و الباقي عليك حتفقد وظيفتك و سمعتك تبقي تحت مداس الناس ههه بغد كدا الا تشتغل قهوجي هههه ، والله الزول اتغاظ غيظ داير ينفجر ، بما انه تافهه و منحط ما كان عنده حل غير انه يمد يدو علي ، لالا ما يدقني انه يتحرش فيني ، قلت ليه و طبعا لان كلامي صح وانت صاحب شخصيه ضعيفه حتتجه للخطة B و اللي هي انك تحاول تخوفني و تعتدي علي و تستغل موقفي ،
والله الزول دا وقف عديل و نطط لي عيونه و طلع زي المجنون ، الصباح جااا
من 8 نادوني جا انس و اسامة و قالو دايرين يطلعوني بكفاله لحد يوم المحكمة ، و حيأجلو قضيتو لحد ما الحيوان داك يفوق لانو ابتدا يستجيب للعلاج ، في اللحظة دي الظابط دا كان نايم ولا مافي ولا شنو ما عارفه ، انا فرحتا فرح ما عادي ، رغم اني ما طايقه انس بس ما بنكر انه ما قصر معاي و قصة زواجو دي حارقاني شديد ..
طلعنا كأني محبوسه لي سنين فعلا الحريه ليها قيمتا .. اتحركنا و طلعنا علي بيتنا دخلنا بي باب اسامة ، خشبت غرفتو بالجد كنت متوقعه القي الغرفه في حالة لا يرسي لها بس لقيت العكس لدرجة انها مبخرة ، عاينت باستغراب قلت لاسامة ، انت منو المنضف ليك كداااا ، قال لي ريم و عيونو دي تلمع لمع ، ضحكتا كداا قلت ليهو ما ننحرم منها ..
قلت ليهم انا بمشي بهناك اشوف امي واخوااتي ، قلت لاسامة امي عارفه الحصل للزفت دا ؟ قال لي ايوة و قالو ليها انو حادث مرور ، طيب وانا ما سالت عني ؟
لا ما سالت انا كلمت ريم انها لو سالت تقول انك معاها قاعده يومين ، قلت ليهو تمام و انت عملت شنو في سفرك ؟
قالي مفروض كان يكون سفري يوم الاتنين الجاي ، بس اوراقي ما جهزت ، قلت ليهو يوم الاتنين بنحصل ، الليله ياداب اربع ، قال لي لا ما بقدر اخليكي براكي ولازم احضر المحكمة ، قلت ليهو ما تخاف علي انا زينب و قدرهاا ، المهم نتكلم بعدين عشان نفسي استحمي و انوم ، انس قال لي ، زينب بعدين بجيكي بعد المغرب ضروري نتكلم ، استغربت نتكلم في شنو و بالجد ما طايقاهو عديل ، قلت ليهو ان شاءالله .. مشيت و خليتهم
مشيت البرنده البيت فاضي و المطبخ كذالك ، و غرفه اريج فاضيه و هاجر فاضيه ، قلت دي فرصه حلوة ادخل غرفه امي و اشيل الاوراق العايزاها ، بس للاسف فتحت الباب لقيتا نايمة ، فمااا عندي حل غير اراقب الوضع ،، استحميت و صليت ركعتين شكر ، و رقدتا كنت قايله نفسي حرتاح في سريري بس للاسف الحصل معاي كله زي شريط الفلم احداثه ملازماني ، لمن نمت ..
فجاه صحيت بي ريم جمبي تبكي بكااا من الخلعه نطيت متر ....

استككانة🍉~

يتبع .......