السر

4

بقيت بعاين بخرمة الباب
لقيت قصاد عيني ، عين بتتاوق لي من نفس الفتحه .. انتو متخيلين الخلعه والهجمه ، وحات الله بقيت بكورك و بصرخ و بسكلب انا لو ما ماسكة في صلاتي و زاكرة ربي ، كان لبسني شيطان ، في زمن زي دااا ..
و زول يتاوق لي وانا عريانه ، بس بعد صرختا اتزكرت اني في الحمام و بقيت اقول اعوز بالله من الخبث و الخبائث ، دايرة اجن ، و حاتكم بيتنا دا من غياب ابوي بقي كلووو قسوة مافي زول قلبو علي التاني ،
الصريخ الصرختو ، دا كان لم الحلة كلهااا ، لكن في بيتنا زول عبرني مافي ، احساس انك في بيتك بس مافي امان .. دا كان بالنسبه لي زي القوة البتدفعنني لاني اخد قرار مؤجلاهو لي مدة .. زكرت الله و غسلت جسمي من الصابون و برجف رجف لبست وخايفه اطلع و الله جسمي دا لمن منمل .. فتحت الباب و بقيت بتاوق وازكر الله ، بس قويت قلبي و جري دخلت الصاله و بعدها الغرفه و تربست الباب،
و جسمي دا بيرجف ، عاينت لاريج لقيتا نايمة و البيت زاتو زي المضلم ، قعدت ورا الباب في الواطه و بقيت ماسكة راسي و اندب و ابكي و حاسه بي برد و الحو اصلا ياداب المروحه تهوي علينا ، رجعتا فتحت الباب و ما لقيت الا رجولي مودياني غرفة اسامة ، اسامة اصلا بينوم علي النور ، ف غرفتو كانت منورة ، لقيتو نايم و علي الحيطة لقيت نفسي رقدت جمبو و غطيتو و اتغطيت و كأنو تلج و نازل علي جسمي برجف بس ، اقوليكم حاجه ، رغم ان اسامه جليس لكن بحس بالامان ، اكون جمبه خلاص مطمنة انه ما حتجيني عوجه ، بحسو ابوي ، بيزكرني بي ابوي ، بشم ريحة ابوي فيهو الله يرحمه ..
و نمت علي كدا ما صحيت الا تاني يوم الساعه 8 مساء و لسه راقده جمب اسامة و خاتي لي فوطة في راسي ، فتحت عيوني زي الفيهم شطه و صداع قووي ، قال لي حاسه بشنو ؟ لساني دا لمن تقيل ، عيوني م قادرة احركا اعاين ليهو ، قلت ليهو اخدت علاجك ؟ الساعه كم ؟ قالي ما تقلقي اخدتو اسي خليكي مني طمنيني عليكي ، قلت ليهو اعفي لي ضايقتك في السرير ، قال لي متخلفه بس ما ح ارد عليكي ، رغم ان مليون سوال جواي ، قلت ليهو ما وقتهم اسي ،،
وانت الجاب ليك الكمادات دي منو ؟ قال لي اريج اختك ، و ريم كانت هنا مقيله ، لمن رجعت البيت ، و قالت بتجي بعد صلاة العشا تسوقك معاها ، قلت ليهو تسوقني وين ي اسامة ؟ قال لي اخدي يومين غيري جو ، قلت ليهو ما بقدر ، و قمت حاولت اقعد سندني لمن قعدتا ، قال لي قصدك انا ؟ قلت ليهو اكيد انت و غير كدا عايزة اشوف موضوع قرايتي دا ، قالي بقيتي علي ال it ؟ شوف يا اسامة انا حقرا سمسترين مؤقتا لانو تبع التنسيق ، لو حبيت المجال بستمر ، و ف كل الاحوال انا مقررة قرار ،
قرار شنو دا ؟ ، اسي ما وقتو مصدعه راسي حينفجر ، حقوم اشوف لينا لقمة ناكلا و اخت تلج في راسي ، انا اكلتا ، اكلي انتي وبعدين الصداع من شعرك المنكش دا كل شعره في اتجاه امشي شوفي ليكي زيت ولا حاجه ختي فيهو ، بشيل ليكي الصداع دااا ،، ضحكت ومشيت ، الذ حاجه اني انسانه قنوعه و مقتنعه من جواي اني شينة ، بس يلا انا ما بعاين بالجوانب البتشوفني بيها الناس ، او النظرة المعتاده ، لا انا شايفه نفسي من جواي لشخصي انا مرتاحه و ما بهمني اذا كنت حلوة و لا شينه ، يكفي ان صحتي بخير و ما بعاني من اي امراض حمدلله ، احسن من غيري ،،
طلعتا و ماسكة راسي ، لقيت الفقر دا في وشي يعاين لي بقعر عينو و يضحك ضحكة خبث ، عملتا نفسي رايحه تماماً ، ما عندي حل غير ابلع لي ابلونج ولا ريفو و الحاجات دي في غرفة امي .. بقيت متردده امشي الغرفه ولا لا ، اخر مرة دخلتها متين ما متزكرة ، يعني بالجد حياتنا غريبه لدرجة انتو ما حتتخيلو اننا ممكن نكون اخوان شققه او امي دي الولدتني ، سبحان الله ،
اتوكلت علي الله و ناديت كتير علي امي نا ردت علي ، ناديت اكتر من مرة ، تاني قلتا يمكن نايمة ، مشيت علي الغرفه ...

استككانة~🐥

يتبع .....