السر

9

فجأة وقف العربيه دي انا قلبي وقف معاها ، قلتا بس العربيه باظت ..
سكتا و عيوني و اضنيني شغالات زي الرادار ، سكت مسافه و قال لي زينب تعالي اقعدي قدام ، قلت ليهو : منووووو
قال لي في زول غيرك ، تعالي قدام ، قلت ليهو لالا انا هنا مرتاحه والله يا انس ، قال لي يا بت انتي عويره ، قلت ليهو لا بس اجي قذام ليه ، صراحه خفتا م عارفه ليه الزمن دا ما تثق في اقرب الاقربين ليكي ، قام هرشني
قال لي زينب تعالي قدام ، و حاتكم مع الهرشه دي جاتني بكيه كدا من وين ما عارفه ، فتحت الباب و نزلت ، و فتحت الباب الجمبو وقعدتا ، شال منديل و قعد يمسح لي دموعي انا عامله كدا 😳 اكيد دي ما انا البحصل معاي كدااا ، بس قلبي دا شغال دربق زي دلوكة انصاف مدني و الخوفه كتلتني ، قام اخوكم في الله ساق العربيه و مبتسم و سايق ، في سري قلتا ليهو اهااا ، طيب وانااا ؟ خلاص كدا العرض انتهي ؟
اسي جابني قدام و خالعني الخلعه دي و مطلع عيني مالك ، و كلو كوم والتصرف العملو معاي دا كوم تاني ، يا جماعه انس دا حاجه كدااا يعني سبحان الله حلاة و سماحه و وجاهه زاتا غريبه ، كلهم ريم و يوسف الله يحفظهم ، وصلني البيت ، و قال لي تصبحي علي خير ، انتظرني لحد ما دخلتا وانصرف ، داخله البيت و انا اعصابي بايظه خالص ما قادرة اسوي حاجه مبتسمة و شارة سنوني برا ، مشيت اطمنت علي اسامة و مشيت استحميت وصليت العشاا و رقدتا ، و هاجر مافي في الغرفه ، بفكر في انس سبحان الله قدامي ليهو سنين و قمتا قدام عيونو عمري ما فكرت ف حاجه تجاهو ويمكن تصرفو دا عادي بس انا المزودا الموضوع ، اصلا انا منو البعاين لي بلا اوهام ..
غمضت كدا تلفوني رن عاينت لقيت ريم بتطمن علي ، قفلت منها و اتصل علي انس ، استغربتا ، رديت ليهو ، قال لي كيف وصلتي ، قلت ليهو بخير والله ، و سكت ، قلت ليعو انت كويس ؟ قال لي في احسن حال ، ودام الصمت لمدة 60 دقيقه ، قلت ليهو انت كدا مرتاح و رصيدك حينتهي ، قال لي فعلا مرتاح قلت ليهو طيب سكتا ، بس فضولي منعني اسكت ، قلت ليهو تصرفك القبيل داك محيرني ، قال لي والله حبيت بس تكوني جمبي ، قلت ليهو وبعد جيت جنبك الحصل شنو ؟ قال لي نفسيا مرتاح و ما تساليني ليها عليكي الله ، قلت ليهو حاضر ، فجاه الباب فتح ، عاينتا لقيت الحيوان دا داخل بملابسو الداخليه و بقيت بصررخ والخط فاتح ..
قمت علي حيلي و قلت غبيه انا و قفتاا قرب مني ، قالي : جيبي الولاعه ، قلت ليهو ما عندي ولاعات ، قال لي بالذوق انا قلت ليكي جيبيها عشان ما اتصرف معاكي تصرف ما حيعجبك ، قلت ليهو هيهات ، اعلا ما في خيلك اركبو ، ثم تانيا خلي عندك نخوة واحترم شيبك والله كان نفسي اقوليك انك قدر ابوي لكن كوني اماثلك بي ابوي دي زاتا اهانه ليهو ، و امشي انسترر ، و مشيت قعدت ، سمع صوت كركبه في الباب جري النا بختشي ، مشيت عاينت لتلفوني لقيت لسه الخط فاتح ، ختيت التلفون في اضاني لقيت
صوت هوا كداا ، بقيت اقول الووو الوووو
ما رد علي قلقتا ، لمن الخط فصل اظن رصيدو انتهي ، جات هاجر داخله فتحت ضلفتي تاني و بقت تقلب ،
قعدت استغفر مزاجي م رايق لشكل ، قلت ليها هاجر الله يهديكي عايزة شنو انتي من دولابي ؟ قالت لي ما تتكلمي معاي ، قلت ليها لاحظي اسي من البتمادا و يغلط ، قالت لي جيبي الولاعه ، قلت ليها ههه ليه
عشان اكتشفتي انها ولاعه ابوكي خايفين اكلم امي عن عملتو مش كداا ، قالت لي زينب اديني الولاعه ، قلت ليها هاها وانا اولع سجايري بشنو تاني ؟
دقايق مافي ، تلفوني بقي ينور و يطفي ، عاينت لقيت انس ، متصل نرتين ، لمن ما رديت لقيتو مرسل لي ،
تعالي صالون اسامة ،، اتخلعتا الجابو شنو ،
قلت لي هاجر ما تتعبي نفسك م حتلقي حاجه و ابتسمت ليها باستفزاز و طلعتا ،
مشيت الصالون و قلبي وجسمي كله بيضرب
عاينت لقيتو في الحوش المنو ومدخل الصالون ومنو الغرفه ، شفتو قلت ليهو ثواني مشيت علي اسامة لقيتو نايم غطيتو ،
و صلحت طرحتي و مشيت لي انس ، انا ملخوعه ما اكذب عليكم ، عاينت ليهو لقيتو متعصب داير ينفجر لمن عروق وشو بارزة ، قلت ليهو الجابك شنو اسي ؟
سكت قال لي عمل ليكي شنو ؟ هبشك ؟ لمسك ؟ مدو يدو عليكي ؟ وريني ما تسكتي كدااا ، انا مخلوعه بالجد ، قلت ليهو روق يا انس هددني بس و طلب الولاعه و لو ما ناس امي جو في الوقت المناسب الله اعلم كان حصل لي شنو ، حمدلله ،
قلت ليهو انت جيت ليه ؟ قال لي كيف ليه يعني انتي بتهزري ، قلت ليهو وطي صوتك اسامة نايم ، قال لي انا حأبيت هنا مع اسامة الليله ، قلت ليهو طيب اكلت حاجه ؟
قال لي لا ما داير ، قلت ليهو يلا تصبح علي خير ، جيت امشي مسكني من يدي ، بقت لي تقيلة اتلفت ليهو واعصابي تلفت ، قلت ليهو انس انا بخير ما تقلق بعدين اختك قويه ههه
من مسكتو لي ما حسيت الا بي انفاسه ، جراني علي حضنه في رمشه عين ، انتو عارفين احساسي مزيج غريب انه انا في المكان دا ما بصدق و انس ، طيب ليه عمل كدااا ، ليه طول عمرنا نظرتنا لبعض اخوان ، معقول يكون عندو مشاعر تجاهي انااا !!!

استككانة ☕~

يتبع .....