السر

18

بس امي بفت تفتح في الدواليب
و بتفتش في حاجه بطريقه هستيريه ، الله ينعلك الله انتقم منك يا كلب ، ان شاءالله تموت يا حيوان الله ياخد ، و تبكي ، بس اتصلت بعفاف ديك تاني و تبكي ، امي قالت ليها الكلب دا سرق اخر غويشتين فضلو لي يا عفاف ، انا اسي اصرف من وين
حتي الاوراق اختفت من مدة و ما عارفه داسيهم وين ، دي الحاجه الوحيده الحتثبت ميراث اختي ..
*باك فلاش*
تتزكرو يوم الحادث حقي ، يوم انس كلمني امشي اقابل البناين و اتفق معاهم علي الحاجه العايزاها ، لمن انس جاهو اتصال مستعجل ، قالينا برجع ليكم ، و علي اساس حمشي القي بناين ما بنا واحد زي ما لقينا ، تتزكرو لمن سألت البنا قلت ليهو وين الباقين ؟ و قام قال لي حيجو ، في حين انه انس قال لي البناين بكونو منتظرنك في الارضيه، و لمن سالتو عن ريم قال لي طلعت بالتحديد ........
و انه بعد الحادث اختفي تماماً ، ريم قالت ما شافتو و البناين الاتلمو فيني كانو بناين تانين ، و تتزكرو يوم الظابط جا و قال في بنا واحد شهد ضدي ان انا كنت بقوم بعلاقه🔞 مع الحيوان دا ، و اني لزيتو متعمدة !!!!!!!!!!! عايزاكم تربطو الاحداث دي مع بعض انا قربت امسك طرف الخيط ،، * نرجع لاحداثنا* .. انا كتمت بي جوا الدولاب ، وتقريبا قربت افهم تعامل امي القاسي دا سببو شنو بس برضو ما فهمت ، مافي ام بتقسي علي اولادها بالطريقه البشعه دي ،
و علي حظي الحلووو ، امي طلعت تستحمي
بعد اتاكدت انها بعدت عن الفرفه تماماً انا كان كل هدفي اطلع من الغرفه دي بأسرع وقت
( لحفظ الحقوق ،السر بقلم /سحرسمير)
، بس طلعتا علي طرف اصابع رجلي بقيت ماشه ، و جري جريت علي البرندة ، ومشيت لاسامة ، لقيتو مبسوط قلت ما حنكد عليهو فرحتو ، جاتني ريم من وراي قالت لي غاتسه وين م خليت ركن في البيت ما فتشتك فيهو
، سرحانه و ساكته والله ولا رديت عليها ،
طلعت علي غرفتي واغرب حاجه هاجر دي مختفيه هي واريج ، مشيت قعدت في السرير جاتني ريم مسكتني وتضحك قالت لي اسامة اخيرااااً قالها لي يا زينب انا فرحانه عايزة اطير من الفرحه ، وانا مافي عندي اي ردة فعل ، لاني سرحانه ومخي ما معاي
قالت لي زينب انتي كويسه ؟ قلت ليها قلتي شنو ؟ قالت لي سرحانه وين ياخ ، قلت ليكي اخيراً اسامة قالها لي ، قلت ليها بجد والله فرحت ليكم و ربنا يسعدكم ان شاءالله ..
تلفوني رن ، عاينت لقيت انس
قلت لريم دا انسسي ، قالت لي ايوة ايامكم ، قلت ليها ايامنا في شنو انتي عويرة ؟
قالت لي ردي طيب قبل يفصل ، فعلا رديت
قال لي جاهزة ؟
قلت ليهو جاهزة في شنو ؟ قال لي كيف يعني في شنو زينب انتي بتستهبلي ؟ قلت ليهو ما تعلي صوتك علي ،
قال لي اسف ، انا قبيل كلمتك اني عايز اتكلم معاكي و حجيكي بعد المغرب ، قلت ليهووو اووووف والله نسيت يا انس اعفي لي ،
قال لي تمام لو ما حابه ممكن ناجلو ، قلت ليهو لا مسافه توصل حكون جاهزة باذن الله ، مشيت لاسامة استأذنتا منو ، قال لي عادي اطلعي معاهو وهو مخلوع في اني بستاذن منوو ، رجعت الغرفه لقيت اختكم في الله مطلعه لي ملابس وحالفه تمكيجني وانا راسي والف سيف لا يعني ، لا و عملت الفي راسي ، لبست زي ما كل مرة بعمل و انتظرتو لمن جااا ..
( رواية السّر / بقلم .. سحر سمير )
جاا ، ضرب بوري ، وطلعت ليهو
قبل اركب لقيت هاجر راجعه من برااا ، و واقفه لانس بشباك العربيه ، و تتونس و تتظارف وهو اصلا بيرد ليها بالقوة ، قالت ليهو رقمك ، قاليها اكتبي 09 .....، انا ما عارفه زعلت زعل ما عادي ، قامت قالت ليهو طالع وين مع شنشونة دي ، قاليها احترمي نفسك ، عاينت لي و مشت ، قال لي اركبي ، فتحت الباب الورا ، قال لي تعالي قدام ،،
ركبت قدام ، ساايق و طول الطريق ساكت و صاري وشو ، لمن وصلناا ، كافتيريا كدا،، طلب لي من غير ما يسالني و اتفاجات انه طلب لي منقه عرف كيف بحبها ما عارفه ،
وانا ساكته و هو ساكت ، قلت ليهو الزمن يا انس ومن جينا في حالة صمت ، كنته عايزني في شنو ؟
سكت مسافه و قال لي : انحنا لازم نتطلق
..........

استككانة🏃~
توقعاتككم 👇

يتبع ......