أنا لك .. ولكن! الجزء الثالث (تحت التعديل الجذري)

الفصل الحادى عشر

أدهم بضيق وهو واقف قصاد مازن:"إحكيلى بقا روحتوا فين وعملتوا إيه؟"

مازن بحزن:"معرفش أنا بس كنت مشغول فى التفكير وبعدها دورت عليها مالقتهاش جنبى."

أدهم بضيق:"غبى."

آيه:"خلاص يا أدهم."

أدهم بضيق:"ممكن تسكتى دلوقتى."

آيه:"طب يا حبيبى ممكن تهدى بس عشان نعرف نفكر."

أدهم بغضب مكتوم:"أهدى؟!! ، هو إنتى مش مستوعبه إن دى بنت أختى إللى أنا مربيها على إيدى؟، يعنى دى بنتى مش بنت أختى بس"

مازن بحزن:"أنا فعلا آسف يا بابا أنا..."

آدهم بضيق وهو بيديله ضهره:"معرفتش تحافظ على الأمانه يا مازن ، خيبت ظنى فيك."

آيه:"يا أدهم أنا السبب، أنا إللى سبتهم وطلعتلك..."

أدهم بضيق وهو بيقاطعها:"مهما حصل مكنش ينفع يخرجوا بره الفندق من غيرنا."

آيه:"طب هنعمل إيه؟"

أدهم :"هروح أدور عليها ، خليكوا هنا."

آيه:"لا هنيجى معاك."

أدهم بضيق:"كفايه واحده ضاعت مش هستحمل حد تانى يضيع."

آيه بضيق:"أنا مش عيله صغيره يا أدهم، إحنا هندور فى مكان وإنت هتدور فى مكان ، ونتابع مع بعض وإللى يلاقيها يكلم التانى."

أدهم بإستسلام:"طيب ، بس خدوا بالكم من نفسكم كويس ، إحنا بعد نص الليل."

آيه:"ماتقلقش، إحنا فى الأقصر يعنى أكيد مافيش حد هينام فى وقت زى ده."

أدهم بتنهيده:"أتمنى."

آيه:"يلا يا مازن."

أدهم:"مازن."

مازن وهو منزل عيونه فى الأرض:"نعم؟"

أدهم بتنهيده:"ماما أمانه عندك خد بالك منها كويس جدا، ماشى؟"

مازن بإبتسامة فرحه وهو بيرفع راسه لأدهم:"ماشى."

بدأوا يتحركوا كل واحد فى مكان...

آيه:"إنت متأكد إنكم كنتوا هنا؟"

مازن:"أيوه يا ماما ، كنت سرحان مش مركز هى قالت إيه."

آيه بتفكير لنفسها:" يعنى أنا لو مكان ملك ولقيت مازن مش مركز معايا هعمل إيه أو هروح فين؟"

مازن بضيق:"كالعاده هتتقمصى منى وتاخدى جنب."

آيه بضحكه مكتومه:"بالظبط."

مازن:"ثوانى كده!! أنا غبى."

آيه بإستفسار:"عرفت هى فين؟"

مازن بتفكير:"تقريبا لما كنا بنتمشى وأنا كنت سرحان كانت جابتلى سيرة إنها عاوزه تجيب أيس كريم."