أنا لك .. ولكن! الجزء الثالث (تحت التعديل الجذري)

الفصل الثانى عشر

وصلوا الفندق بعد يوم طويل...

أدهم لملك:"أنا حابب أتكلم معاكى شويه يا ملك، تعالى ورايا."

ملك بتوتر:"حاضر يا خالو."

أدهم قبل مايخرج من الأوضه:"مازن."

مازن:"نعم يا بابا."

أدهم:"هتيجى إنت كمان."

آيه بإستفسار:"طب أنا هعمل إيه؟"

أدهم بغمزه:"إنتى هتستنينى هنا."

آيه بخجل:" طيب."

ــــــــــــــــــــــــــــــــــــــــ

بعد فتره بسيطه كانوا قاعدين عند حمامات السباحه..

أدهم بتنهيده:"دلوقتى يا ملك أنا عاوز أعرف إيه إللى حصل؟"

ملك بتوتر:"أنا ومازن كنا بنتمشى شويه ، ولقيت واحد بيبيع أيس كريم قلتله ييجى معايا لكن مازن مكنش مركز معايا، أنا زعلت منه فمشيت وسبته وجبتلى أيس كريم من الفلوس إللى حضرتك إدتهالى، وبعدها جيت أبص ورايا مالقتش مازن موجود ، كنت عاوزه أرجع بس معرفتش أرجع إزاى فضلت ماشيه لحد ماوصلت لمكان بعيد عن الناس والدنيا كانت ضلمه جدا بس شوفته وساعتها صرخت وحضرتك جيت."

أدهم بضيق لمازن:"وإنتوا إيه إللى خلاكوا تخرجوا بره الفندق بليل فى وقت زى ده؟!!!"

مازن بتوتر:"أنا بس ماكنتش حابب إنى أشوف ماما وهى بتعيط، كنت عاوز أخرج من هنا بأى طريقه ، أنا آسف."

أدهم بضيق:"هتفضل تتأسف كده من غير ماتتعلم؟"

مازن بعد إستيعاب:" هاه؟"

أدهم:"حاول تفكر كويس قبل ماتعمل أى خطوه ، إنت المره دى فكرت بقلبك يا مازن مش بعقلك ، شوفت لما فكرت بقلبك إيه إللى حصل ، بنت عمتك تاهت منك ، وأنا كنت هموت ، عاوز أعرفك إن أى قرار هتاخده بعد كده هيأثر على حياة كل الناس إللى حواليك يعنى فكر كويس."

مازن:"حاضر يابابا."

أدهم بضيق:"وإنتى يا ملك ، مش عشان مازن مركزش معاكى يبقى تسيبيه وتتصرفى من نفسك ، إتعلمى وبلاش تتسرعى كده من غير تفكير."

ملك:"حاضر يا خالو، أنا آسفه."

أدهم بتنهيده:"أسفكم مقبول ، يلا نطلع."

ــــــــــــــــــــــــــــــــــــــ

كانت نايمه على السرير و حاسه بوجع خفيف فى ضهرها من الإرهاق إللى واضح عليها، إبتسمت لما لقته دخل الأوضه...

أدهم بإبتسامه:"إتأخرت عليكى؟"

آيه هزت راسها بالنفى ، قرب منها أكتر وقلق لما لقى وشها شاحب...

أدهم بقلق:"مالك فيكى إيه؟!"

آيه بتعب:"مانمتش من إمبارح بس."