أنا لك .. ولكن! الجزء الثالث (تحت التعديل الجذري)

الفصل الخامس والثلاثون

فى قصر المحجوب:

كانت خارجه من أوضتها وواضح عليها التعب الشديد، وبدأت تخبط على أوضة أروى...

أروى بقلق وهى بتفتح الباب:"مالك يا سلمى؟!!"

سلمى بتعب شديد:"بسرعه يا أروى خدينى عند ماما ، أنا مش قادره أستحمل أكتر من كده."

أروى:"حاضر إهدى طيب ، هطلب تاكسى وننزل بسرعه ، ماتقلقيش."

سلمى بألم:"بسرعه."

ـــــــــــــــــــــــــــــــــــــــــــــــــــــــــــــ

فى بيت سهير:

كان واقف مصدوم من إللى شايفه قدامه...

عمر وهو بياكل:"إيه يابنى إيه إللى موقفك كده ، تعالى مد إديك فى الحله معانا."

آيه وهى بتاكل:"أه يا أدهم ، تعالى المحشى حلو أوى ، خالتك سهير دى شيف عالمى."

أدهم بضيق:"إنتوا إيه إللى بتعملوه ده ؟ مش عيب تاكلوا من الحله؟ وكمان مش عيب تتكلموا وإنتوا بتاكلوا؟"

عمر:"ده محشى يعنى مهما كان فين هيتاكل."

آيه وهى بتدى صباع محشى لأدهم:"خد يا أدهم دوق صباع ورق العنب ده حلو أوى."

أدهم بضيق مكتوم:"فى خلال ثانيه واحده بس ألاقيكم إنتوا الإتنين بره ، بسرعه."

خرج من المطبخ من غير مايستنى رد منهم...

عمر بإستفسار وهو بيكمل أكل:"هو أدهم ماله؟"

آيه وهى بتاكل:"صدقنى مش عارفه."

عمر:"طيب."

آيه:"عمر؟"

عمر:"نعم؟"

آيه:"هو أنا وإنت كنا أصحاب قبل كده؟"

عمر:"يابنتى ده إحنا كنا بنخطط مع بعض كده دايما عشان أصالحك إنتى وأدهم ، ده أنا كنت متمرمط معاكم."

آيه:"طب كويس."

عمر بإستفسار:"كويس إيه؟"

آيه:"لا مافيش."

عمر بتنهيده:"طيب ، تعالى نطلع بره عشان أدهم مايتخانقش معانا."

آيه:"حاضر."

خرجوا من المطبخ وإتفاجئ بوجودها...

عمر بصدمه:"بسنت! إنتى إيه إللى جابك هنا؟"

بسنت بإحراج:"حبيت نتكلم شويه."

أدهم:"ممكن تدخلوا فى البلكونه طيب وتتكلموا؟"

عمر بتوتر:"ماشى."

دخلوا فى البلكونه وبدأت كلامها..

بسنت:"أنا آسفه ياعمر على إللى حصل."

عمر بإستفسار:"على إيه؟"

بسنت بتنهيده صعبه:"على الكلام إللى قولتهولك من غير ما أقصد، أنا آسفه أنا مش عارفه كان مالى وقتها ، بس أنا آسفه."