أنا لك .. ولكن! الجزء الثالث (تحت التعديل الجذري)

الفصل الثالث والعشرون

مدحت بضيق:"زى مانت سمعت كده ، وإياك حد فيكم يفتح سيرة الجواز دى تانى قدامى."

يحيى وهو بيقرب منه:"تعرف لولا إنى عامل إحترام للناس الكبيره إللى قاعده دى ، أنا كان زمانى رديت عليك بطريقتى يا محترم."

مدحت بسخريه:"ورينى هتعمل إيه؟"

منى ليحيى:"إهدى يابنى ماتتعصبش هو أكيد مايقصدش حاجه."

يحيى بضيق:"إنتى مش شايفه هو بيقول إيه ياماما؟؟"

منى:"ياحبيبى والله الموضوع قديم هو بس يقصد إنه مش هيتجوز تانى ، لإنه فى مشاكل دايما مع سهير بسبب موضوع الجواز ده."

يحيى بضيق:"يعنى عاوزانى أعدى إنه بيقول إنه لسه بيحب مراتى وأسكت؟!!!"

ادهم بعصبيه:"إهدى يا يحيى هو مايقصدش."

مدحت بتنهيده:"أنا آسف، هو أنا الكلام طلع منى غصب عنى أنا حقيقى ماقصدش."

يحيى بضيق:"لا يابابا حاسب على كلامك بعد كده دى فيها خراب بيوت خد بالك ، يلا ياسلمى نمشى."

سلمى:"يايحيى...."

يحيى وهو بيقاطعها:"يلا إمشى قدامى ، يلا يا ملك ، يلا يا عمر."

أدهم بإستفسار ليحيى:"هو مش إنت قلت هتقعد كام يوم؟"

يحيى:"خلاص غيرت رأيى ، عن إذنكم كلكم."

يحيى لمنى:"هبقى أجيلك أزورك يوم تانى يا ماما مع السلامه."

خرجوا من البيت وأدهم كان قاعد فى مكانه وبيحاول يمسك أعصابه..

سهير لمدحت بحزن:"ليه كده تفضحنا قدام الضيوف؟أنا خيبتى فيك كبيره، لسه بتحبها ومموت نفسك عشانها ، هى خلاص إتجوزت وشافت حياتها ولازم تتقبل ده ، ماينفعش تفضل كده ، تصدق إنى كنت بكذب نفسى وبقول مدحت هيرجع إنسان جديد وبدأ حياه جديده مع نفسه ، لكن للأسف إنت هتفضل خايب زى مانت ، مابتحبش غير وجع القلب. "

مدحت:"يا ماما مكنش قصدى."

سهير:"سواء كان قصدك أو لا الناس يقولوا علينا إيه؟ "خرابين البيوت؟" إنت مابتفكرش فى شكلى قدام الناس؟ كل إللى يهمك نفسك وبس ، وتغور أمك إللى نفسها تفرح بيك فى داهيه."

أدهم بتنهيده:"إهدى ياسهير ، بعد إذنك سبينا نتكلم شويه."

منى:"يلا يا سهير ندخل ننام إنتى واقفه على رجلك من الصبح ."

سهير بإستسلام:"حاضر."

مشيوا وسابوهم لوحدهم...

أدهم بتنهيده مع إستفسار:"ليه عملت كده يا مدحت؟ وماتقولش مكنش قصدى ، أنا عارف إنك تقصد كلامك ده كويس ، وعارف إنك لسه بتحبها."

مدحت:"طب أدام إنت عارف كل ده ، بتسألنى ليه؟"

أدهم:"يمكن عشان تخيب وجهة نظرى فيك."