كذبتي الصادقة❤

البداية

السلام عليكم
كثرة الطلبات للقصة راح ابدي باعادة نشرها رغم اعتراض احد اصحابها
.......
البداية...

ولادة طفل جديد بكل عائله يكون يوم فرح والاهل والعائله كلها عدهم فضول يشوفون هالطفل ...زوجة عمي مهدي هاليوم قضت نهاركامل تطلك واحنا الجهال نمشي وراها يا رايحين يا رادين ...بعد فضول طفل فرحان ومنتظر ...عمتي وسناء تلوب واني ونهى متعاركين عاللي ببطنها هي تكول اخونا صالح راح يجي واني اكول الها لا راح تجي بنية ...جدتي كل ما اكرر السالفة تكول عاب هالحلك نغط البومه بس اني كنت متأكد وكأني عارفها ... سونار وهالسوالف ماكو فجنس الجنين مجهول لحد يوم الولادة .

اتذكر من كثر ما تعاركنا جدتي طردتنا بره بالحوش وقفلت الباب ...
وره ساعات وعمتي كامت تصيح ..ونهى مكابله الباب وتبجي على امها ...وقاص يلعب بعيد ما يهمه الموضوع بعده صغير عمره جوه الخمس سنوات ...اني ونهى اكبر ومسجلين مدرسة ونفتهم ...عاطت عمتي قوي وراها سكتت والسكوت طال ماكو صوت الطفل مثل من ولدت امي اخويه وسام ...

تقربنا للباب وطلعت جدتي وشويه وجانت تعثر بينا كاعدين بعتبته ...عاطت بينا بعصبية نبعد عن الباب ونروح نلعب ...هي فاتت واني وهاي نتزاحم عالفتحه الصغيرة اللي بقت بالباب نشوف شكو بالغرفة...لمحت الطفل بيد هاي المره اللي ولدتها معلكته من رجليه وتضرب بضهره فد انقهرت عليه وانرعبت خطيه يكتلوه وهو هيج صغير ما لابس شي واحمر دم عبالك لحمة ...ضربت على ضهره عدة مرات وماكو ...

عمتي وسناء رغم تعبانه وتون كعدت لحيلها ...مفزوعه تسأل ليش ما كاعد تصرخ بيها شي والمره تكول الها لا تصيرين خوافه ما بيها شي مثل الكمر بس تعبتوا بالولادة شويه لا تخبصينا ما بيها شي...وجدتي رجعت تركض شايله وصل قماش ودفعتنا وسدت الباب بس اني ما بطلت همه ما قفلوها للباب شسويلهم فتحتها ومديت راسي ...الطفل بعد مرور وقت صرخ بس بصوت كوه يطلع ..وامها وجدتي استبشروا ..

جدتي كانت كاعده تلملم بالفراش ..كله دم عذااا والقابلة انطت الطفلة لعمتي وكامت تبوس بيها فرحة ام بعد المخاض بوجها وابتسامتها كلش متعبه ..

نهى من عرفت بنية تركت مكانها ومشت واني ضليت لازك بالباب ما تحركت لزكت

ما احس غير انجريت من اذني
-ولك وضيح ما تستحي ولك شعندك هنا وشتباوع

-يمه والله  ما باوعت بس شويه ونهى هم جانت وياي

-امشي ولي بره اذا اشوفك هنا املص اذاناتك والله ..عاب هالشكل اي والله 

طردتني وفاتت للغرفة وركعت الباب بوجهي ..اني هم عفت و طلعت بالشارع اخاف منها معصبة اليوم...رحت العب دعابل ويه محمد جريه واخوه حيدر ...يمكن عرفتوا سبب اللقب ..هو حلكهم تكول مال جري ...
شارعنا شعبي ضيق باحد مناطق العاصمة القديمه بازقتها القديمه الضيقه ودرابينها المغلقة رغم ضيقها توسع عالم بطيبة ناسها وتراحمهم ..احبها واحب هالمكان ااااني