كذبتي الصادقة❤

٣٤

صفا :

ركضت بينا الايام لنهاية سنة ٢٠١٧ واجا موعد زواجي من وقاص ...كأي خطيبين بعدهم يريدون يعرفون الاخر اكثر ..كنا نقضي ساعات نحجي ولا نمل ...رغم شغله يحتاج وقت وتركيز بس كان ما يبخل عليه بوقته ..كان يكعد ساعات يخيط واني مقابيله عالكاميرا نسولف وكأن كاعدة يمه ..غرامي اله يزيد حتى تفاصيله البسيطه حبيتها ...بي طبع يرمش عيونه بطريقه غريبه وهالشي بسبب تركيزه لاوقات طويله بشغله..كل خميس نطلع اني وياه من المغرب لحد ساعات متأخره نقضيها مطاعم ومولات وورد وقلوب ودباديب حمر ....اشترالي دب اكبر من اللي ظهر وياي بتصوير رقصتي المجنونه ...خطيبين الحب شملنا بعطفه وجمعنا سويه

عرفت جوانب من وقاص ووجوه عدة ..احلاهن الساكت وعيونه تسولف حب واقساهن لما يعصب بسبب غيرته ..نار مو عصبية ..جربتها مره بفترة خطوبتنا كنا طالعين وشاب ضايقني بكلمه ما انتبه اكو شاب وياي ...

بيومها ضربه لحد ما خلاني اتوسله يعوفه لا يموت بايده ورجعني للبيت رزالة وعياط وصياح ..ينتقد لبسي ومكياجي وكل شي بيه ...وراها صرت اتجنب عصبيته واحاول اخففها بطرق بسيطه ..اني معروفه باسلوبي واكدر اتعامل ويه كل انواع البشر

..اجتماعية ومحبوبة والناس تمدح دائما صفاتي هاي ..كنت اظن انها كافيه تعيشني مرتاحه ويه اي بشر بس مو دائما اعتقادنا يكون صح!!!!

عرسنا اتفقنا نسويه بمكان اثنينا نعتز بي ونحبه ...رجعنا لطفولتنا واحنا اثنينا متعلقين بديالى فقررنا يكون عرسنا هناك وهم رادها هو اكثر لان جدته يعتبرها كل اهله...

قضينا يومين بديالى فرح وركص ..الحنه التموا البنات وسوولي حنه بسيطه ..حنة الشباب كانت كلش كبيره واصواتهم توصلنا ...الفاصل بين بيت جدو ابو شهاب وبيت جدهم بستان واسع ...واستمرت لحد ساعه متاخره من الليل

..نمت اني مرتاحه حسب توجيهات عمه اسراء لازم انام من وكت حتى وجهي يرتاح من الانفعالات وينور الصبح ويتفح عود مثل التفاح يتفح بالله تعالوا زين المشمش شيصير🤔

بيبي ام شهاب اجتي يمي بالغرفة عود تشرح العرس ههه نسوان قبل لساهم عدهم هالعادات ..كعدت واني يمها وعود مستحيات واني اضحك بوجهن منتظرتهن يسولفن ...نهى وصبا كاعدات يضحكن عالدور الفقير اللي اخذته عود خجل وكذا وهو اني اشكال شارحه الهن قبل اصلا الملخص كله عندي ...كل شويه واريد انطلق واشرح الهم واكول يبت اختشي هههه...

سمعت كلامهن مثل البنات المطيعات ومن وصلن للمفيد كامن يمتمتن ...عاد اني مثل طالب حاصرته الاجابه ..شايفين من تحصركم الاجابه وكل شويه رافع ايدك وما يكومك المعلم اني هيج صار حالي ..تالي ما تحملت..
-تره موتوني انتو شيرادلها هي.......و......و......

بيبي ام شهاب لطمت صدرها وبخوف
-يااااء ياا..ولج من معلمج هيج

-كولي غلط
امي تدعلبت من الضحك هي واخواتي وعمه اسراء اختفت من الفشله والمستحى الا اني حاطه عيني بعين بيبي واناقشها