كذبتي الصادقة❤

٣٥

باوعوا دا اكول الكم البارت قصير محد يحجي شي وياي 😁

ومتابعيني اللي يحب يسأل او يعرف عني اكثر ..حيستضيفوني بعد شويه بكتاب اسمه ...لمة كاتبات الواتباد..تعالوا نتعرف 😁بس مو تزهكون من اسالتي 

صفا :

بقيت وحدي افتر بالبيت ما بين المطبخ والغرفة والهول ..اشغل نفسي..رجعت نمت وكعدت ما اشتهيت اسوي غدا ولمنو اسويه وهو ما يرجع للغدا يضل بالمشغل ..دكيت لماما وحجيت كل شي ..كالت اصبري وميخالف وانت تتذكرين حياتي ويه ابوكم شلون جانت بدايتها وان هي تحملت كلش هوايه والمرأه الاصيله لازم تتحمل زوجها وهاي مو مشاكل تسوى الزعل..

سديته منها كلامها ما فادني بقدر شعره وما دخل مخي ...عود يعني ليش اتحمل ..اني بشر مو حيوان ويحبسني ..طول عمري حره والي حرية التصرف والقرار ليش ارضاها لنفسي ما عنده ثقه بيه ....يحبسني ..شنو بباله ادري يغار بس مو توصل للشك ..لازم الكي حل اله .. وحتى لو احبه لازم ما اكون الطرف المضحي الوحيد ..

بهذاك النهار ما اشتهيت اكل شي ولا نزل ببطني شي ...تعدا الوقت منتصف النهار ..سمعت صوت المفاتيح بالباب ودخلته كنت متمدده بالهول ومعتمتها نهائي ومتلفلفه ببطانيه ثكيلة ومطلعه بس عيوني اباوع تلفزيون ..ما كمت ولا تحركت من مكاني من اجا..

وكف بيني وبين التلفزيون ودنك يشوفني كاعده لو نايمه ..خزرته بلا كلام هو كعد مقابيلي عالتخم ورجعت ثبتت عيوني عالشاشه اتصنع الهدوء بينما اني نار ومشتعله...فرك وجهه ودنك بتعب ورجع باوع الي
-كومي حبيبتي جبت غدا وياي
ما تحركت من مكاني ولا حجيت وياه 

-مو احجي وياج!!
-روح انت اكل ما عاجبني
-كومي صفا نحجي هناك
-ما بيناتنا اي كلام بعد اللي سويته الا تفسر اللي صار
-ماشي صفا

كام طلع من الهول واسمعه يطكطك بغراض المطبخ يمكن كسرهن ...جاب صينية اكل واجا حطها كدامي
-يلا اكعدي ناكل ونسولف

بصراحة رغم زعلني بس حركته عجبتني كلت حيشبع بطنه وما اهمه ...كعدت وكفيت البطانيه بعيد ..كنت لابسه تراك دلعته جبيرة ..عيونه تفحصتني بشغف وكأنه طفل يباوع لحلويات ويريد الاذن لاكلهن...لميت روحي يمعود خلي شويه احترام للزعلة عاد كلتها بنفسي طبعا...

صار ياكل ويكلي اكلي ...ولا كلمه نطق ولا سولفنا بحيث خلاني اشعر بالغباء واني كاعده كباله اكل وهو هيج مسوي بيه الصبح ...

كملنا وشالها للصينيه وداها ورجع اني غسلت ورجعت لفراشي لكيته سابقني ومحتله اول ما فتت سألني
-هاي ليش هيج فراشج حار شنو مصخنه 

ما جاوبته واكتفيت بالكعده بعيد...كام وحط ايده على راسي
-اووو هاي شكد حارة انت اخذتي دوا

هزيت راسي بلا
-وليش هيج تسوين كومي دا تسبحين شويه واكلي برتقال لو سوي عصير واخذي دوا ..حروح اجيبلج دوا
-انت ليش هيج تسوي؟؟
-شنو شكو شبيه اني!!