كذبتي الصادقة❤

17

اعذروني عن تقصيري معاكم ...صدكوا ما كنت بحال يسمح الي بكتابة شي 💔💔اعوضكم ان شاء الله

نهى:

بيوم سبعة صبا شفته مرتين روحة ورجعة صعدنا بسيارته ...شخص مزعج عيونه تتبع بدقة ...اول ما صرنا بالسيارة انتبهت اله حط المرايا عليه ...ضايقني كلش لما وصلنا اجيت دا انزل نزلت امي وعمتي بهيجة وصفا اشو هذا نزل واكف يم بابي اخرني بالنزول واني اضوج من هيج حركات غبية ولا توانيت عن فتحها عليه وهو واكف يمها ..تفاجأ من فتحت الباب عليه وراد يوكع ... اي لو واكع على وجهك ومتكسرة سنونك ...

نزلت وبين ما امي نزلت اخواني والغراض وملابس لصبا اشترت الها شكم قطعه ..هو لزك بصفي ...ويباوع خفت العيون اي والله شكد مزعج ..ما انسى كلماته بيوم عركتنا ابد شلون وضاح مصادقه لهذا لساه ولو هو من طفولتنا كان صديقه وكنت اموت منه واغار على وضاح منه لان وضاح صديقي اني وبس ...كنت اطلع بالشارع واني زغيرة ازغر منهم هو ووضاح واتذكر شكله زين حلكه جان شكبره هو واخوه .. يجي يدفعني لو يضربني لو يكطع كلادتي وهاي كانت عادة عنده كل ما يشوفني بالشارع ... كنت دوم البس اكسسوارات لو بشعري لو كلايد وهو يكطعهن ...واني منا يريد الي حجة ابقى ابجي لحد ما يتعاركون هو ووضاح وياخذني ونرجع لبيت جدو..

بين الذكريات اله صورة وحدة حلوة محتفظة بيها ابطال مروا بحياتي كان هو من ضمنهم ...اثر عركه مع اشقياء تحرشوا بيه لفظيا بحينا القديم..يومها اكل كتله غسل ولبس بيها بس شفته كلش شجاع وشهم لما خلاهم يلتهون بي بين ما اني انهزم..كل ما اتذكر هذاك الموقف اضحك

فتنا للبيت وهو واكف وابد ما نزل عينه ..ثولني ما صرت اعرف امشي ...شافتني صبا وضلت تتسأل نن سبب شرودي وضوجتي بس ما حجيت شي ...خلص الوقت ووطلعنا بمشكلة ويه ام وضاح وكنت متنرفزة حيل ...صفا رغم كابرت بس وصلنا للسيارة انهارت.. الغبي وقاص ضاربها ومن طلعنا التهيت بيها مقهورة وميتة قهر صعدنا بالسيارة موتت نفسها من البجي حضنتني وتبجي عمتي بهيجة تحجي وامي ترزل بيها وتلوم ليش تراددت ويه رحاب 

وصلنا عمتي اول وبقينا احنا بالسياره ..سكتت صفا وره مده وبقت حاضنتني ..هي اضخم مني وتبين اكبر ..اني صح اكبر وحدة بيهن عمرا بس اصغرهن بالحجم ...خنكت انفاسي وما بيه ادفعها خطيه تقهر ولا بيه اتحمل اكثر حموت 

..تالي امي تدخلت

-ولج صفا تره اختج حتختنك عدلي كعدتج..ما صار شي مشكلة وانتهت

صفا:المفروض انت بمكانها بس وين تعرفين بس ترزلين بيه وترجعين علينا
جرتها بهاللحظة امي لحظنها واني اخذت نفسي واخيرا ...لمحته يضحك عليه الخبيث لان فعلا كنت مختنكه ..تعاتبت وياها بهمس ما سمعناه لا اني ولا الكاعد كدام ..مبين فضوله حيخبله ...بس عرف ام وضاح متعاركة ويانا ..هي اصلا من زمان هيج ومعروفة بالمشاكل بالشارع كله