كذبتي الصادقة❤

19

عزااا كمية الدعاوي والغلط بهذاااك البارت على وضاح ..شاحنات محملة شلنا ههههه ...هالمره الابطال ابد ما اعترضوا ومتفهمين لمواقفكم  ...ابطالي صايرين غثيثين ادري لا تكولون 🤦‍♀️🤦‍♀️مدا يجون مثل عمو حسن شسويلهم😁😁

هذا البارت حيكون فاصل بقصتهم ...بالبارت الجاي حنتركهم شويه وتبدي ويانا قصة ثانية ....

اذا ما انقطع النت مكملين ان شاء الله  واذا انقطع شنسوي بعد هاي دولتنا العظيمة وهذا عراقنا اللي ما نرتاح بي سنتين وره بعض بلا مشاكل ...ربي يحفظ الجميع بردا وسلاما على بلدي ان شاء الله 

نهى :
كنا مجتمعين بالمطبخ اني وامي وصفا واخواني دا نحضر للعشا وقت الغروب ...ماما كاعدة تلف كبة وهدهد وكروش متعاركين عالحشوة ياهو اللي ياكل الكشمش ..امي ما تتعب نفسها ولا تكول شيسوون ..اصلا هو هذا طبعها من احنا صغار هي ما تعلي صوتها ولا تتعب نفسها ولا تعصب ..عادي عدها شما نسوي بس المهم ما نتأذى ..

طبعها الهدوء المفرط ...اني كاعدة بصفحة وكل شويه انهرهم بس ما يسمعون مني لان ما يخافوني يحبوني وما اذيهم ..

صفا واكفة تعزل بالسنك بس كالت منو ديلعب بلا ما تلتفت ..اثنينهم طفروا يركضون بره المطبخ ..ضحكت عليهم ..صفا فيلم الرعب والبعبع اللي نخوفهم بي مدري شمسويه لاخوانا...

بهالاثناء دخل بابا من بره مستعجل وجهه مخطوف وبي شي خوف مرعوب جان... جان بره يقلم بمتسلق الجهنمية اللي على سياج بيتنا ...كال وهو مستعجل ينزع بدشداشته ويركض

-ولج وسناء كومي صبا موديها مستشفى ومدخليها طوارئ..تصخمنا وسناء راحت بنتي ابو وضاح خابرني يبجي عليها ويكول تعالوا بساع البنية مو زينة

يبجي ويضرب على فخذه

اول مره اشوفه بهالضعف والارتباك ..عرفت شكد كان يكابر كل هذيج الايام على نفسه حتى لا يبين حبه لصبا وتعلقه بيها

كامت امي وراه وانخبص بيتنا بهذيج المغربية اني ما تحملت ابقى ..ركضت اخذت عباتي ولبست سريع ..صفا تبجي ومهدي هم يبجي وياها وكرار رغم بعده صغير على بجينا اشترك...بقوا واني وبابا وماما طلعنا للمستشفى ..الطريق كله يدعون ويبجون ...سنة كاملة وصبا يوم وره يوم ذبلت وما عادت الحياة مثل الاول بعينها ..كنا متوقعين هي مقهورة او تدلل لان هي ما تبين قهرتها ولا اشتكت لاحد كل ظنا كانت ما تحب وضاح وناقمه على زواجها منه ولسه ببالها بشير اللي ما يستاهلها 

..ما كانت تحجي ..بعد عرسها اشتكت مرتين ثلاث وبطلت ..وبدل ما هي تشتكي من يجينا وضاح يكوم يحجي عليها ويلومها بقلة اكلها وعدم اهتمامها بصحتها ونندار عليها كلنا نحجي ..ما حسبنا حساب ولا احد يدري بيها وين الله حطها ولا شنو سبب حالتها اللي وصلت بيها ..سكوت دائم وانعزالية ..اهمال وقلة مسؤولية اول المسؤولين عنه وضاح وبعده امي واحنا كلنا النا دور