كذبتي الصادقة❤

١٢

مرت سنوات واحنا بهالمكان اليوم حان وقت رحيلنا منه ...دموع الرحيل صعبة هالمره وكلنا احاسيس لما اجينا كنا اطفال ....هسه كلنا شابات بالغات .. نهى قررت تقدم دراسات عليا وبابا من حبه الها ومساندة لقرارها وتفوقها وحتى يشجعها قرر نرجع لبغداد...اني انقلبت بنفس السنة كلية تربية جامعة المستنصرية وكلها شجعت انتقالنا

صبا كانت الاشد حزنا بطلعتنا وكلنا عارفين السبب ومغلسين عنها ومحد بينا يكدر يسويلها شي حبهم مستحيل وهي لازم تفهم ان بابا شهاب لو تموت لو تمشي على اصابع ايديها ماراح يوافق ينطيها لبشير هاي ثلاث سنوات مرت وبشير حاول وحاول وكان مستقتل عليها وكلنا متعاطفين وياهم بس ما ينفع بعد واصلا سبب ثاني لرجوعنا لبغداد هي يريدوها تبعد ...واهسها بالدراسة صفر بابا وماما مصممين ان تدرس وتنجح وهي ماكو بهالاجواء اصلا لحكت بيها بالدراسة وسبقتها وهي عصت ثالث سنتين وسادس هم سنتين ولساها بي ...قل اهتمامها بروحها وقل حبها لكل شي ودوم صافنة وساكتة ...انضربت مرات ومرات من بابا وهي كانت اكثرنا دلال عنده ...ما وصلوا لحل وياها غير نبعدها عن المكان كله

سنة ٢٠١٢ تحديدا كانت السنة اللي رجعنا بيها والسنه اللي حتنقلب بيها كل حياتنا من الرتابة والهدوء للثورية والفوضى والصخب

حياة كنت منتظرتها وبشدة راح نرجع لنفس البيت القديم اللي تركناه قبل..  بغداد افق جديد وعالم جديد يمكن اكدر اطلع من الواقع المحدود الرتيب اللي بديت امل منه ...بيت جدي محمود اللي موجود اسمهم بجناسينا ما نعرفهم بس حسب كلام امي حيكونون قريبين وراح نشوفهم ..عماتي اللي يتواصلون ويانا حيكونون جيران النا وبيت عمنا اللي امي تكرههم موت هم حنشوفهم كل مشاكل امي وياهم كانت بسبب حضانتها لبناتها ما قبلت تنطينا لما انتقلنا لديالى لما طالبوها بينا وتخاربت وياهم

...اني عن نفسي ما اذكرهم بس نهى تتذكرهم زين وصبا شوي عدها ذكريات قليلة عن اولاد عمنا...جدتي من كانت مريضه بالمستشفى شفت عماتي وعمي وكانت هذيج المره للوحيدة اللي شفناهم بيها ...من بعدها وحدة من عماتي كانت تجي وتواصلنا لما تجي زوجة عمي لاهلها هي تمر النا وياها ...زوجة عمي ما شايفيها ولا تدخل بيت جدو ابو شهاب رغم هي اقاربهم والسبب لان بينهن مواقف قديمه ..كانوا يكولون احسن هي ما تسوى الواحد يعرفها وحتى اقاربها هم ما يحبوها شايفة روحها وتتباهى هواي حسب قول عمة اسراء

حزمنا اغراضنا وجنطنا كلها والدمع كان احسن تعبير لحالنا ...عمه ام منير ونهى سووها مناحة وبيبي ام شهاب تحجي عليهن فال مو زين البجي ...صبا خلقة ربنا هي ما تسكت هالنوب حتفارق الحب ..موتت نفسها من البجي ...

اني مستغربة الدراما كلها وعبالك كاعدة اشوف تراجيديا حزينة وحاطه ايدي جوه وجهي..زين رايحين بطريبيل !!هي بغداد ساعة اذا بطئ وازدحامات واقل اذا مستعجلين