كذبتي الصادقة❤

9

احبك ❤
للنظرة الاولى❤❤
والنظرة الدائمة ❤❤❤
والنظرة الابدية❤❤❤❤
💕💕💕💕💕💕💕

يقال ان اروع اللحظات هي لحظة اللقاء الاول والنظرة الاولى ..فكيف لو انها نظرة ابدية ازلية تتخذ في الروح منازلها وتعمر اسوارا لقلاع حب ابدية فيهيم قلبان خاليان في سابق عهدهما فيصبحان هائمان في ازقة الحب ودهاليزه💗💗

.......
جمعت سلة فواكه كامله منوعة من على ارضية البستان واشجارها الكثيفة المتشابكة ...مشمش وتفاح وغيرها انواع من فواكه بداية الصيف ...نهاية شهر ايار وبداية حزيران كان وقت غير بحياتي الكثير والكثير

التهيت بجمع الفاكهة اللي تساقطت نتيجة مرور يوم عاصف ...ابتعدت عن المجموعة ...نور وصفا كانوا المفروض معاي بس بلحظات اختفوا ...على اسااس كلنا نجمع الفاكهة سويه بس بالواقع اني صرت اجمعها وهمه يجمعون اوراق الاشجار اللي تحمل ميزة معينه ..ورقة صفرا ورقة غريبة وبعدها جمعوا اغصان وبعدها الحصو اللي الوانه مميزة وكل شغلة تجي ببالكم عدا الفاكهة اللي فرشت ارضية البستان عقب يوم عاصف ... بقوا يشيلون شغلات ويحطوها بالسلة بدل الفاكهة وهيج افترقنا ..لحد ما استوعبت اني وحدي ما خفت شيريد الها ارجع وحدي اندل الطريق!!!

وكفت وحملت السلة اللي تريد الفاكهة توكع منها ..فرحت بأنجازي هاي للبيت ناكلها بالليل هسه عمو شهاب يفرح من يشوفنا مرتاحين هنا ..نريده يكون فخور بينا دائما وما نزعجه ابدا لو نفشله كدام عائلته...عمال البستان الصبح وهاي اللي يوكع بعدهم بفترة الظهيرة ووقت العصر ...الغروب بدا ينطي ملامحه للسماء المتشابكه بأغصان الاشجار ...واني بالقسم البعيد من البستان ...مقسمه اقسام واني ببقچة المشمش(مكان مخصص لنوع من الاشجار) حسب تقسيمهم للاراضي

ضعت وتره كلش عادي تضيعون ببستان مساحتها اكثر من عشرات الدونمات متشابكة الاشجار والاغصان ..

من بين هالضياع اجا هذاك الشخص اللي يخجلني بنظراته ومراقبته ...شاب بملامح حادة وحشية عيون محددات وكأنه مكتحل وحواجب ثخينة وطوال وجهه الابيض المائل للاحمرار ينطي ملامح اهله وعمامه وملامح خاصة بعائلتهم ...جسمه رياضي جدا ومعتدل القامة مائل للضخامه بكل شي......كانت المرة الاولى اللي هيج اركز بي واتعمق بأدق تفاصيل ملامحه كنت اتهرب دوم بنظراتي الخجولة عن نظرات عيونه المقلقة

استغفرت ربي وغضيت البصر ..تره مو بس الرجال يحتاج يغضون بصرهم مرات النساء هم يحتاجوها لما يكون الواقف امامها بمثل هالصفات

-شلونج نهى؟؟
-الحمد لله
-شجابج لهنا؟؟؟
-اجمع فواكه ماما وعمه كالوا اجمعوها
كان يحجي بجدية بالغة بلا ادني تعابير بوجهه
-وحدج؟؟
خفت من سؤاله وجاوبته بسرعه
-لا كانت وياي نور وصفا بس مدري وين راحوا