كذبتي الصادقة❤

٢٣

بارت طويل ٣٥٠٠ كلمه

واعتذر عن التأخير اللي حاصل😘😘😘😘

......

شهاب اليوم راجع من السفر بعد ما طمنا عن صحة صبا واخبارها زينه صحتها عال ومندمجة اكثر ويه وضاح ..كان يحجي ويه البنات وما حاجاني ابد هالموضوع كبر بيه وضل يحز بخاطري ليش هيج ما تعودت عليه قاسي لهالدرجه

وصل للمطار العصر ودك على نهى وحجى وياها اسمعها تكول اله هيانها يمي وما عرفت شنو حجوا لان كمت انهزم من يريد يحجي وياي اني ما اريد احاجيه

رحت بغرفة الاولاد كعدت ارتب بملابسهم ولا اريد اسمع صوته ولا اسامحه على كلامه ..اني الفاهية الباردة هيج صرت هاي تالي حياتنا

دخلت نهى للغرفة وراي شايلة موبايلها
-ماما وين رحتي هاي بابا يحجي وياج
-اشرت الها براسي يعني ماكو ..روحي
جاوبته بأن اني بالحمام وسدته وخزرتني وراحت ...اني وياها بيناتنا خلاف بسبب محمد ...كرار كاعد يمي يباوع بوجهي ويضحك مدري شبيه سنيناته اموت عليهن يا ربي هالولد نسخه عن اخواته الكبار ولا كأنه من غير اب بس مهدي طالع لبيت جدة ابو شهاب نسخه عنهم

مر الوقت ووصل للبيت شهاب استقبلناه ..سلمت عليه وبوسته عادي حالي حال الباقين ما ابديت فرحي برجعته ولو اني من داخلي طايرة طيور برجعته

امه كانت يمنا باقية بيومها ...عفتهم ورحت اطلع بشغلات العشا صاح عليه من دخل للغرفة يبدل وغلست ما رحت اله...مر وقت وكملت الاكل وحطيته بالهول ورحت ناديتهم ..كعدنا ناكل كعدت يمه وقبل لا اكعد حطيت كرار بيناتنا كام يأفأف ضايج تستاهل وبعد اكثر اسويهن..عزلت اكلي بماعون وحد اني وكرار وهو وحده ..هو دوم يركز على هالمسائل بكل شي يشاركني اكل وغير شغلات يكره ينعزل وحده لازم اشاركه بكل شي..كل شي بالمعنى الحرفي حتى بحمامه مشاركته ..بس الظاهر الرجال من يتدلل زايد يجحد نعمته ..لان كنت اعاند وياه وما اقبل بقربه من جان يشرب صار يتنرفز اذا سويت هالحركات وياه ..

ياكل ساكت امه تحجي والبنات ما سكتوا وهو ساكت واني مثله ..سكوتنا مثل هدوء قبل عاصفة واني منتظرة عاصفته شوكت حتضرب!!

كملت شغلي بالمطبخ وضيعت الوقت بي ما اريد اروح يمهم ..صاحت الي الحجية ورحت عليها ..استغربت بس هي والبنات وين شهاب؟؟

كعدت يمها لان اشرتلي اكعد
-شبيج؟؟
-ما بيه ..شبيه يعني؟؟

-وسناااء ...ما اعرفج اني ...شنو هالدشداشة الخلك اللي لابستها ..وصلة مسح ؟؟
-شكو شصاير ...باوعت عالبنات عرفت مسولفات الها عن مشاكلنا اني وابوهم وبالاخص صفا اللي سوت روحها كاعده تقرا كطعته لكتابها تكطع اووف منج مصكوعه

-ما تدرين شصاير ..رجلج رجع من السفر يالمسعدة وراح نام بغرفتكم
-اي شسويله
-روحي وسناء وراه..ليش شهاب يستاهل منج هيج ؟؟امشي لغرفتج هسه ولج وجهج فكيه الرجال تعبان راجع
-والله ولا اروح ولا اوصل خل يعرف اللي سواه