كذبتي الصادقة❤

٢٢

 كنت فاتحة فيس وتذكرت الصفحة مالته بسرعه دخلت اسمه بالبحث وقاص ال.... صرت اقلب بيها واتفرج صوره والفيديوهات كل فيديو وكل صروة لبس وشكل ..يا الله شلون حلو شكله والكاريزما والشخصية والخلقة اللي ما الها شبيه ...

فاتت نهى بالغرفة بسرعة واني سديت البرنامج بسرعة وفتت على غيره بعدني اخاف يكون هالاحساس معلن واخجل من فضح مشاعري..كعدت هي على فراشها وشكلها ضايجه البارحه امي هواي ضغطت عليها حتى توافق على الولد اللي متقدم صديق وضاح

...اني هم شفته مناسب ..اهله مرتاحين ماديا وخوش عائلة وبعمر وضاح يعني مقارب لعمرها وحتى عدها معرفة من طفولتها بيه ..اعتراضها مو مقنع ..لبسه وهيئته وطبعه الضحوك ما يعجبها!! هو احد لاكي شاب بهالمواصفات وفوك هاي حاضر لكل طلباتها شاريها حيل ..اني ما تدخلت بس اليوم هي وامي صاروا فد مره ..طبعا حق الام لما تشوف بنتها تضيع حياتها نهى هواي تجيها ناس وهي ترفض وترفض بحجج مو مقنعة ..لو كانت صبا هنا كان الامور اسهل ويجوز حتمتص من غضب الاثنين اني ما اعرف الهن ...

سكتت وهي نامت بفراشها وغطت راسها وقرفصت على نفسها مبين عليها تريد تنهزم من الواقع ومن المواجهة وهالشي اشوفه ارحم الها من تكرار قولها احب منير وعدم اقتناع كل اللي حواليها واصرارها على البقاء عزباء بس لشوكت تبقى هيج؟؟

رجعت بهدوء لصفحته ...قلبت بيها هواي ..شاب متعدد الهوايات ويحب الفرارة والونسة والطلعات ما مخلي محافظة تعتب عليه جنوب، شمال ..يحب الصيد فديوهات صيد سمج وصيد طيور وبكل مقطع لازم وياه الجلب مالته اسمه لاكي بس وين هذا الجلب اني ما شايفته حتى جلبه هم حلو...

قلبت هواي وطلع وياي قفزات اله من على جسر عالي للماي مو ببغداد بغير محافظة وشباب ملتمين ويغامرون بالقفز من اعلى الجسر بنهر دجلة ...شي رائع..طبعا الفيديو يحبس الانفاس من اثارته وفوك هاي وقاص كان لابس بي بس شورت وجسمه يخبل ممشوق القوام وعضلاته شويه بارزة باعتدال تعذيب يا الله هالصفحة عبالك دا اتفرج بصفحة شخصية مشهورة صعب الوصول الها وهو ابن عمي!!لو بس يشوفني لو بس يلتفت لناحيتي غلطت يوم تجاوزت عليه كنت اظنه غير..وعرفته غير 😍

 ..بطنه مشدودة شد ..جسمه رياضي حيل ..ابحرت بمخيلتي وافكاري وتوهجت وجناتي خجل من هالافكار المخجلة بعدتها بساع عني لا اتهور واروح اعترف اله بحبي هسه!!!

..هواي تعليقات كلش عالفيديو واصدقائه اللي عددهم كلش جبير تقريبا كلهم معلقين ..صفحته ممتعه جدا عبالك داخله لصفحة مال موديل من هذوله الحلوين وبنفس الوقت هالموديل مغامر ..متت وانصهرت بالزايد ...صار فترة من بديت احس بميل تجاهه وحبيته بفترة قصيرة 

..بس اكو مشكلة بي هو وهو بس اني كلي استعداد لخوض تجربة رومانسية ويه شخص مثله بس هو..نهائي ما يهتم لانثى ولا يصد لمره وهالشي زاد تعلقي واصراري على كسبه ..احب الرجال الثكيل وهو ثكيل زايد وشخصية من اللي راسمتها لرجل الاحلام وشريك المستقبل ..دا اخطط لبعيد حيل وهو وين عني اصلا ما شايلني من ارضي ولا عبالك يشوف!!