كذبتي الصادقة❤

٨

مساء الخيرات متابعيني 😘

اريد توقعات واريد اراء .....

واريد تصويت😈🔪

علقوا  واطربوني بافكاركم🙂🙂

.......

الاستقرار الحقيقي دخل عالمي وبدا بمرحلة معينه من حياتي وكان بلحظة دخولي بيت الحجي ابو شهاب ...
مترددة خايفة ومنزعجة ...بناتي الثلاث تأقلموا سريعا مع الوضع هما احسن مني بتقبل اي واقع يفرض عليهم ...معتادين تبديل المكان والاشخاص المحيطين وبسرعة ياخذون شكل البيئة اللي يصيرون بيها
اني كان حالي العكس ...الخوف والخجل والانعزال اخذ اول ايام مني ..اسبوع مر بهدوء ببيت اهله لشهاب عمتي امرأة رائعة تحتوي الكل وتضمهم تحت جنحها لكيت بناتي متعودات عليها ويحبوها وكل اللي تكوله يسمعوه وينفذوه هاي طبيعتهم مسالمات ولطيفات كلش عدا صفا شويه عدها الشغلة ما تسويها الا لما تقتنع بيها

الحجي بعيد يجي على كد الوجبات ويطلع ويه اولاد ابو منير للبستان ولشغله ...شهاب كانت هاي اصعب فترة عليه ..الشرب ممنوع نهائي هنا وامه تميزه بطريقة عجيبة حتى مرات اني ما ادري شارب هي تنتبه ...نبهتني ووعتني لهواي شغلات اسويها لما يشرب تخليه يندم ...امه وتعرفه بعد اكثر مني ومن اي شخص ثاني ...مرتين بس سواها خلال كعدتنا ويه اهله وراها بطل والتهى ويه ابوه وولد عمامه ..كنت حابه هالشي ومرتاحه اله صار شكد من ترك الشرب واني خايفه من رجوعه اله...طبعه الحلو بديت اكتشفه وعرفت المر اللي عنده هم ..زيناته غلبت كل شي

مرت الايام وبدا قصف الطائرات للمحافظه ...ديالى ما تعرضت لقصف هواي بس المنطقة اللي كعدنا بيها كانت قرب قاعدة جوية عراقية خاصه للتدريب فالقصف كله تمركز بيها ..اذكر كنت احضن بناتي ونكعد نبجي خفت هواي بوقتها ....اي اتصال ببغداد ما عدنا اهلي بالي يمهم ما طلعوا من بغداد ولا عيالي محد طلع منهم من العاصمه 

الذعر اللي مرينا بي ما ينوصف بهذيج الليالي ...سقط النظام خلال فترة قصيرة ..بقينا فترة خمس اشهر بالمنطقة الا انتهى القصف وتقريبا صار مستقر اكثر ...

اهله طول فترة بقاؤنا عاملوني معاملة الضيف مرات قليلة وبأصرار مني يلا يقبلون اشتغل وياهم ..ام منير والحجية قايمات بكل شي وبناتهم هم يجون يشتغلون لان ابوهن كان دوم عنده ضيوف وناس تجيه ...مرت فترة صعبة وخوف لان ابو منير وابو شهاب كانوا ضمن الحزب والخوف عليهم بس بنفس الوقت ما مأذين احد والهم مكانتهم بالمنطقة وما يأثر انتماؤهم للحزب عليهم ...

بعد نقاش طويل بينا وبين الحجي يلا قبل نروح بس نشوف اهلي ونشوف بيتنا ونرجع وما قبل نطلع البنات ويانا خوف عليهن ..طبعا الحجي خلال هالخمس اشهر صار يحبهن حيل لان مطيعات والنهار كله مقابيله وما كان عدهم بنات بعمرهن بنت ابو منير صغيرة بعدها بعمر صفا فكلش حبوهن للبنات وخاصه نهى..سبحان الله ربي ناطيهن ميزة كل من يعيش ويانا يتعلق قلبه بيهن ...كانت بذيج الفترة رحاب متصلة بأهلها ومطمنتهم عنها وعن عائلتها ..اني من عرفت الوضع يمهم امن بقيت الح على شهاب اروح اشوف اهلي وبعد مدة الا كدرت اقنعه