كذبتي الصادقة❤

16

تأخرت عليكم متابعيني اعذروني مريضة وعيوني كوة افتحهم 😘

اسبوع مر وصبا غايبة عن البيت ..امي ما تفوت ليلة اذا ما تكعد بطارمتنا تبجي عليها وابوي ما يفوت للبيت اصلا الا لما يتأخر الوقت ويصير وقت نومنا ما يريد يشوف مكانها الخالي ودوم طول وقته ساكت ...نهى ساكته ما تحجي ابد وكأن صديقتها بالبيت اختفت ..علاقتها بصبا احسن من علاقتها بيه واني نفس الشي صبا بالبيت مثل مغناطيس للمحبة يجمع العائلة ابد ما تتوانى عن اظهار مشاعرها سواء زعل او حب وحتى الكره اللي تكرهه متكدر تستلطفه ابد..رغم فهاوتها عدها قلب ما شايلة بشر عدها استعداد تبجي ايام على حيوان يموت كدامها ...

كنا صغار واذكر عنها مره دا تسولف النا بيبي شلون هي وعمو ابو منير داهسين كلب وهو يعبر الشارع بالسيارة ..كانت تسولف ومندمجة ما نحس غير صبا عالوصف تكومت بنصنا مغمى عليها ..بيومها عفنا السالفة والتهينا نكعد بيها وراها دخلنا بهستيريا من الضحك على سوالفها المشابهة هواي عدها من هالمواقف كلش رقيقة وهادئة هي ...مدري ليش هيج سوت بنفسها وبينا ...عمو شهاب اللي يحبها موت ومدللها دلال صار ما يتحمل يسمع اسمها ومنع ماما تروح الها بعد عرسها لحد السابع ...ولما اتصل وضاح يعاتب نهى ضلت تبجي عليها ..ندري بزوجة عمي شلونها واصلا عمه بهيجة نطتنا لمحه عن حياتها الجديدة ...

قضينا هالاسبوع نهى ملتهية بكليتها ودوامها واني لان مرحلة اولى بعدنا نطربك ماكو قرايه ..بيوم السبعة من الصبح كعدنا ..امي حطت اخواني الصغار سبحتهم وبدلت الهم وهي ساكته غيرت ملابسها وعمو منتظرها ..اني منتظرة شوكت تكول بدلوا تروحون وياي اشو ما كالت ..لحكتها وهي تلبس بباقي ملابسها

-مام شنو ما نروح احنا وياج
-لا شويه وراجعه اني وين رايحات انتن ابوج ما يقبل تروحن ..اني وعماتجن نروح ونرجع ماكو كل شي لا حفلة ولا عزيمة
-شنو ماما هالكلام شلون ما نشوفها قلبي نار عليها ..مشتاقه الها 

-اسكتي وخليني بقهري رحاب طردتنا قبل لانروح ..اكعدن واسكتن تضل تلغي واني ما اتحمل خلي اختج يمهم وساترين فضيحتنا

-ماما تره صبا انظلمت ليش كلكم تأيدون الظلم
-كولي ظلمت نفسها

بعدني دا اسولف وي ماما وفاتت نهى تسد بعبايتها ووكفت تعدل بروحها مقابيل المرايا
نهى:ها ماما يلا استعجلي راح تجي عمتي

وسناء:ولج مو كلت محد تجي شبيج انت نهى ما اخذج
نهى:يلا صفا انت هم بدلي ..ماما نروح ..وضاح بهالاسبوع مرتين عاتبني لان ما رحت اشوفها
-حجيتي وياها

-لا ما قبل كال تعالي للبيت وشوفيها وتوه خابرني وكلت اله امك ما مسويه سبعه ولا تريد احد ..تخبل ورزلني وسد الموبايل وكال اذا ما تجون اجيكم اني اخذكم
-صفا:ماما خطيه صبا تفرح