كذبتي الصادقة❤

جزء بلا عنوان 4

الحياة لوحدج بمواجهة مجتمع تتمثل بليل طويل اظلم ما بي ضوه القمر ...بارد وكئيب ..ووفاة زوجي كانت بداية هالليل

خلصت اشهر عدتي بسرعة ..قضيتها ببيت اهلي طبعا وفق العادات والتقاليد عدهم اللي تترمل هي اللي تندفن مو زوجها مريت بايام تمنيت لو اني اللي ميته كان هسه يجوز حال بناتي عالاقل احسن ..بناتي يم اهلي اربع اشهر حابستهم وياي بغرفتنا اني وخالتهم ...اذا طلعوا منها احس اهلي شايليهم فوك ظهورهم مو بس بيتهم ...تعبانين ويشتكون منهن ومن تصرفاتهن

جدهم وبيبيتهم لما يجون متنفسنا الوحيد ...يطلعون البنات ويشترون الهن ملابس ويونسوهم ويجيبوهم الي بأخر النهار فرحانات ..قهري يزيد اضعاف من اشوفهن يضوجن من يرجعن بديت احس بعدم راحتهن ...

نهى عاقلة وصبا فاهية بس صفا كانت المأساة الحقيقية ...طفل يعاني فرط الحركه التوتري طبعا هذا مرض بأيامنا الحالية بس على وقتنا يسموه وكاحه ...ما تعرف تكعد بكاع فوك السرير اقل ارتفاع ممكن تهبط عليه ...اذا كعدنا عالاكل ما تعرف تكعد ابد تالي اضطر اكلها قبلنا ..طفلة مزعجة سببت الي احراج وسببت لاهلي كومه ازعاج ...

شكد حاولنا نقوم سلوكها ما نكدر ابوي اول اللي صاروا يتضايقون منها وكل شويه يريد يضربها واختلها منه....امي اصلا لبناتي ما تميل تكول مو بنياتنا بنيات اهلهن هذني ..

اذا تعاركوا صفا وابن اخويه الامه كلها تكلب وجهها لان تضربه لو تأذيه وهذاك ما يكدر الها ..ابوي بأذني مرات اسمعه يحرضه يضربها وهالنوب هي من تشوف هيج تتخبل بالزايد لو تغلط لو تتفل مكرم القارئ عليهم عقل طفل بعد ...ما كدرت اسيطر ابد عليها واصلا اني مو بحال يسمح الي بالتفكير ولا التصرف ....

مرت اربع اشهر وعشرة ايام بطلوع الروح يوم بعدها ما تحملت اكعد اكثر بنياتي ينقهرون شنو حياتي واشوفهم محبوسين بغرفة ببيت جدهم والله شنو لا يزعجون احد احبسهم مجبرة لا يكسرون شي وامي تصيح عليهن ..كنت اتحسس زيادة واهلي متشنجين منهن بزيادة هم..

حسيتهم تأذوا وخاصه نهى انمردت بعد وفاة ابوها ...انطوت وانعزلت وصفا كثر الضرب صارت متوحشه بحيث اللي يريد يبوسها تعضه لو تخرمشه بس صبا لو وين متصير تبقى نفس وضعها ما تتأثر ابد

اجو عيالي يتفقون على رجعتنا وياهم واني ارتاحيت لان عمتي كالت نرجعكم بنات مهدي يربون عدنا ...اللي صار والدي فاجأنا بشي ما كنت محسبة حسابه ..كال الهم بناتكم الكم وبنتي الي انتو اخذوا البنات بس امهن اني ازوجها لابن اخوي...بجيت وتوسلت ولا فاد قفل الموضوع وياهم هيج بعد لا يتفاهم ولا يتراجع ..

ابن عمي ارمل وعمره كبير وبناته كبار كان كل يوم يجي للبيت وكنت متوجسة من جيته ومن سمعت بقرار ابوي تخبلت لطم وبجي وعياط وهوسه هو يهدد وعمي يهدد لان شافني متمسكة ببناتي وكلت الهم تذبحوني يلا تاخذوهن...لو ساكتة بوقتها كان ممكن ياخذون اطفالي مني بس ما سكتت ابد ووره ما راحوا عمي وعمتي ترزلت وانهانيت ولا اهتميت ...ما رضيت اعوفهن وكمشت ببناتي بنصهم لا همه يكدرون ياخذوهن ولا هنه اللي يرضن يعوفني