كذبتي الصادقة❤

مكان جديد

اشكر كل اللي تقدموا بتعازيهم وواسوني ...ربي يبعد عنكم الهم والحزن 💗💗

بعد الموقف الاخير اللي حصل ..شهاب تركني بعد ما خلاني اتندم اللي حجيت عليه كدام ام الفواين...بيومها ايدي موتتني الم لان جرها قوي واني اقاومه ...طلع من الغرفة للحمام وسبح وراح للمطبخ ...كان يوم عطلة والبنات وهو بالبيت يبقون ...بقيت ابجي بمكاني مسلوبة من كل شي ...شنو اني عبده حتى العبيد ما ساويتهم ..تصرفاته بدت تأذيني حيل وتصرفاتي انعكاس لافعاله ياما حاولت اتقرب منه واعامله ويعاملني بغير شكل ..انصدم بي وبنفوره وصده الي بس ياخذ غايته بأذيه يتركني بلا اي كلام ولا عاطفة ...اكرهه اني وما اطيقه .. من يوم ما تزوجنا نفسي ما تريده بس حاولت اتأقلم حتى ويه ريحته المعفنة لو كنت عدو وند اله هم ما هيج يعاملني بس هو حيوان 

وكفت بصعوبة لان اذاني هالمره حيل احس نبضي يتسارع بمكان المفروض يشع بشهوة اني كان يشع بألالم ...حتى شفت قطرات دم بمكاني بالسرير غطيتهن بالبطانية لا يشوفوهن بناتي لحد ما ارجع واغير الشرشف ...بجيت بقهر وين الفرق بينه وبين سابقه كان ان شافني بس متضايقه مو متألمه فقط اتضايق يتركني ويصبر نفسه ويأجل حتى غرائزه وياي ...كنت بنعيم وهسه حتى الحجيم هم يمكن ارحم من وضعي

مشيت للحمام بصعوبة ..التفتت جهة المطبخ بناتي كاعدات وهو واكف عالطباخ يسويلهم اكل وهمه مكيفين ويضحكون ...التقت عيونا وبسرعة بعدناها لا هو ولا اني راغبين بعض شكو تزوجني ..زين هسه تزوجني ليش يجبرني اعاشره وهو كارهني لهالدرجه ...فتت للحمام وفتحت الماي حار من ينزل على جسمي يوجعني وين ما يمشي اثار ايديه القاسية بجسمي مؤلمة جدا وكأنها تنبض بالم

مر وقت واني على كعدتي بالمغطس بالحمام ..والنزف صح قل بس ما توقف حيوان ملخني..اندكت الباب بقوة ...منو غيره سألني بنبرة جافه من خلف الباب مع طرق ايده القويه

-وسناء بيج شي...افتحي ليش تأخرتي

جاوبته بصوت منكسر بعبراتي
-لا ما بيه
-يلا اطلعي دا اشوف
-بعد ما خلصت فد شويه

راح وبقيت على كعدتي ورجع اشوف رجليه من جوه الباب يروح ويرجع
وكفت لبست ملابسي بعد ما ارتاحيت شويه ..فتحت الباب هو بباب غرفتنا واكف وجكارته بحلكه ...باوعت للبيت بناتي ماكو

-وين بناتي
-جدهم البارحة طلبهم يشوفهم ..وديتهم يم عمتهم 

سكتت امنت من ذكر عمتهم لان تحبهن هواي وتداريهن ...مشيت للغرفة بس هو صار بيني وبين دخولها ....رفعت راسي اباوع اله 

-شنو هذا الدم بالفراش بيج شي
-ما بيه 

حاولت افوته ...كمشني من معصمي وجرني للمطبخ واني امشي وراه لان ما بيه حيل اقاوم بعد تعبت حيل ..محضر الي اكل
-اكعدي اكلي