JALAI PENGERINDU

Tusun ke 22

TAJUK:JALAI PENGERINDU
DIKARANG:LIVEANNEROSE

Tusun ke 22

LONDON

datai sida iya ba London, apai Grace ati diri enda entu ragak engka iya lelak bejalai,
Sepemanjai sida ke bejalai ari kuala Lumpur ngagai menua London alu enda ragak baka selama ambih nimbal seleka dua.

"Nama nuan enda entu bejaku deh apai? Nama lelak nuan?"
"Enda"
"Enti nama-nama madah auk apai?"

Alu nadai nyaut meh iya udah nya, mua iya seilu-ilu tang nemu amat iya ngelalai ke mua iya awak ke kami enda nanya iya.

Datai ba Airport London sida iya alu nuju ngagai kereta ke sigi dasuh Stefan jaga bala sekuriti dia empu,
"Nganti ditu dulu kita aku ngambi kereta dulu"
"Auk meh igat" saut indai Grace enggau tuchum.

Stefan alu ngambi kereta enda jauh ari sida iya,
Grace mina ngelila ke pejalai Stefan ke ngambi kereta udah nya datai mesej ari Stefan ba talipaun Grace.

Mesej nya alu di buka Grace jaku Stefan,
"Engka apai sinu meda tua ka kahwin ngenang ke utai udah nyadi ba nuan suba nya sulu"
Grace alu malik ngagai apai iya udah nya iya alu tuchum malas mesej Stefan.
"Engka kini mar ga ati apai indai irau ke kitai anak sida"

Grace alu merap nyium apai iya asai ke rindu amat iya ngagai apai iya baka ke berapa taun enda meda taja selalu video call ko urang putih.

"Enda rapar nuan apai?"
"Enda.., nemu aku madah"
"Auk madah aja meh"

Kereta alu di parking ke Stefan ba depan sida awak nyamai enda bejalai jauh tama dalam kereta.

RUMAH STEFAN

Dua ari nya sida iya agi kisuk ngadu ke pengerami ba rumah Stefan empu iya ke tinggal ke iya ngelamatu diau ba bilik madik indu iya Veanne.

Pagila seduai iya deka di rami ke bala mayuh,
Kad mayuh udah diedar ngagai bala urang ngasuh datai maya pengerami seduai ke deka jadi melaki bini.

Pagi siti nya Grace ba bilik pangking  siti laban ke nganta ke iya,
Veanne atai enggau anak indu lala iya nya meh.
"Pama mua indu lala nya tinduk atas tilam" Grace.
"Udah nusu nya iya tinduk, agi baruh ikun nya meh ngasuh iya jenak amat ka bakani urang ragak"
"Ketup enggau kuyu awak ensepi"
"Ila enggau nuan ga ketup aku hahaha"

Stefan mega ba bilik pangking seduai iya empu nganta berpasuk ke baju kut celum bertancut panjai.
Bala kaban Stefan mayuh datai nulung nganta ke iya sambil ke bertundi pangan diri.

Udah tembu seduai Grace enggau Stefan ke danta urang, seduai iya alu dasuh urang ngagai pelamin seduai iya.
Bala urang mayuh udah datai duduk ba mangku laban ke ba luar rumah ngintu pengerami kahwin.

Stefan dulu ngagai endur Pastor ke berdiri sebedau pengantin indu datai,
Enda lama udah nya pengantin indu datai lubah-lubah ngena karpet merah awak ke enda ngindik rumput.

Grace dipegai apai iya Gomez, seduai iya belubah-lubah nuju ngagai Stefan nangi ke Grace terincir.
Semua urang bertempap ke jari gaga, datai Grace ba Stefan.., Gomez alu megai jari Stefan udah nya dipanggai ke iya ba jari Grace.

"Anak aku Grace serah ke aku ngagai nuan meh igat, aku ngarap ke nuan nyaga iya baka aku nyaga iya, sayau ke iya anang leju bakani seduai rindu ke pangan diri suba baka nya meh pengerindu seduai sampai parai, bisi anak bela ngibun anang belak-lak ke pangan diri anang meda bini ke beranak iya aja nyaga anang baka nya, maya kitai ke ngaga anak ukai siku bela dua-dua ke ngaga, nyema udah leju anjung pulai ngagai apai indai iya anang baka ke udah laban kami semampai nerima penatai anak kami, nya aja jaku aku ngagai nuan igat"

Gomez alu tuchum ngagai menantu iya Stefan,
Stefan alu tuchum mega udah ninga jaku ari entua iya ke laki.

Pastor nya alu nerus ka pengawa iya nyatu ke seduai melaki bini nyadi satu dalam Tuhan yesus.
Seduai iya alu berpasuk ke tincin tanda pengerindu seduai iya nyadi melaki bini.
Semua urang bertempap ke jari gaga udah nya asuh urang nyium mulut ke indu tudah Stefan tu tadi.

Stefan alu nyium mulut Grace,
Udah Stefan tembu nyium Grace semua urang alu nyerauh gaga lagu alu di pasang kena ngerancak ke agi pengerami.

Enda lama udah nya sida iya alu ninga nyawa indai Grace manjung ngagau ke nama laki iya Gomez.
"Nai.. Dani nuan anang bakatu... " nyawa Connie enyau bergetar bai nyabak ngerak laki iya ke majak mejam ke mata serta enda enseput agi.

Grace alu belanda nuju ngagai apai iya, dalam ati iya kesal amat meda apai iya enyau tergali ba tanah.
"Apai!.. Dani nuan" Grace alu ngali ke palak apai iya ba pah iya.
"Udah ninggal ke kitai apai nuan anak" Connie nyabak madah ke Grace apai sida iya udah ngejang ninggal ke sida iya.
"Anang ninggal ke aku apai, udah ga ari gaga aku nuan nadai"Grace nyabak ngasak amat ngerak apai iya ke udah tengkering nadai enseput agi, mua enyau pucat lesi.

Semua urang ke dia enyau nyabak meh meda sida manak ke nyabak,
Stefan alu berkeberai ai mata meda entua ke laki iya ninggal ke sida iya, baru tadi iya udah ngajar enyau parai.

Veanne ngemai anak iya damping ngagai Grace ke nyabak ke apai iya nyentuk ke Veanne nyabak enda alah tat meda urang ke dikesayau ke Grace bela ninggal ke iya.

LIVEANNE

Kasih meh tudah Grace deh.., bangat ditinggal ke bala urang disayau iya, suba Cleventon diatu apai iya kasih udu meh tudah Grace.

Nemu amat apai iya nganti ke udah tembu masuk ke tincin kahwin baru iya madam ke seput enggai enda meda anak iya berpasuk ke tincin.

Aku enda tan ninga leka sabak indai Grace bangat telih ninga leka sabak iya rerauh ngangau ke laki iya.

Malam nya kami nyengai bangkai apai Grace,
Aku enyau nyabak sesedan meh ninga leka sabak indai Grace.

Akai...., nadai enda pedih telih asai tu ati aku wai sulu ditinggal ka nuan selama-lama ya, badu meh tua berpeda, badu meh tua belaya..., udah tu sapa meh urang enggau aku belaya deh... Apai merinsa udu meh aku nadai nuan asie kesulai... Bangat iga nuan kempang ninggal ke kami maya anak nuan ke berami.
Patut meh nuan nadai bermunyi enda nemu nya nuan madah kediri deka ngejang pegi nadai agi nyadi tanah, baka ribut berpuput nadai dipeda bakanya meh ati aku sinu tang enda ulih di peda.
Mua nuan baka ke tinduk, mua tuchum nuan baka ke nundi aku angkat nuan anang ninggal ke aku kediri bakatu.
Puang bilik tua, sayur nuan nadai urang ngintu enti ngandal ke aku ukai aku bangat nemu ngintu sayur nuan sulu kesulai terebai ngelawai ninggal ke aku kepenudi iya.
Danti meh penatai aku ila sulu maya aku nitih ke nuan ila..,

Bakanya meh leka sampi iya.. Agi meh iya bejaku dia tang enda lama udah nya aku meda iya narit seput iya sekali alu pucat mua iya alu luput.

Begau magang urang meda iya ke luput, berumban Grace nulung indai iya laban iya empu ke Lutur.
Kasih bendar meda jalai pengerindu apai indai Grace nyentuk ke indai Grace luput enda dapat nyabak meda laki iya ninggal ke iya..

#Bertampung...