JALAI PENGERINDU

Tusun ke 30

TAJUK:JALAI PENGERINDU
DIKARANG OLEH:LIVEANNEROSE

Tusun kepenudi

HARI MINDAH KE JANTUNG

Pagi nya tumu Grace ngagai Sepital laban deka meda mua laki iya.
Tama iya ngagai dalam wad endur Stefan, iya meda laki iya agi tinduk.

Grace narit seput iya ngica ke kering bejaku enggau laki iya Stefan,
Grace alu merap Stefan, udah nya alu di sium-sium iya mua laki iya.

Enda lama udah nya Stefan pan dani nyepi bisi urang ke merap alu nyium iya.
"Sulu.., tumu nuan kitu"
"Tumu meh laban enda betah laki ku"
"Ermm.., sulu terima kasih udah ngada ke anak aku, purih aku, sanggup beranak ke anak aku taja pedih, aku minta ampun maya nuan beranak aku nadai ba tisi nuan"
"Nadai ngawa nya sulu deh.., bini nuan kan kering"
"Enda sabar aku deka pulai begulai enggau bini anak ku pengudah mindah ke jantung ari penderma nya"

Grace alu mejam ke mata iya udah nya narit seput iya nguji kuat,
"Auk ar bisi sida indai madah, udah tu ngarap ke nuan gerai belama sulu, nyaga Stefanie enggau manah"
"Nama utai ko nuan sulu?"
"Sulu.., enti nyema aku lesi bebadi sanggup nuan nyaga Stefanie enggau manah? Ngiga indai ke mentas enggau iya?"
"Nama jaku nuan ter nyelai amat, enggai aku ninga, aku semina sayau ke nuan siku aja"
"Janji auk, sebut janji aja"
"Auk, auk aku janji"

Grace alu merap Stefan baru enda berasai ai mata iya naya taja enda didinga sada.

Tengahari nya bala entua iya enggau indai Grace empu datai ngagai Sepital nganti ba mangku luar maya ke Stefan deka dipasuk ke urang ngagai bilik bedah.

Grace sigi udah tama ngagai bilik bedah bekena ke baju Sepital,. Stefan udah enda nemu utai agi laban di bius mati enda nemu utai.
Bala misi datai laban nulung Lutur Robin maya medah urang,
Lutur Robin tama pengudah tembu meresi ke jari iya.

Grace alu gali ba katil nya dasuh indu misi laban deka sedia mius iya,
Sebedau nya Grace nyua ke siti sampul surat warna biru ngagai Lutur Robin.

Grace alu gali ba katil, malik iya ngagai katil sepiak iya endur Stefan gali.
Ai mata iya labuh keberai laban udah tu pemadu iya agi dani meda mua laki iya.

Grace alu mejam ke mata iya udah nya indu misi pan meri iya jik bius.
Lutur Robin alu narit seput dulu sebedau ke ngurik dada Grace.

                                  ******
Stefan alu sedar muka mata iya,
Perening iya agai dada iya udah nadai agi asai pedih.
Lutur Robin mansang ngagai iya nanya bakani asai iya enggau utai dipeda iya.

"Bakani asai pagi tu?"
"Erm.. Bisi nyamai mimit"
"Peda tunjuk jari ku bisi berapa iti?" Lutur Robin mantai ke tunjuk jari iya tiga iti ngagai Stefan.
"Tiga" pia ko saut Stefan betul.
"Baik meh nya udah nadai ngawa"

Grace agi bedau ba katil sepiak tang enda dipeda laban dilindung enggau tirai,
Bala sida apai indai Stefan tama enggau indai Grace.
"Bakani asai nuan jang?" mua indai iya tampak sepengudah meda Stefan duduk serta kering dipeda.

Veanne enda enggau laban nyaga Stefanie, sida iya alu bertanya kini enda penunga Grace ari tengahari kemari nadai dipeda, talipaun nadai nemu di angkat.

Lutur Robin berasai sinu ninga sida iya bertanya ke dini endur Grace,
Enda sida nemu udah nadai agi pemadu iya begulai enggau sida iya.

"Lutur ulih nuan madah ke bendar sapa ke nerma jantung ngagai anak aku?"
Apai Stefan nanya Lutur Robin.

Lutur Robin merening mua sida ke dia laban ke benung nganti deka nemu sapa urang nya,
Lutur Robin alu narit seput iya udah nya mansang ngagai katil sepiak, alu nyilak ke tirai nya enggau pengambih sekali awak sida iya ulih meda Grace.

"Iya meh penderma jantung ngagai laki iya"

Semua urang alu tekenyit meda tubuh lempung Grace enda engkebut agi, mata enyau pejam aja.
Indai Grace alu nyerauh meda anak iya udah nadai agi ninggal ke iya kediri bujik apai sida udah nadai tu iya ga ninggal ke iya.

"Dei..., Grace sanggup nuan ninggal ke aku anak asie... Ar... Patut meh nuan malam kemari lain ulah enda nemu nya madah kediri deka ngejang pegi... Ihh.. Merinsa udu meh aku anak nadai nuan... Erhhh... Apai deh indai.. Anak nuan benung mekang ditinggalka ke nuan.. "

Lutur Robin alu ngasuh indu misi ke nulung iya nya macha jaku ari Grace.

Ari aku Grace nuju kita semua..,
Oo.. Indai terima kasih udah ngada ke aku ngagai dunya, baru iya aku ngasai bakani asai nuan meranak ke aku suba.
Pia mega sabar enggau aku sampai aku bisi keja menyana.

Indai.., tua udah kelalu mayuh utang budi ngagai sida laki ku sebilik, maya tu meh aku malas budi manah pementas sida iya.
Cukup meh Cleventon aja ninggal ke sida sebilik,
Jaga manah ucu indu nuan indai.., aku ngejang pegi dulu nitih ke apai aku ila nuan nitih dudi.

Oo.. Indai apai aku berterima kasih ngagai pementas seduai nerima aku nyadi ke menantu seduai taja seduai nemu aku indu jai nasib,
Terima kasih udah kelalu manah enggau aku, jaga manah meh laki aku apai.. Indai nya meh ke bukti aku kelalu sayau ke anak seduai.

Nuju nuan sulu ati perembam dalam, aku minta ampun sayau laban kala belaya enggau nuan, jaga manah meh jantung aku dalam nuan.
Idup meh enggau berpengerai, lantang idup ba dunya, nginsap anang sesekali enggai ke jantung aku rusak.

Jaga meh anak tua enggau manah, giga meh indai ke mentas ke ulih nerima Stefanie baka anak kandung iya empu.
Terima kasih udah sayau ke aku ngelamatu, sabar enggau perangai aku.

Dulu aku sayau ila nuan nitih, ingat jaga manah jantung aku.
Sampai ke salam aku ngagai Veanne, terima kasih Veanne.., aku sayau ke nuan nyentuk ke aku parai lesi bebadi enda pulai agi.

Nya aja ari aku nuju kita semua..

Semua sida iya pan nyabak sesedan meda Grace udah tengkering gali ba katil sepiak.
Stefan nyabak ngasak amat alu angkat merap bangkai bini iya Grace.

"Enda sanggup aku ditinggalka nuan bakatu sulu, taja pia terima kasih sayang udah meri aku jantung nuan ti berega tu.., aku berdanji deka nyaga jantung nuan enggau manah, badu meh nuan berai berambun ke ai mata.. Alai meh nuan nitih ke sulu nuan Cleventon enggau apai, aku sigi semampai sayau ke nuan asie.., Stefanie sigi ngiga nuan sulu laban nuan ninggal ke iya"

Stefan nyabak sesedan asai ke dipandam urang dada iya bai kelalu telih asai ati iya.
Bangkai Grace alu dibai urang ngagai bilik mayat laban ke deka ngintu bangkai iya.

DUA ARI UDAH NGUBUR KE GRACE

Stefanie enggai badu-badu nyabak ngiga bau indai iya Grace,
Beri Veanne tusu butul enggai meh iya nginsap nya tembu nyabak, Veanne pan nyabak meda Stefanie nyabak ngiga indai iya Grace.

Apai indai Stefan nguji deka ngemadu ke ucu seduai nyabak tang nadai ngasi sekali, nguji ga indai Grace nunduk ke ucu iya tang agi bedau kua-kua nyabak.

Datai Stefan ari pasar laban ke ngadu surat pemati bini iya Grace,
Ninga anak iya nyabak ngasak amat enyau baka ke digetil, Stefan pan alu merap anak iya alu kenyut-kenyut seduai iya, butul tusu tadi alu ditumpil ngagai mulut anak iya.

Alu badu tekala nya meh anak iya ke nyabak pengudah Stefan merap anak iya ngagai dada iya.
"Tinduk meh asie.., enyau badu iya nyabak laban iya ulih ngasai ke degup jantung indai iya ba apai iya nya meh iya badu nyabak" Veanne bejaku alu nyabak.

Crisnie enggau apai indai iya pan bisi kia, semua sida iya bela nyabak magang enda nyamai ditinggal ke Grace selama lama iya...

Jayriel udah nemu rita Grace udah nadai agi, nya meh Jayriel nyabak ngasak amat numbuk pagar, ni ke numbuk dinding sampai berdarah jari iya.

Tani nadai daya enyau gila, anak iya pan enyau di ibun ba dalam Sepital.

Ambih meh cherita jalai pengerindu Grace, badu agi iya berai, badu iya tusah ati.
Apus ai mata nuan Grace..

-TAMAT-

Sama-sama meh kitai belajar ari jerita tu, iya ke laki anang bangat deka datai jari ngagai bini.., enti enggai anjung ngagai apai indai iya nya bisi bilik ga bini.

Guna meh peluang enggau masa nya enggau manah laban enda ulih tikal pulai agi,
Masa lalu terus berlalu nyadi masa ke deka atai nya kitai meseti deka nguna iya enggau manah, anang masau peluang.