JALAI PENGERINDU

Tusun ke 25

TAJUK:JALAI PENGERINDU
DIKARANG OLEH:LIVEANNEROSE

Tusun ke 25

TANI

Tani duduk nyabak sikuk-sikuk ba mangku sofa laban ngenang ke anak dulu iya suba di gugur ke iya empu laban pedih ati ko jaku iya meh.

Meda Jayriel enda sayau ke iya agi nya meh iya sanggup ngugur ke kandung iya, iya kelalu steris (stress)  nadai mikir nama agi alu di irup iya racun rumput ke kena Grace ngeracun rumput ba sayur iya suba.

Laun gek Jayriel atai udah parai meh Tani nya enyau jengap-jengap mua nyepi dalam tubuh iya ter lain asai,
Tani enyau luput ulih Jayriel nangung ngagai kereta naban ngagai Sepital.

Datai ba Sepital urang enyau begau laban iya ke berirup ke racun.., udah ga ngandung.
Anak dalam kandung iya udah nadai laban ke agi dua bulan ni tan tudah.

Jayriel minta ampun baru minta peluang kedua ngagai Tani,
Udah diberi peluang kedua tang nadai meh peluang nya tadi ngasuh majak nyadi.

Maya iya rindu ke Tani dembal ke iya, enyau baka gamal antu rasung mua iya minta ba Tani, tang maya iya benci baka nama ga iya nginsah Tani.

Tu ngandung baru Tani ka nganti diri beranak nadai meh Jayriel ka peduli.

Tani murus perut iya udah nya enyau ketawa lelekik iya, pengudah iya ke ketawa enyau nyabak ga iya narit buk iya ke udah pandak dikempat laki iya Jayriel.

Ati iya tusah laban Jayriel enyau enda peduli ke iya agi.

"Nyamai agi aku parai enti majak bakatu!."

Tani enyau ngeramak kuyu iya.., udah nya ngetup kukut asai ke meda Jayriel mansang deka ngacuk iya enggau guntin dipeda iya.

Tani enyau nyerauh kekepai ngapa jari iya taja Jayriel nadai iya tang peda mata iya Jayriel bisi.
Gegetak aja tubuh iya takut, kaki iya berselumbit aja.

ARI BERTUKAR GANTI..

apai indai Tani datai ngusung anak seduai iya laban ke ka nyaga Tani damping ari ka beranak,
Sekali seduai iya datai dia meda bilik baka ke tungkang pecah nadai temu gamal tusut aja.

"Ni nuan mang!."

Indai iya ngangau ke Tani meda nadai dipeda,
Enyau duai apai Tani nguji ngiga ngagai pangking enda nemu nya Tani enyau perunsai aja gamal iya.

"Apuu.., lapa nuan bakatu anak"
Indai iya nyabak meda gaya anak iya bangat nempaya kediri bakanya.
"Ni laki nuan?" apai Tani nanya.

Tani enda nyaut mina merening mua indai iya udah nya ketawa lelekik iya meda mua indai iya.
"Bertalipaun ngagai apai indai iya nuan"
Indai Tani ngasuh laki iya bertalipaun ngagai isan iya nanya kini penunga Jayriel.

Tut.. Tut.. Ko munyi talipaun empai disaut, enda lama udah nya talipaun iya alu disaut apai Jayriel.
"Ar.., nama utai isan?"
"Nadai utai tu! Nya dini anak nuan!."
"Nai.., lapa nya?"
"Bini iya baka urang gila ditu nganti ke ka beranak laki nadai temu tungga, nama bisi nuan ngelalai ke iya dia hah!"
"Enda aku nemu utai ko nuan tu isan, ter nadai kala pulai kitu iya"

Apai Tani alu madam ke talipaun iya naka pemedih ati iya,
Enda lama udah nya Tani alu nyerauh nyepi utai iya ter pedih amat.
"Oww!.., ka beranak nuan tu mang, aram tanggung anak nuan tu"
Sida iya alu berumban nuju ngagai Sepital laban Tani ke ka beranak.

BILIK BERSALIN

anak Tani alu kua-kua nyabak pengudah pansut,
udah sida Lutur meresa anak Tani dia sida iya madah ngagai apai iya Tani laban ucu indu seduai iya bisi penyakit jantung belubang.

Pengudah Tani ke tembu dintu sida iya, Lutur alu ngasuh apai indai Tani nitih ke iya ngagai opis laban bisi utai deka padah,
Sida 3 iya Lutur duduk ba mangku bertungga mua.

Lutur Diana duduk bertungga mua enggau apai indai Tani,
"Enggai enda madah ke seduai, anak seduai Tani bisi masalah mental ko kitai iban gila"
Apai indai Tani semina enda bermunyi tang mua seduai iya udah temu bakani enyau sinu meh ngenang ke ucu seduai iya bisi penyakit jantung belubang tu indai iya gila enyau nadai endur engkah.

"Enti seduai setuju aku ngaga surat ngambi bala misi datai ngambi anak seduai ngagai Sepital gila, iya enda ulih begulai enggau anak iya nangi ke enyau munuh anak iya empu"
"Nadai ko enggau meh Lutur enti iya udah bakanya, asuh anjung berubat din meh iya" apai Tani nimbal Lutur Diana.

Nadai meh tudah Tani danjung urang ngagai Sepital gila,
Ngelingkang enggai dibai urang majak ngumbai diri enda gila.
Pemuas urang kiruh laban iya alu dejik tinduk sekali iya nya baru nyamai mai iya ngagai Sepital gila.

SEBULAN UDAH NYA

Sebulan udah berlalu tang rita Jayriel nadai temu mina kereta iya aja bisi ditemu parking ba tisi jalai semak babas tang tubuh iya nadai ditemu nadai temu penungga.

Pengelama bala Polis ke ngiga iya ke kampung enda nemu nya Jayriel tinduk ba langkau mit endur alai iya nginsap dadah.

Bala Polis alu nangkap iya ke udah lemi tulang nya bai ngagai balai laban urang ka nasat iya,
Udah tembu nasat iya, iya alu dengkah ke urang ngagai endur pemulihan dadah empu.

Jayriel engkah ke urang ba jil siti udah nya alu imbul urang ngena ai dia meh iya nyerauh gegetak enggai ditanjah, 
Iya makai dadah enggai bai negu ai laban celap.

Cukup pemerinsa tudah Jayriel nitih ke masa serta ari iya dipulih ke ari dadah, iya kelalu balat ketagih dadah nya iya enda tan nadai dadah.

Mua enyau ukai Jayriel agi kelalu bai kurus, tulang kerigai enyau ulih dipeda empa pengurus iya...

Apai indai Jayriel nyabak maya ke ngabas anak seduai iya Jayriel,
Anak seduai iya cukup pengurus, seduai iya nangung malu laban rita Jayriel ke makai dadah.

#Bertampung...