بَيِن يَديِك أنا

جزء 1

"بالروح بالدم نفديك يا عراق
بالروح بالدم نفديك يا عراق"

اصوات الرمي وطلقات النار بس هذا يلي ينسمع وركضة المتظاهرين وصياح وهذا وكع وهذا انضرب .....

انباوع من شباك الاسعاف وكَلوبنه متهدأ نار على هذولي الشباب مابيدنه شي غير ندعي ماكو احد اتصاوب او مات وعلى هذولي عديمين الاحساس قب...؟

انفتح باب الاسعاف بقوة هاا احمد شصاير
: هذولي اولاد الكلب يرمون علينه واكو واحد اتصاوب بالبداية جاي انحاول انجيبه
ديربالك سد الباب وراح والدكاترة والمسعفين نزلو ويه للمتظاهرين خاف واحد اختنك من مسيل الدموع او وكع بس اني والمسعفة يلي وياي سارة

سارة بعصبية وخوف حسبي الله ونعمة الوكيل شنو هذولي مو بشر
كثر صوت الرمي وسمعنا هوسه تقترب انفتح الباب وشفت شخص دخلوه النه ايده كلها دم شكَينا القميص من جانب

ايده بسرعة نحاول نعرف مصدر الدم

-سارة الباندج والمعقم بسرعة

باوعت للمتظاهر : هله بالزلم الما تسكت عن حقها

باوع عليه ومعاجبه الحجي: دكتورة يا حق متت

يمعود  الاصابة سطحية والطلقة حتى  مداخله بيدك

ضمدت جرحه وحمدنا الله مبيه شي
تره الالم شوي ويروح الحمدالله على سلامتك

فتح الباب مالت الاسعاف وزاد صوت الشعارات وصوت الرمي والهوسات

"انموت عشره انموت ميه
انا قافل على قضية"

ويتكرر وكل مره بصوت واحد وقوي يرهب السامع

مرت الربع ساعة
سارة :  فاطمة خلصت المناوبة مالتنه خل نرجع للمسشفى

اباوع من الشباك وأرد عليها : بس شوي خل انش؟؟

انفتح باب الاسعاف وصديق احمد مؤمن يتنفس بصعوبة ويحجي وهو يلهث
: دكتورة  .... أحمد .... اتصاوب بالمقدمة يمهم وهذولي  مكافحة الشغب بدو يتقدمون  ويشمرون مسيل الدموع ومنكدر نوصله

طلعت من الاسعاف وسارة انطتني مي بارد وانطينا لمؤمن لان اختنك وبده ايكَح حيل غسل وجهه

وسارة بقت وياه درت وجهي لمكان تجمع المتظاهرين الدنيا صارت سوده من حرك التايرات وناس واكعه بالكاع ميته ونص مختنكة ونص متصاوب وضع لا ينحسد عليه

: مؤمن خل انروحله

سارة :وين رايحه عوفيه وخل نرجع للمستشفى

لا يله مؤمن وين هو  ساره انطتني جنطة البيها المستلزمات ومشينا
ارتبكت وخفت لمن مشيت بين المتظاهرين مدعية القوة شفت

الدكتور سامي الدكتور المسؤول جاي ايعالج واحد واكع شافني واني غلست عبالك مشفته

بدت الخطوات اتقل بينا وبين مكان احمد وبين سيارات الجبيره مالت قوات مكافحة الشغب .المتظاهرين جانو راجعين ليوره اكثر وصايره ساحه او مجال بين المتظاهرين والقوات الأمنية

صارت عيني على الشخص الواكع بالكاع ويلي الدم يملي مكانه ركضت اله بكل قوتي ونزلت يمه نسيت الرمي نسيت الهوسات وكأنو العالم بحالة هدوء طلعت السماعة احاول اسمع النبض مجاي اركز

اجه الدكتور سامي يركض
شسوين روحي رجعي
حجيت دكتور ماكو نبض اخذ مني السماعة نزلن ادموعي احاول انو اهدئ بس شفنه قنبلة غاز مسيل للدموع وكعت قريبة علينه والمتظاهرين شوي
رجعو

الدكتور شكَ قميصه ايحاول يعرف مكان الطلقة اتصرفت من تلقاء نفسي نبع اعتقد من الخوف ورهبة الموقف يلي اني بيه انقذ المريض لو اروح واانقذ حياتي

الدكتور : اكو نبض بس ضعيف لازم ناخذه للمستشفى بسرع؟؟

ركضت للعبوة مال مسيل الدموع اتلامس الدخان اعيوني واحتركن واختنكت بس كملت لحد ما كضيتها ومباشرة شمرتها على قوات مكافحة الشغب والقوات الخاصة ما ادري منين اجتني الجرأة والشجاعة علمود اسوي هيج .
.
اختنكت كلش واعيوني بس ايدمعن وما افتحهن اجه الدكتور سامي والتمو يمي متظاهرين شمرو المي البارد على وجهي واعتقد ببسي مشفت فتحت اعيوني

اشوي دكتور احمد
رجعنا لاحمد واعيوني بالكوات فاتحتهن راح انفقده ....

باوعت لمؤمن وصرخت حيل ( جيبو الاسعاف )
اجتي الاسعاف وفي أمل انو نطلع هذولي سدو الطريق وماكو سيارة لا تطلع ولا اطب

الدكتور يحاول ايوكف النزيف اعتقدت خلص مراح ايفتحون الطريق شفت طابوكه بالكاع شمرته عليهم بكل عصبية

لاحظت انو كلش اتقربو علينه والمتظاهرين بدو ايرجعون
وكعت يم قدم شخص كلشي مبين من وجهه بس اعيونه كان على مسافة 10 خطوات مني ويمه كله لابسين اسود وكذالك بس اعيون وكاضين درعهم ألتقت أعيونه وسط هذي الهوسه كلها

صح خفت وكلت راح اموت من جهة واحمد راح ايموت ولازم انروح للمستشفى من جهة ثانيه اتقويت وطلعت يلي بداخلي
وصرخت عليهم :  يا كلاب يا عديميين الاحساااس فتحو الطريق راح ايمووووت

كان صوتي ضئيل جدا للهوسه بس مدام المسافة قريبة سمعو كل كلمة

ضل ايباوع عليه بدون ردة فعل وصرت عصبية اكثر ردت اتوجه الهم بس الدكتور كضني
ولج لا تموتينه دسكتي 

رجعو المتظاهرين اتقدموا ورجعت باوعت لهذا الشخص شفته أشر لواحد وراح يركض ايوخر السيارة علمود انفوت
صعدنا سيارة الاسعاف واتوجهنا للمستشفى وأهم شي هو سلامة المتظاهر .
.
.
.
لنشوف وين توصل ويه الدكتورة فاطمة🌱 وأتمنى تعجبكم بأعتبارها اول قصة اكتبها🖤