بَيِن يَديِك أنا

جزء 10

ما كان حبك إلا أمر ربي

وما كان قلبي إلا عبدُ مطيع

💜

........................

نزلنا من المصعد وعيني على الباب شفته واكف لابس دشداشة سودة فوكاها غترة مطرزة حاولت ما اباوع واثكل بس ما
طالع كلش حلو والدشداشة عليه تفصال بيده فونه ما اتحملت ما ابتسم بالكَوات كَضيت نفسي

امي شافته وهو سلم عليها

امي : راح تطلع
جبل : ايي يمه وانتو وين رايحين

امي : انزور ونفتر شوي اذا تحب تجي ويانه

هز راسه وابتسم لأمي كض ايدها ونزلها من الرصيف
مشو كدامي ويسولفون واني مدري ليش ضجت واني امشي وراهم اباوع عليه والعيون كلها عليه كلش ضجت

طلعت روحي التقت اعيونه وهو يباوع عليه ويخزر شبي هذا اتقربت من امي ومشيت وياهم واباوع منا ومنا اسوي روحي ما مهتمة

دخلنا الحرمين وهمه بعدهم يسولفون
كعدوا ابمكان

يمه راح اروح ازور

امي : ماشي يمه ديربالج وين تليفونج انطيني اياه

انطيتها الفون وحذائي

جبل : حجيه لعد اني هم اروح ازور

انطاها فونه وشحاطته

جبل : تعاي اوصلج

امي احسها انتبهت عليه بس سكتت
واني بلعتها

مشينا اني وياه
وافكر بأمي

جبل : من اطلعين انتظريني اهنا

رحت زرت واني افكر بيه ماراح من بالي وامي

كملت وطلعت لكيته منتظرني بنفس المكان شافني وعلت الابتسامة على وجوهنا

اتقربت اله وهو مد ايده عود اكضها بالبداية خفت واتلبكت كدام الناس بس
رجعت الابتسامة على وجهي واني اكض ايده

مشينا بين الحرمين انزور الامام ابو الفضل والابتسامة ما راحت عن وجوهنا

جبل : قبل لا نرجع فاطمة

نعم

جبل : شوفي فاطمة بحق هاي الكاع يلي نمشي عليها والامام الزرناه بس انتي مطلبي تراني رايدج من الصدك وحابج  خلينا نبدي صفحة جديدة وحياة جديدة اني وياج