(((((( البر التانى )))))))
#لولو_محمد
الحلقه ١٢
محمد / كل الشباب فى سنك عارفين الاصول و الصح و الغلط
محمود / هو كان عاوز يفرحها
محمد / طب كنت شورت عليا و لا سالتني على الاقل كنت جسيتلك نبضها
يوسف / انا عارف انى اتسرعت بس صدقني يا عمى انا اجلت الموضوع كتير اوى لما ما عدتش قادر
محمد / على العموم احنا اتكلمنا معاها كتير امبارح و مفيش نصيب
محمود / هو ايه اللى ما فيش نصيب احنا لحقنا نتكلم
محمد / الكلمه فى الموضوع ده الاولى و الاخيره لهند هى اللى تقرر و هى رفضت
يوسف / ليه ان شاء الله
محمد / دى كمان رفضت تتعامل معاك من اساسه
محمود / و انت موافق على الهبل ده
محمد / و انا مالى هو مش ابنك قالنا بيني و بين هند ما حدش يدخل احنا مش هندخل خصوصا لو هندخل عشان نجبرها على حاجه مش قبلاها و دمرتها نفسيا
............................................
يوسف / دا اللى هو انا
محمد / تحويل علاقتك بيها لاى حاجه غير انك تكون ابن عم مرفوضه حتى ابن العم له حدود يا يوسف
يوسف / طب هى فين و انا اتكلم معاها
محمد / مش هتتكلم معاها يا يوسف و لو قربتلها هبلغ البوليس انك بتضايقها و اعملك محضر عدم تعرض
محمود / تعمل محضر لمين يا محمد انت اتجننت
محمد / الموضوع لحد كدا و خلص يا محمود ما فيش نصيب الجواز مش بالعافيه
محمود / بناقص يا خويا خليهالك خللها و خليها جنبك اياكش تنفعك و لا ينفعها دلعكوا فيها
محمد / بنتى و انا حر فيها و طول ما انا عايش مش هيحصل غير اللى هى عوزاه لما ابقي اموت ابقوا اعملوا فيها اللى انتوا عاوزينه
محمود / دا اخر كلام عندك يا محمد
محمد / اعتبره زى ما تعتبره
محمود / تمام ما ترجعش تزعل بقي
..........................
محمد / اللى تشوفه يا خويا
محمود / يلا يا يوسف
يوسف يبص لعمه
محمود / قولت يلا يا يوسف
يوسف / هو فى حد تانى يا عمى
محمد / لا يا يوسف مش لازم يبقي فى حد تانى عشان اقولك ما فيش نصيب انت و هند مش متفقين اذا كنتوا كدا قبل الجواز امال بعد الجواز هتعملوا ايه
يوسف / هتغير
محمد / سمعتها منك كتير دا انت بتقولها الصبح و تتعصب الضهر يا يوسف اسمع يا ابني انت عندى فى غلاوه عبد الله
محمود / مهو باين
محمد / لا باين يا محمود باين اوى كمان
يوسف / يا عمى اديني فرصه
محمد / ابعد فتره يا يوسف
يوسف/ مش قادر
محمد / مهو انت كل شويه تحط البنزين على النار و كل ما تهدى تشعللها يا يوسف
يوسف / انا برده
محمد / انت ما اكتفيتش انك كنت هتضربها هنا دا انت كنت هتضربها فى وسط الكليه وسط زمايلها
يوسف / و هى لما شتمتنى قدامهم و قدامكم كان عادى
محمد / مهو من عصبيتك و عمايلك دا البت ورتنى امبارح ايديها زرقه من مسكتك ليها دا الحمد لله انها ما حكتش قدام عبد الله كانت علاقته بيك باظت هى رخره
محمود / يلا يا يوسف ضيعنا وقت كتير
يوسف / طب لو انا اتغيرت لو اثبتلها انى هبقي احسن
محمد / اتغير لنفسك يا ابني قبل اى حد و بعدين ما حدش بيهرب من نصيبه لو ليك نصيب فى حاجه هتاخدها
محمود / كفايا ملاوعه بقي عمالين تعشموا فى الواد و تبيعوا و تشتروا فيه امال لو كان باير و لا معيوب كنتو عملتوا فيه ايه
محمد / مش هرد عليك
محمود / يلا يا يوسف انا اتخنقت
محمود يفتح الباب و يمشي
يوسف/ قولها انى هتغير قولها انى هرجع تانى لما اثبتلها انى اتغيرت قولها انى بحبها و شاريها و مش شايف غيرها قولها انى مستعد اعمل اى حاجه عشان اسعدها يا عمى قولها يا عمى عشان خاطرى لو بتحبنى زى ما بتحب عبد الله زى ما بتقول كلمها و قولها انا هعملها كل اللى نفسها فيه هحققلها كل احلامها
محمد / ربنا يصلحلكوا الحال يا ابني
يوسف يبص فى الارض و يمشي و محمد يروح يقفل الباب وراهم و هو زعلان و حزين
.......................
فى الكليه تانى يوم
يمنى قاعده جنب هند
يمنى / انا كلمتها برده لانى استغربت جدا ازاى تشترك فى مصيبه زى دى و كلمتنى بكل وقاحه انا بجد مصدومه فيها اوى
هند / انا تعبت يا يمنى تعبت بجد و مش عارفه اعمل ايه و لا اروح فين ضغط فى البيت و الكليه تعبانه بجد و مش قادره استحمل كل اللى بيحصل ده
يمنى / مش عارفه اقولك ايه ربنا معاكى بصراحه دا انسان مش طبيعي معقول بعد اللى حصل يجي يتقدم برده
هند تنفخ
يمنى / اقولك حاجه بيني و بينك و ما تزعليش
هند / ما جتش عليكي قولى
يمنى / بصراحه كان نفسي توافقى
هند / لا اله الا الله حتى انتى
يمنى / مش قصدى والله بس يعني انتى فاهمه بصي زى ما بيقولوا التصرف الصح جاى من الشخص الغلط فهمانى
هند / مع الاسف مع الالم و الوقت الغلط و المكان الغلط
يمنى / اكيد ربنا شايلك حاجه احسن
هند / ان شاء الله
بنتين يعدوا من جنب هند و يمنى و بيتكلموا بصوت مسموع
بنت ١ / انا عارفه شايفه نفسها على ايه
بنت ٢ / بكره تتجوز واحد يندمها
بنت ١/ على رايك
.....................
فى الجيم
عبد الله شغال هو و مختار على اتنين تريدميل جنب بعض
عبد الله / ماما شايفه انه مش وقته و ان الوقت ده اولى انى اذاكر فيه بس بصراحه انا شايف انه احسن حاجه تغير مود الواحد
مختار / الرياضه مهمه بتحسن التركيز
عبد الله / هو انت دخلت زراعه عشان المجموع و لا عشان انتوا صعايده و الارض بتاعتكوا و كدا
مختار / اساسي مجموع اصل احنا مش بنهتم اوى بالتعليم زيكوا كدا للاسف الحياه عندنا مختلفه و الله هو مش للاسف احنا حياتنا اه مختلفه بس ما عندناش عيال يعني
عبد الله / يعني انا عيل ؟
مختار / لا مؤاخذه مش انت برده بتاخد مصروف
عبد الله / ما انا لسه بدرس و بعدين انت يعني بتشتغل اوى
مختار / انا مسكت الفاس و عزقت فى الارض اول مره و انا سبع سنين قبل كدا كنت بروح اودى و اجيب طلبات بيتهيالي اول مره كان عندى اربع سنين
عبد الله / اربع سنين ايه يا عم النخع انت
مختار / طب والله يا عم كنت شايل يوميها عمود اكل كمان للرجاله كنت بوصله من السرايا للارض
عبد الله / اربع سنين و تخرج فى الشارع لوحدك
مختار / يا ابني احنا البلد عندنا مقفوله على نفسها كل الناس عارفه كل الناس يعني اى حد معدى كان عارف ان انا مختار الزيني اخو ناصر الزيني كبير عيله الزيني و بعدين اكيد ما كنتش لوحدى هعرف السكه ازاى نزلت مع باقي العيال كل واحد فينا كان شايل حاجه يوديها اللى شايل عيش و اللى شايل غموس كدا يعني
عبد الله / و كان بيطلعلك فلوس من الموضوع ده
مختار / بيطلع طبعا بس مش شرط فلوس ممكن حلاوه ممكن اى حاجه على حسب يعني
عبد الله / انتوا غراب اوى على فكره
مختار / احنا صح على فكره بنطلع الراجل راجل من صغره يعرف قيمه القرش و يعرف يشيل مسؤليه يتكسف يمد ايده لابوه يطلب جنيه
عبد الله / انت بترمى كلام و لا ايه
مختار / هههههههههههههههههههههه لا يا عبد الله الحياه هنا مختلفه هنا انت لازم تركز فى المزاكره عشان لو ما فلحتش فى العلام هتقعد على القهوه انما احنا ما لكش فى العلام اجرى على الغيط
عبد الله / ممكن برده
مختار / تعرف احنا ناس كتير من عندنا ما بتكملش تعليم بمزاجها هو رستق نفسه فى شغلانه و خلاص يتجوز بقي و يفتح بيت
عبد الله / يتجوز ازاى يعني ؟ من غير ما يتخرج ؟
مختار / اه عادى مش قادر يفتح بيت و كسيب يجوزوه
عبد الله / و اللى معاه دى مهى ما خلصتش تعليم هى كمان هو انتوا عندكوا جواز قاصرات و كدا
مختار / هو للاسف موجود بس عندنا فى البلد مش بالشكل اللى فى دماغك طب ما هو موجود هنا مش بيكتبوا على بنات عرفي لحد ما تبلغ سن الجواز يسجلوهولها
عبد الله / لا طبعا ايه الكلام ده
مختار / بيحصل و اسال الحج محمد هيقولك
عبد الله ينزل من على التريدميل
عبد الله / مش قادر خلاص
مختار ينزل هو كمان و يمسح بالفوطه
عبد الله / كفايا كدا النهرده انا تعبت
مختار / كفايا يلا بينا
عبد الله و مختار يروحوا الحمام
.....................
فى شقه محمد
شيري بتحط العشا
محمد/ امال عبد الله لسه بره و لا ايه
شيري / راح الجيم مع مختار عوزاك تكلمه فى الموضوع ده
محمد / موضوع ايه
شيري / الجيم مع مختار يا محمد هيكون ايه
محمد / اكلمه فى ايه هو رايح كباريه دا رايح يلعب رياضه مش احسن ما كرشه يدلدل و لا انتى قصدك على مختار نفسه
شيري / مزاكرته يا محمد بيرجع هلكان يدخل ينام
هند / بيصحي بدرى تانى يوم يزاكر
محمد / عبد الله بيعرف ينظم وقته سبيه براحته و لعلمك بقي انا فرحان بخروجه مع مختار
شيري / ابتدينا وصله المدح فى مختار و اخلاقه و صلاته و تفوقه
محمد / ههههههههههههههههههه الله مش حقيقه و ادينا شوفنا اهله ناس اكابر اخلاق و زوق و لسانهم كويس
شيري / ما تنساش الكلام اللى قاله يوسف
هند / دا كدب على فكره مختار قال لعبد الله انه كان فى الجيم و سهل عبد الله يسال فى الجيم و يتاكد ان يوسف بيتبلى على مختار
محمد / بقي واحد ما بيفوتش صلاه الفجر فى الجامع هيبقي مرافق برده يا ناس اذا كان المتحدث مجنون يبقي المستمع عاقل و لا ايه
شيري / صحيح لقيت محل كويس عوزاك تيجي معايا نمضي العقد بكره
محمد / اجى ما اجيش ليه
...........................
فى شقه يوسف
يوسف بيكلم وسام فى التليفون
وسام / دى طريقه قديمه و متجربه صدقني دا اخر امل ليك بقي
يوسف / انا مش هعرف اعمل كدا
وسام / الغايه تبرر الوسيله
يوسف / طب و ذنبها ايه البنت دى اعمل فيها كدا
وسام / هو انت هتعمل كدا غصب عنها ما هو برضاها
يوسف / يا سلام و الاقيها فين بقي اللى تخسر سمعتها عشانى
وسام / و ايه علاقه سمعتها بالموضوع انت هتمشي رسمي
يوسف / يفتح الله رسمي ايه قصدك ادبس نفسي
وسام / يا اخى اسمعنى و افهم كل حاجه بالاتفاق
يوسف / يا بنتي فاكس
وسام / انا ممكن اساعدك
يوسف / انتى بتقولى ايه يا وسام
وسام / صدقني ما فيش حل تانى
يوسف / و انتى ذنبك ايه ليه تدخلى نفسك فى مشاكل بسببى و الناس تتكلم عليكي طب و اهلك هيقولوا ايه
وسام / هيقولوا كانت مخطوبه و فسخت و مفيش نصيب
يوسف / انتى مبسطه الموضوع اوى
وسام / انت اللى مكلكعه هو احنا اول و لا اخر اتنين نتخطب
يوسف / يا بنتي دخول البيوت مش لعبه و بعدين دى هتتحسب عليكي خطوبه
وسام / انت غريب اوى انت عاوز هند و لا لا
يوسف / ايوه بس مش على حسابك
وسام / لو عندك غيرى هاتها بس لازم واحده تكون جامده عشان هند تغير يعني مش اى واحده و السلام
يوسف / يعني عشان اتجوز هند اخطب غيرها
وسام / يا ابني بقولك اتشالت و اتهبدت لما عرفت اننا بنتكلم امال لو عرفت انك هتخطبنى هتعمل ايه دى هتيجى ترمى نفسها تحت رجليك
يوسف / انا مش عارف اقولك ايه
وسام / الموضوع كله مش هيكلفك حاجه بس بالله عليك لما ترجعوا لبعض تقولها انى كنت بمثل عشان اوفق بينكوا و اصلح بينا لحسن دى ما عدتش طايقه تبصلي و قلبت يمنى عليا و انا دلوقت ما عدليش صحاب غيرك و انت كل اللى حواليك شباب فهفضل طول الوقت فى الكليه لوحدى
يوسف / لوحدك ازاى بس ما انا معاكى اهو
وسام / بجد يا يوسف
يوسف / صدقيني يا وسام انا ما فيش حد عمل معايا اللى بتعمليه عشانى و انا عمرى ما نسيت جميله حد عملهالى
وسام / جمايل ايه بس ما فيش بينا الكلام ده
.............................
فى شقه هند
هند واقفه فى المطبخ جنب لبن بيغلى و سرحانه اللبن يفور تتنهد و تطفى و تشيل الحله و تنضف البوتجاز عبد الله يدخل
عبد الله / هند فى ريحه ... هههههههههههههههههههههه انتى فورتى اللبن يا فالحه دا الحجه ام عبد الله هتنفخك
هند تنضف البوتجاز من غير ما تبصله
عبد الله / فى حاجه مضيقاكى و لا ايه سي زفت عمل حاجه جديده
هند / لا
عبد الله / امال مالك
هند / اتخانقت مع وسام صحبتي
عبد الله / عادى بكره تتصالحوا ما تزعليش نفسك بتحصل
هند / عمرنا ما هنتصالح بجد ما كنتش اتخيل انها كدا
عبد الله / يبقي ما يتبكيش عليها
هند / انا مش زعلانه عليها انا زعلانه على انى كنت هبله و وثقت فيها دى تعرف عنى ادق تفاصيل حياتي دى كانت اقرب واحده ليا
عبد الله / اقربلك منى
هند / ياله بتكلم جد
عبد الله / راحت وسام عبد الله موجود هى وسام دى كانت بتنزل مخصوص تجبلك شيكولاته بتحبك قدى
هند تبتسم
عبد الله / سيبك من وسام دى دلوقت انتى نضفتي البوتجاز و داريتي اثار الجريمه بس لما امك تسالك عن اللبن هتقولى شربناه و لا ايه عشان كلامنا يبقي واحد
هند / هههههههههههههههههههههه
عبد الله / امال انتى فاكره ايه تظبيط الشغل اهم من الشغل نفسه
هند تضحك
....................
فى شقه يوسف
محمود قاعد بيتفرج على التليفزيون و اسراء جنبه يوسف يطلع من اوضته
اسراء / تعال يا حبيبي الفيلم ده اكشن و هيعجبك
يوسف يطفى التليفزيون و يقعد قدام ابوه و مامته
محمود / فى ايه يا يوسف فى حاجه و لا ايه
يوسف / انا عاوز اخطب
محمود / يا ابني مش هنفضها سيره بقي قولتلك ابعد حره تزيد محبه
يوسف / لا يا بابا انا مش عاوز اخطب هند انا عاوز اخطب واحده تانيه
اسراء / لولولولولولولولولولولولولى
محمود / استني يا وليه اهمدى انت بتقول ايه يا يوسف
يوسف / اللى حصل الفتره اللى فاتت خلانى اخد بالى انى كنت ظالم نفسي اوى يا بابا انا مش هشترى اللى بايعني و لا هجرى ورا واحده مش عوزانى
اسراء / لولولولولولولولولولولولولى
محمود / يا ابني انا مش عاوزك تتسرع و لا تاخد الدنيا عند الجواز مش لعبه و دخول البيوت مش سهل
يوسف / انا عارف يا بابا والله بس فعلا فى بنت شريانى جدا و اكتر واحده اعرفها وقفت جنبي
اسراء / حلوه
يوسف / جميله
اسراء / ابوها بيشتغل ايه بنت ناس يعني
محمود / يا وليه استني ... اسمع يا ابني البنت دى ان كانت شرياك حرام تظلمها ادى لنفسك وقت تفكر
اسراء / ما دام البت شرياه يبقي هتقدر تنسيه هند و سنين هند السوده قولى يا يوسف عرفتها ازاى و امتى
يوسف / معايا فى الكليه و باباها مدرس جغرافيا و اهلها ناس محترمين
اسراء / خلاص يبقي على البركه
محمود / يا ابني فكر تانى
يوسف / هو انا كل ما اطلب حاجه تتعبونى كدا
محمود / يا حبيبي انا مش عاوز غير مصلحتك
يوسف / و انا عارف مصلحتي فين
يوسف يقوم يدخل اوضته و يرزع الباب وراه محمود يبص لاسراء و يقوم وراه يفتح باب الاوضه
محمود / حددلى معاد مع اهلها
..........................
فى شارع ضلمه
مختار ماشي يوصل لحد بيت قديم يبص يمين و شمال و يدخل يطلع السلم و يخبط على شقه تلت خبطات ثوانى و الباب يتفتح و شاب يسلم على مختار
الشاب / الباشا تعال ادخل
مختار يدخل يلاقي معمل كيميا و انابيب و تفاعلات
مختار / انت هتودى نفسك فى داهيه باللى بتعمله ده
الشاب / انا جبتلك اللى طلبته
مختار / حبيبي
الشاب يشاور على كوم ورق
الشاب / دى كل الابحاث اللى اتعملت
الشاب يطلع كرتونه
الشاب / و دى معظم المنتجات اللى فى السوق بس انا جربتها شغل اعلانات بعيد عنك
مختار يمسك ورقه
مختار / يعني الفرمونات دى ما لهاش وجود
الشاب / ليها جسم الانسان او الحيوان بيفرزها عشان يستقطب الجنس الاخر بتاعه بس احنا مش حيوانات يا مختار احنا برده لينا عقل
مختار / لينا بس اكيد بتاثر برده و لو بنسبه
الشاب / الابحاث اللى لقيتها بتقول انها ما لهاش التاثير الملحوظ ده و انها بتفرز مع العرق طبيعي و انا فعلا شميت معظم الروايح دى و ما حستش باى حاجه
مختار / و هى فين الجنس الاخر اللى هتستقطبك انبوبه اختبار
الشاب / ههههههههههههههه تصدق ممكن ما انا مش هستقطب نفسي فعلا المهم البرفيومز دى بتترش على
مختار / اماكن النبض الرقبه و الايدين
الشاب / بس انت ايه اللى خلاك متاكد اوى كدا انها فرمونات
مختار / عشان انا مش جماد و برده مستحيل ابص لواحده زى دى الا لو كنت شارب حاجه دورت على حاجه تكون بتاثر بالشكل ده لقيت الفرمونات
الشاب / تفتكر فعلا الفرمونات دى ليها التاثير ده و مش راضيين يعلنوا عنها دا كل الابحاث بتاكد انها اسلوب ترويج منتجات مش اكتر
مختار / ما لهاش بديل ما لهاش مضاد
الشاب / لا ما لقيتش بس زى ما قولت لينا عقل ما البنات فى الشوارع كاسيات عاريات مستحمين بالبرفانات و مع كدا
مختار / احنا رقم اتنين فى التحرش يعني مش بعيد
الشاب / دى تبقي كارثه
مختار / انا هاخد الحاجات دى اجربها
الشاب / هتستقطب مين انت كمان
مختار / مش هجربها على نفسي هاخدها زياره للبلد و اوزعها على الرجاله و اشوف
الشاب / انت اتجننت يا مختار هتشوف ايه مين فيهم هيقولك على سر بيته هى الحاجات دى فيها كلام و لا حكاوى يعني
مختار / ما انا لازم اعرف لازم اتاكد على العموم ما تشغلش انت بالك انا هتصرف مش هيبقي زى ما انت فاكر
الشاب / بقولك ايه خد بالك من نفسك الست دى شكلها مش سهل و عارفه هى بتعمل ايه كويس
مختار / و لا احنا عيال يا ابن عمى بقولك ايه قفل البتاع ده و روح الوقت اتاخر و بعدين ايه المكان ده
الشاب/ اللى لقيته اعمل ايه كل ما اروح حته الجيران تشتكى من صوت الفرقعه
مختار / مسيرك هتولع فى روحك
الشاب / الكميا دى يا مختار هى مفتاح الحياه هى اللى بتخلينا نفهم كل حاجه كل حاجه فى الدنيا ما هى الا تفاعل كميائي حتى الطبخه تحط ان اي سى ال على اى مركب يغير طعمه
مختار / ما تقول ملح يا خويا
الشاب / كل حاجه فى الدنيا ما هى الا مركبات كيميائيه بتتفاعل مع بعضها و كل ما غيرت فى المعادله هتديك نواتج جديده
مختار / يا خسارتك يا ابني المهم خد بالك من نفسك و خلاص
الشاب / ما تقلقش عليا انا برده ابن الزيني
مختار / عاش يلا سلام
مختار ياخد الكرتونه و يمشي و الشاب يقفل الباب وراه
...........................
فى الكليه تانى يوم
وسام و يوسف قاعدين فى الكافتريا
وسام / لا طبعا مش دلوقت
يوسف / امال امتى اضرب على الحديد و هو سخن
وسام / لا يا يوسف مش كل حاجه ينفع معاها الاسلوب ده ما ينفعش تتقدم لواحده و تانى يوم تتقدم التانيه كدا مفقوسه اوى انك بتكيدها
يوسف / ما احنا بنعمل كدا فعلا
وسام / يا ابني افهم الحاجه لازم تستوى على نار هاديه و الا تشيط منك
يوسف / يعني اعمل ايه انا خلاص فاتحت اهلى فى الموضوع
وسام / ما اختلفناش بس ما ينفعش دلوقت قولهم مثلا بعد الامتحانات عشان ما نعطلش بعض اى حاجه اى حاجه
يوسف / و انا لسه هستني لبعد الامتحانات
وسام / لا طبعا الفتره الجايه هتعمل معايا نفس اللى كنت بتعمله لهند و اكتر
يوسف / ازاى يعني
وسام / لازم تشوفك هاملها و مهتم بغيرها عشان تعرف قيمه اللى كان معاها
يوسف / بس هى بنت عمى عادى انى اوديها و اجيبها لكن انتى
وسام / انا مالى بس ... بص معاك حق انا هكلم ماما فى الموضوع و انت تجيب اهلك و تكلمهم على قرايه فاتحه و نخلى الموضوع فى السر مش هنقول لحد فتره لحد معاد الخطوبه
يوسف / ماشي كدا معقول
وسام / المهم بقي تغرقنى ورد و هدايا بقي و انا هصور كل ده و انزله على الانيستا و هى اكيد هتشوفه و كام بوست على كام تويته كلام بالمستخبى نفضل مع بعض طول الوقت نروح و نيجى سوا فى كل حته تهتم بيا جدا اهتم بيك جدا كدا يعني نسبكها
يوسف / كل الحاجات دى سهله بس
وسام / صدقنى فى اقل من شهر هتلاقيها جايه تبوس رجليك و مش بعيد تبعت عمك يفاتحك فى موضوع الجواز
يوسف / لا عمى ما يعملهاش
وسام / اللى خلاه يخسر اخوه عشان خاطرها مش هيراضيه عشان خاطرها برده
يوسف / معاكى حق برده ... انا بس خايف عليكي
وسام / يا يوسف انتوا الاتنين اعز اصحابي و انا كل اللى يهمنى انكوا تكونوا سعدا
يوسف / مش على حساب سمعتك
وسام / ما انا هيبقي مقرى فتحتي
يوسف / مش بتقولى مش هنقول لحد
وسام / بنغزى العين يعني ما فيهاش حاجه بتحصل دول بيبقوا مخطوبين و مش قايلين لحد كمان العين فلقت الحجز
يوسف يتنهد
وسام / بص بقي انا تعبت براحتك
يوسف / لا لا خلاص اتفقنا انا بس مش مستوعب
وسام / فى الاول صعب و محتاج تركيز بعد كدا الدنيا هتظبط لوحدها
يوسف/ امرى لله نجرب
وسام تبص ليوسف و السعاده مش سيعاها
.........................
فى السرايا تانى يوم
مختار / هتعمل ايه يعني
ناصر / انت مش ليك اقولك مين فيهم بيجيب نتيجه خلاص ما لكش دعوه بالباقي بقي
مختار / تمام
ناصر / الموضوع ده لو صح
مختار / هو مش صح فى الحاجات دى او مش بالقوه بتاعه اللى معاها و الا كانت اتباع بالوف
ناصر / طب ما نشوف حد بتاع حاجات مسترده يجيبلنا حاجات اصليه من الغاليه نجربها
مختار / انا عملت كدا فعلا و طلبت حاجات كتير من النت بس على ما تيجي بقي
ناصر / ما تشغلش بالك انت ان شاء الله كلو هيبقي تمام
مختار / نقيت الرجاله
........................
أنت تقرأ
البر التانى بقلم / لولو_محمد (كامله )
Actionشاب من الصعيد يعيش فى سلام بين عالمين حتى يقع فى حب يتسبب في شتات عالميه اكشن غموض دراما رومانسي
