البر التانى بقلم / لولو_محمد (كامله )

الحلقه ١٦٧

(((((( البر التانى )))))
#لولو_محمد
الحلقه ١٦٧
فى الداخليه
ظابط يخبط بايده على المكتب جامد لمجموعه ظباط واقفه قدامه
الظابط ١ / دا اسمه تهريج
ظابط ٢ / و احنا هنعرف منين انها
ظابط ٣ / انا و الله فعلا اكلت من الحلويات دى قبل كدا لو كان فيها
الظابط ١ / معاكوا خط سير العربيات اللى داخله و اللى خارجه واماكن تخزينها ساعه زمن و تكونوا جايبين اكبر كميه عينات و تبعتوها تتحلل و اى عينه يثبت احتوائها على البى كاى
الباب يخبط و ظابط يدخل
ظابط ٤ / انا اسف جدا يا فندم بس فى حاجه مهمه جدا حصلت و لازم حضرتك تعرفها
..................
فى سرايا فيرا
فيرا بتتفرج على التليفزيون
المذيعه/ بتتباع فى المدارس فى المحلات حتى على الارصفه الموت بجنيه و عروض و لعب و هدايا و احلى تسويق و اعلى ما بيعات الاطفال بيحبوها مش عشان جودتها عشان منين الطفل يصرخ لامه تشتريله كانه شبطان مش عشان هو مدمن مهو مين شيطان ممكن يفكر التفكير المريض ده
فيرا تضحك
فيرا / انا ههههههه
رشيد يدخل و هو متعصب يشوط الباب برجله الرجاله ترفع عليه السلاح فيرا تشاورلهم يطلعوا بره
رشيد / انتى ايه شيطانه ازاى تعملى كدا
فيرا / انت فاكرنى ببيع ايه و بعدين انت مالك اصلا بشغلى انت بتعمل شغلك و بتقبض و ما لكش دعوه باللى جوه الباكدج مش دى الرولز بتاعتك من الاول انا لو ما كنتش بحبك
رشيد / انتى استغلتيني
فيرا / ما كانش فور فرى قبضت و قبضت كتير كمان
رشيد / و الادويه
فيرا تبصله
رشيد / دول ناس عيانه ناس بتموت بدل الدوا تديهم سم
فيرا / بحل ازمه الكثافه السكانيه بساعد الحكومه ايه ما تعبتوش من حملات تنظيم الاسره
رشيد / انا مش قادر استوعب
فيرا / انا بتاجر فى الاعضاء يا رشيد بموت الناس و افتحهم و اقطعهم و ابيعهم لاعلى سعر انا بموت اطفال عادى بتاجر فى البنات و الاطفال و اى حاجه تجيب فلوس انت بقي مصدوم ليه كنت فاكرنى مديره مدرسه راهبات مثلا ... انا هقولك ايه اللى مزعلك ... انك عرفت من بره
رشيد / ما انتى بتفهمى اهو
فيرا / اعتبرنى بشيل من علي ضميرك حمل ما عدتش قده سمر اثرت عليك صحت ضميرك و واحده واحده بدات تفقد السيطره انا واخده بالى من زمان بس ما اقدرش اساعدك فى الحكايه دى دا انت اتجوزتها و سمعت انك بقيت بتصلى كمان
رشيد / ما قصرتش فى شغلى
فيرا / تمام يا رشيد هديك باكدج ... اندر ايدج فيرجن هتروح حفله انا و انت عارفين هتعمل ايه هناك ... ممكن توديهالى
رشيد يبصلها
فيرا / اكيد لا ... شوفت بقي انك ضعفت ... ما عدتش رشيد الساحر الاسطوره و واحده واحده مش هتبقي نافع فى الشغلانه دى و الكنز اللى عندك هيندفن موهبتك النادره و خبرتك هيضيعوا عشان شويه ضمير صحيوا فجاه ... عرفت ليه ما قولتلكش
رشيد يسيبها و يمشي
فيرا / هترجع و انا هستناك
فيرا تعلى التليفزيون
المذيعه / لا يا فندم الموضوع مش مجرد حلويات احنا عاوزين نطمن ان اولادنا فى امان
فيرا / هههههههههههههههه لذيذه اوى البنت دى
.......................
فى اوضه سماح
سماح بتزاكر مغاورى يدخل
سماح / دقيقه بس دقيقه اخلص الحته دى
مغاورى / خدى وقتك انا لسه هغير و اتشطف
سماح / يووووووه دا انتى رخمه اوووف
سماح تقفل الكشكول بعصبيه و تلم حاجتها
سماح/ بقالى ساعه فى الحته دى اعيد و ازيد و ابدا اصلا البت ما لهاش غير بيتها و جوزها بلا تعليم بلا قرف
مغاورى/ بشوقك انا ما يفرقش معايا بس انا ما كنتش اعرف انك نفسك قصير اوى كدا
سماح / سيبك منى ... شكلك مش مظبوط عمتك تانى و لا ايه
مغاورى / لا مفيش حاجه ... امممم انا نسيت اكلمك قبل ما اجى ... عندنا اكل و لا انزل اجيب
سماح / ما شوفتش الحله اللى بره و لا ايه دا عملتلك مكرونه بالتونه
مغاورى / و دى تطلع ايه دى ... اقولك اغرفى اغرفى انا واقع
سماح / هتعجبك استنى
سماح تطلع بره و مغاورى يدخل الحمام يغسل وشه و ايديه
سماح / والله كان ورايا مزاكره كتير فدى كانت اسرع حاجه يعني
مغاورى / كلها نعمه ربنا احنا هنتبتر على ايه و بعدين تسلم ايدك يعني
مغاورى يطلع و سماح شايله طبقين فى ايدها تحطهم على الترابيزه
مغاورى / لا ريحتها حلوه
سماح ترجع تجيب طبق السلطه و تحطه و معلقتين
سماح / فى كمان فى الحله لو عاوز اجيبلك
مغاورى / اخلص ده الاول بسم الله
مغاورى يدوق
سماح / عجبتك
مغاورى / حلوه تسلم ايدك
سماح / اعملها تانى
مغاورى/ لا
سماح / الله هى مش عجبتك
مغاورى / خليها للطوارئ اللى زى دى تعرفى لو حطيتيلى علبه التونه على طبق السلطه و ظبطيهالى و سخنتيلي رغيفين عيش و لا تسلقي و لا تسبكى مش اريحلك والله اريحلك
سماح / طب لو مش عجباك
مغاورى / حلوه وآلله تسلم ايدك هاكلها لا دا انا هنسفها بس ما تعمليهاش تانى انا ما بفهمش الاكل ده بطنى مش واخده عليه تحسيه ... مش بتاعى
سماح / طب عاوزين نشترى فريزر صغير بقي احط فيه خزين فراخ لحمه الحاجات دى يعني
مغاورى / محلوله بكره يكون عندك احسن حاجه
سماح / و عاوزه حلتين و صينيتين و شويه مواعين اقولك ما تشغلش بالك انا هكلم امى تجبلى
مغاورى / ورقه وقلم و اكتبى طلباتك و انا هجيبها خلى ست فاطمه مرتاحه
سماح / تمام اللى تشوفه
مغاورى يكمل اكل
سماح / بالمناسبه ... امى و الجماعه هيجوا يزورونى بكره
مغاورى / عباده كلمنى مش فاهم هو عامل تكليف ليه
سماح / هنعمل ايه
مغاورى / فى ايه ؟
سماح / افرض الجنونه جت لعمتك و
مغاورى/ سماح ... دى عمتى مهما كان اللى بينك و بينها مهما كان اللى بيني انا و بينها هتفضل عمتى يا سماح
سماح تبص الناحيه التانيه و ترجع تبصله و تهز راسها
سماح / لا امى و لا اخويا هيعدوا اى غلط فى ابويا و لا حتى عشانى
مغاورى / مفيش حاجه هتحصل ان شاء الله و بعدين سبيني اتهنى على اللقمه بقي
سماح / معاك حق حقك عليا ... صحيح و انا بقلب فى الدولاب لقيت حاجه كدا اول مره اشوفها ... بس عجبتنى
مغاورى يبصلها باستغراب
سماح / كنت دافسها كدا ليه ... يا راجل بكلمك على القميص الاصفر الكنارى القصير
مغاورى يبتسم و يبص الناحيه التانيه و هو بيهرش فى قفاه بصابعه
سماح / تسلم و تسلم مجايبك
سماح تقوم تدخل الحمام
مغاورى / مش هتاكلى و لا ايه
سماح ما تردش
مغاورى / طب اكمل اكل و لا اجى و لا ايه
سماح ما تردش مغاورى ياخد معلقتين بسرعه و يقوم و يرجع ياخد معلقتين يحشرهم و يروح يفتح الحمام
........................
فى سرايا الجوارحه
انتصار بتحضن و تبوس فاتن
انتصار / الف مبروك يا ضنايا ربنا يتملك على خير
فاتن / انا لولا الملامه كنت زغرطت فى المستشفي
فاطمه / البت دى اسمها فاطمه على اسمى انا بقولك اهو
فاتن / و احنا نطول يا عمتى
هند / الف مبروك يا فاتن ربنا يتملك على خير و تيجي بالسلامه
خديجه / كلمتى ابوكى تطمنيه
فاتن / طبعا اول ما خرجت من العياده اول واحد حتى قبل ابو عمر
انتصار / ناصحه من يومها بتضمن حقها هههههههههههههههه
الكل يضحك
هند / هو انا الوحيده اللى مش فاهمه و لا ايه ... انتى فاهمه يا ماما
شيرى / هو فى اكرم من الكبير يا دودو
انتصار / لا و مش اى كرم دا كلو الا البنات على قلبه بيقول رزق
فاطمه / لما عرف انى حامل فى بت فى سماح جابلى طقم دهب
انتصار / عندى اخوه بس انا جابلى خاتم زياده
انتصار تغيظ فاطمه فاطمه تضحك
فاتن / ما تقلقيش يا عمتى انا ضربته منها
انتصار / الا بالحق انتى صحيح ما رجعتيهوش من فرح هند
فاتن / ما خلاص بقي يا ام فاتن هو اللى بيروح بيرجع
انتصار / ما يغلاش عليكي اعتبريه هديه بطه الصغيره
فاطمه / اخص عليكي يا ام فاتن بقي دا مقام بطه عندك برده
انتصار / لو على مقام بطه و لا غلاوه بطه فدى لا تتقاس بمال و لا تتاقل بالدهب و بعدين لسه هديه خديجه
فاطمه / لا ... ان شاء الله شاكر ... عشان سيرته تفضل فى الدنيا
الكل يبص لبعضه
شيري / انا هقوم ابص على الاكل لحسن سايبينه لوحده بقاله ياما
خديجه / انا جايه معاكى
شيرى تقوم و خديجه وراها
فاطمه / انا طالعه اوضتى ارتاح شويه
هند / و انا كمان تعالى نطلع سوا
هند و فاطمه يطلعوا سوا
هند / ممكن اسالك فى حاجه و ما تضايقيش
فاطمه / اسالي
هند / لو خديجه جابت بنت هتزعلى
فاطمه / اكيد لا كل اللى يجيبه ربنا خير هى بس تقوم بالسلامه ... بس ... احنا صعايده يا هند ... اه كل اللى يجيبه ربنا خير و كل حاجه ... انتى يا بت رخمه كدا ليه ... طب تصدقى لو ربنا كرمها ببنت ندر عليا لدبح عجلين
هند / ولو ولد
فاطمه / هدبح اربعه .. يا رخمه
فاطمه تسبق و هند تجرى وراها
هند / استنى بس انا لسه مخلصتش كلامى
فاطمه / لا انتى رخمه مخصماكى
هند / هصالحك استنى ههههههههههه
هند تطلع تجرى ورا فاطمه
.......................
عند الجواهرجى
ناصر بينقى بين تلت اطقم دهب تقيله مختار يدخل
مختار / ايه ده انت عرفت ... السلام عليكم يا حج مكاوى
الجواهرجى / و عليكم السلام يا مختار يا ابنى تعال اتفضل
ناصر / اول واحد تعال ساعدنى
مختار يروح يقف و يتفرج
مختار / والله كلهم حلوين هى حاجه عم مكاوى كلها حلوه ... بقولك ايه يا حج ... ما عندكش حاجه من بتاعه اليومين دول
مكاوى / عندى شغل جديد لسه واصل هيعجبك اوى
مختار / ربنا يكرمك يارب وريني احلى حاجه عندك
ناصر / و انا اللى قولت هتساعدنى
مختار يشاور على واحد
مختار / ده حلو خدهولها
ناصر / بس التانى ده تحسه اتقل كدا ايه رايك
مختار / خلاص خده و انا هاخد ده
ناصر / ماشي كلامك ... نشوف حاجه بقي لام فاتن
مكاوى يرجع و شايل علب يفتحها اطقم بناتى خفيفه و اساور و خواتم
ناصر / بقي ده مقام ست البنات برده شوفلنا يا عم خاتم الماظ و لا حاجه تقيله كدا
مختار / لا لا الحاجات دى حلوه هاخد دى
مختار يشاور على اسوره رقيقه اوى
ناصر / ياض لو ما عكش اكملك
مكاوى / خلى خالص يا سيد الناس خيرك سابق
مختار / عشت يا حج بس والله معايا ... ام عباده لسه مدياها خاتم و حلفتها ما تقلعه و انت عارف زوقها مش هتلبس الحاجات التقيله دى غير فى الافراح و على عينها كمان هاخد دى و هاخد الطقم ده بس كل واحد لوحده و شوفلى علبتين حلوين على زوقك كدا يا عم مكاوى
مكاوى/ عنيا
ناصر / تسلم عنيك و هاتلى الطقمين دول يلا ان شالله ما عن حد حوش ما يغلاش عليها
مختار / الا هو ابو عمر جالك و لا لسه
مكاوى / جه امبارح و اشترى سلسله على شكل الكعبه
ناصر / امبارح !!!
ناصر يبص لمختار
...................
فى مطبخ الجوارحه
سماح فاتحه التلاجه و بتنقى حاجات بتحطها فى حله ماجده تدخل
ماجده / مساء الخير
سماح / مساء العسل بقولك ايه هو احنا ما عندناش فلفل اللوان ؟
ماجده / مش عارفه مفيش عندك ؟
سماح / لا مش لاقيه
ماجده / هى الطبخه واقفه عليه و لا ممكن ابعت اجيبهولك الصبح ؟
سماح/ مش عاوزه انزل الصبح و اضطر احتك بعمتك و امى واهلى جايين بكره و مش هبقي فاضيه اعمل حاجه ... مش مشكله هتبل الحاجه و اسيب الفلفل للصبح
ماجده / هتعملى ايه شيش ؟
سماح / اه عرفتى منين ؟
ماجده/ الحاجات اللى فى الحله و عاوزه فلفل الوان خمنت
سماح / انا بعمله حلو اوى هبقي ابعتلك طبق هعمله مشوى على رز كبسه هتاكلى صوابعك وراهم
ماجده / تسلم ايدك جوعتيني على السيره
سماح / انتى عامله ايه مع عمتك ؟
ماجده / عامله ايه فى ايه ؟
سماح / ما اعرفش مش بحس انها بتعاملك حلو ..  بحس أنها بتطلع غلبها فيكي ... مهى الواحده لما بتسكت
ماجده / دى امى يا سماح امى و ام جوزى الله يرحمه و جده عيالي و بعدين انا واخده عليها و على طبعها
سماح / و هى بقي بتقدر الكلام ده ؟
ماجده / انا مش مستنيه منها حاجه انا بعامل ربنا اقعدى يا سماح
ماجده و سماح يشدوا كرسيين ماجده تشد سكينه و تخلى الفراخ
سماح / بتعملى ايه
ماجده / هتسلى و احنا بنتكلم
سماح تجيب سكينه تانيه و تشتغل معاها
ماجده / مفيش اسهل من الكلام خدى حقك و ردى و هى ترد و الدنيا تكبر و يمكن من غير ما تقصدى تضيعي حقك و بدل ما الحق كان معاكى يبقي معاها و فى كل الحالات خسرتى انما لو سكتى
سماح / بتسوق فيها جربتها بتفتكر انه ضعف و تزيد و اديكي شوفتى و فى الاخر ما احترمتش حتى عضم التربه و لا عملت حساب لحد ... يا ماجده هو فى شماته فى الموت
ماجده تبص فى الفرخه و تتنهد
سماح / لو كان مغاورى بعد الشر بعد الشر اللى مات يوميها كانت هترتاح هى لو كان اخويا اللى مات كانت هتفرح
ماجده / ما حدش بيفرح فى الموت يا سماح
سماح / عمتك بتفرح فرحت فى موت ابويا يا ماجده ابويا اللى عمره ما اذى حد و لا طلعت منه العيبه فرحت فيه يبقي الغريب قبل الغريب بيترحم عليه و عمتك بتشتمه
ماجده / غلطت بس ... كلنا بنغلط
سماح تتنهد و تبدا تقشر البصل مغاورى يدخل
مغاورى / السلام عليكم ... اتاخرتى كدا ليه قلقتيني
ماجده / الله يسهلوا مش قادر على بعادك يا ستى
سماح / هههههههههههه
مغاورى / انتوا بتعملوا ايه هتعشونا حاجه حلوه و لا ايه
سماح / هو انا مش لسه معشياك و بعدين هتتعشي فراخ بالليل يعني
مغاورى / بالليل و لا الصبح
مغاورى يفتح التلاجه يلاقي حله محشي بتنجان يطلعها
مغاورى / خدى سخنيلى دى
سماح / هبقي اعملك بس سيب دى
ماجده / يا بت سخنيها هو فى ايه
سماح/ فى انه لسه متعشي
مغاورى / لا فيها انها خايفه يقولوا مين اللى اكلها و يتعرف انه انا
ماجده / و دى فيها ايه
سماح/ فيها انه ملزم منى انا هعمله
ماجده / انا اللى اكلتها صحيت اطافست و كلتها الف هنا على بدنه اوعى انا اللى هسخنهاله
ماجده تقوم و تحط طاسه و سمنه
مغاورى / بحب البتنجان البايت اكتر من الصابح قرمشيها يا ست الستات
ماجده / عيني
سماح / هعملك والله بس
ماجده / ما خلاص بقي يا سماح و بعدين دا بيته عيب اللى بتعمليه ده
سماح / مش انا اللى عملت انتوا و لا نسيتي يا ماجده مش الكبير هو اللى قال ما حدش له دعوه بيا و انى ملزمه بروحى و بجوزى
ماجده / ادى اخره اللى يتجوز عيله مش كنت استنيت عليها شويه تكبر و تعقل
مغاورى / لا مهو جنانها عاجبنى برده
سماح تبصله و تبتسم
مغاورى / صحيح يا ماجده دوقتى المكرونه بالتونه قبل كدا
سماح تزغرله
ماجده / لا بس شوفتها على النت بيقولوا حلوه و خفيفه
مغاورى / خفيفه لدرجه انها ما بتصلبش فى البطن ربع ساعه على بعض
سماح / ما بتسترش ابدا كدا
ماجده / هههههههههههههههههه عمره دا انا مره قولت اجرب اعمل فطير تركى ... الا صحيح يعني مهو بمبدائك ده المفروض ما تاخديش حاجتك من هنا بقي
سماح / مهو ما بيجبليش اعمل ايه يعني نموت من الجوع هنا يعني و لا ايه
شاهين يدخل
شاهين / هو مين اللى بيجوع هنا يا سماح ... ايه الروايح الجامده دى تسلم ايدك يا ماجده فى ليا و لا ايه
مغاورى / بالليل يابا
شاهين / خليك فى حالك ... ما ردتيش يا سماح مين اللى بيموت من الجوع
مغاورى / بتشتكى منى انى مش بجبلها خزين
شاهين / خدى دى من ايدي يا سماح
سماح / تسلم يا كبير بس
شاهين / انا هنا ابوكى يا سماح تقوليلى يابا خدى دى من ايدي
سماح تاخدها
سماح / تسلم ايدك
مغاورى / و انا ما ليش واحده من ايدك يا حج
شاهين / لا انا باكل الغريبه و الملبن بس ... خدى يا غريبه الواحده دى
شاهين يعزم على ماجده تاخد و هى مبتسمه
سماح / ايه ده يعني انا طلعت الملبن
مغاورى / على كدا انا طلعت فايش بقي
ماجده / تصدق يا مغاورى نفسي فيه بكره ابدء فيه
سماح / لا خليها بعده و اساعدك بكره امى جيالى مش هبقي فاضيه
ماجده / و ماله احضر بكره الخميره و بعدين نكمل
سماح / ماشي
كوثر تدخل
كوثر / متجمعين عند النبى ان شاء الله
شاهين / اللهم صلى عليك يا نبى تعالى يا ام عباس كليلك لقمه
كوثر / تسلم يا خويا
كوثر تقعد سماح تشد رخامه التقطيع و تكمل خلى الفرخه
كوثر / خير هى سماح عزمانا على الغدى بكره و لا ايه
شاهين / لا سماح اهلها جايين يزوروها بكره مش فاضيه
كوثر / بجد ينوروا و هى بقي الفرخه الغلبانه دى هتقضيهم ان شاء الله و لا هتحلفيهم عليها
مغاورى / لا دا احنا هنتعشي بيها انما انا هعزمكوا بكره على اكله سمك و جمبرى جاهزه و اهو يوم تريحوا فيه من المطبخ
شاهين / يدوم العز اعمل حسابى بقي فى طبق شوربه وصايه من اللى قلبك يحبها
مغاورى / من غير ما تقول هظبطك
شاهين / ههههههههههههههههه انا هطلع انام يلا تصبحوا على خير
كوثر / و الفرخه يا كبير
شاهين / الف هنا عليكوا
شاهين يمشي و كوثر تبص على مغاورى بياكل من المحشي يشوفها بصاله يعزم عليها بواحده
كوثر / لا يا حبيبي كل انت انا شبعانه
سماح تقوم تجيب الكبه و تحط فيها البصل و تشغلها و ماجده تناولها حله
كوثر / عشنا و اتكتبلنا ندوق طبيخك يا سماح
مغاورى/ سماح نفسها حلو اوى يا عمتى
كوثر / و مين يشهد للعروسه
ماجده تروح تفتح التلاجه و تطلع علبه المسطرده و تساعد سماح فى تتبيل الفراخ
كوثر / حطيلها لبن يطريها
سماح / هحط ذبادى
كوثر / ما فرقتش
سماح / نسويها كدا و خلاص و لا هنشويهم مفيش فلفل
ماجده / هعملهم صينيه ... اعملك مكرونه يا مغاورى
سماح / مكرونه و محشي بالليل كدا كتير
كوثر / انتى جايه تعدى على الراجل لقمته فى بيته
سماح / صحته تهمنى يا عمتى جوزى و بخاف عليه
كوثر/ طب اهتمى بيه و اكليه ياختى ما دام بتخافى عليه اهتمى بيه ياختى بدل ما هو يا حبه عيني اتمقت كدا 
مغاورى / كتر خيرك يا عمتى بس انا كويس و زى الفل تسلمى
كوثر / كويس اه ... باماره جلبيتك المكسره
مغاورى / و هى المفروض تمشى ورايا بالمكوه يعنى تفردها عليا ما انا لابسها من ساعه ما رجعت
كوثر / لا بس على الاقل تنبهك تاخد بالها تقولك قبل ما تنزل الجلبيه اتكسرت غيرها
سماح تبص لماجده
مغاورى / هى ما شافتنيش و انا نازل اصلا انا كنت ممدد على السرير بتفرج على الماتش و لما استعوقتها نزلت اشوفها اتاخرت ليه
كوثر / ليه كنا هناكلها و لا هناكلها
مغاورى / لا اله الا الله ما تطلعى ترتاحى يا عمتى انتى و ماجده و لما سماح تخلص هنطلعلكوا منابكوا لحد عندكوا
كوثر / مراتك حكتلك على الحقيقه و لا لسه مأكلاك البلوظه
مغاورى / عمتى
كوثر / طلعتنى كدابه و مجنونه و هى يتفاتلها بلاد جلدها ناعم زى الحيات
سماح / اغلطى كمان ما انا ساكته
كوثر / لا متربيه يا بت فاطمه
سماح / سكتنالها على غلطها فى ابويا هتسوق فيها و تغلط فى امى
مغاورى / اطلعى اوضتنا يا سماح
سماح / لا يا مغاورى انا مش متجوزاك فى اوضه فى لوكنده انا ليا فى البيت ده و من حقى اروح و اجى فيه
كوثر / حق ايه يا ام حق
مغاورى يتعصب
مغاورى/ ما كفايا بقي يا عمتى ارحميني بقي ما كانتش لقمه كل ما نيجي نحضرها تعمليلنا مشكله
كوثر / انا يا مغاورى ... انا اللى بعملك مشاكل دا بدل ما تربى مراتك بتتشطر عليا
سماح / انا متربيه غصب عنك
مغاورى / سماح اطلعى فوق
كوثر / بكره امك جايه و اقعدها و افرجها على تربيتها السوده
سماح / انضف من تربيتك بتاع الكاس و الكباريهات
مغاورى يلطش سماح بالقلم سماح عنيها توسع
................