البر التانى بقلم / لولو_محمد (كامله )

الحلقه ١٠٨

(((((( البر التانى ))))))
#لولو_محمد
الحلقه ١٠٨
الدكتوره / وجودها فى المستشفي من دلوقت مش هيفرق ما دام الرحم ما اتفتحش انا مش هقدر اعملها اى حاجه
مختار يبص على هند و يبتسم
مختار / انا بتكلم عشان نبقي فى الامان يعني
الدكتوره / انا مش عاوزه حضرتك تقلق خالص فى اى وقت الرحم اتفتح حضرتك هتكلمنى و ان شاء الله توصل الوحده تلاقيني فى انتظاركوا
مختار / تمام .. اسف تانى على الازعاج
مختار يقفل و يبص لهند و ياخد صينيه الاكل و يروح يقعد جنبها
هند / انت بتعمل ايه هتبهدل السرير
مختار / هتيجي هناك يعني
هند / ماشي روح يلا
مختار يرجع الصينيه و هند تقوم معاه تقعد
......................
فى الكباريه
عباس نايم فى حضن البنت و هى عماله تلعبله فى شعره
عباس / ساعات بفكر اطلقها و اخلص بس بلاقيني لما ببعد عنها كام يوم بتوحشني ... بس هي ما بتحبنيش ... ما بتفرحش لما بتشوفني ... كل ما اجى اقرب منها
عباس يقوم يقعد و يلبس هدومه البنت تحضنه من ضهره
البنت / سليشكوم رانو ( لسه بدرى )
عباس يزق ايدها و يقوم و هو بيطوح يعدل نفسه البنت تقوم تسند بضهرها على الباب
عباس / اوعى تفتكرى انى مبسوط انا بشرب عشان انسي عشان اتول عشان ما شوفش عنيها اللى بتكرهنى
عباس يطوح البنت تسنده ترجعه السرير
عباس / قالتلى اجيلك اجيب العيال و اجيلك
البنت تبوس عباس من خده
عباس / انا عاوز اروح ... عاوز ارتاح ... عاوز انام
عباس ياخد البنت فى حضنه و ينام
....................
فى الصاله بره
الشاب ابو عنين زرقه يدخل و يقف ثوانى المدير يدخل و يسلم عليه بحراره
المدير / اهلا اهلا بباشا البشوات احلى ترابيزه
الشاب / لا ترابيزه ايه انا مش ناوى اطول خلينا نخش فى الموضوع علاطول
المدير / عيني اتفضل يا باشا اتقضل نفس النظام و لا التغير مطلوب
الشاب / كل اللى يجي منك حلو
المدير / حبيبي
الشاب يضحك المدير يفتحله الباب الشاب ينزل تحت و المدير وراه يفتحله باب اوضه تاني
المدير / خد راحتك يا باشا خدمه فى ار بى
الشاب يديله فلوس
الشاب / حبيبي
المدير يقفل الباب و يمشي
.......................
فى اوضه ماجده
ماجده نايمه عباس يدخل بيطوح يخبط فى كرسي يقلبه و يتكعبل يقع على وشه ماجده تقوم مفزوعه تبص تلاقي عباس فى الارض تقوم تسنده
ماجده / يا مصيبتي انت بتعمل ايه هنا ... اوووف يا اخى اتقى الله انت جاى سكران كمان
عباس / وحشتيني
ماجده / حد شافك و انت جاى شافوك و انت سكران كدا
عباس / بقولك وحشتيني يا وليه خلى عندك دم
ماجده / انا اللى اخلى عندى دم قوم قوم معايا قوم خش الحمام قوم اتشطف و فوق قبل ما حد يشوفك و لا يحس بيك
ماجده تسند عباس و تدخل بيه الحمام و تفتح الدوش المايه تنزل عليهم هم الاتنين و عباس بيبص لماجده و مبتسم
عباس / بحبك يا بت الفقرى
ماجده / لما تفوق نبقي نتكلم فوق
مغاورى يدخل و يسنده عنها
مغاورى / عنك يا ماجده عنك
ماجده تتلجلج فى الكلام و مغاورى بيشد عباس بره الاوضه و هو مبلول
عباس / انا كنت ماشي هشوفها و ماشي
ماجده / طب سيبه يغير هدومه بس
مغاورى يوصل لباب الاوضه
مغاورى / خليكي هنا الرجاله واقفه بره
عباس / روحى اعمليلى لقمه اكلها انا جعان
مغاورى / هتاكل لما تشبع دلوقت تعال
مغاورى يزق عباس بره الاوضه ماجده تشده من ايده
ماجده / انتوا هتعملوا فيه ايه
مغاورى / ابوكى عاوزه تحت ... غيرى هدومك بدل ما تبردى
ماجده تبصله و عنيها تتلمى دموع مغاورى يمشي و يقفل الباب وراه
...................
فى اوضه هند
شيري واقفه فى الركن بتعمل قهوه على البوتجاز العين و تصبها و تروح تديها لمختار
مختار / تسلم ايدك تعبتى نفسك على الاخر
عبد الله قاعد قدام السرير فى الارض بيقلب فى التليفزيون
عبد الله / ما فيش حاجه فى التليفزيون خالص كدا
مختار / بكره الدراسه تبدا و يجيبوا افلام جديده
عبد الله يقوم يقعد على السرير جنب هند
عبد الله / عامله ايه دلوقت
هند / زى ما انا يا عبد الله اهدى بقي
عبد الله يبصلها ضاربه بوز يروح يقعد على الارض مكانه
هند / هى ياسمينا فين
عبد الله / نايمه فى اوضه مريم
هند / طب و انتوا مش ناويين تناموا مش ناويين ترتاحوا يعني
عبد الله / هو احنا بننطرد و لا ايه
هند / لا طبعا يا عبد الله بس النهار قرب يطلع و امك ما فردتش ضهرها و انت مش كنت واقف فى شغلك طول النهار و عندك شغل الصبح هترتاح امتى انت
شيري/ اما نطمن عليكي هنرتاح
مختار / انا والله مش عاوز اتكلم من الصبح لتفهمونى غلط بس هند معاها حق حضرتك واضح عليكي الارهاق جدا و عندكوا شغل الصبح و بعدين ما انا جنبها اهو يعني ما تقلقوش
شيري / طب انا هخليني جنبها و انت و عبد الله ارتاحوا و بعدين نبدل سوا
هند / انا كويسه يا ماما
مختار / ماشي يا امى بس هنبدا بيا و الصبح هروح الشغل و اسيبك مع هند تكونى فايقه و قادره
عبد الله / تمام شوفلنا السكه يا مختار
مختار / هنزله و ارجعلك تمام
هند تهو راسها
شيري / انا هفرد ضهرى بس مش هنام لو حسيتي باى حاجه
هند / نامى يا ماما ما تقلقيش عليا
شيري تهز راسها و تمشي وراهم و تقفل الباب وراها
........................
فى سرايا الجوارحه
الرجاله بتربط عباس فى شجره
كوثر / حلفتك بالله يا خويا اخر مره لو عملها تانى ابقي اعمل فيه اللى انت عاوزه
شاهين / لو كنت عملت كدا من اول مره ما كانش عملها تانى لكن ادى اخره الدلع
شاهين يروح يجيب كرباج
كوثر / حلفتك بالله يا خويا حلفتك بالله عشان خاطرى
شاهين / حد يمسكها
الستات تشد كوثر جوه و شاهين يضرب عباس بالكرباج و عباس يصرخ ماجده تجرى على جوه خديجه تجرى وراها ماجده تجرى على اوضه العيال تفتح الباب تلاقيهم نايمين تقفل الباب و تقعد على الارض قدام الاوضه تعيط خديجه تقعد جنبها
خديجه / خليهم يربوه يمكن يتصلح حاله
ماجده تبصلها و تبص فى الارض و تمسح دموعها
خديجه / صعب عليكي
ماجده تبصلها
خديجه / ما كانش يصح يدخل السرايا بالمنظر ده ما فيش احترام لحد
ماجده / يعني بيضربوه عشان كسر كلامهم و لا عشان سكر و لا عشان جه يشوفنى
خديجه / ما جالك قبل كدا حد كلمه و لا وقف قصاده
ماجده / معاكى حق
خديجه / جوزك برده
ماجده / خليكي جنب العيال لو صحيوا ما تخليهمش ينزلوا تحت ما تخليهمش يشوفوا ابوهم بالمنظر ده
خديجه تهز راسها ماجده تقوم تنزل تحت و خديجه متبعاها
.........................
فى اوضه هند
هند نايمه و مختار ممدد جنبها بيبص فى الموبايل يبص عليها و يفضل باصص يمد ايده و يايد النور و يبص عليها يلاقيها زرقه يتنفض و يدور على حاجه و يلف حوالين نفسه يمين و شمال
مختار / فين التيلفون فين الزفت الموبايل
مختار يشوف التليفون فى ايده يبصله و يبص لهند و يتصل بالدكتوره
مختار / ايوه يا دكتوره انا اسف على الازعاج انا مختار الزيني هند زرقه خالص
الدكتوره / الرحم اتفتح
مختار / يتفتح و لا عنه ما اتفتح بقولك البت زرقه
الدكتوره / مش هقدر اعملها حاجه غير لما
مختار / انا هجيبها و اجى اوصل المستشفي الاقيكي انتى فاهمه
الدكتوره / تمام هاتها و انا هقابلك هناك
مختار يروح يبص على هند تانى و يروح يجيب اسدال و يلبسهولها تفتح
مختار / هنروح المستشفي
هند تهز راسها و مختار يساعدها تلبس
مختار / هتقدرى تمشي و لا اشيلك
هند تبصله يشيلها و يفتح الباب و ينزل بيها يروح للعربيه يلف حواليها
مختار / المفتاح ... المفتاح ... خليفه ... خليفه
خليفه يجرى عليه عبد الله يفتح باب المضيفه و يطلع
عبد الله / مالها فيها ايه
مختار / نسيت المفتاح خدها على ماجى
عبد الله يشيل هند خليفه يجرى يجيب كرسي مختار يجرى على جوه
عبد الله / هند ... هى مالها
مختار ما يردش و يجرى على جوه و يطلع يجرى يجيب المفتاح و ينزل ناصر يفتح باب الاوضه
ناصر / فى ايه يا مختار
مختار ما يردش و ينزل يجرى
انتصار / فى ايه يا ناصر
ناصر يلبس الجلبيه و العبايه
ناصر / ما اعرفش بس شكل فى حاجه حصلت
انتصار / جيب العواقب سليمه يا رب
انتصار تجرى تلبس
..................
فى اوضه ماجده
عباس نايم على بطنه و ماجده بتطهر الجروح بقطنه
عباس / والله ما هسكت البلد دى فيها قانون
ماجده تدوس بالقطنه على جرح يصرخ
عباس / بالراحه يا جاموسه
ماجده ترمى القطن و تدخل الحمام و ترزع الباب وراها
عباس / يا ماجده ... ماجده
ماجده تفتح باب الحمام و تروح تقعد جنبه
عباس / انتى هتسبيني كدا
ماجده تروح تحط قطن على الجروح و تربط بشاش
عباس / الواحد بيصعب عليه نفسه لما ميلاقيش ليه فى الدنيا غير امه تدافع عنه
ماجده / ما حدش بيقطع علاقته بكل الناس و يرجع يزعل انه وحدانى
عباس / ما انتى لو
ماجده / انا ايه انا ايه انا اللى خليتك تشرب و لا خليتك تيجي البيت سكران بالمنظر ده انا ايه هو كل حاجه تقولى ما انتى ما انتى
عباس / كلمى جوزك عدل يا بت
ماجده / جوزى اه جوزى ... انا خلصت
عباس / غورى اطلعى بره و اطفى النور
ماجده تبصله بقرف و تروح تطفى النور و تفتح الباب و تقفله و هى واقفه بتبص على عباس
عباس / ماجده ... ماجده ... ماجده
ماجده / نعم
عباس / تعالى ... خليكي جنبى هنا
ماجده تروح تقعد جنبه
عباس / شوفيلى مسكن و لا اى حاجه
ماجده تفتح الدرج و تطلع مسكن و تديله و تناوله مايه يشرب
ماجده / ما تعملش كدا تانى المره الجايه
عباس / انا حر انا اعمل اللى انا عاوزه و اللى ابوكى عمله ده هدفعه تمنه غالى
ماجده / لما تخف ... لما تشد حيلك و تخف ... تطلقنى
عباس يبصلها ماجده تبص الناحيه التانيه
ماجده / طلقنى و كلو بعض بعيد عنى ... عاوز ايه ... عاوز تموت بتعند مع مين انت دا شاهين الجارحى اللى انت بتتكلم عنه
عباس / و انا عباس الجارحى عرفتى ليه ببص بره عرفتي ليه بعرف غيرك عشان انتى ما بتشوفنيش راجل انتى ما مش بتحسسيني بقيمتي
ماجده / فبتروح تحسها وسط السكريه و بنات الليل مش كدا دول بيحسسوك انك راجل بتحس بقيمتك وسطيهم ... بتحس بقيمتك لما بتقل قيمتى و تخونى لما بتيجي عليا ... قصرت معاك فى ايه
عباس / اسطوانه كل يوم بقي ما احنا مش هنخلص ايه مش شيفانى تعبان
ماجده / شيفاك و هسيبك ترتاح
ماجده تروح تفتح الباب و تطلع بره و تقفل الباب و تقف وراه تعيط
عباس / ماجده ... ماجده ... ماجده
ماجده تبص تلاقي مغاورى باصص عليها من بعيد تدخل و تقفل الباب وراها بالمفتاح
عباس / انتى هتسبيني و انا تعبان
ماجده / ارحمونى بقي
ماجده تدخل الحمام و تغسل وشها و تبص لنفسها فى المرايه
..................
فى الكباريه
الشاب ابو عنين زرقه نايم فى حضن البنت تليفونه يرن يمد ايده يجيبه
الشاب / الباشا
صوت راجل / هنحول الكميه التانيه بكره
الشاب / علاطول كدا .. و ماله عيني
الراجل / انا حولتلك نص فلوس الدفعه الجديده كالعاده و بكره لما استلم هبعتلك الباقي
الشاب / حبيبي
الشاب يقفل و يحط الموبايل جنبه و هو بيضحك البنت تبصله و تبتسم
البنت / تشزليفي زفانوج ( مكالمه سعيده )
الشاب / تشزليفي على الاخر ... اصل محسوبك فنان حاوى تعرفى يعني ايه حاوى
البنت / يانى بونيما ( مش فاهمه )
الشاب يضحك
الشاب / الحاوى يعني ساحر يعنى نولاجيني شار
البنت تبتسم
الشاب / انا نولاجيني شار باشاره اخفى الحاجه و باشاره اظهرها و اقف اتفرج من بعييييد على البوليس و هو بيلف حوالين نفسه بيدور عليها
البنت / بوليتسيا ( بوليس )
الشاب / عليكي نوووور ما انتى فهمتى اهو
البنت / يو فاس ياستى بروبلايما اس بوليتسي ( عندك مشاكل مع البوليس )
الشاب / دول حبايبي بقولك قال بروبلايما قال
البنت / يا فاس نى بونيما ( مش فهماك )
الشاب يقوم يقعد البنت تقوم تقعد
الشاب / ما قولت حاوى تديني البضاعه اخفيها اعديها من تحت مناخير البوليس من غير ما يشوفها و لا يحس بيها و زى ما خفيتها اظهرها فهمتى و لا هتتعبيني معاكى
البنت تشاورله بايدها و تقوم تصب كاسين
الشاب / اريح برده بلا هم انتى اساسا فصلتيني و انا عندى بكره شغل مهم
توصل للشاب رساله على الموبايل يبص
الشاب / الناس دى عبيطه و لا ايه هيغيروا خط السير ليه
الشاب يتصل بالتليفون بحد
الشاب / باشا البشوات
الراجل / وصلك اللوكايشن
الشاب / وصلنى امال انا بكلمك ليه بص يا زميلى اللى اعرفه ان اقصر طريق بين نقطتين الخط المستقيم يبقي ليه نلف و ندور احنا فى السليم لا مخبيين سلاح و لا بنعمل حاجه غلط و لا مؤاخذه
الراجل / على مسؤليتك
الشاب / عيب يا باشا و بعدين احنا تجار لعب اطفال محترمين شرفاء يعني نعدى من اى كمين فى السليم
الراجل / اعمل اللى انت شايفه
الشاب / حبيبي يا باشا
الشاب يقفل البنت تديله الكاس و تقعد جنبه و تبتسم
الشاب / انا محاط بشله متخلفه على راى المعلم اسكار
الشاب يشرب الكاسه على بق واحد
الشاب / تعرفى سكار اخو موفاسا
البنت / ليون كينج
الشاب / ما انتى حلوه اهو و بتتفرجى على كارتون ... صبى صبى خلى الواحد يفك بلا قرف
الشاب يديها الكاس تقوم تملاها و ترجعله
الشاب / حبيبي
......................
فى المستشفى
العيله كلها متجمعه فى كوريدور و مختار مقرفص فى الارض جنب باب اوضه و باين عليه التوتر عباده يروح يقعد جنبه
عباده / هتبقي
مختار يشاورله بايده عباده يهز راسه حاضر و يسكت و يقوم باب الاوضه يتفتح و الدكتوره تطلع مختار يقف و الكل يتجمع
مختار / هى عامله ايه
الدكتوره / كويسه الحمد لله بس زى ما فهمت حضرتك انى مش هقدر اعمل اى حاجه الا لما الرحم يفتح
مختار / المعم بقت كويسه بقت احسن اقدر اشوفها
الدكتوره / ما تقلقش حضرتك هى مش لوحدها انا طلبت من الممرضه انها تفضل معاها و تتابعها و اى جديد هتبلغنى علاطول
مختار / طب انا عاوز ابقي معاها
الدكتوره / الزحمه مش هتبقي كويسه
مختار / انا بس
مختار يبص لشيري و عبد الله شيرى تهز راسها اه مختار يبص للدكتوره
الدكتوره / تمام
الدكتوره تفتحله الباب يدخل و تبص للباقين
الدكتوره / انا مقدره غلاوتها عندكوا بس صدقونى وجودكوا هنا مش هيفرق فى حاجه عن اذنكوا
الدكتوره تمشي و الكل يبص لبعضه
انتصار / تقول اللى هى عوزاه انا مش هتحرك من هنا
فاطمه / بس الدكتوره معاها حق لازم كل واحد يشوف اللى وراه احنا زاحمين المستشفي
ناصر / معاكى حق كل واحد هيروح يشوف اللى وراه و خلو عبد الله و ام فاتن و ام عبد الله و لو فى جديد يبقوا يبلغونا
عباده / بس يا كبير
ناصر / شوف شغلك بهداوه
عباده / تمام يا كبير
ناصر يمشى و الكل يمشي وراه
عبد الله/ هم مش هيخلونا احنا كمان ندخل نطمن عليها
شيري تقعد على اقرب كرسي
شيري / تبقي كويسه يقولولى بس انها كويسه و انا مش عاوزه حاجه تانى
انتصار تروح تقعد جنبها و تمسك ايدها
انتصار / كويسه و باذن الله هتقوم بالسلامه و تبات فى بيتها الليلادى بس انتى قولى يارب
شيري / يارب يا ام فاتن يارب
عبد الله / هروح اجيبلكوا حاجه تكلوها و لا تشربوها ثوانى و راجع
عبد الله يمشي ناحيه الريسبشن يلاقي عباده واقف مع راجل بيتكلموا عباده يشوفه يروحله و الراجل يمشي
عباده / سبتهم ليه
عبد الله / هجيبلهم حاجه يكلوها ما تنساش ان كلنا  على لحم بطننا
عباده / تمام خليك معاهم وانا هبعتلك اللى انت عاوزه كله
عبد الله يبص يمين و شمال فى رجاله فى كل حته
عبد الله / هو فى حاجه و لا ايه
عباده / حاجه ايه
عبد الله / الرجاله دى كلها
عباده / و هى هند شويه دى عندنا اهم من المحافظ
عبد الله يبتسم
عباده / دول عشان اهل البلد ما يتلموش حواليكوا انت عارف مختار و غلاوته عند الناس و الناس هنا غلابه وولاد بلد هيبقوا عاوزين يطمنوا و يوجبوا و انت عارف بقي
عبد الله / تقوم بس بالسلامه و
عباده / هتقوم ما تقلقش ان شاء الله هتقوم و تبقي زى الفل بس انت فكها كدا و خليك جنب الجماعه انت راجلهم دلوقت و ما لهمش غيرك يتسندوا عليه
عبد الله يبص الناحيه التانيه عباده يمسكه من دماغه و يجبره يبصله
عباده / هتبقي كويسه انا بقولك
عبد الله يهز راسه  و يمشي و عباده متابعه
........................
فى سرايا فيرا
مدير الكباريه واقف و فيرا و صاحبها قاعدين على كنبه قدامه
المدير / انا بلغتك و عملت اللى عليا
فيرا / بلغتنى اه بس عملت اللى عليك دى تقولها لما تجبلى الكونتينارات دى لحد هنا باللى فيها
المدير / بقولك ايه يا ست هانم بناتك عندى متشالين على الراس و ما حدش لا بيدوسلهم على طرف و لا بيرفع عينه فيهم و الواد بتاعى حتى جتته ما ادوتهالناش و الرجاله دى مش بلاقيها فى كيس قلبظ و لا مؤاخذه
فيرا / ههههههههههههه حلوه لا بجد عجبتنى اجرى نفذ اللى قولتك عليه بدل ما تحصل راجلك العبيط اللى انت جاى تعيطلى عليه و اه المره الجايه ابقي نقى واحد انضف من كدا شويه دا منظر ظابط ده
المدير يبص الناحيه التانيه
فيرا / بتقولوا ايه عندكوا هنا الاهم من الشغل تظبيط الشغل يعني ما ينفعش تجيب واحد محشش تلبسه ظابط و توقفه فى كمين الظابط لازم يكون ليه هيبه مش عيل برياله لا و كمان جاى تعيطلى عليه
المدير / تمام يا ست الكل
فيرا تشاورله يمشي و تروح تقعد جنب الشاب
الشاب / انى بروبليمز ( فى مشاكل )
فيرا تهز راسها لا و تشرب
................
فى اوضه هند
هند متركبلها محلول تفتح عينها و تبص حواليها تلاقي مختار قاعد على كرسي و ساند بايديه مربعهم على السرير و نايم براسه عليهم و ماسك ايدها تبتسم و تسحب ايدها بالراحه يصحى
هند / الكنبه دى بتتفتح سرير ما نمتش ليه
مختار / احسن دلوقت ؟
هند / الحمد لله .. نزل ؟
مختار يهز راسه هند تبص للسقف
مختار / الحمد لله احنا كنا فين دا انا كنت هموت من رعبتى عليكي
هند تبصله و تبتسم
مختار / لما تقومى بالسلامه هاخدك و نعمل عمره نشكر ربنا على سلامتك
هند / انا نفسي فيها اوى
مختار / قومى انتى بس و انا هاخدك و نعمل الباسبور و نسافر هقعدك فى فندق قدام الحرم عدل
هند تبتسم
مختار / بس انتى قومى بالسلامه
هند / ماما فين ؟
مختار / روحت بالعافيه غصبناها تروح ترتاح ما كانتش قادره تقعد
هند / انا كمان عاوزه اروح
مختار / اكيد يا حبيبتى نطمن بس عليكي و نروح علاطول
هند / انا مش عاوزه اقعد هنا مخنوقه خليني اروح و انتوا اكيد هتاخدوا بالكوا منى فى السرايا
مختار / هناخد بس انا ما اعرفش هيحصل مضاعفات و لا لا هنا احسن
...............................