البر التانى بقلم / لولو_محمد (كامله )

الحلقه ٨٢

((((((((( البر التانى ))))))))
#لولو_محمد
الحلقه ٨٢
عباده / هى لحقت و بعدين ان خلصت يعني ايه المشكله نروح فى الشتا الغردقه و لا السخنه و لا الحتت الحلوه دى
تليفون مختار يرن يطلعه يبص فيه و يوطى على ودن ناصر يوشوشه
ناصر / يا خبر و انت قاعد قوم يا ابنى قوم بسرعه
ناصر و مختار يقوموا و الكل مستغرب
هند / هو فى ايه
ثوانى و يرجعوا و معاهم عبد الله
انتصار / جيت فى وقتك حماتك بتحبك
عبد الله / شكرا
مختار / دور شاى فى المكتب يا ام فاتن لو سمحتى
انتصار / من عنيا
انتصار تروح المطبخ و مريم تروح وراها و الرجاله يروحوا المكتب
ناصر / اقعد يا عبد الله
عبد الله يقعد و هو متوتر و محرج و كل شويه يبص لمختار مختار يروح يقعد قدامه و يطبطبله على ركبته عبد الله يبص لمختار
ناصر / خير يا ابنى مختار قالى انك عاوز تتكلم معايا
………………
عبد الله / الحقيقه انا مش عارف ابدء منين
عباده / قول يا ابنى انت هتتكسف و لا ايه امال لو كنا اغراب بقي
عبد الله / لا ازاى دا انتوا اهلى و دا السبب انى جايلكوا النهرده و طمعان يعني
عبد الله يبص لمختار
امين / عاوز فلوس
عبد الله / لا لا لا معايا كتير الحمد لله انا الحقيقه عاوز حاجه تانيه ... انا عاوز اتجوز
عباده / و ماله دا يبقي يوم المنى
عبد الله / انا يا كبير طالب القرب منك
الكل يبص لبعضه
ناصر / فى مين
عبد الله / مريم
ناصر يبتسم و مختار كاتم الضحك جواه و عبد الله متوتر و الكل مصدوم
عبد الله / انا عارف انى لسه بدرس بس هى كمان بتدرس احنا ممكن .. لو حضرتك وافقت يعني
الباب يخبط عباده يفتح و ياخد من انتصار صينيه الشاى و يقفل الباب
عبد الله / لو ينفع يعني ممكن تبقي خطوبه
ناصر / اسكت يا عبد الله
عبد الله يبص لمختار و يبص لناصر
ناصر / انت عاوزنى اجوز مريم لواحد قاعد قدامى بيرتعش كدا
عبد الله / حضرتك لازم تقدر موقفى انا اول مره اتحط فى الموقف ده و كلكوا بتبصولى و الموقف مش سهل على فكره
ناصر / بص يا عبد الله انت راجل جدع و انا يشرفنى انى اجوزهالك بس لازم توفى مهرها الاول دا لو وافقت طبعا
عبد الله يبص لمختار
مختار / و ايه مهر مريم
ناصر / تقدير عالى السنادى و عشان انت زى ابنى مش هقولك هات امتياز انا راضي بجيد جدا
عبد الله يبص لمختار و يبص حواليه و هو مبسوط
عبد الله / يعني اروح اجيب ماما و اجى
ناصر / هههههههههههههه مش لما ناخد راى العروسه الاول
عبد الله يبتسم و يبص فى الارض و يبص لمختار متابعه و مبتسم
....................................
فى اوضه فاطمه
فاطمه / يعني يتكلم على سماح و يروح يخطب اختها
شاكر / فاطمه
فاطمه / فاطمه ايه اصلا ازاى يوافقوا عليه يعنى يرفضوا مغاورى يرفضوا مغاورى الجارحى و يوافقوا على اخو هند
شاكر / الواد ما يتعيبش يا فاطمه و انا قولتلك قبل كدا لو كان جه لبنتي انا شخصيا كنت هوافق
فاطمه / هيعيشها فين هيصرف عليها منين هيعرف يجيبلها شبكه حتى
شاكر يبصلها
فاطمه / هتقولى بتشتروا راجل مش كدا
شاكر يبص الناحيه التانيه
فاطمه / طب كان صبر سنه و لا اتنين يكسرله فيهم قرش ... طب دا ولا سبع سنين حتى على ما يخلص كليه و يبدا يشتغل 
شاكر / بيشتغل مع الدراسه
فاطمه / اديك قولتها بيشتغل عندنا
شاكر / عيب يا فاطمه مش عشان ساكتلك هتسوقى فيها
فاطمه / لو ما سمعتش منى بكره تسمع من غيرى و على العموم سكت انا مالى اصلا ربنا يهنى سعيد بسعيده
فاطمه تروح تنام فى السرير و شاكر قاعد مضايق
فاطمه / و حوار بنشترى راجل ده
شاكر يبصلها و هو مستغرب
فاطمه / بيقولك و لا تمدح و لا تشكر غير بعد سنه و ست اشهر
فاطمه تشد الغطا عليها و تنام و شاكر قاعد بيضحك
.....................
فى اوضه مريم
سماح / عمرى ما كلمته يا سماح و لا لسانى جه على لسانه يا سماح
مريم / والله ما حصل
سماح / امال يعني جاى يطلبك بمناسبه ايه ؟
مريم / و انا مالى هو انا اللى روحت طلبته
سماح / يعنى انتى مش موافقه ؟
مريم / قولت هصلى استخاره
سماح / و ماله ... قال يعني البت ما فطتش من مكانها لما عرفت انه جاى يطلب ايدها
مريم / ما تبطلى بقي يا سماح الله
سماح / بيني و بينك ليكي حق تترددى برده
مريم تبصلها
سماح / هو صحيح عبد الله شكله حلو و بكره و لا بعده هيبقي دكتور بس برده طلع لا و نزل كحيان دا شغال عندنا
مريم / انا ما بيفرقش معايا الحاجات دى و انتى عارفه
سماح / طبعا دا انتى رافضه مغاورى الجارحى بعزه
مريم / خدوهم فقرا يغنيهم الله
سماح / بفلوسك يا عنيا هيغنيه بفلوسك و ساعتها ياخد فلوسك يتجوز بيها
مريم / يا سلام و هو لو كان غنى من الاول مفيش احتمال يعني يتجوز عليا ؟
سماح / كل شئ وارد .. حد عارف ؟
مريم / و بعدين التعدد شرع ربنا لو مكتوب عليا اللهم لا اعتراض اكيد ربنا هيعوضنى بحاجه احسن
سماح / بس مش من فلوسك
مريم / على فكره مش معنى انى بسايرك فى الكلام انى مقتنعه بكلامك
سماح / ياختى اهو كلو كلام هو انتى يعني كنتى وافقتي
مريم تبص لسماح
سماح / الا لو وافقتي هيجبلك شبكه شكلها ايه ؟
مريم / الشبكه هديه العريس لعروسته و انا مش ناقصنى دهب
سماح / معاكى حق ... اقولك روحى الصاغه و غيرى دهبك ساعتها اللى هيشوفك لبساه هيفتكره شبكتك و ما يتنقوروش لا عليكي و لا عليه
مريم / تعرفى تسكتى
سماح / يا بت بتكلم معاكى عادى اهو اعتبرينا بنفكر بصوت عالى تفتكرى هيجوزوكوا هما فى الاوضه و لا هيدوكى اوضه من الكبار اللى فوق بحمامها بيتهيالي لازم تبقي بحمامها امال يشوفوكوا كل شويه و انتوا رايحين تستحموا ههههههههههههههههه
مريم / انتى قليله الادب
سماح / ههههههههههههههههههههه يا بت !!!
مريم / و بعدين هو هيتجوزنى هنا ليه ما هو عنده شقه
سماح / حقه يا بت تتجوزوا فى مصر و يشتغل هناك بس ساعتها القرشين بتوع الايجار اللى عايشين منهم هيروحوا عليه
مريم / و نتجوز فى مصر ليه لينا مين هناك انا بتكلم على الشقه اللى هنا
سماح / هتتجوزى مع امه !!!
مريم / و ماله يعني امال نسيبها لوحدها هى و ياسمينا 
سماح / يعني مش بس هياخدك بلوشي دا هياخدك خدامه لامه و داده لاخته كمان
مريم / بقي دا كلام بنات الاصول برده يا سماح
سماح / انا بتكلم عشانك ... انا مش مستفيده حاجه هو يعني لو رفضتيه هيتقدملى يعني !!
مريم / انا ما قولتش كدا بس برده
سماح / اقولك صلى استخاره و اللى قلبك يرتاحله اعمليه يلا اسيبك بقي و اروح انام
مريم تبصلها سماح تمشي و تقفل الباب وراها مريم تروح تلبس الطرحه و تفتح الشباك و تقف تتفرج على القمر باب الاوضه يخبط مريم تروح تفتح
مريم / نسيتي الموبايل و لا ايه
مريم تلاقى مختار على الباب واقف مبتسم تبتسم
مريم / ازيك يا عمى
مختار / هى سماح كانت هنا و لا ايه
مريم / اه لسه ماشيه حالا تعال داخل
مختار يدخل يشوف الشباك مفتوح يروح يقف يبص على السما
مختار / الجو حلو اوى النهرده و السما صافيه
مريم / ايوه فعلا
مختار / انتى طبعا عارفه انا جاى اتكلم معاكى فى ايه صح
مريم / هو تقريبا مفيش موضوع غيره الكل يكلمنى فيه اصلا
مختار / ههههههههههههه بس انا لا جاى اقنعك و لا اضغط عليكي انا بس متاكد انك هتسمعى كلام وحش كتير الفتره الجايه دا ان ما كنتيش سمعتيها اصلا بما ان سماح كانت هنا
مريم / بس انا ربنا خلقلى عقل يا عمى
مختار / مهو ده اللى مطمنى ... انتى عارفه ان عبد الله معجب بيكي من فتره بس كان خايف يتكلم عشان هو مش جاهز
مريم / و ايه اللى غير رايه و شجعه
مختار / خاف تضيعي منه لقاكوا بيجيلكوا عرسان و فهم ان هنا غير مصر ... و انا شجعته
مريم تبتسم و تبص فى الارض
مختار / انا اعرف عبد الله من سنين و عارف اخلاقه كويس عبد الله واد جد ما لوش فى اللوع و انا متاكد انه هيصونك
مريم / و دى اهم حاجه
مختار / انا عارف ان الكل لما يكلموكى هيعترضوا على الماديات بس انا عاوز افكرك ان سيدنا محمد لما اتجوز ستنا خديجه كان بيشتغل فى فلوسها
مريم / عليه الصلاه و السلام
مختار / فكرى و صلى استخاره و لو حبيتي تتكلمى انتى عارفه انا عمرى ما اتاخر عنك
مريم / يخليك ليا
مختار / انا هنزل اتمرن تحت شويه مش جايلى نوم تيجي معايا
مريم / لا شكرا انا ضهرى واجعنى خلقه
مختار / بقيتي خرعه
مريم / خرعه خرعه بس اعيش
مختار / هههههههههههههههه ماشي يلا تصبحى على خير
مريم / و انت من اهله
مختار يمشي و مريم تقفل الباب وراه و ترجع تقعد على الشباك و هى مبتسمه و تبص للقمر
.........................
فى اوضه هند
هند تصحى ما تلاقيش مختار جنبها تنفخ و تقوم تلبس الاسدال و تنزل تروح المكتب تفتح الباب المكتب فاضي عباده يكلمها من ضهرها
عباده / بتدورى على مختار
هند تتفزع
هند / خضيتني
عباده / حقك عليا
هند تهز راسها
عباده / مختار تحت فى الجيم
هند / هو فى هنا جيم
عباده / فى هنا حاجات كتير ما تعرفيش عنها حاجه بس واحده واحده هتعرفى على العموم هو تحت السلم اللى هناك فى باب افتحيه و انزلى السلم هتلاقيه
هند / معاه حد و لا لوحده
عباده / لوحده انا كنت لسه تحت هو لوحده
هند / شكرا
هند تيجي تمشي ناحيه الجيم
عباده / هو انا ممكن اسالك فى حاجه لو مش هيضايقك يعني
هند / اكيد اتفضل
عباده / اعتبريه فضول مش اكتر اتعلمتى تفكى و تركبى السلاح و روحتى تتعلمى الرمايه خير ان شاء الله غيرتى رايك اخيرا
هند / كان نفسي اقولك اللى انت عاوز تسمعه بس الحقيقه لا ممكن تقول انى بقيت ببص للموضوع من نظره تانيه بس انا لسه عند مبدئي
عباده / مش فاهم
هند / يعني انا اعتراضي عن تجاره السلاح و التهريب مش على ان مختار يشيل سلاح و انتوا كمان كلكوا المفروض تبطلوا القرف ده
عباده / على مهلك يا بنت عمى انتى ليكي فى اللى يخصك انما احنا كبار كفايه اننا نعرف الصح من الغلط نرجع لموضوعنا ..  ايه اللى جد
هند / نوعا ما فهمت طبيعه حياتكوا و المخاطر اللى بتقابلكوا
عباده / بتتعلمى عشان تحمى نفسك يعني
هند / عشان احمى جوزى و جوازى
عباده / فهمت
هند / انا عارفه ان مختار هيحميني بس وقت الجد لو فى حاجه بتهدد حياه جوزى عاوزه زى ما هيحميني انا كمان احميه
عباده / يعني عمرك ما هتسمحيله يرجع لتجاره السلاح
هند / مش بايدى اسمحله او امنعه الموضوع كله بايد مختار
عباده / بس هو اداكى كلمه
هند / و ده اللى مطمنى بس مش هكدب على نفسي الموضوع صعب قوى على مختار
عباده / و انتى قدها تقدرى تنسيه الدنيا بحالها مش تجاره السلاح بس
هند / بتتكلم بثقه قوى
عباده / لما ربنا يقول ان كيدهن عظيم هاجى انا و اعترض
هند تبتسم و تبص فى الارض
هند / مقبوله منك
عباده / هسيبك انتى تروحيله
هند تبتسم و تهز راسها عباده يطلع فوق و هى تقف تفكر ثوانى و تطلع وراه تدخل اوضتها و تقفل الباب وراها
.........................
فى الجيم
صاله كبيره فيها اجهزه رياضيه و حديد و فى بوكس باج متعلق و مختار لابس الجلوفزات و بيتمرن هند تدخل تقفل الباب وراها
هند / واو دا فى هنا دنيا تانيه انا ما كنتش اعرف عنها حاجه
مختار / ايه اللى صحاكى ؟
هند / المكان هنا تحفه دا و لا الجيم اللى فى مصر
هند بتتفرج على المكان تشوف حمام فى جنب و فيه دوش
هند / دا فى دوش هنا كمان
مختار / فى كل حاجه عباده هو اللى مجهز المكان هنا لما نزلى مصر مره زياره و جه معايا الجيم رجع ظبط الدنيا هنا
هند / عشان ما يبقاش حد احسن من حد يعني
مختار / فهمتى الليله اهو
هند / بس الله ينور المكان حلو جدا هو المكان ده كان ايه زمان
مختار / مخزن للكراكيب و السلاح
هند / لا كدا احسن بكتير انت بتتمرن ايه ؟؟ بوكس !! انا عمرى ما لعبت بوكس ... ممكن اجرب ؟
مختار / اكيد تعالى
مختار يقلع الجلوفزات
هند / هو انا ممكن اقلع الاسدال و اخد راحتى و لا المكان هنا ملغم و لا ايه ؟
مختار / ثوانى
مختار يروح يقفل الباب بالمفتاح و يروح يلف عصايه حديد تقفل شبابيك فوق
مختار / الدار امان خدى راحتك
هند تقلع الاسدال لابسه بنطلون شارلستون اسود هاى واست و بدى استوماك اسود حمالات و عامله شعرها ديل حصان من فوق تمدله ايدها يلبسها الجلوفزات مختار يشوفها يتنح
هند / ايه ؟
مختار / انتى خدتى راحتك على الاخر
هند / هههههههههههههه طب مش هتلبسني و لا ايه
مختار / و اتبتر على النعمه طب دا حتى ربنا يحاسبنى
هند / هههههههههههههههه يا عم انا بتكلم على الجلوفزات مش هتلبسهانى عشان اللعب البوكس
مختار / اه شوفى و الواحد
هند / ههههههههههههههههههه
مختار يلبسها الجلوفزات و يمسكلها البوكس و هى تضرب جامد
مختار / عاش
هند / لا دا احنا جامدين قوى فين ايامك يا دينا
مختار / دينا كانت بتعلمك بوكس ؟
هند / لا يا بنى قولتلك عمرى ما لعبت بوكس كانت بتعلمنى ادافع عن نفسى بس حتى ما علمتنيش اهاجم لازم ابقى ريفلكس بس
مختار / طب ما احنا فيها اعلمك انا
هند / لا بالراحه عليا انا مش قدك و عبد الله بصراحه مسوء سمعتك قوى فى الحوار ده
مختار / ههههههههههههههههه لا ما تقلقيش هبقى حنين عليكي
هند / اه بالله عليك لحسن اتكسر فى ايدك
مختار / طريقتك فى الضرب ما تقولش كدا خالص
هند / انت شايف كدا
مختار / ادينا بنلعب
هند / نلعب
هند و مختار يروحوا مساحه فاضيه و مختار يقلعها الجلوفزات و يرميهم بعيد
مختار / نبدا منين يا دودو نبدا منين تمام ايدك بوكس كدا و تاخدى وضع الدفاع
هند تعمل ايديها بوكس و ترفعهم قدام وشها مختار يعمل الحركه قدامه
مختار / زى ما كنتى بتعملى مع الكيس بوكس يمين و بوكس شمال و رجل
هند / اجرب
مختار / اه جربى
هند تضرب بوكس يمين و بوكس شمال و ترفع رجلها مختار يمسك رجلها هند تفضل واقفه على رجل واحده
مختار / قدامى اكتر من حل الاول ارفع رجلك لفوق تقعى على ضهرك و التانى انى اشدك ناحيتى ياما رجلك تتفتح و تقعى برده او تنطى على رجل واحده لحد ما توصليلى و امسكك من رقبتك و اوقعك فى الارض
هند / او ممكن
هند تنط و تحاول تضربه بالرجل التانيه فى وشه يفاديها تلف و تنزل تسند بايديها على الارض
مختار / اوعى لا دا دينا عامله شغل
هند / هههههههههههههههههههه ياما فى الجراب يا حاوى
هند تقوم
مختار / لا كدا نصعبها عليكي شويه
هند / برينج ايت اون بايبى
هند تشاورله بايدها تعال و هى مبتسمه و واخده وضعيه الدفاع مختار يقلد عادل امام و هند مانعه نفسها من الضحك
مختار / لا و واثقه من نفسيها
هند / ما تضحكنيش انا بعانى انى اكون جد قدامك على فكره
مختار / تمام
مختار ياخد وضعيه الهجوم قدامها و يبقى جد
مختار / مش بتقولوا لايدز فيرست اتفضلى يا ست الكل
هند تضرب اول بوكس مختار يمسك ايدها و يفتح رجله و يقرب منها و رجله التانيه فى مكانها و بالكوع يحاول يضربها و يقف قبل راسها بالظبط
مختار / ايه ؟ انتى هتقفى كدا و تاخدى الضربه فى وشك عادى !!
هند / انت فاجئتنى انا قولت هتكرر نفس الخطوات يعنى بما انك ما شرحتش جديد
مختار يعمل بيزرغط
مختار / لولولولولى و هو اللى بيضربك هيستنى يشرحلك
هند / ما تالسش انا مش فى المعركه دلوقت انا لسه بتمرن وقتها الادرنالين بيبقى عالى و يعنى انت عارف
مختار / فى المعركه !! ماشى من الاول اهجمى و ياريت تعتبرينا فى المعركه
هند تبصله باستهزاء و تحاول تدى مختار بوكس يمسك ايدها و يقرب بنفس الطريق هند تضربه بوكس تانى فى فم معدته يقع فى الارض
هند / سورى سورى سورى
مختار / مش فى المعركه قوى كدا
هند / هههههههههههههههه انت اللى قولت انا مش عارفه
مختار / تمام الحمد لله انها جت على قد كدا
مختار يقوم يقف
مختار / غلطتى على فكره انا اللى مش مديكي حقك
هند / نحاول تانى
مختار / اكيد يعنى امال هروح مضروب شكلى بقى وحش قوى
هند / هههههههههههههههه ما تقولش على نفسك كدا انت جميل
مختار / هههههههههههههههههه يا بت هتغابى عليكي
هند / مش ههون عليك
مختار / جد
هند/ جد
مختار / اهجمى
هند تضرب بوكس يمين و بوكس شمال و ترفع رجلها عشان تضربه يضرب رجلها برجله و يرفع رجله التانيه و يوقفها قبل ما تضرب هند فى صدرها
مختار / فهمتى حاجه
هند / حلوه الحركه دى تمام
مختار / تحبى تطبقى
هند / ماشى يلا
مختار يبصلها بطرف عينه
مختار / مش هنبقى فى المعركه قوى تمام ؟
هند / ما تخرجنيش من المود بقى
مختار / ربنا يستر
هند بتعانى انها تمنع نفسها من الضحك
مختار يحاول يضرب هند بالرجل و يوقف قبل ما يضربها
مختار / ايه !!!
هند / انا كنت فكراك هتضرب بوكس يمين بوكس شمال الاول انت فاجئتنى
مختار / يا لاهوى 
هند / بقولك ايه ما تتعصبش عليا تانى المرادى هركز
مختار / اتمنى
مختار يرجع خطوه لورا و يحاول يضربها بالرجل تضرب رجله برجلها و تديله بالرجل التانيه فى صدره توقعه فى الارض تجرى عليه
هند / سورى سورى سورى جت جامده سورى سورى
مختار / حلو قوى الدرس لحد كدا النهرده نكمل مره تانيه ان شاء الله فى المشمش
هند تضربه فى كتفه ينام فى الارض و هو بيضحك يشدها فى حضنه
مختار / هو عشان بسكتلك
هند / لا عشان بتحبنى و اوعى بقى خلينا نكمل
مختار / لا نكمل ايه مش انا توبت
هند / بطل بقى يا مختار بجد بقى
مختار / اخر حركه 
هند / اخر حركه
مختار يقوم هو و هند الباب يخبط
مختار / اللبسي الاسدال
هند / تمام
هند تروح تلبس الاسدال مختار يروح ناحيه الباب و يبص عليها لبست يفتح الباب يلاقى مريم
مريم / انت قافل عليك الباب ليه ... ما جاليش نوم قولت انزل
مريم تشوف هند
مريم / طب انا ممكن احاول مع النوم تانى عادى
هند / تعالى انا كدا كدا كنت طالعه
مريم / شكلى وحش قوى صح
هند / صدقينى هيدعيلك
مختار يبصلها و يفتح بقه هند تضحك
هند / يلا تصبحى على خير
هند تطلع
مختار / ادى اللى بناخده لما بنعاملكوا بالراحه اهى دى لو كنت شديت عليها جوه كانت عيطت فى ايدى
مريم / و انا مالى
مختار / ما انا مش قادر على الحمار بقى اعمل ايه
مريم / ههههههههههههههههههههه
مختار / يلا تصبحى على خير
مختار يسيب مريم و يطلع و هى واقفه بتضحك تبص عليهم
مريم / و انا جايه اتمرن لوحدى يعنى
مريم تطلع وراهم