البر التانى بقلم / لولو_محمد (كامله )

الحلقه ١٥٢

((((((( البر التانى ))))))))
#لولو_محمد
الحلقه ١٥٢
فى شقه رشيد
رشيد يفتح باب الشقه و يدخل و هو شايل اكياس كتير و محتاس بيها
رشيد / اهل البيت ... يا حجه ... سمر
سمر تطلع من الاوضه تاخد منه
سمر / ايه دا كله
رشيد / اعمل ايه فى قلبي الحنين كل ما اعدى على حد بيبيع حاجه اجبلك منها على الله يتمر و تبطلى نكد
سمر / شكرا
رشيد / الواد رجع لامه
سمر تبصله
رشيد / ابوه كان عليه فلوس و كانوا بيحاولوا يضغطوا عليه و انا دفعتهاله على الله يتمر فى اللى جابوه و يقدر النعمه اللى عنده
سمر تتعصب
سمر / و انت كنت شوفت ابوه و لا تعرفه عشان تتكلم عنه كدا
..................
رشيد /  هو انتى غاويه نكد و خلاص ما فيش حاجه بتعجبك ابدا كدا
سمر / مهو مش موجود عشان تغلط فيه
رشيد /  و هو كان من باقي عيلتك عشان تتحمقيله اوى كدا
سمر / انت بتقول ايه انت .. بقولك ايه انت شوفت الولد ده
رشيد / اه شوفته ماله راخر مهو اليوم بيبان من اوله
سمر / كان عامل ايه اكيد كان مرعوب يا قلبي
رشيد / و لا دريان بالدنيا هى العيال فى السن ده ليها فى حاجه اخره يرضع و ينام
سمر / يرضع !!!!
رشيد / اه يرضع ايه مالك مستغربه ليه يرضع ما لهاش معنى تانى بالعربى بريست فيدينج اقولهالك بالفرنساوى
رشيد يحط ابهامه فى بقه
سمر / هو عنده قد ايه ؟
رشيد/ مهو عشان كدا نسبه الطلاق عاليه الست تستقبل جوزها على الباب و هاتك يا لوك لوك لوك لوك لما تخرجوا الواحد عن شعوره
سمر / اخر سؤال والله اخر حاجه عشان خاطرى قولى
رشيد / ما اعرفش عيل فى لفه ممكن كام شهر سنه حاجه  كدا
سمر / بيبي !!!
رشيد يروح يقعد و هو بيتزهق
رشيد / اه يا ستى بيبي خلاص
سمر تروح تقعد باستسلام و حزن
سمر / خلاص
رشيد / انا مقدر انك مش واخده على الحاجات دى بس لازم قلبك يجمد فيرا معاها حق مش كل عيل ابوه هيداين هروح اخلص الليله مش مال سايب هو
سمر / انا اسفه
رشيد / انا تعاملى مع الحريم سطحى فى اضيق الحدود فبحاول و الله افهمك مره اقول هرمونات مره اكتئاب مره جينات النكد بس انا برده بشر و ليا طاقه انا مقدر وجعك و اللى انتى فيه بس انا بعمل كل اللى اقدر عليه حاولى شويه انتى كمان
سمر / انا بجد اسفه اوى انا عارفه انى تعباك معايا بس
رشيد / انا عمرى ما هقتلك يا سمر انا حتى عمرى ما هاذيكي ما تطلبيهاش تانى باى صوره و لاى سبب
سمر / انا اسفه انا عارفه انى جيت عليك جامد اوى ... انت ما اكلتش هقوم اسخنلك الاكل و اعملك عصير او حاجه حلوه
رشيد / ايوه بقى ايوه بقى فينك من بدرى بحبك انا
سمر تبتسم و تقوم و رشيد متابعها
رشيد / ربنا يهديكى و يكفينا شر قلبات هرموناتك
.....................
فى القسم
زياد / ايوه بس خروج القوات دلوقت
امين / مش هتعمل حاجه و بعدين احنا هنزود الكماين بره حدود البلد كمان يعنى هنبقى فى الامان و البركه فى جنابك
زياد / و يا ترى راى الجوارحه ايه فى الموضوع ده
عباده / اسالهم لو تحب بس عشان اوفر وقت سعادتك هم موافقين احنا ما بنعملش حاجه من غير ما يكون بينا اتفاق
زياد / انا هصعد الموضوع و ان شاء الله
عباده / احنا اتكلمنا مع الباشا المحافظ و ان شاء الله البركه فى جنابك تمشيلنا الموضوع
زياد / و انا هعمل اللى اقدر عليه ... بخصوص كاميرات المراقبه اللى فى البلد
امين / كلو فى السليم يا باشا و بالقانون
زياد / هههههههههههه اكيد يا باشا انا بس كنت بستاذنكوا يتعملى اكسيس على السيرفر بتاعها
امين و عباده يبصوا لبعض
زياد / انا عارف انها كلها كونكتيد بسيرفر واحد
عباده / و ماله يا باشا نديك الباسورد
امين يبص لعباده
عباده / بس الاول لازم نبلغ الجوارحه زى ما قولنا ما نقدرش نعمل حاجه من غير شورتهم
زياد / تمام و انا هستنى ردكوا
عباده يقوم يقف زياد يقف امين يقف
عباده / عطلنا جنابك ما تاخذناش
زياد / ما تقولش كدا امال احنا هنا ليه و صدقنى التعاون اللى بينا هيخلينا نعدى المحنه دى اسرع
امين / باذن الله بالاذن احنا بقى
زياد يحيهم امين و عباده يمشوا و اول ما عباده يطلع بره القسم امين يشده من ايده
امين / انت ازاى توافق انه يدخل السيرفر انت بكدا
عباده / يا بجم افهم انا قولت هديله الباسورد قولتله هديله انهى باسورد ؟
امين / هاه ؟
عباده / تعال معايا نروح لفتوح و هناك هتعرف كل حاجه
امين / و ماله ادينى وراك اما نشوف
امين و عباده يروحوا يركبوا العربيه
...............
فى شقه رشيد
رشيد بياكل و يشرب عصير و سمر قاعده جنبه مرتبكه و بتفرك فى نفسها
رشيد / مالك ما بتاكليش ليه
سمر / مش جعانه .. يعنى ... اصلى اكلت من شويه لما لقيت نفسى مضايقه و انت بره فشيت غلى فى الاكل اهو بقى اللى حصل
رشيد يبتسم و يكمل اكل سمر تحط ايدها على ايده رشيد يبص على ايدها سمر تسحب ايدها بسرعه رشيد يبص لسمر 
سمر / اااام هو انت زعلان منى
رشيد / اكيد لا طبعا و ان كان فى شويه ... بقول شويه زهق كدا من عمايلك راحوا خلاص
سمر / طب الحمد لله ... هدخل الحمام ثوانى و جايه
رشيد / خدى راحتك بس ما ترجعيش تعيطى لما تلاقى الاكل خلص
سمر / الف هنا قولتلك اكلت
سمر تقوم تروح الحمام و تمد ايدها ورا الغساله و تشد ازازه البرفان و تبص لنفسها فى المرايه
/////////////////
سمر / هتعمليها تانى يا سمر ... غصب عنى ... قوليله هيساعدك ... لو ما عملتش اللى بتقولى عليه هتقتلهم هم الاتنين ... تفتكرى هيقف جنبك بعدها تفتكرى هيبصلك بعدها هيشوفك واحده زى كل الزباله اللى عرفهم فى حياته ... ما يبصليش ياريته يكرهنى و يخلص نفسه من الوحله اللى وحلته فيها انا اللى ربطاه بفيرا انا ايده اللى بتوجعه خليه يرمينى فى الشارع خليه يقتلنى حتى اهو ابقى نجيتهم هم الاتنين ... فكرى تانى لسه فى وقت .. رسالتها وصلت كدا كدا ما عدتش تفرق
/////////////////
سمر تبص لنفسها و تمسح دموعها و ترش البرفيوم على شرايين ايديها ورقبتها و ترجع تخبى الازازه و ترجع تبص لنفسها فى المرايه و تمسح دموعها و تطلع و تبص على رشيد بياكل
.......................
فى عربيه عباده
امين / يا ابن الجنيه ... لا مؤاخذه ... يخربيت شيطانك يا جدع ايه الدماغ دى عظمه على عظمه بصحيح
عباده / عجبتك للدرجادى
امين / اوى بس تفتكر الواد فتوح هيعرف يعمل الحكايه دى
عباده / ما يعملهاش غيره و بعدين مش هو اللى عمل السيرفر الاولانى اكيد هيعرف يعمل السيرفر التانى اللى هنحط عليه الحكومه
امين / بس لو الباشا الظابط عرف الحكايه دى
عباده / جرا ايه يا بتاع القانون انا اللى هقولك الباشا ما لوش اى صفه قانونيه انه يدخل على كاميرات المراقبه دى صح و لا لا
امين / هو لحد دلوقت صح بس لو عاوز صفه فالحكايه مش هتاخد فى ايده غلوه
عباده / ساعتها كام نبله على كام عيل صغير تحل الموضوع و كفى المؤمنين شر القتال و بعدين الباشا هيعرف منين اولا الباشا مش من البلد يعنى ما يعرفش الشوارع كلها و بعدين هو هيراقب ايه و لا ايه و بعدين برده احنا مش هنغلب يعنى
امين / صح والله العظيم تلاته صح انت صح
عباده / المهم فى الحوار ده سرعه الاداء الواد فتوح لازم يخلص الحوار ده فى اسرع سريع
امين يركن العربيه قدام سرايا الجوارحه
امين / ادينا وصلنا و هفضل على دماغه لحد ما يخلص الموضوع
عباده / تمام يا ابن الزيني
امين / دا انت اللى زيني بدماغك دى
امين و عباده ينزلوا و يدخلوا السرايا
........................
فى شقه رشيد
سمر قاعده جنب رشيد بيتفرجوا على مسرحيه و رشيد كل شويه يبصلها من تحت لتحت
سمر / بقولك ايه
رشيد / هاه ؟
سمر / هقوم اجبلنا حاجه نشربها تحب اجبلك حاجه معينه
رشيد / اى حاجه منك حلوه
سمر تبتسم و تقوم تروح المطبخ و رشيد متابعها و بعدين يبص فى الارض سمر ترجع شايله صينيه عليها كبايتين حاجه ساقعه و فيهم تلج توطى ناحيته
سمر / لقيت الازازه سخنه قولت اسقعها و لا اجبلك واحده تانيه
رشيد ياخد الكبايه سمر تحط الصينيه على الترابيزه و تعدى تقعد جنبه و تمسك كوبايتها و تبص لرشيد تلاقيه باصصلها سمر تبتسم
سمر / بتبصلى كدا ليه
رشبد / مفيش
سمر / امال مالك
رشيد يحط الكبايه و يقوم يدخل الحمام و سمر متبعاه
...........................
فى سرايا الجوارحه
فتوح / يا عم دا حوار اهبل اخلصهولكوا فى نصايه على ما تشربوا الشاى يكون باذنك يا رب منهى
امين / اقسم بالله دماغ متكلفه كنت بقولك ايه انا فى العربيه قولتلك مش هيجيبها الا فتوح حصل و لا لا
عباده / امال
فتوح يفتح اللاب و يشتغل عليها
فتوح / مسافه ما تشربوا الشاى اكون خلصت باذن الله
امين / خد راحتك و لو تحب نروح و نفوت عليك وقت تانى
فتوح / يا جدع دا انتوا منورين
امين / تكون يعنى بتحب تشتغل فى رواقه كدا و تاخد رحتك و كدا
فتوح / ما انا واخد راحتى اهو عادى
عباده / بقولك يا فتوح ما تعرفش حد من حبايبك دخل الطب مع عبد الله
امين يبص لعباده
فتوح / اعرف خير
عباده / كنت عاوزله المحاضرات اللى بتفوته دى
امين / يا عم قولتلك انا هظبطله الحوار ده
فتوح / دا انا اعرف اللى يظبطلك الحوار ده احلى ظبطله
عباده / اللحقنى
امين / يا عم سيب الراجل يركز فى شغله و بعدين نتكلم
فتوح / الواد شريف ابن عطيه الحلوانى اخته دخلت كليه الطب الواد شريف حبيبى و كان فى مره قالى ان اخته دحيحه و موس
امين / الا ما سمعنا حتى زغروطه فى بيتهم و لا حد جاب سيره ان البت ورده كانت فى الثانويه اساسا دا انا كنت مفكرها فى اعدادى ... اكمنها قصيره كدا و مش باينه من الارض 
فتوح / اصل امها بتخاف من الحسد فما قالتش لحد و قالت يبقوا يعرفوا بعدين حتى انا عرفت بالصدفه كانت عدت من قدامنا و حته بيضه كدا باينه من شنطتها الواد شريف نداها و شخط فيها مدت ايدها و دارتها علاطول ... اتاريه البالطوا لابيض ههههههههههههههههههه
عباده / و انت عرفت ازاى
فتوح / و انا هشوف المنظر و اسكت البت ما عملتش حاجه عشان يشخط فيها كدا و يخرها فى الشارع قدام الخلق و انا لما زنقته كدا حكالى الليله كلها
عباده / و دى هتصورلنا المحاضرات ازاى دى فى الهم اللى هى فيه ده لا خلينا ورا امين و مجايب امين بقى
امين / ايه يا عم فى ايه مالك ما بالراحه علينا
فتوح / انا هكلم شريف و اخليه يتوسط بينكوا و برده الحوار يبقى فى السر زى ما هم عاوزين و شريف يبقي يودى و يجيب الورق
عباده / لا ما تتعبش نفسك كفايا عليك اللى انت فيه ربنا يقدرك عليه انت بس
فتوح / براحتك
............................
فى شقه رشيد
سمر نايمه على السرير على جنبها و مديه الباب ضهرها رشيد يفتح الباب بالراحه يبص عليها و يغمض و يقفل الباب تانى سمر تقوم تفتح و هى مبتسمه تسمع صوت قفل باب الشقه تقوم تجرى تقف فى البلكونه ثوانى و تلاقى رشيد خارج من العماره و ماشى سمر تتنهد و تدخل
.......................
فى اوضه هند
هند نايمه على السرير بتتكلم فى التليفون
هند / طبعا وحشتنى و الاوضه من غيرك رخمه اوى بفكر اروح انام جنب ماما و ياسمينا بس مش هاين عليا اسيبها فاضيه
مختار / قريب هاجى ازحمهالك حاضر
هند / احلى زحمه ربنا ما يحرمنى من دخلتك عليا و لا وجودك جنبى ابدا
مختار / و لا يحرمنى منك قالولى انك خلصتى مخزون الرصاص النهرده
هند / خدعوك فقالوا دا حياله خزنتين
مختار / اتنين بس؟
هند / ممكن ... انا بقول ممكن يكونوا تلاته
مختار / و انا مصدقك
هند / الله بقى
مختار / هههههههههههههههههه يا ستى فداكى المهم قوليلى النتيجه ايه
هند / عيب يا ابنى انا خلاص فاضلى تكه و اضرب و انا مغمضه
مختار / معلم و سيد باشا المعلمين كلهم
هند / لقيت الاوضه اللى نقلوا فيها الجيم
مختار / دا انتى ما قعدتيش بقى
هند / الفراغ وحش اوى
مختار / ههههههههههههههههه بس لقيتها ازاى هو احنا كنا مخبينها
هند / ما انا ما كنتش اعرف انا كنت فاكره انكوا رميتوا الحاجه و بعدين انت عارفنى انا مش بدخل فى اماكن مش عرفاها و لا بدخل فى حاجات ما ليش فيها انا حتى فى اماكن كتير فى السرايا و اوض كتير ما اعرفش بتاعه مين اصلا دا انا ما اعرفش اوضه اختك فين
مختار / ههههههههههههههه والله عسل
هند / مش بهزر تصدق بكره هسالها ... لا يا عم يدحكوا عليا
مختار / ههههههههههههههه فوق اوضه ناصر
هند / بتهزر
مختار / اقسم بالله
هند / الواحد كانه ما عاش فى السرايا خالص
مختار / حلوه الفكره دى استغلى الفتره الجايه انك تتعرفى على السرايا اكتر و اهو تقربى من المكان يعنى
هند / انت بتاخدنى على قد عقلى يا مختار
مختار / هههههههههه استغفر الله مين يجرؤ يقول الكلام ده
هند / كتر خيرك
مختار / بقولك ايه
هند / افندم
مختار / ما تشديش على روحك فى اوضه الجيم
هند / اهى ام فاتن طلعت اهى ... ما فيش حاجه يا مختار مفيش
صمت ثوانى
مختار / مش عشان كدا خايف تتمزقى و لا يجرالك حاجه انا محتاجك بصحتك عشان لما ارجع القاعده هنا ناشفه اوى و الواحد خد على النومه الطريه
هند تبتسم بخجل
مختار / مش كنت خدتك معايا
هند / طب ما تجيلى انت احسن
مختار / قريب باذن الله قريب اوى كمان
..............................
فى كباريه
رشيد قاعد باصص فى الارض مدير المكان يدخل
المدير / فريد باشا والله ليك وحشه .. فريد باشا ... فريد بيه
رشيد يبص للراجل
المدير / ازيك يا فريد بيه ايه الغيبه الطويله دى اوعى تكون زعلان مننا و لا حاجه
رشيد / لا انا كنت مسافر ما انت عارف
المدير / شكلك مش عاجبنى خالص مش عاوز سعادتك تقلق انا عارف طلبك هسهرك حته سهره تغير مودك ... ايه ده ايه ده ايه ده ترابيزه الباشا فاضيه ليه يا ابنى انت مش عارف دا مين و لا ايه ثوانى و تكون مفروشه فى اى بى .. انا بعتزر فريد بيه
المدير يشاور لبنتين يروحوا يقعدوا جنب رشيد و الوايتر يحط خمور و مزه على الترابيزه و رشيد عينه على الازازه
.......................
فى اوضه فتوح
امين نايم و فتوح شغال و عباده بيتكلم فى التليفون بصوت واطى جنب الشباك
عباده / غصب عنى والله كل ما اقول امشى يقولى خمس دقايق و اخلص و ما اعرفش يلاقى مشكله فى ايه يرجع يظبط الدنيا
خديجه / و انت يعنى مش عارف فتوح يومه بسنه
عباده / دا امين نام و هو قاعد
خديجه / بس ما تقلقش ان شاء الله يخلصلك الليله دى فتوح بسم الله ما شاء الله عليه عبقرينو كمبيوتر
عباده / مهو باين شوفى بقالنا قد ايه قاعدين
عباده يتلفت حواليه و يغطى بقه بايده
عباده / بقولك ايه اوعى تنامى انا جايلك هاه
خديجه / حد يسمعك يا راجل
عباده / ما اللى يسمع يسمع و انا هخاف و لا ايه
خديجه / و دى تيجي برده
فتوح / خلصت
عباده يجرى عليه
عباده / احلف
فتوح / اقسم بالله خلصت و السيرفر جاهز و شغال و مليون فل و اربعتاشر
عباده / الكاميرات اللى قولتلك عليها
فتوح / زى ما طلبت بالظبط و خد شوف بنفسك
عباده يتكلم فى التليفون
عباده / هكلمك بعدين
عباده يقفل و ياخد اللاب على رجله و فتوح بيفرجه
..........................
فى الكباريه
بنت تقوم ترقص و بنت تانيه تصب و تعزم على رشيد رشيد يطلع فلوس من جيبه و يرميها على الترابيزه و يمشى المدير يحاول يحصله ما يلحقوش يضرب كف على كف
...........................
تانى يوم على القهوه
شاب يدى لعباده ورق
الشاب / اتفضل يا سى عباده صورتهولك كلو بس فى كتب بقى بتتباع فى الكليه ان شاء الله هتجيبهالك
عباده يطلع فلوس من معاه
الشاب / خلى يا سى عباده خيرك سابق
عباده / عشت بس برده الورق و الكتب دى كلها مصاريف و كفايا علينا تعبك ربنا يقدرنا و نرد جميلك ده
الشاب / جميل ايه يا سى عباده و دا يجي ايه من بعد خيركم .. استنى يا سى عباده كنت هنسى البت ورده ادتنى الورقه دى
عباده ياخد ورقه
الشاب / دى اسامى كل العيال اللى فى البلد اللى معاهم فى الدفعه و اسامى المعيدين و الدكاتره اللى هيدرسولهم قالت يمكن تحتاجولهم دى قعدت ساعتين تكتب فيهم
عباده / و ليه التعب دا كله على كل كتر الف خيرها ما نتحرمش
الشاب / انت بس تؤمر و اى حاجه ناقصه قولى علاطول و انا هصورهالك و رقمى معاك و لا انت مش مسجله
عباده / امال مين اللى كلمك الصبح
الشاب / لا مؤاخذه
الشاب يشرب الشاى و عباده يبص فى الورقه
...................
فى شقه رشيد
رشيد يفتح الباب و يدخل سمر نايمه على الكنبه تقوم و تجرى علي
سمر / كنت فين يا رشيد قلقت عليك جدا
رشيد / كنت بتمشى مالك ايه اللى نيمك هنا
سمر / كنت مستنياك غلبنى النوم مالك شكلك مرهق اوى
رشيد / انا فعلا تعبان شويه هدخل انام و لما اصحى نبقى نتكلم عن اذنك
سمر / طب احضرلك حاجه تاكلها
رشيد / بعدين بعدين
رشيد يسيب سمر و يدخل الاوضه و يرمى نفسه على السرير و ينام
...........................

فى القسم
امين قاعد قدام زياد و زياد فاتح اللاب
امين / احنا كدا عملنا اللى علينا فاضل كلمتين حلوين من جنابك
زياد / انا فعلا اتكلمت معاهم و باذن الله هيناقشوا الموضوع النهرده و ربنا يقدم اللى فيه الخير
امين / و نعم بالله
زياد / انا عارف ان طلباتى كترت بس انا كان فى موضوع كمان عاوز اكلمك فيه
امين / اؤمر يا باشا تحت امرك
زياد / انت راجل قانون يا امين و تفهم فيه عنى
امين / استغفر الله يا زياد بيه
زياد / احنا اتفقنا كان على اننا نحط ايدينا فى ايدين بعض عشان نخلص من فيرا و التنظيم اللى وراها
امين / حصل
زياد / بس لو فى يوم حصل و اتصرفتوا من غير علمى سواء فى الموضوع ده او فى غيره
امين / و انت يا باشا هتاخد راينا فى غيره
زياد / امين
امين / بص يا باشا احنا الحمد لله كافيلين بروحنا و مش عاوز اقول ان سعادتك اللى جيتلنا و طلبت تحط ايدك فى ايدنا عشان نساعد بعض احنا لا جينا و لا طلبنا مساعده انا مش عاوز اقول الكلام ده
زياد يبتسم
امين / انا راجل قانون اه بس انا فى الاصل صعيدى و فلاح و دى لسه على سعادتك شويه لحد ما تفهمها بس ما تقلقش بالعشره هتعرف كل حاجه ... انا مش هعطل جنابك اكتر من كدا بالاذن انا
امين يقوم و يمشى و زياد متابعه و مبتسم
..........................
فى مصر
مختار يدخل محل اسلحه الراجل يقوم يقف
الراجل / مختار باشا اهلا اهلا اتفضل اتفضل
الراجل يمشى ناحيه باب جانبى و يدخل و مختار يدخل وراه
الراجل / ايه الكلام اللى بنسمعه فى الاخبار ده يا باشا
مختار / اهو كلام هيقعدوا ساكتين يعنى
الراجل / الحمد لله الواحد كان خايف اللى بيحصل ده ياثر على السوق بتاعنا
مختار / و احنا من امتى قصرنا معاك .. و الله انت اللى مقصر معانا جامد
الراجل / يا باشا ما تقولش كدا حاجتك جاهزه من بدرى انا بس ما كنتش عارف اوصلها ازاى
مختار / و هو رجالتنا اللى هنا قصروا معاك فى حاجه
الراجل / و دا كلام برده انا اصلى كنت عاوز شغل جديد
مختار / جاهز بس الاول سد القديم مش دى الاصول برده و لا ايه
الراجل / يا باشا جاهز
الراجل يفتح الخزنه و يطلع شنطه مختار ياخدها و يفتحها فيها فلوس
يقفلها
الراجل / مش هتعدهم
مختار / فى البيت على رواقه و لو فى زياده او نقص ادينى عارف العنوان
الراجل / بيتك و مطرحك يا باشا
مختار يسلم على الراجل و يمشى الراجل يتكلم فى التليفون
الراجل / خليكوا وراه و ورونى شطارتكوا
...........................