البر التانى بقلم / لولو_محمد (كامله )

الحلقه ٤٤

((((((((البر التانى )))))))
#لولو_محمد
الحلقه ٤٤
مختار يمشي ورا البنت لحد كاونتر و يبص على المانيكانات حواليه البنت تجبله عبايات كتير منهم العبايه اللى اختارها و تفرد و مختار ينقي
مختار / بصي شكلى يعني مش كله لون واحد هاتى من كله ... حلوه دى هاتيها مع الحمره
البنت تفضل تطلع و هو ينقي
مختار / حلو الازرق ده هى بتليق فيه اوى هاخدها ... فى بجامات عرايسي
البنت / فى كل حاجه حضرتك
البنت تديله تلت كتالوجات
البنت / لانجيري و بيجامات و عبايات نقى حضرتك و انا اجبلك على ما اطبق دول
مختار يركن كتالوج اللانجيرى و يبص فى البجامات صورتين و يقفله
مختار / انا مش هعرف انقى من الصور دى نقيلى تشكيله حلوه و مش مهم السعر شكلى بقي اللوان و مقاسات شورتات بناطيل كت نص كم كلو عادى يعني و الداخلى شكلى برده
.........................................
البنت / ثوانى حضرتك
البنت تمشي و مختار يقلب فى البوم العبايات لحد ما يوصل لعبايه جينز على بنطلون
مختار / حلوه دى هتعجب هند و تنفع فى البلد ... لو سمحتى
مختار يلاقي البنت بعيد عماله تطلع يشاور لواحده تانيه
مختار / عاوز من العبايه دى
البنت / ثوانى حاضر هجيلك
مختار / و لو فى موديلات تانيه الاستايل ابو بنطلون ده هاتى بس غوامق الله يخليكي
البنت / من عنيا حاضر
البنت تمشي و مختار يبص فى الساعه البنت الاولى ترجع شايله علب لانجيريهات كتير تحطها قدام مختار
البنت / نقي حضرتك على ما اجيب البجامات
مختار يهز راسه و هو مبتسم و البنت تمشي و مختار يفتح و يفرد و ينقي
........................
فى الكافيه
هند و شيري يدخلوا شايلين اكياس المحل يقعدوا
هند / خيانه اكلتوا من غيرى
عبد الله / انتو فين كل ده
شيري / دا يدوب محلين اتنين بس اللى دخلناهم
عبد الله/ محلين بس قولوا مولين بس على الوقت دا كله
هند / مختار فين
عبد الله / مش عارف قال هيبص على حاجه و هيرجع و اختفى فى نفس الفجوه الزمنيه اللى انتوا اختفيتوا فيها
شيري تفتح المحفظه و تعد الفلوس اللى معاها
شيري / المحلات هنا عندها حاجات حلوه و تشكيله كبيره وفرت وقت اللف بس الفلوس عجزت معايا جامد
هند تفتح محفظتها و تطلع فلوس
هند / انا معايا فلوس عملت حسابي و جبت معايا قولت بدل ما تعجبني حاجه و اندم خديهم
عبد الله / و انا معايا على فكره
شيري / خلو فلوسكوا معاكوا لو احتجت
عبد الله / لا خليها معاكى و اعزمى مختار على الغدى الراجل معانا من الصبح
هند / و هو مختار بياكل اكل الشارع برده
عبد الله / نعزم لسه هيستنى اما نروح و تطبخوا
هند تبص لشيري شيري تاخد منهم الفلوس
شيري / كل واحد عارف انا اخدت منه كام عشان ارجعهملكوا
عبد الله يشوف مختار جاى من بعيد بيزق عربيه مليانه شنط
عبد الله / مختار جاى هناك اهو ايه الحاجات دى كلها
مختار يدخل
مختار / كان عندكوا حق المكان هنا حلو جدا لقيت فيه حاجات حلوه اوى اما لو مريم عرفت المكان ده هتسحل امها هنا اسبوع لحد ما تدخل محل محل و تقيس كل اللى فيه
شيري / يا سيدى خليها تنبسط
مختار / المهم لقيتوا حاجات حلوه
هند / اوى لما اروح هوريهالك
عبد الله / بس ايه دا كلو
مختار / هههههههههههههههههههه و الله كان نفسي اجيب اكتر بس كل اللى فى المحل كانوا بصينلى و مركزين معايا فانسحبت فى هدوء بدل ما الهدوم تولع فى ايدي
هند / المهم جبت حاجات حلوه
مختار / لما نروح شوفيها و قوليلى رايك
هند تبتسم / تمام
شيري / اكيد جوعت يا مختار المكان هنا شكله نضيف اوى ايه رايك نطلب اكل
مختار / مفيش مشكله تحبوا تاكلوا ايه
مختار يشاور للوايتر
هند / هتاكل من بره يعني
الوايتر يدخل
مختار / المنيوهات لو سمحت
الوايتر يمشي و مختار يتكلم بهزار
مختار / مهو لو كنتى مهتمه كنتى جبتيلى معاكى سندوتشين
عبد الله / ههههههههههههههههههه
هند / غلطتى دى معلش
الوايتر يجيب المنيوهات
هند / بص خد بيتزا مارجريتا دى دقيق و جبن و سلطه لا لحمه و لا فراخ يعني ما فيهاش حاجه
مختار / ماشي هاتيلى واحده صغيره
شيري / يا ابني الصغيره دى اخرها تاكل ياسمينا و انت اكيد جعان
مختار / والله يا امى انا هاكلها لانى فعلا جعان غير كدا انتى عارفه الاكل ده ما ليش فيه خالص و لو عليا ما حطوش في بطنى
هند / نتصبر و اوعدك اول ما نروح البيت هعوضك باحلى عشا
مختار / ماشي شوفي تطلبي ايه
..............................
على القهوه
ممدوح قاعد مع خيلان مختار
ممدوح / يا جدعان ما يبقاش نفسكوا قصير الزن على الودان امر من السحر اصبروا
خال ١ / يا عم احنا قولنا هتروشها انما انت نايم فى الخط
ممدوح / يعني اروشها اكتر من كدا ايه طلعتلها فى الكليه و التليفون حتى امها كلمتها و بعت ورد
خال ٢ / ابعت تانى و تالت هات نمر تانيه و كلمها اللى بتاخده مش شويه
ممدوح / و هو انا مقصر
خال ١ / يا ابنى افهم كل يوم بيعدي فرصتنا ننقذ البنت بتقل و اديك شوفت الواد محاصرها ازاى
ممدوح / و انا مش متاخر بس اعمل ايه اكتر من كدا الحاجات دى بتحتاج وقت و انا مش ساكت و عشان تتاكدوا دى لسته بالمصاريف بالسحتوت
ممدوح يطلع ورقه مدبس فيها بيان اسعار
ممدوح / لحسن تكونوا فكريني ضربت الفلوس فى جيبي و لا حاجه و مدبساكوا فيها فواتير الورد و كل حاجه
خال ١ / انا ليا بالنتيجه غير كدا ما يكلش انا مش فاضي للرغى الكتير انا قايم
خال ١ يمشي و ممدوح و خال ٢ يبصوا لبعض خال ٢ يمشي
ممدوح / واحد شاى هنا يا ابني
.......................
قدام شقه هند
هند و عبد الله و ياسمينا و شيرى و مختار طالعين السلم و كل واحد شايل شنط كتير جدا يحطوها على السلم مختار يفتح شقته
هند / انت رايح فين مش هتيجي ؟
مختار / هموت من التعب هغفل شويه لحد ما تحضرى العشا تمام
هند / تمام
مختار يدخل و لسه هيقفل الباب
عبد الله / حاجتك يا ابني
مختار يطلع
مختار / دى مش ليا دى لهند
هند / ليا انا !!
مختار / ابقي قوليلى رايك و لو ما عجبوكيش يتبدلوا عادى معايا الفواتير .... يلا تتمسوا بالخير
مختار يدخل و يقفل الباب و هند عماله تبص على الشنط الكتير
عبد الله / ما تيلا يا جدعان هنبات على السلم و لا ايه
الكل يدخل و يشيلو الشنط و هند تفتح شنطه و تبص جواها و تقفلها بسرعه و تفتح باقي الشنط و تبص فيها و تبص لمامتها تقوم تبص معاها و يضحكوا
عبد الله / ما تطلعى تفرجيني جبتوا ايه
شيري / مش وقته خش زاكر على ما نحضر العشا ... خشي يا هند دخلى الحاجات دى بسرعه على اوضتك و حصليني على المطبخ
هند تبتسم و تدخل الشنط جوه و تطلع تاخد غيرهم
شيري / انت هتفضل واقف مش كفايا اليوم اللى ضاع مش كنت روحت زاكرت احسن من قعدتك معانا
عبد الله / صحيح فى الهم مدعيين و فى الفرح منسيين عجبت لك يا زمن
شيري / هههههههههههههههههههه
هند / ما تدخل يا ابني تزاكر
عبد الله / اتوزعت
عبد الله يدخل اوضته و يقفل الباب شيرى تروح تبص في الشنط مع هند
هند / ههههههههههه ايه اللى هو جايبه ده
شيري / صاحب مزاج زى ابوكى تعالى ساعديني نحضرله العشا و نبعتله عبد الله بيه و تقعدى تقيسي و تفرجيني
هند تبتسم اوى و تدخل اخر حبه و تقفل الباب و تجرى مع شيري على المطبخ
........................
فى شقه وسام
وسام و مامتها و يوسف و اسراء قاعدين فى الصالون
الست / دا كفايا وقفه يوسف جنبنا فى المستشفي
اسراء / امال انتى فاكره ايه هو فى زى يوسف طب دا كان هيتجنن عليكي و اسالي وسام مش حصل يا وسام
وسام تبتسم و تهز راسها
الست / هى الناس بتبان فى المواقف اللى زى دى
اسراء / و بعدين يا ست الكل انا مش عوزاكى تهملى علاجك تانى عاوزين نشد حيلنا كدا و لا ايه
الست / انتى عارفه مشاكل الشغل اللى ما بتخلصش الواحد كمان اعصابه ما عدتش بتستحمل
اسراء / يا اختى خدنا ايه من الشغل الا وجع القلب الست ما لهاش الا بيتها و جوزها و لا ايه يا وسام
الست / ايه اللى رماك على المر اديكي شايفه المعاشات ما تاكش عيش حاف و الاسعار كل يوم بتزيد
اسراء / و الله معاكى حق ... دا احنا لسه امبارح الحج نفسه هفته على اكله سمك و جمبرى كلفتنى فوق الخمسميه جنيه الا ما جبنا كابوريايا حتى دا حتى الوليه رفعت سعر القليه خلته ١٢ جنيه فى الكيلو بدل ١٠ و اكلمها تقولى قال ايه الانبوبه غليت تقوليش هتقليلى بالانبوبه بحالها ما عدش فى ضمير
الست تبتسم و الكل يبص لبعضه
.....................
فى شقه هند
جرس الباب يضرب عبد الله يفتح الباب جري يلاقي هند طالعه من المطبخ
عبد الله / هفتح انا خشي خشي
هند تدخل و عبد الله يفتح يلاقي دليفرى ورد
الشاب / الورد ده للاستاذه هند الجمل
عبد الله / انا اخوها
عبد الله يستلم و يقفل الباب و يبص فى الكارت
صوت شيري من جوه / مين يا عبد الله
عبد الله يدخل المطبخ
عبد الله / هو ايه حكايه ممدوح ده يا هند
هند تبص لمامتها و لعبد الله
عبد الله / البيه باعت ورد مكتوب عليه مش قادر اشيل صورتك من خيالي و لا افقد فيكي الامل
هند / والله العظيم انا عملتله بلوك و المره اللى فاتت رميت الورد بتاعه فى الزباله
عبد الله / هو كان فى مره فاتت
شيري / استني يا عبد الله اما نفهم
هند / انا قولت لمختار على فكره و مختار كلمه و قاله انى مخطوبه و ما يكلمنيش تانى و الراجل اعتزر مش عارفه ازاى بيبعت ورد تانى
شيري / استني هو ممدوح ده طويل كدا و عريض و ابيضاني كدا
هند / تقريبا انا ما شوفتوش غير مره واحده فى الكليه ... و صدفه والله
عبد الله / هى كمان حصلت للكليه
شيري / دا جالى الدكان و كلمنى عليكي و قولتله انك مخطوبه دا عبيط دا و لا ايه
عبد الله / عبيط ايه دا عاوز يتربي اديني نمره الحيوان ده
شيري / بس يا عبد الله بقولك ايه علاج الندل اجتنابه ... بقولك ايه اتصل بمختار شوفه صحي و لا لا الاكل جاهز خده و روح زاكر معاه
عبد الله / و ان شاء الله هنقول لمختار على التطور اللى حصل فى حوار سي ممدوح ده و لا ايه
هند و شيري يبصوا لبعض
عبد الله / انا هروح اجهز كتبي و اكلمه جهزوا الصينيه بسرعه
عبد الله يروح اوضته
شيري / تعالى هنا فهميني ايه حكايه ممدوح ده من طقطق لسلاموا عليكوا
هند / و الله زى ما قولت قدام عبد الله
شيري / امال انا ما اعرفش عنها حاجه ليه .. على العموم جدعه انك حشرتى مختار و خليتيه فى الصوره لو كان عرف من بره الموضوع كان ممكن تحصل فيه مشكله
هند / والله قولتله فى ساعتها
شيري / بصي يا هند معظم المشاكل بتحصل لما بنحاول نخبى انما الصراحه بتقوى الثقه و مختار عاقل
هند تهز راسها
شيري / عبي الصينيه يلا خلينا نشوف اللى مستنينا جوه ده
هند تبتسم و تحط الاكل على الصينيه
......................
فى شقه مختار
مختار ماسك الباب و مبتسم و عبد الله يدخل شايل الصينيه
عبد الله / اما نشوف اخره الشحطته دى ايه
مختار / شحطته ايه يا ابني دا الباب فى الباب الاوضه دى فاضيه عسكر لو تحب و لا اقولك الشقه كلها قدامك مطرح ما ترتاح اقعد المهم تزاكر
عبد الله / هزاكر بس الاول اقعد كلك لقمه الاكل ده كلو معمول على حسك
مختار يقعد ياكل
مختار / بسم الله
عبد الله / على فكره مبسوطين اوى بالحاجات اللى جبتهالهم و وزعونى عشان يقيسوا براحتهم
مختار / الحمد لله يارب دايما
عبد الله / فى حاجه كمان حصلت
مختار يبصله
عبد الله / هند بتقول انك عارف حوار اللى اسمه ممدوح ده
مختار يهز راسه
عبد الله / بعت ورد من شويه و لما سالت هند قالت انك عارف وعرفت من ماما انه راح كلمها على هند
مختار يكمل اكل و يهز راسه
عبد الله / ايه ده !! بقولك باعتلها كارت مكتوب عليه مش قادر اشيل صورتك من خيالى
مختار يبتسم و يكمل اكل
عبد الله / انت طبيعي يا ابني
مختار / و ادى ام اللقمه سبتها اهو ارتحت كدا و هنزل دلوقت انا ادور على ممدوح حاضر .. معاك عنوانه ؟
عبد الله / امال هتسكت اذا كنت انا بغلى
مختار / طب ما انا بغلى
عبد الله / قول و الله انت كدا بتغلى
مختار / هههههههههههههههههههههه كل يا عبد الله انا جعان دلوقت
مختار يكمل اكل
عبد الله / انت بجد
مختار / انت مش حكيتلى .. اهدى بقي انت خالص و انا هتصرف تمام
عبد الله / ازاى بقي هتعمل ايه يعني
مختار / لما اكل هبقي اشوف
عبد الله / يا مثبت العقل فى النفوخ يارب
مختار / هههههههههههههههههههه
......................
فى اوضه هند
هند بتقيس عبايه استقبال
شيري / شكلها غاليه اوى بصراحه
هند / والله يا ماما كلهم شكلهم غالي القميص الازرق ده اللى كنتى عاوزه منه الابيض ابو ٦٠٠ جنيه باين ما بالك بالعبايه
شيري / بصراحه احرجنى بس انبسطت
هند / و انا كمان انبسطت اوى والله
شيري / طب لمى الحاجات دى كلها بقي و هروح اشوفلك شنطه تعبيهم فيها عشان مفيش حاجه تروح كدا و لا كدا
هند تهز راسها و شيري تفتح باب الاوضه
شيري / انا لو منك أكلمه اشكره
هند تبتسم اوى شيري تطلع بره و هند تتصل بالتليفون مشغول
هند / بتكلم مين دلوقت
هند تبعت على الواتس
...................
في شقه مختار
مختار واقف فى البلكونه بيتكلم فى التليفون
مختار / مسيره يروح يعني هيبات فى الشارع يعني مش انت متاكد من العنوان ... يبقي خلاص ما تتحركش من معاك غير و هو فى ايدك ... لا انا سهران مش هنام ... سلام
مختار يقفل توصله رساله واتس يفتحها و هو مبتسم
///////////
هند / هو اللى بترغى معاه و سايبني ده احلى منى
//////////
مختار يضحك و يتصل بهند
مختار / السلام عليكم
هند / و عليكم السلام كنت بترغى مع مين
مختار / واحد صاحبي و اه مفيش فى عيني احلى منك
هند / شكرا
مختار / العفو
هند / على فكره انبسطت اوى بالحاجات اللى جبتها قستها كلها جميله جدا جدا جدا
مختار / الحمد لله
هند / اقولك حاجه
مختار / اكيد قولى
هند / النهرده بعد ما اشترينا اللى احنا عاوزينه ماما جابتلى حاجات من دى و سالتني ما تعرفيش مختار بيحب اللوان ايه و لا قصير و لا طويل قولتلها مستحيل ابدا ابدا اسال مختار فى حاجه زى دى لقيتك جايبلى ههههههههههههههه
مختار / حاولت انوع بس كترت من الاحمرات عارف انك بتحبيه
هند / و انت ما بتحبوش
مختار / بحبه و بحب كل الالوان المهم انا مش عارف المفروض يتجاب قد ايه فشوفوا ايه اللى ناقص و ننزل نزله تانيه نجيبه
هند / ماما قالت هتبقي تجيبهم حاجه فى حاجه مش مشكله ... عبد الله حكالك اللى حصل صح
مختار / انتوا جبتوا حاجات غير اللى جبتها
صمت ثوانى و هند تتكلم و الحماسه اختفت من صوتها
هند / واحد
مختار / عاوز اكلمك فى حاجه بس من غير حساسيات اتفقنا
هند / قول
مختار / انتى ملزمه منى و جهازك ده انا اللى هستخدمه ... او هتستخدميه فى بيتي يعني مهو اكيد الحاجات دى مش هتخش فيا
هند / ههههههههههههههه
مختار / ههههههههههههه اقصد يعني انا ربنا فاتحها عليا و مقدرنى فمش محتاج تساعدونى فى جهازك اى حاجه تجيبوها ياريت تحاسبيني عليها يا اما تاخدى فلوس تشترى بيها اللى يعجبك او تاخديني معاكى اللى تشوفيه يعني
هند / مش فارقه على فكره واحد يعني
مختار / ربنا يخليكي بس يعني اهو
هند / مش عارفه ايه اللى المفروض بيحصل فى الحاجات دى بس اقول لماما حاضر
مختار / فى موضوع تانى انا ما اتكلمتش معاكى فيه عشان احنا كدا كدا رايحين جايين مع بعض بس امممم مش عارف بقولك ايه انا عاوز اديكي مصروف لايدك و مش عارف انتى ممكن يكفيكي كام مش عاوز اديكي مبلغ قليل
هند / لما ابقي فى بيتك اوعدك انى انحل وبرك بس مش دلوقت
مختار / على قلبي زى العسل من دلوقت
هند / انا معايا فلوس على فكره كنت محوشاها و ماما كمان معاها فلوس و بتديني
مختار / انا مش بقول كدا عشان انتى محتاجه انا بقول كدا عشان
هند / عشان انت راجل عارفه
صمت ثوانى
هند / على فكره انا بحبك اوى
مختار / و انا كمان اقولك حاجه
هند / قول
مختار / خديهم و اعتبرهم تمن الدباديب و الورد
هند / ههههههههههههههههههه اااااه قول بقي كدا لا يا حبيبي انسي هتجيب ورد و هتجيب دباديب و هتجيب شيكولاته كمان
مختار / من عنيا حاضر
هند / تسلملى عنيك ... انا ما زاكرتش النهرده بصاغ
مختار / و دا يزعلنى جدا اتفضلي يا ست هانم يا تنامى يا تزاكرى و بكره بنفسي همتحنك
هند / ههههههههههههههههه حاضر سلام
مختار / سلام
هند تقفل و مختار واقف يبص فى السما عبد الله يدخل مختار يبصله
عبد الله / ماما كلمتنى بتقول افراج
مختار / ههههههههههههههههه لو عاوز تخليك خليك انا سهران هدخل ازاكر اهو نسلى بعض
عبد الله / خليني
مختار يبتسم و يدخل هو و عبد الله جوه
مختار / هعملك بقي احلى فنجان قهوه يكيفك
عبد الله / حبيبي
.....................
فى شقه هند
هند قاعده بتزاكر و تنفخ
هند / كان مالى انا بالهم ده منك لله يا قاسم يا امين
هند تبص فى الكتاب و تزاكر تليفونها يرن برقم غريب متردش يتصل تانى ترد
هند / الو
ممدوح / طب على الاقل اسمعيني
هند / اسمعك ايه يا حيوان يا عديم الاحساس تعرف انا مش هعملك بلوك انا هبلغ البوليس و اقولهم انك
ممدوح / هند انا بحبك بجد
هند / حبك برص انت تعرفني اصلا
ممدوح / اعرفك و اعرف عنك فوق ما تتخيلى اعرف انك بتحبي اللون الاحمر و انك مش بتحبي الاصفر لانه بيعصبك و بتحبي الكعب العالى بس مش بتعرفي تمشي فيه فبتشتريه و مش بتلبسيه و بتقعدى تتمرنى كتير فى اوضتك لوحدك
هند تقفل السكه الرقم يتصل تانى تكنسل و تعمله بلوك رقم غريب تالت يتصل تروح اوضه مامتها تلاقيها نايمه و واخده ياسمينا فى حضنها تروح تلبس الاسدال و تروح تخبط على مختار و فى ايدها الموبايل بيرن مختار يفتح هند تديله الموبايل فى صمت عبد الله يطلع من اوضته
مختار / الو
صمت
مختار / الو ... الو ... تمام انا كمان مش بحب اتكلم فى التليفونات خليها لما نتقابل
مختار يقفل
هند / قعد يقولى حاجات عنى فعلا
عبد الله / دا الزفت ممدوح ده
مختار / تمام يا جماعه تمام سبيلى الموبايل النهرده و خشي شوفي كنتى بتعملى ايه و انت شوف انت بتعمل ايه و انا الموضوع ده عندى خلاص
هند / طب انت هتعمل ايه يعني
عبد الله / الواد ده لازم يتربي
هند / عرف الحاجات دى عنى ازاى
عبد الله / حاجات ايه
مختار / خلاص يا جدعان قولت الموضوع عندى خلاص يلا روحى زاكرى و انت خش زاكر
عبد الله / انا هروح
مختار / هتروح و تقعدوا ترغوا و لا هى تزاكر و لا انت تزاكر انت هتفضل معايا هنا ... اتفضلي روحى شوفي اللى وراكى هديكي الموبايل الصبح
هند تبص لعبد الله و تبص لمختار و تمشي
عبد الله/ هتعمل ايه
مختار / دلوقت هزاكر خش يلا
مختار يزق عبد الله جوه و يقفل الباب
....................