((((((( البر التانى )))))))
#لولو_محمد
الحلقه ٦١
حمدى / فى جديد ؟
حامد / و لا قديم ناشفه زى المستشفي
حمدى / و العمل
حامد / العمل عمل ربنا بقي هنعمل ايه كلمت اخوك
حمدى / اكلمه فى ايه
حامد / فى اللى قولتلك عليه فى نصيبنا فى المحلات
حمدى / لا طبعا ما كلمتوش هكلمه اقوله ايه
حامد / احنا فى عرض كل جنيه و المحل ده انا ليا فيه التلت
حمدى / باماره ايه يا حامد ما احنا واخدين حقنا و حتى لو مش واخدين انت الربع مش التلت ما تنساش عيال محمد الله يرحمه
حامد / و هو عيال محمد محتاجين لنا الواحد بيضرب نفسه بالجزمه انه مشي ورا محمود و ما حطش ايده فى ايد مختار ما كانش ده بقي حالى
............................
حمدى / هى الحدايه بتحدف كتاكيت يعني
حامد / يا سيدى مش لازم كتاكيت شويه عليقه ما تضرش
حمدى / انا تعبان و مش قادر هات من الاخر انت جايبني هنا ليه
حامد / الله امال انا بقول ايه من الصبح عاوزين نحط ادينا فى ادين بعض عشان نرجع حقنا من اخوك
حمدى / حقنا خدناه و ضيعناه و اكتر من كدا ما لكش عنده حاجه
حامد / يعني هتسكت
حمدى / انت مش لسه جاى من عند المحامى و بتقول طريق مسدود
حامد / ان كنت انت هتسكت انا مش هسكت و هرجع حقي بس ما تجيش ساعتها بقي تاخد على الجاهز
حمدى / انا ماشي يا حامد عن اذنك
حمدى يمشي
حامد / حمدى ... حمدى ... طب حاسب على الشاى بتاعك طيب ... ابو كدا يا جدع ... اخوات اخر زمن
......................
فى الفرح
العربيات تركن و الرجاله عماله تضرب نار مختار يفتح لهند الباب و هى ساده ودانها و مش عاوزه تنزل
مختار / يا بنتي ما تخافيش انزلى
هند / صوته مرعب اوى
مختار / ما تجمدى قلبك كدا و ما تبقيش خرعه
هند / مين دى اللى خرعه
هند تنزل و تبص لمختار ستات يدخلوا يخدوها بالحضن و بوس و زغاريط
ست / نورتى يا ست الكل لولولولولولولولولولولى
مريم / يلا يلا عاوزين نشوف العروسه
مريم و هند يروحوا مع الستات و مختار يروح يسلم على العريس و ينقطه و ياخده بالحضن
مختار / ربنا يتملك بخير
حجازى / تسلم يا سى مختار مجيتك على راسي والله
مختار / ما تقولش كدا دا واجب علينا
ناصر يدخل ينقط العريس و يحضنه
ناصر / عشت و شوفتك عريس يا وله
حجازى / من فضله خيرك يا كبير
ناصر / ما تقولش كدا ازعل منك
حجازى / ما نقدرش على زعلك يا كبيرنا
ناصر يروح ناحيه المزمار و يطلع فلوس
الراجل اللى ماسك المايك / و احلى تحيه لكبيرنا اللى مشرفناااااااا
ناصر / عريسنا
الراجل / عريسنا
ناصر / حجازى
الراجل / حجازى
ناصر / يعني الرجوله و المجدعه
الراجل / يعني الرجوله و المجدعه
ناصر يديله الفلوس و ياخد الميكروفون
ناصر / ان شاء الله يوم الاربع الجاى حنه مختار و الخميس كتب الكتاب و الدخله
الرجاله كلها تضرب نار و الستات بتتفرج من البلكونه تزرغط الرجاله تتلم حوالين مختار و يباركوله مغاورى يدخل و يحدف لمختار شومه
مغاورى / مش هتوجب مع حجازى و لا ايه
مختار / بترجع تزعل
مغاورى يطلع المسرح و يشد المايك و يطلع فلوس
مغاورى / الجوارحه
الراجل / الجوارحه
مغاورى / كمان مره الجوارحه
الراجل / الف مره الجوارحه
مغاورى / الرجاله اللى ما بتخافش
الراجل / الرجاله اللى ما بتخافش
مغاورى / الرجاله اللى على حق
الراجل / الرجاله اللى على حق
مغاورى / و سمعنى احلى سلام لعريسنا
مغاورى يدى للراجل فلوس و ينزل يقف قدام مختار و يرفع قدامه الشومه و الكل واقف بيتابع مختار يبص لواحد من الرجاله يحدفله شومه يرفعها و يلفوا حوالين بعض و هند و البنات بيتابعوا من فوق
سماح / اهى قلبت غم من اولها اهو
هند تبص لسماح
سماح / مغاورى ما بيحبش يخسر بيتعصب
بنت جميله واقفه و لابسه دهب
البنت / و مين فى الدنيا بيحب يخسر يا سماح
الكل يبص على البنت
البنت / العروسه الجديده مش كدا
مريم / دى خديجه بنت الحج شاهين الجارحى اخت مغاورى
هند / اهلا و سهلا هند
خديجه / حمد الله على السلامه نورتى البلد الفتره اللى فاتت البلد كلها ما كانلاهاش سيره الا انتى و خصوصا السرايا عندنا
سماح / مش نتفرج احسن و لا ايه
خديجه / نتفرج
البنات يبصوا مغاورى بيلعب بعنف و مختار بيدافع
مغاورى / عروستك بتتفرج عليك
مختار / عقبالك
مختار يزق مغاورى يرجع لورا مغاورى يهجم بعنف و مختار لسه بيدافع و الاتنين قدام بعض و ملامحهم جد شاهين يدخل
شاهين / مغاورى .. مختار
الاتنين يقفوا عدل و مختار يروح يحضن شاهين و اتنين تانين يلعبوا
شاهين / على ما افتكرت فينك يا جدع
مغاورى / مشغول بعروسته
شاهين / جدع اهى دى الحاجات الحلوه اللى الواحد ينشغل بيها الدخله الخميس الجاى صحيح
ناصر يدخل
ناصر / تنورنا يا سيد الناس
شاهين / امال دا ابنى ده
شاهين يخبط على ضهر مختار و يطلع مسدس من جيبه و يضرب فى الهوا الرجاله كلها تضرب نار فى الهوا هند تتخض و تصرخ و تغطى ودانها
خديجه / ما تنشفي كدا يا عروسه مالك
هند / ممكن حد يتعور
خديجه / ما يبقاش قلبك رهيف كدا بكره تاخدى على الحاجات دى
سماح / ما افتكرش هند اصلها حساسه و رقيقه اوى
خديجه / و ماله تعالوا ندخل جوه مدام ضرب النار بيضايقها و اهو نوجب مع العروسه التانيه
البنات يدخلوا جوه و الرجاله تحت تروح تقعد فى جنب
ناصر / منور يا حج شاهين
شاهين / دا نورك يا حج ناصر
ناصر / ان شاء الله الفرحه الجايه عندنا و اللى بعدها عندنا برده ان شاء الله ههههههههههههههههه
شاهين / هههههههههههههههه و هو الفرح يبقي فرح لو ما كانش عندكوا يا حج
مغاورى / و احنا مش قد الفرح و لا ايه يا ابا
عباده / و احنا و انتوا ايه يا مغاورى
مغاورى / والله كنت فاكرنا واحد بس الفتره اللى فاتت خلت الواحد يعيد حساباته
ناصر / لا اله الا الله ايه الكلام ده يا مغاورى
مغاورى / فى انكوا ترفضونى بسبب العلام و تطلبوا خديجه من ان فى فرق فى العلام برده
مختار / ما اترفضتش عشان علامك
مغاورى / اترفضت عشان مش جاى على هواك مش كدا
شاهين / مغاورى
ناصر / معاش و لا كان اللى يرفضك يا مغاورى الفكره اننا قولنا البت صغيره و هتكمل علامها الاول و من هنا لوقتها ما حدش عارف هيحصل ايه
عباده / و بعدين يا سيدى انت عرضت و ردوا عليك و انا بعرض و خديجه ليها الحق تقبل او ترفض الحاجات دى ما تزعلش يا مغاورى كل شئ بالخناق الا الجواز بالاتفاق
شاهين / عين العقل يا عباده والله عين العقل
عباده / بص يا حج شاهين انا عارف ان علامى على قدى بس عقلى لوحده يوزن مليون شهاده
ناصر / اسمع يا حج شاهين العروسه فى بيتك و الراجل قدامك و الكلمه كلمتك و الشوره شورتك و زى ما عباده قال كل شئ بالخناق الا الجواز بالاتفاق و الحاجات دى لا فيها زعل و لا حرج
شاهين / والله يا حج ناصر انا كلمتها و قالت هتصلى استخاره هسالها تانى و ارد عليك
عباده / و احنا مش مستعجلين فى التأنى السلامه
مختار يقوم مغاورى يقوم وراه
مغاورى / على فين
مختار / بمشي رجلى
مغاورى / امشيها معاك و لا يضايقك
مختار / انا مش عدوك يا مغاورى
مغاورى / دا من بختك
مختار يبتسم و يبص الناحيه التانيه
مختار / من بختى
مغاورى / امال رفضتني ليه
مختار / هو انا اللى هتجوزك يا مغاورى !! انت ليه مصمم انى انا اللى رافضك ... و بعدين الحاجات دى قسمه و نصيب ما تقفلش دماغك على الحاجات دى انت اكبر من كدا
مغاورى / انا كبير غصب عن عين الطخين بس فى ناس مش شيفانى كدا
مختار / استغفر الله العظيم
مغاورى / هنلعب نار فى الفجريه
عباده يدخل
عباده / ايه يا رجاله قعدتنا مش على هواكوا و لا ايه سبتونا و واقفين لوحدكوا ليه
مغاورى / كنت بقوله يجي يلعب معانا نار
عباده / ما عدش ينفع خلاص مختار ساب السلاح
مغاورى / ايه !!!
مختار / عن اذنكوا
مختار يسيبهم و يمشي
مغاورى / انت بتقول ايه يا عباده
عباده / اللى سمعته عروسته طلبت مهرها انه يسيب السلاح و هو اختارها
مغاورى / والله كنت عارف ان الحرمه دى مش
عباده / ما تكررش غلطك يا مغاورى مش كل مره هنعديها
مغاورى / الراجل اللى حرمته تمشي كلامها عليه
عباده / الراجل بكلمته مش بسلاحه و مختار ادى كلمه للحج ابو عبد الله الله يرحمه انه هيحافظ على بنته و يتقى ربنا فيها و مختار من الرجاله اللى لما بتوعد بتنفذ حتى لو على رقبتها
عباده يمشي و مغاورى واقف منشكح
مغاورى / و لسه ياما هنشوف
......................
فى السرايا
العربيات بتركن و العيله بتنزل
عبد الله / لا طبعا مختلفه خالص عن عندنا بس ما تفرقش كتير عن التليفزيون
عباده / عقبال فرحك
عبد الله / هانت النتيجه قربت واخد بالك يا مختار
مختار يبتسم
مختار / تصبحوا على خير
مختار يسيبهم و يطلع اوضته و الكل عينه عليه و بعدين يبصوا لهند
انتصار / الواحد هيموت من التعب و بكره يوم طويل و ورانا تجهيزات ياما يلا نفوتكوا بعافيه تصبحوا على خير
انتصار تشد هند بالراحه و يدخلوا السرايا
عبد الله / هاجى معاكوا الفجر صح
عباده / تنور
عبد الله / تمام تصبح على خير
الكل يتفرق
......................
فى شقه يوسف
محمود قاعد بيتفرج على التليفزيون و اسراء رايحه جايه
محمود / كدا هيرجع بدرى يعني
اسراء / دا بدل ما تكلمه و تراضيه
محمود / مهواش صغير هيتمشي شويه و هيرجع
اسراء / احنا داخلين على الفجر
محمود / ما يمكن هيبات عند حد من صحابه
اسراء / و هو عادله صحاب يا كبدى قطعت و قطعت سيرتهم
محمود / ما عدش فيا حيل ادلع و ادادى بقيت شايل هم هناكل ايه بكره اللى عمره ما شلته
اسراء / ليه ان شاء الله سيب الكلام ده لحد تاني
محمود / المحل هياخد وقت و فلوس على ما يتفتح تانى و فى الوقت ده ما فيش فلوس تانيه هتخشلنا و لو وقفنا فى النص هنبقي زى اللى رقص على السلم لا اللى فوق شافوه و لا اللى تحت نضروه
اسراء / ان شاء الله خير ما تقلقش هتدبر ان شاء الله
محمود / انا خايف على يوسف انا لو هكلها بدقه مش هتفرق معايا لكن يوسف مش هيعرف يعيش لو محفظته مش مليانه لو هدومه مش مركات ساعاته و برفاناته و عيشته السبع نجوم
اسراء / ربنا يقدرك و تعوض اللى فات ما تشيلش هم
محمود / خايف عليه من بكره خايف ما يقدرش يكمل من بعدى خايف يضيع و يضيع اخواته البنات
اسراء / ما تقولش كدا يوسف راجل و سيد الرجاله كمان
محمود / على الله كلو على الله انا داخل افرد ضهرى مصدع و مش قادر
محمود يقوم و اسراء بتابعه
......................
فى اوضه هند
هند رايحه جايه فى الاوضه و الموبايل فى ايدها و شيري و ياسمينا نايمين تروح تقعد على كرسي و تنفخ تفتح الواتس عند مختار و تكتب " بحبك " و تبعتها تليفونها يرن مختار تبتسم و ترد
هند / الو
مختار / ما نمتيش و لا ايه
هند / مش عارفه انام
مختار / و لا انا
هند / مختار انت زعلان منى
مختار / سالتيني و قولت لا
هند / انت متغير
صمت
هند / للحظه شكيت انك مش هتختارنى
مختار / و اخترتك
هند / بتحبني يا مختار
مختار / اعمل ايه اكتر من كدا عشان اثبتلك
هند / انا بس عاوزه اسمعها محتاجه اطمن
مختار / بحبك اكتر من اى حاجه تانيه يا هند بحبك لدرجه انى بقيت مالسه البلد عشان ارضيكي
هند / ليه بتقول كدا
مختار / عشان دى الحقيقه مختار الزيني ساب السلاح عشان مراته منعته مختار حرمته بتمشيه مختار
هند / ما حصلش
مختار / هو انا ممنوع من تجاره السلاح و لا من شيل السلاح عموما يا هند اصل الرجاله هيلعبوا نار الفجر فقولت اخد الاذن الاول
هند تعيط
هند / انت مش ممنوع من حاجه و ما تتكلمش معايا بالطريقه دى ما اجرمتش انى بخاف عليك مختار انت وعدتنى
مختار / انتى بتعيطي ليه
هند / و انت مش سامع بتقول ايه
مختار / سمعتى انتى انا بيتقال عنى ايه
هند / انت وعدتنى
مختار / وعدتك بايه
هند / انك مش هتسمح لحاجه تفرق بينا
مختار / ما انتى كمان وعدتيني نفذتى وعدك
هند / انا اسفه
هند تقفل السكه و تعيط تليفونها يرن تكنسل و تقفله و تبص حواليها و تروح تلبس الاسدال و تفتح باب الاوضه و تنزل المكتب تلاقي المسدس فى باسكت الزباله تمسكه و الدموع عماله تنزل من عنيها تمسح دموعها و تطلع تخبط على اوضه مختار ما حدش يفتح تفتح الباب تلاقي الاوضه فاضيه تستغرب مريم تفتح الباب تلاقي هند تتخض
مريم / هند !!! بتعملى ايه هنا يا هند ؟
هند تبصلها
هند / ما بعملش
مريم / ايه السلاح ده
هند / ما فيش
هند تنزل
مريم / طب رايحه فين السعادى
هند ما تردش و تخرج من السرايا تروح الجنينه الورانيه و تقعد على المرجيحه و تحط السلاح جنبها و تعيط ثوانى و المرجيحه تتهز بيها تبص وراها تلاقي مختار بيمرجحها تمسح دموعها
مختار / طلعتلك الاوضه ما لقتكيش اما اتصل بخالتى اطمنها عليكى
مختار يطلع التليفون
مختار / السلام عليكم ... ايوه لقيتها بتتمرجح فى الجنينه ... معاكى
مختار يناولها التليفون
هند / ايوه يا ماما ... كويسه مفيش حاجه .. زهقت شويه عادى يعني ... تمام ... تمام ... سلام
هند تقفل و تدى مختار الموبايل يروح يشيل السلاح و يقعد و يمرجح برجليه و يدى السلاح لهند
هند / جتلك اوضتك عشان اديهولك ما لقيتكش
مختار / اعمل بيه ايه
هند / احنا هنتجوز الخميس ... دا كمان كام يوم يا مختار مش بعيد يعني
مختار / الحمد لله
هند / هنعيش فى النكد ده العمر كله دا مش طبعك انت بتعمل كدا قاصد بتضغط عليا عشان ارجع فى قرارى خد السلاح اهو خده
مختار / بس انا اخترتك انتى
هند / لحد امتى ... فاكر لما اتكلموا عنك فى الكليه فاكر لما نشروا صورك مع البت اياها فاكر كنت هادى ازاى و مش فارق معاك كلام الناس
مختار / انا اسف انا بس مرهق و مضغوط مش سهله و الله ما سهله
هند / اللى انت عاوزه اعمله
مختار / عاوزك انتى .. السلاح ده هيفضل معاكى انتى لحد ما تاخدى على البلد و تفهميها و ان حصل و لا ما حصلش مش هشيله الا بموافقتك و رضاكي
هند / انا بس بخاف عليك من حقى اخاف عليك من حقى
هند تعيط
مختار / مش كان خير البر عاجله و اتجوزنا النهرده و خلصنا و خزينا الشيطان ده عمال يوزنى و يقولى طبطب عليها و احضنها و امسح دموعها هتدخليني النار يا منيله
هند تبصله و ما تقدرش تمسك نفسها و تضحك
مختار / لو رجع بيا الزمن هختارك و لو بعد مليون سنه سالتيني هتعمل ايه لو رجع بيك الزمن هقولك هختارك
هند مبتسمه
مختار / قومى نامى و ارتاحى و انسي اللى حصل مع انى عارفكوا قلبكوا اسود و ما بتنسوش كلو بيتخزن
هند / يا سلام
مختار / يلا يلا تعالى اوصلك
هند تقوم
مختار / هند
هند تبصله
مختار / السلاح
هند / هو اللعب ده فيه خطوه عليك او على عبد الله
مختار / ان شاء الله لا
هند / لو ده هيبسطك روح اللعب معاهم
مختار / بتديني الاذن يعني
هند / بس بقي يا مختار
هند تسيب مختار و تمشي يجرى وراها
مختار / بهزر معاكى فى ايه
هند تديله ضهرها يلف حواليها
هند / هزارك سخيف
مختار / هى حصلت ماشي ماشي عشان لوحدينا بس
هند تبصله و يبتسموا لبعض
هند / انا بحبك
مختار / و انا كان دهولنى كدا غير انى متنيل بحبك
هند تلف حوالين نفسها و هى رافعه اديها لفوق و مختار بيضحك
هند / مختار الزيني يا جماعه و رومانسيه مختار الزيني
مختار / ان كان عاجبك
هند / عاجبنى و مفيش غيره بيعجبنى
مختار / يا سعدك يا مختار
هند / هههههههههههههههههه
امين من شباك اوضته / مهو يا نراعى ان فى عزاب هنا يا تجوزونى
هند و مختار يبصوا لفوق كل شبابيك الاوض مفتحه و الكل بيبص عليهم هند تتكسف
عباده من شباكه لامين / انت هتفضل حلوف لحد امتى يا جحش انت خش ياض بدل ما اجيلك ... احنا اسفين يا جماعه استمروا استمروا
مختار / نستمر ايه بقي دا الحفله ما شاء الله اهى ايه يا جماعه هو الفرح ما فرهدكوش و لا ايه ... ايه اللى مصحيكوا
انتصار / بنطمن عليكوا الحق علينا
مختار / لا ازاى ما تتفضلوا معانا
عباده / مره تانيه الفيلم خلص
مختار / ليك يوم يا حبيبي ليك يوم ... يلا يا اختى ادى اللى بناخده من وراكوا
هند / مختار بس
مختار و هند يلفوا يدخلوا السرايا انتصار تزرغط
ناصر / بس يا وليه الناس نايمين
انتصار / يا خويا بقي طلعت و خلاص
.......................
فى المحل تانى يوم
محمود واقف مع مهندس
محمود / لا لا لا انا عاوزك تلم الليله باقل التكاليف و فى اسرع وقت دا انت لو ينفع تديها وش بياض على الناشف كدا اديها و خليني افتح من بكره اليوم بيخسرنى جامد
الباشمهندس / ايوه يا حج بس
محمود / يا هندسه انا جاى صريح معاك الميزانيه تعبانه على الاخر و المحل كبير و هيحتاج فلوس بالكوم عشان يتفرش فابوس ايدك انا فى عرض كل جنيه
الباشمهندس / تمام يا حج هحاول اعمل اللى اقدر عليه
محمود / ربنا يباركلك
محمود يشوف حامد جاى من بعيد
محمود / عن اذنك يا باشمهندس شوف شغلك
محمود يروح لحامد
محمود / ازيك عملت ايه مع المحامى
حامد / و لا اى بتنجان القانون لا يحمى المغفلين حتى وصولات الامانه اللى معانا نبلها و نشرب ميتها مكتوبه غلط
محمود / طب و بعدين
حامد / هعمل ايه يعني اديني بدور عليه فى كل السكك اللى اعرفها بس لحد ما الاقيه هعمل ايه يعني هاكل طوب انا و عيالى و اديك شايف الواد اترفد من شغله
محمود / و ممدوح كمان بس ما تشيلش هم ان شاء الله لما المحل يتفتح يجوا يشتغلوا معايا لحد ما ربنا يكرمهم بشغلانه كويسه
حامد / طب و انا و البنات و ام البنات انت عارف ان مرتب الحكومه لا بيشفع و لا بينفع و انى كنت داخل فى اخر عمليه دى بتقلى كله و اداينت لطوب الارض و جمعيات بالهبل
محمود / والله يا حامد زى ما انت شايف المحل على البلاطه و انا لسه النهرده بايع شقه يوسف بالخساره عشان اوضبه و افرشه و لسه حالا قايل للمهندس يلمه باقل القليل عشان مفيش فلوس و لو المحل ما اتفتحش كلنا هنعض فى الارض العمليه اللى فاتت ما عورتكش لوحدك كلنا اتلطينا معاك
حامد / يعني مش هتقدر تساعدنى
محمود / لو تصبر لما المحل يتفتح اديك عيني بس انا ما بعتش شقه ابنى و مغضبه منى و مبيته بره البيت من امبارح عشان اديك الفلوس و يبقي كانك يا ابو زيد ما غزيت و لا انت ايه رايك دا انا حتى عارض عربيتي و عربيه يوسف للبيع عشان تسند معانا فى المصاريف باى حاجه
حامد / طب و العمل
محمود / العمل عمل ربنا هنصبر فى ايدنا ايه تانى
حامد / ان كنت انا هصبر عليك الناس مش هتصبر عليا و انا مش حمل بهدله
محمود / انا قولتلك اللى عندى و اديك شايف الظروف غير كدا انت عارف انا عمرى ما اتاخر عنكوا
حامد / تمام ... ما دام انت شايف كدا انا هشوف مشترى لنصيبي
.........................
أنت تقرأ
البر التانى بقلم / لولو_محمد (كامله )
Aksiشاب من الصعيد يعيش فى سلام بين عالمين حتى يقع فى حب يتسبب في شتات عالميه اكشن غموض دراما رومانسي
