البر التانى بقلم / لولو_محمد (كامله )

الحلقه ٤٨

((((((( البر التانى ))))))))
#لولو_محمد
الحلقه ٤٨
شيري / طب اسهرى زى ما تحبي و تعالى باتى هنا انا مش هنام
هند / بيقولوا هيسهروا للصبح يا ماما حرام تسهرى كل ده
شيري / اللى يريحك انا كدا كدا نومى خفيف
هند / تمام
هند تلبس طرحتها و تروح السرايا تقابل فاطمه
فاطمه / الله انتى ما نمتيش يا دودو
هند / هسهر مع سماح و مريم فى اوضه مريم
فاطمه / والله ... تعرفى ان اوضه مريم لزقه فى اوضه مختار
هند الابتسامه تروح من وشها
فاطمه / فى مصر اوضتك لزق فى اوضه مختار و فى السرايا اوضتك لزق فى اوضه مختار و هانت كلها حاجه بسيطه و الحيطه اللى بينكوا تتهد
هند / ان شاء الله عن اذن حضرتك
فاطمه / تعرفى اوضه مريم فين و لا اجى اوصلك لتدخلى اوضه غلط و لا حاجه
......................
هند / عن اذن حضرتك
هند تسيبها و تطلع و هى بتغلى و فاطمه متبعاها ببرود تطلع وراها مختار يفتح باب اوضه ناصر و عباده يطلع وراه و يقفل الباب هند تعدى ما تعبرهمش و تروح تفتح باب اوضه مريم و تدخل
عباده / انتوا قافشين و لا ايه
مختار / مش على حد علمي
فاطمه تطلع
فاطمه / الله انتوا واقفين هنا ليه فى حاجه و لا ايه
مختار / عن اذنكوا
مختار ينزل  و فاطمه متبعاه ترجع تبص لعباده
فاطمه / هو فى حاجه يا عباده
عباده /حاجة زى ايه يعني
فاطمه / مفيش تصبح على خير
عباده / و انتى من اهله
فاطمه تسيب عباده و تدخل اوضتها تلاقي شاكر قاعد على الكرسي و مكشر و باصصلها تروح تقف قدام المرايه و تقلع الطرحه و تسيب شعرها و تسرحه
فاطمه / الله انت لسه صاحي يا اخويا
شاكر / مستنيكي
فاطمه/ حقك عليا كنت بشطب المطبخ انت عارف البنات ملخومين مع هند و ما يعتمدش عليهم
شاكر / اقعدى عاوزك
فاطمه / هستاذنك اخش الحمام لحسن على اخرى
شاكر يشاورلها تدخل تجرى على الحمام تفتح الدش على الميه السخنه و تروح تحط روج و بعديه تجيب طبق بلاستيك من تحت الحوض و تحطه فى البانيو و تحط كحل و روجاجو و برفيوم و بعدين تقفل الحنفيه و تحط ملح باديكير و تاخد الفوطه على كتفها و الطبق و تطلع تحطه فى الارض تحت رجل شاكر
شاكر / دا وقته ده
فاطمه تشمر الجلبيه لفوق و تربع و تقلع شاكر الجزمه و الشراب و تحطها فى المايه
فاطمه / ما انا تحت رجلك اهو و سمعاك انا بس قولت شكلك تعبان اما اخف عنك شويه الله يعينك من الوقفه و تعب اللف على الغيطان طول النهار و بعدين انت عارف انى بحب ادلعك و اهتم بيك
فاطمه تدعك لشاكر رجليه
شاكر / انت قولتى لسماح ان مغاورى متقدم لمريم
فاطمه / انا يا حج !!! اخص عليك ازاى تقول كدا
فاطمه تقوم تقف
فاطمه/ انا هروح دلوقت اجبلك البت سماح من شعرها تقولك عرفت منين
شاكر / ما لهاش لزمه الشوشره سماح مع هند بعدين ابقي اساليها بينك و بينها
فاطمه / طب والله دى عين الوليه ام سعيد
فاطمه تروح تفتح الدولاب و تطلع كيس فيه قمصان نوم و تفردها و توريها لشاكر و تحطها فى حجره
فاطمه / معرفش ايه اللى جابها مع ام منصور و عينها نقرانى و انا بنقيلك الحاجات الحلوه دى ... مستكترينك عليا يا خويا
فاطمه توطى و تسند بايديها على رجلين شاكر و تقرب اوى و تبص فى عنيه
فاطمه / تحب اللبسلك انهى واحد
شاكر / شوفيلى حاجه على زوقك
فاطمه / هههههههههههههههههههههههه
.....................
فى اوضه مريم
مريم حاطه اللاب على رجلها و عماله تظبط لسته الاغانى و سماح بتطلع كيسه سوده من الدولاب فيها صاجات و حزام شخاليل
هند / ايه الحاجات دى
مريم / دى حاجات ضربتها من جهاز اخواتى و عيناها هنا لزوم الصياعه
سماح / انتى ما جبتيش بدله رقص فى جهازك
هند/ هههههههههههه لا ما جبتش انا لسه ما جبتش غير شويه لبس بيتي
سماح / جبتى قمصان نوم ... فرجيني فرجيني
هند / فى الشنط جوه فى اوضه مختار مش هقدر اقوله هاتهم
سماح تبص لمريم و يضحكوا
هند / فى ايه
سماح / ما فيش
هند / لا فى قولى
سماح / انتى سايبه الحاجات دى فى اوضه مختار عادى كدا طب هو عارف اللى فى الشنط
هند / انا مش هرد عليكوا
سماح / ما تبقيش افوشه بقي بنهزر معاكى
هند / هو اللى شاريهوملى اصلا
سماح / يلاهوى بتهزرى
هند / ممكن نغير الموضوع و نرقص و لا احنا جايين نرغى
سماح / يا اختى فكيها انتى شكلك لسه قافشه من حوار مغاورى امال لو ما كانش خدك فسحك
هند / شغلى يا مريم
مريم تشغل الاغانى و التلت بنات يقوموا يرقصوا و سماح تروح تعلى الصوت و مريم تربط لهند الحزام
......................
فى الجنينه
مختار يطلع من السرايا يلاقي عبد الله قاعد لوحده فى جنب يروح يقعد جنبه
مختار / اللى شاغل عقلك و مطير النوم من عينك
عبد الله يبصله و يبتسم
عبد الله / قال يعني انت اللى مقطعها شخير
مختار / و هو انا هشوف نوم النهرده البنات عاملين حفله صباحى فى الاوضه اللى جنبي و هيصحوا البيت كلو دلوقت
عبد الله يبتسم مختار ياخده تحت باطه عبد الله يبصله
مختار / شكل فسحتك مع عباده ما بسطتكش
عبد الله / مرزق هو عباده حكالك
مختار / قصدك مغاورى ... الراجل معزور كرامته ناقحه عليه
عبد الله / اياكش يفطس
مختار / هههههههههههههههههه
عبد الله / انت بتضحك
مختار / اصلها امنيه شعب بص باختصار كدا انا و الكائن ده من يوم ما وعينا على الدنيا و احنا مش طايقين بعض و بمناسبه و من غير بنتخانق تقوم هند اول ما تقابله تشتمه
عبد الله / هههههههههههههههههه
مختار / شوفت بقي
عبد الله / هنروح بكره
مختار / تحب تخليك
عبد الله / ما عدتش عارف انا قولت ههرب من اللى فى مصر
مختار / مفيش مكان سالك و اتعلم تواجه ما تهربش
عبد الله يهز راسه و بعدين يفتكر حاجه مهمه
عبد الله / لا بس النهرده بصراحه كنت فرحان اوى عارف ابن الكلب ده رفع المسدس عليا فجاه لقيت الكل بيدافع عنى و عباده بيقوله دا اخونا و اخته مننا بصراحه طلعوا رجاله اوى انا قولت هيجروا
مختار / ولاد الزيني يجروا !!! هههههههههههههههههه يا عم لسه بقولك واجه ما تهربش
عبد الله / بس هم كلهم بيشيلوا سلاح كدا
مختار / تعرف انا كنت بتكلم مع اختك فى الحوار ده النهرده
عبد الله / حوار ايه
مختار / الفرق بين هنا و مصر فى حوار السلاح ده
عبد الله / مستحيل تكون الاسلحه دى كلها مرخصه دا امين ما كملش تمنتاشر و شايل سلاح هو ده قانونى ؟
مختار / القانون هنا مش زى مصر
عبد الله / واضح
مختار يبص لعبد الله و يبتسم
مختار / بجد !!!
عبد الله / بس اللى انا مش فاهمه ليه القانون مختلف معقوله الحكومه مش عارفه تسيطر على الصعيد
مختار / ثقافه شعب
عبد الله / بس كدا ممكن حد يتاذى
مختار / لا مهو مش سبهلله يعني فى برده قانون يعني اللى بيغلط بيتعاقب مهما كان سنه
عبد الله / يعني اشيل عيل سلاح و ارجع اعاقبه لما يستخدمه غلط
مختار / سن الطفوله هنا برده مش زى عندكوا احنا طبيعه
حياتنا بتكبرنا اسرع يعني عندنا فى رجاله بتتجوز ١٨ سنه عادى و يشتغل و يفتح بيت عادى
عبد الله / بس رسمى بيمشى عليه القانون العادى فى الجرايم و الخناقات و كدا
مختار / ايوه دا لو الحوار وصل انه يبقي رسمى و حكومه و كدا بس فى حاجات عندنا بتتحل بالقعدات العرفيه
عبد الله / فكره حلوه اوى دى
مختار / المهم نرجع لحوار السلاح
عبد الله / ماله
مختار / مع ان فى ناس كتير شيلاه بس برده مش اى حد ممكن يشيله يعنى بيتباع لناس معروفه و معروف هتستخدمه فى ايه انما لو حد غريب او ارهابى مثلا اكيد لا
عبد الله / والله رجاله
مختار / انت بجد دا رايك !! دا عكس راى هند خالص هند شايفه ان الغلط غلط ما ينفعش نبسطه او نجمله
عبد الله / كل مكان و له عاداته و ثقافته مش هينفع نغيرها لاننا بكدا بناخد روح المكان منه يعني
مختار يبتسم
مختار / انت عارف ان السلاح ده بما ان فى سلاح كتير مش مرخص يعني فى سوق سوده يعني اكيد بيدخل بطريقه غير شرعيه
عبد الله / صعبه دى بيعملوها ازاى دى
مختار / عارف مامتك لما بتسيبك تسرق البطاطس المحمره من المطبخ
عبد الله / هههههههههههههههه ايوه بس لما بتقفشنى بتزعق
مختار / اهو الحكومه كدا ما دام ما اتمسكتش اعمل اللى انت عاوزه تجار السلاح بيشوفوا شغلهم و الحكومه بتشوف شغلها و اخر اليوم حبايب دا كمان لو ظابط اتزنق فى ترقيه ممكن يظبطوله ضبطيه حبى
عبد الله / عالم دماغ اقسم بالله
مختار / لسه نظرتك فى الصعيد حلوه
عبد الله / انت معاك سلاح
مختار / معايا
عبد الله / ينفع تجبلى واحد
مختار / ههههههههههههههههه لما تتمكن منه هجبلك واحد
عبد الله / انا اتحسنت كتير فى النشان اسال عباده
مختار / تعرف تفكه و تركبه و تنضفه
عبد الله يبصله باستغراب
مختار / تعال هعلمك
مختار ياخد عبد الله تحت باطه و يدخلوا السرايا
.......................
فى اوضه فاطمه
شاكر نايم بيشخر و فاطمه نايمه جنبه مضايقه و تبص عليه بحزن و صوت الاغانى مسمع فى الاوضه فاطمه  تتقلب و تغطى ودانها و تنطر الغطا و تقوم تلبس العبايه شاكر يحس بيها يقوم يقعد
شاكر / رايحه فين يا فاطمه
فاطمه / الفجر قرب يدن و دول ما فيش دم خالص معليين الاغانى و لا كان فى غيرهم فى البيت انا مش عارفه انام
شاكر يفتح الدرج و يطلع كيس قطن
شاكر / حطى قطن فى ودانك و انتى تعرفى تنامى
فاطمه / يعني انت عاجبك عمايلهم دى هيصحوا يصلوا الفجر ازاى
شاكر / دى مشكلتهم هم اللى ما تقومش معاكى تصلى الفجر عاقبيها لكن دلوقت سبيهم ينبسطوا البت ما بتجيش كل يوم
فاطمه / يادى البت اللى كلكوا عاملينلها حساب
فاطمه تروح تقعد على السرير و تربع و تحط ايدها على خدها شاكر يلف ايده حوالين وسطها و ياخدها فى حضنه تنام و تحط راسها فى حضنه
شاكر / هدى نفسك ما فيش حاجه تستاهل
فاطمه / اللى تشوفه
فاطمه تغمض عينها و تكتم زعلها جواها و تفتكر
/////////////
بيت طين فقير جدا
عيله ١٤ سنه بتمسح الارض و تمسح عرقها باب الشقه يتفتح و تدخل ست
الست / انتى لسه ما خلصتيش يا اللى تنشكى فى قلبك
فاطمه / هخلص اهو اخر حاجه والله يا مراه ابويا
الست تروح تقعد
الست / بيضالك فى القفص هتعيشي فى السرايا
فاطمه تبصها
الست / خلصى تنضيف يا بت و انجرى على المطبخ الليله جيلنا ضيوف و عاوزين نعملهم ضيافه حلوه
فاطمه / مين جاى يا مراه ابويا و ايه حكايه السرايا دى
الست / بيدوروا لسى شاكر الزيني على عروسه بعد ما مراته ماتت و بالعافيه اقنعتهم بيكي يلا خليكي تغورى من وشي و ارتاح من قرفك كان يوم اسود لما اتجوزت ابوكى و بلانى بيكي
فاطمه تبصلها
الست / بتبصيلى كدا ليه يا بت الجزمه انجرى خلصى اللى وراكى
الست تقوم تزق فاطمه توقعها و هى بتدخل اوضتها و فاطمه تكمل تنضيف
...................
فى السرايا
فاطمه قاعده قدام المرايه بتسرح شعرها باب الاوضه يخبط
فاطمه / مين
الست تفتح الباب و تدخل فاطمه تبصلها باستغراب
فاطمه / انتى ازاى تدخلى من غير ما اذنلك
الست / انتى هتنسي نفسك و لا ايه يا بت يا فاطمه
فاطمه / الست فاطمه اوعى انتى تنسي نفسك
الست / هى حصلت يا بت
فاطمه / بقولك ايه يا مراه ابويا خافى على الحسنه اللى بتاخديها من جوزى
الست / اما قليله الاصل بصحيح ما تمرش فيكي يا بت اللى عملته عشانك
فاطمه  / لا والله فاكره كل اللى عملتيه فيا من يوم ما دخلتى بيتنا و خربتى على امى و موتيها بقهرتها و داينتى ابويا لطوب الارض و موتيه بهمه و قعدتيني من المدرسه و شغلتيني خدامه فى البيوت فاكره كل مره ايدك اتمدت عليا فيها و كل مره شتمتيني فيها انا و امى
الست / انا اللى لبستك و نضفتك و عملت منك ست
فاطمه  / بفلوس جوزى
الست / انا اللى جوزتهولك جوزك ده
فاطمه  / و قبضتي التمن و لسه بتقبضي
الست / اتفو عليكي واطيه عديمه الربايه
فاطمه  تبتسم و ترمى نفسها فى الارض و تصرخ
سماح / ااااااه اللحقونى عاوزه تسقطنى اااه اللحقونى ااااااه
الست تحاول تسكت فاطمه
الست / اسكتى يا بت المجنونه اسكتى هتوديني فى داهيه اسكتى
فاطمه  / حد يلحقنى
الباب يتفتح و ستات كتير تدخل و شاكر و هو فى الاربعينات بصحته لسه ياخد فاطمه فى حضنه و هى بتعيط و تصرخ
فاطمه  / حرام عليكي دا انا كنت فكراكى هتفرحيلى
شاكر / طلعوها بره و نادوا الحكيم من الوحده الصحيه بسرعه
فاطمه  / همووووت مش قادره اااااه مش قادره
شاكر يشيلها
شاكر / اوعوا من وشي
شاكر ينزل يجرى بيها و الست واقفه مصدومه
//////////////////////
فاطمه  تمسح دموعها و تلف تحط وشها فى حضن شاكر
فاطمه / انت احلى حاجه حصلتلى فى حياتي
شاكر يبوس راسها و يناموا
......................
فى اوضه مريم
الاغانى شغاله و البنات بترقص هند ترمى نفسها على السرير
هند / مش قادره اخد نفسي
سماح و مريم يناموا جنبها
سماح / انا انبسطت اوى
مريم / امتى تيجي تعيشي معانا علاطول بقي
سماح / و هى لما هتيجي تعيش هنا هترقصلنا احنا برده ههههههههههه
مريم / هههههههههههههه اما لو امك سمعتك
سماح / يا اختى بقي ما تقفلنيش
الاغنيه تتغير و تشتغل اغنيه هاديه
مريم / انا بحب الاغنيه دى اوى
هند / و انا كمان
التلت بنات يسمعوا الاغنيه و النوم يكبس عليهم و يناموا على وضعهم
.....................
فى المكتب
عبد الله بيركب المسدس ببطء
عبد الله / مفيش فايده باين
مختار / ليه يا عم بتتحسن على فكره
عبد الله / انت سريع اوى
مختار / الوقت اللى انت كنت بتلعب بيه كوره فى الشارع انا كنت بفك السلاح و اركبه و انا مغمض فطبيعي ابقي اسرع منك
الباب يتفتح و عباده يدخل
عباده / بتعملوا ايه هنا
مختار / انت ما نمتش
عباده / يا عم و هو المروستان اللى فوق ينيم حد ... ايه ده بتتعلم تركب السلاح
عبد الله / السهل الممتنع
عباده / يا عم دى لعبه عيال هات اوريك
عباده ياخد المسدس و يركبه بسرعه و يفكه و يركبه تانى و يفكه و يركبه و يفكه و يديه لعبد الله
عبد الله / انت لو قاصد تعجزنى مش هتعمل كدا
مختار / ههههههههههههههههههههه و احنا قدك لم كنا نحب نلعب كانوا يغموا عنينا و يشوفوا مين بيركب اسرع و لعلمك انا كنت بكسب
عباده / مش دايما على فكره
عبد الله يركبه و ينجح
عبد الله / اوعى لا مش مصدق نفسي مش مصدق نفسي
مختار / ههههههههههههههههه فكه و ركبه تانى بقي
عبد الله يرفع حاجبه و عباده بيضحك
.......................
فى اوضه مريم الفجر
فاطمه تفتح الباب تلاقيهم نايمين تروح تطفى الاغانى و تقرب منهم و تبصلهم و تتنهد و تغطيهم انتصار تدخل
انتصار / بتعملى ايه هنا
فاطمه / جبني اللى جابك سايبين الاغانى و نايمين مش عارفه ازاى قولت اغطيهم
انتصار تروح تصحيهم
انتصار / الفجر يا بنات الصلاه
فاطمه/ سبيهم يناموا شويه شكلهم خلصان خالص
انتصار / يصلوا و يكملوا نوم ... يا بنات الفجر يا بنات ... الفجر ما تخلونيش اضرب قوموا
مريم تصحى
انتصار / صحيهم و يلا عشان الصلاه
مريم تهز راسها و تدعك عنيها انتصار تروح اوضه مختار و تخبط مفيش حد تخبط تانى تفتح الباب بالراحه مفيش حد فاطمه تطلع من اوضه مريم
فاطمه / البنات صحيوا هيغيروا هدومهم و يقوموا يروحوا الحمام ... الله امال مختار فين
انتصار / ما اعرفش سريره متروق شكله ما نمش هنا هنزل ابص على المطبخ
فاطمه / هصحى باقي البيت و احصلك
انتصار تهز راسها و تنزل و فاطمه تدخل تلاقي هند لبست العبايه و بتعدل الطرحه
فاطمه / صلوا و ارجعوا كملوا نوم لو عاوزه
هند / لا خلاص صحيت هبقي اشرب قهوه و لا نسكافيه و لا اى حاجه
فاطمه / كلو موجود فى المطبخ تحت ... بسرعه شويه يا بنات
فاطمه تقفل الباب و تروح اوضه عباده مش موجود
فاطمه / الله انت كمان !!! داهيه ليكون فى حاجه
فاطمه تقفل الباب و تنزل تلاقي باب المكتب مفتوح و انتصار واقفه مبتسمه تروح تشوف فى ايه عباده و مختار كل واحد قدامه رشاش مفكوك و مغمى عينه و بيركبه بسرعه و عبد الله بيحكم بينهم عباده يكسب فاطمه تبتسم عباده يفك عينه
عبد الله / و الفائز هووووووووا .... عبااااااده .... احم
عبد الله يشوف انتصار و سماح يقوم يقف مختار يفك عينه
عباده / قولتلك هكسبك
مختار / اخر مره مسكت رشاش امتى ... يلا سبتك مره تفرح
انتصار / الصلاه يا رجاله
مختار / صباح الخير ... مستنينها ... الاغانى سكتت يعني
فاطمه / سبوها شغاله و ناموا
عباده / ان كيدهن عظيم يقلقونا و يناموا
فاطمه / هروح اجهز الفطار
عباده / لو كبايه قهوه من ايديكى الحلوه تبقي قشطه
فاطمه / مفيش قهوه على الريق تتعب بطنك
فاطمه تمشي هى و انتصار تقفل الباب عباده و مختار و عبد الله يقعدوا
عبد الله / انا كنت بشوف الحاجات دى فى الافلام الاكشن و بفتكرها فاست فوروارد بس انتوا طلعتوا جامدين
عباده / انا اجمد منه
مختار / ابتدينا الذل هيفضل ماسكهالى بقي لحد ما اعلم عليه فى حاجه تانيه كام مره كسبتك قبل كدا
عباده / اللى فات مات احنا ولاد النهرده
مختار / طب قوموا نتوضى قبل ما يصحوا و الحمام يتزحم قوموا قوموا
التلاته يقوموا و يطلعوا بره المكتب
عبد الله / هو انتوا مش هتعينوا الحاجات اللى جوه دى لحد من العيال يلعب فيها
مختار / دا مكتب الكبير العيال ما بتدخلوش ما تخافش
هند تنزل من فوق بتدعك فى عنيها مختار يشوفها و يبتسم
مختار / صباح الخير
هند تعدى من غير ما تبصلهم
هند / صباح النور
التلاته يستغربوا و يبصوا لبعض
.......................
فى شقه محمود
اسراء / ما تنساش تاخد منهم الوصولات
محمود / قولتيلى مليون مره فى ايه
اسراء / بفكرك الحق عليا
محمود / فاكر كتر خيرك
اسراء / ما تشوف حوار العربيات بتاع حامد ده
محمود / لا
اسراء / حامد اروبه
محمود / قولت لا انا نازل خشي صحي يوسف و حضريله يفطر
اسراء / حاضر و اعمل حسابك انى عازمه اخواتى على الغدى يوسف ما بيكلمهمش و زعلان منهم و الوضع ده ما ينفعش عاوزين نصالحهم على بعض
محمود / لما يبقي يصالحنا احنا الاول نبقي نصالحه على خيلانه انا نازل
محمود ينزل و اسراء واقفه تنفخ تقفل الباب و تروح اوضه يوسف نايم
.....................
فى المطبخ
فاطمه بتعلق على قدره فول على البوتجاز و انتصار بتقلى طعميه هند تدخل
هند / صباح الخير
انتصار / صباح الفل حالا الفطار هيكون جاهز
هند / ما انا جايه اساعد
هند تفتح فى التقفيل و تدور على حله صغيره
انتصار / يا حبيبتي ارتاحى
فاطمه / سبيها هى ضيفه و لا ايه
........................................