البر التانى بقلم / لولو_محمد (كامله )

الحلقه ١٥٧

((((((( البر التانى ))))))))
#لولو_محمد
الحلقه ١٥٧
سمر نايمه فى حضن رشيد و هو عمال يلعب فى شعرها و هى سرحانه 
سمر / تصدق ان عندك حق
رشيد / فى انهى جزئيه بالتحديد
سمر / انى نكد
رشيد / هو بغض النظر انها واضحه وضوح الشمس بس يا ترى ايه اللى لفت نظرك للموضوع هل ده له علاقه انك بتفتحى من الاساس موضوع زى ده و احنا فى وضع زى ده
رشيد يبصلها يلاقيها بتعيط ياخدها فى حضنه اوى
رشيد / ليه كل ده طيب
سمر / خايفه عليك اوى
رشيد / من ايه
..........................
سمر / خايفه اخسرك خايفه افرح و اصدق اننا خلاص بقينا لبعض اصحي الاقينى لوحدى تانى خايفه الاقى سبب اتعلق بالدنيا و يروح منى تانى
رشيد / والله يا سمر كان نفسي اقولك اى حاجه تانيه بس انا مش ناوى اغشك ... انا كدا كدا ميت النهرده بكره بعد ديشيليون سنه ما حدش بيخلد فيها يا بنتى ... مت فى سريرى مت فى حادثه كدا كدا النهايه واحده ده هيقف
رشيد يمسك ايد سمر و يحطها على قلبه
رشيد / و كل ما عرفتى الحقيقه دى بدرى كل ما عرفتى قيمه الدقات دى و عملتى كل اللى تقدرى عليه عشان تستمتعى بكل دقه فيها انتى عارفه حتى الناس المتوصلين بجهاز القلب اللى بيعمل تيت تيت ده
سمر تبصله باستغراب
رشيد / انا شخصيا ممكن ارقص على التكات دى
رشيد يطرقع بصوابعه مع الكلام
رشيد / تيت تيت تيت تيت تيت فيها رتم ما يقدروش غير اللى عارف ان لما القلب بيقف بيعمل تييييييييييييييييت واحده كبيره ما بتخلصش مزعج كدا و ما فيهوش حياه
سمر / انت بتقول ايه
رشيد / بقول كلنا هنموت و كلنا لينا اجل و معاد ما حدش بيتاخر عنه فما دام كدا كدا النهايه واحده هتفرق فى ايه
سمر / تفرق انك ما عدتش لوحدك انا بقيت متعلقه فيك و افرض حصل بيبي هتسيبه لمين فى الغابه دى
رشيد / هسيبه للى خلقه هو احن عليه من الكل و انا كنت اتسابت لمين غيره انتى اتسابتى لمين غيره هو انا و انتى مين اللى جمعنا ببعض ايه اللى نزلنى من اوضتى فى اللحظه اللى بيدوكى فيها الحبايه مش ربنا مش نصيبنا ايه اللى خلانى دون عن الناس كلها احبك انتى مش قدرى و نصيبي ربنا يا سمر
سمر / ما كنتش متخيله انك تقولى الكلام ده
رشيد يبتسم بسخريه
سمر / بس ربنا قال لا تلقوا بايديكم الى التهلكه
رشيد / ربنا قال حاجات كتير مش حافظها للاسف بس انا متاكد انه ما قالش انك تبقي قادر تساعد غيرك و ما تساعدوش هرجع ابن اخوكى و اخلص كام حوار كدا و لو ربنا كاتبلنا عمر بعدها اوعدك نعمل اللى انتى عوزاه و نروح البلد اللى انتى عوزاها تمام ؟
سمر / تمام
رشيد / لا مش تمام يا سمر مش تمام عشان انا ما سبتش الاكل اللى بره يبرد عشان يتنكد عليا انا مستاء و عندى لوعه
رشيد يقوم و يروح ناحيه الباب و يفتحه سم تقعد على ركبها
سمر / ههههههههههههههههههه اسمها مشتاق
رشيد / انتى هتعدلى عليا كمان و لا ايه دا انتة هتتقطعى النهرده
رشيد يرزع الباب و يرجعلها يزقها تنام و هى بتضحك
..........................
على السطوح فى سرايا الزنايته
مختار قاعد بيكتب حاجه على الموبايل هند تدخل
هند/ يعني جيت و ما عدتش عليا
مختار يسيب الموبايل و يبصلها و يقوم يقف
هند / و لا سالت عنى و لا عبرتنى و طلعت استخبيت هنا و عمال تلعب فى الموبايل ... اللى وخداك مننا يا مختار بيه
مختار / و هى مين دى اللى تقدر انتى مش شايفه نفسك و لا ايه
هند تبتسم و تكتمها
مختار / و بعدين انتى تغيرى عليا ازاى دا البنات هم اللى المفروض يغيروا منك
هند تغطى وشها بايدها
مختار / عجبتك صح
هند تبصله و هى بتحاول تكتم الضحك
هند / طبعا ... بس انا بيتهيالى سمعت الكلام ده قبل كدا يا ترى مين يا ترى مين يا بت يا دودو يا ترى مين
مختار / دى اكيد ديجافو
هند / والله
مختار يتكلم بسرعه
مختار / اه وهم سبق الرؤيا دا بيحصل نتيجه شذوذ في المخ المخ مش بيقدر يسترجع غير تفاصيل مشوشه من الموقف الجديد لكن في نفس الوقت مش بيقدر يسترجع الموقف القديم فيحصل تشابك بين الذاكرة ذات المدي القصير و الذاكره الي فيها مدي طويل و قبل ماتروح الذاكرة دي للوعي لازم بتتخزن ولما بتوصل الذاكرة للوعي بتتصلح هناك
هند بصاله و فاتحه بقها
مختار / في منطقه في المخ اللي بتتسمي هيبوكامبوس  وفي دراسه تانيه اكتشفت انه المسؤول عن الذكريات المتسلسله منطقه التلفيف المسنن وده جزء صغير من منطقه الهيبوكامبوس الي في نفس الوقت بتخلينا نميز بين الأحداث المتشابهه في خلايا الدماغ
هند / انت بتقول ايه ؟
مختار / بشرحلك يعني
هند / بتشرحلى !! طب ممكن لو سمحت تشرحلى الرساله اللى عبد الله اخويا بعتهالى دى
هند تطلع الموبايل مختار ياخدها
مختار / لو ميخا قالك ما تغيريش من حد الكل يغير منك انتى مش شايفه نفسك و لا ايه دى جملتى غاششها منى ... اه يا جزمه ... اه حصل فيها ايه يعني على الاقل بحاول اتعلم ببذل مجهود هنا يا هانم لازم تقدريه
هند تضحك
هند / و عشان كدا بحبك عشان بتحاول طول الوقت تسعدنى عشان بجد بتتقى ربنا فيا
مختار / و عشان بحبك و بحب اشوف دحكتك الحلوه دى منوره وشك
هند / و دى بقي غاششها من مين
مختار / اقسم بالله مجهودى
هند / ههههههههههههههههه يلا يلا الاكل اتحط
هند تمشي و مختار وراها
..............................

فى فيلا فيرا بعد اسبوع
فيرا قاعده بتتفرج على التليفزيون و قدامها طبق فاكهه متقطعه بتاكل منه رشيد يدخل تبتسم و تقوم تقف و تفتح ايديها
رشيد / انا راجل متجوز دلوقت
فيرا / ههههههههههههههه يعنى ما وحشتكش
رشيد / ما خطرتيش على بالى ثانيه
فيرا / كداب ... اخبار سمر ايه
رشيد / تمام بنجهز للسفر
فيرا / على فين
رشيد / هنلف الدنيا و نفرتك القرشينات لحد ما ربنا يكرمنى و اقع على شغلانه حلوه
فيرا / طب ما الشغلانه فى ايدك
رشيد / يا فيرا انا بشتغل ايه معاكى اللى بعمله ده مش شغلتى انا راجل رحال حياتى فى السفر مش فى قعده البيت زى الحريم
فيرا / لا .. الوضع دلوقت اتغير خالص انا الفتره اللى فاتت سبتك عشان كنت مقدره ظروفك و ظروف سمر
رشيد / قال يعنى ظروفك كانت سالكه
فيرا / جدا فوق ما تتخيل
رشيد / ازاى بعد ما الحكومه ضربتك فى مقتل
فيرا / بس ما موتش و عايشه و اسمى ما اتهزش فى السوق و قريب اوى هتعرف مين فينا اللى ضرب التانى فى مقتل
رشيد / هو يتخاف منك اه بس مش
فيرا / مش بتقولوا يا خبر النهرده بفلوس بكره يبقى ببلاش
رشيد / بنقول
فيرا / خلاص استنى شويه
رشيد / بس انتى عارفه ان ايدى فرطه و احب ادلع نفسى ما تقولى بقى الفضول قاتلنى
فيرا / تعرف ان معاك حق الفضول فعلا بيقتل صاحبه و انت دلوقت عندك اللى تعيش عشانها
رشيد / ما حدش بيموت ناقص عمر
فيرا / عشان كدا بحبك بتفكرنى بحد تانى بحبه برده مع انكوا مختلفين جدا ... و فى كل حاجه ... بس نفس الاسبيرت نفس النظره اللى فى العنين نفس الثقه الغبيه ... بتعجبنى مش هنكر بتشدنى موت بس فى الاخر ايه اللى بيحصل ... بتموتوا و بفضل انا سينجل
رشيد / هههههههههههههههه
رشيد يبص فى الساعه
رشيد / كان نفسى اطول معاكى بس للاسف ورايا مشاوير كتير جدا قبل السفر يلا اشوفك على خير
فيرا / هتسافر برده يا ابنى فكر فى اللى قولتهولك
رشيد / انا لو امى زيك كدا
فيرا تبتسم بدلع
فيرا / كنت عملت ايه
رشيد / كنت قتلتها انا صحيح ما اعرفهاش بس ان شاء الله كانت شريفه يعنى
فيرا  تنفخ و تبص الناحيه التانيه و ترجع تبصله
رشيد / انا صدقتك كتير و كنتى بتقولى شغل و مش شغل و تبعتينى فى حوارات هبله انا مش بلطجى انا فنان مبدع ما ليش فى الحاجات دى
فيرا / صدقنى هتنقل حاجات كتير جدا بين المحافظات كل حاجه اتغيرت ما عدتش بقدر اصنع فى اماكن كتير و بغير المصانع بتاعتى كل فتره و صفيت كل عناصر الشرطه اللى كانت بتساعدنى و بجد محتاجاك جدا
رشيد / يا نهار اسود  نيلتى ايه قتلتى الحكومه
فيرا / كان لازم انضف ورايا اى واحد منهم لو خف هيسلمنى
رشيد / هى وجهه نظر تحترم بصراحه و تبقى هبله لو ما عملتيش كدا بس ... ازاى ما فيش اخبار عن الحاجات دى دا الدنيا المفروض كانت تتقلب
فيرا / ما هى بتتقلب يوميا انت ما بتقراش جرايد و لا ايه دا اساميهم منوره صفحه الوفيات باحلى نعى
رشيد / بس ... خلصتى كدا ... طب الحكومه اكتفت بالنعى يعنى
فيرا / ههههههههههههههههههههههه ... فهمتك فهمتك ... الحكومه هتحقق فى جريمه قتل سرقه اغتصاب انما واحد اتزحلق وقع على دماغه واحد جاتله سكته قلبيه واحد اتكهرب فى حمام السباحه بتاعه اكسيدانت هابنت
رشيد / عندك حق و بعدين دى اعمار يعنى و ما حدش بياخد اكتر من نصيبه
فيرا / اديك قولت
رشيد / و المطلوب دلوقت
فيرا / انا محتاجه معارفك يظبطونى الحكومه بتعمل ايه مين رايح فين مين جاى منين هيهجموا على ايه و تساعدنى فى نقل البضاعه هى صحيح هتبقى سياحه داخليه بين المحافظات بس اهى سياحه برده
رشيد / بس السعر ثابت ما ليش دعوه انا داخليه خارجيه  الشغل شغل
فيرا / و انا عمرى زعلتك فى الموضوع ده
رشيد / يا ستى عشان نبقى على نور و ان كنتوا اخوات ... استغفر الله العظيم لا لا عشان نبقى على نور و خلاص
فيرا تضحك و تروح تفتح درفه و تطلع شنطه و تفتحها و تحطها قدامها
فيرا / العربون
رشيد / استبينا تحبى ابدا من امتى
فيرا / من بكره هات سمر و ارجعوا
رشيد / لا الموضوع ده محتاج شويه ترتيبات انا ما اقدرش اضغط عليها و اجيبهالك تانى مش عاوز ارجع الاقيها راميه نفسها من البلكونه
فيرا / اخص عليك دا انا احطهالك فى عنيا
رشيد / البنت نفسيتها مدمره و لا بتاكل و لا بتشرب و كانت حاطه امل كبير انها تسيب مصر كلها باللى فيها يا ترى مين فى مصر تاعبها يا ترى مين
فيرا / خلاص خلاص براحتك بس انا فعلا مستعجله على الشغل رتب امورك و كلمنى
رشيد / تمام يلا اخلع انا ... حلو الطبق ده
فيرا / ما يغلاش عليك
رشيد / المره الجايه سلام
رشيد ياخد الشنطه و يمشى و فيرا مبسوطه
.............................
فى سرايا الزنايته
مغاورى / بس دى مصيبه
امين / او حلاوه روح 
مختار / هتتمسك برشيد ليه لو مش محتاجاه
عباده / عشان توصلك مثلا
مختار / هتغر والله
عباده / هى مش سمر قالت بنفسها انها مقتنعه ان فى بينكوا اتصال عاوز ايه اكتر من كدا
مختار / انا و هو ما بنكلمش بعض غير عن طريق القمر الصناعى و دا للشديد القوى غير كدا بالشفره و من ايميلات مختلفه كل مره
امين / بس هو فى بيتها برده
مختار / و هو مش اهبل و لا هاوى
مغاورى / الباشا ... زياد ده كان متاكد ان لينا حد جوه و كان هيموت و يعرفه
مختار / قولتله ؟
مغاورى / ليه داقق عصافير لا طبعا
مختار / الحمد لله
ناصر / خلاصه الكلام ... يا خبر بفلوس بكره يبقى ببلاش مرات رشيد امانه فى رقبتنا هنحميها و نحافظله عليها و هو لازم يتحرك فى اسرع وقت
مختار / مرات رشيد هو كفيل بيها ما تشغلش بالك بالموضوع ده يا كبير و بعدين هو اكيد مش هيجيبها هنا
مغاورى / هنا فين لا طبعا
ناصر / و مين قال هنا ... يبعتها اسكندريه ... مفيش فيها اكتر من الصعايده و حبايبنا هناك كتير
شاكر / انا كمان معاك فى الموضوع ده يا ناصر كل ما كان مطمن على مراته اكتر كل ما عرف يشتغل احسن الشغلانه دى كل مادا ما بتزيد خطوره الاول كان ما عندوش اللى يبكى عليه ...دلوقت ... الدنيا اتغيرت خالص
مختار / بس هو ما اتغيرش ما تنسوش حكايه الولد اللى بيدور عليه
امين / انا اشتغلت على الحوار ده على فكره الولد فعلا اتخطف بس هناك فى امريكا و ما فيش اى دليل انه دخل مصر
مختار / و هى يعنى هتدخله رسمى ما اكيد تفليته
عباده / اشتغل على حبايبنا الفتره دى يا امين شوف مين عدى ايه و عداه امتى و ازاى و لف البكره الخيط هيكر فى ايدك
امين / تمام بس الموضوع ده هياخد وقت
ناصر / تحتانى يا امين و تحت التحتانى كمان لو تقدر
امين / ما تقلقش يا كبير ان شاء الله خير
........................
فى تراس الزنايته
سماح و مريم واقفين بيبصوا على الجنينه
سماح / تقل ايه الله يعينه ما انتش شايفه همه
مريم / انتى مش بتقولى بيرغى معاكى فى الساعات
سماح / ما هو ما بيقدرش يقفل لما بيسمع صوتى
مريم / يا سيدى يا سيدى
سماح / بيقولى بخاف اكلمك اكون بعطلك بستنى اما ترنيلى بعرف ساعتها انك فاضيه فبتصل
مريم / و انتى بتعرفى منين ان كان فاضى و لا لا
سماح / و انا هستناه يفضى و لا ايه و ما نيل المطالب بالتمنى انما تؤخذ الدنيا غلابا ... كداهو
سماح تطلع الموبايل و ترن على مغاورى
مريم / بتعملى ايه يا مجنونه
مريم و سماح يشوفوا مغاورى بيطلع من المضيفه مريم تجرى تقعد بعيد
سماح / الو
مغاورى / ازيك ... خير
سماح / خلصتوا ؟
مغاورى / لسه
سماح / بص فوق
مغاورى يبص فوق يشوفها يبتسم
سماح / ما تمشيش الا ما تكلمنى انزل اسلم عليك
مغاورى / شكلنا مطولين و مش هينفع اسهر هنا هبقى اكلمك فى التليفون لما اروح
سماح / تمام
مغاورى / سلام
سماح تقفل و تروح تقعد جنب مريم
سماح / شوفتى
مريم / عملتيها ازاى دى دا انا قولت هيتنرفز و لا يتعصب و لا حتى يقفلك
سماح / حرام عليكي طب دا مغاورى ما فيش فى حنيته
مريم / سبحان مغير الاحوال على العموم جدعه
سماح / انتى مستغربه اللى شوفتيه امال لو قولتلك بقى ان عمته عوزانا ندخل بعد الاربعين و نازله زن على الموضوع هتعملى ايه
مريم / عمته مين
سماح / كوثر الجارحى ... ام عباس
مريم / يا مثبت العقل هى العيله دى جرالها ايه
سماح / و هو فى فى العيله دى كلمه بعد كلمه مغاورى دا حتى الحج شاهين ما بيمشيش غير بشورته
مريم / ربنا يوفقه و يصلحله الحال بس الست دى انا ما عدتش برتاحلها
سماح / على روحها مش عليا انا بعرف اتعامل مع اللى زيها كويس
مريم / دى عمته يا سماح و بلاش تدخلى الدخله دى عشان ما تخسريش
سماح / لا ما تقلقيش انا بفهم فى الاصول كويس و احنا يعنى صغيرين ما احنا ياما شوفنا ... الا صحيح مفيش اخبار عن ورده
مريم / مش فاهمه
سماح / يعنى لسه بتصورله الورق لسه بتكلمه لازم عينك تبقى فى وسط راسك لحسن من امن العقاب اساء الادب
مريم / عبد الله ما بيشوفش غيرى
سماح / جدعه ايوه كدا زغللى عنيه امال هو فين صحيح
مريم / فى الجنينه الورانيه بيزاكر ما هم احتلوا المضيفه بتاعته
سماح /يادى المزاكره اللى مفرقاكوا عن بعض يا انتى بتزاكرى يا هو بيزاكر و واحده واحده هتلاقي الكلام بينكوا قل و المسافات كبرت
مريم / لا ... ما فيش الكلام ده احنا اه طول الوقت مشغولين بس بنعرف نستغل كل ثانيه فاضيه كويس اوى
سماح / هههههههههههههههههههه بجد طيب
مريم / بتضحكى على ايه
سماح / انتى بتكدبى عليا يا مريم يا بت دا انا اختك و بعدين احنا قاعدين مع بعض بقالنا قد ايه الا حتى ما رن عليكي و لو بتفه حتى
تليفون مريم يرن
مريم / اهو رن قولتلك لما يخلص مزاكره هيكلمنى انا ما بحبش اعطله و بعدين هو بيتعب فى المزاكره ليه مش عشان يسد مهرى عن اذنك بقى
مريم ترد
مريم / وحشتنى فينك كل ده
مريم تمشى و سماح تروح تبص من التراس تلاقى عبد الله طالع من الجنينه الورانيه و هو بيتكلم فى التليفون و مبتسم اوى تدخل جوه
..................................
فى شقه رشيد
سمر و رشيد قاعدين و قدامهم شنطه الفلوس مفتوحه
سمر /  هترجعلها امتى
رشيد / لما الاقيلك مكان امان تقعدى فيه
سمر / انت هتسيبنى لوحدى
رشيد / ما انا لازم اقرب منها عشان اعرف مكان العيل ده
سمر / ما تستهونش بيها يا رشيد دى توديك البحر و تجيبك عطشان
رشيد / هرجع عطشان اه بس هسقيها انا المالح
سمر / طب هتبقى تكلمنى صح هتجينى
رشيد / اكيد و ما تقلقيش هجيبلك تليفون و اوصى ناس حبايبى يشقروا عليكي و يجيبولك كل اللى تحتاجيه انا مش هسيبك فى اى حته
سمر / اجى معاك ؟
رشيد / لا انا ما صدقت خرجتك من هناك و انا ان شاء الله ما اطولش
سمر / طب هتعمل ايه بالفلوس دى يا رشيد انا كنت فكراك نويت تتوب
رشيد / كل حاجه لازم تمشى طبيعى لحد ما اخد منها الواد ما ينفعش اخليها تشك فى حاجه
سمر / يعنى هتهربلها الحاجه فعلا
رشيد / فى فى دماغى كام حاجه كدا بس الحاجات دى ما بتجيش عفينه بتيجي بالهداوه و التكتيك و بمناسبه التكتيك ما فيش فنجان قهوه من ايدي الطريه دى
رشيد يبوس ايدها تبتسم و تقوم تدخل المطبخ رشيد يقفل شنطه الفلوس و يقوم يدخل وراها المطبخ
..........................
فى اوتوبيس الكليه بعد فتره مش كبيره
عبد الله قاعد بيتكلم فى التليفون و الكرسي اللى جنبه فاضي
عبد الله / المشكله انهم بيبصولى كانى بعمل حاجه ما اتعملتش قبل كدا
مريم / عاوز تقفل يعني
عبد الله / قلبي مش مطاوعنى
مريم / انا كدا كدا ورايا باقي واجب الاحياء
عبد الله / يعني انتى اللى عاوزه تقفلى اهو
مريم / بس قلبي مش مطاوعنى
عبد الله / طب هنقضيها الوساده الخاليه و لا ايه
محمد يدخل يقعد جنبه و هو منشكح
عبد الله / هكلمك بعدين سلام
عبد الله يقفل و يحط الموبايل فى جيبه
محمد / انت لسه زعلان منى
عبد الله / لا ابدا ما فيش حاجه
محمد / على فكره انا كمان خاطب
عبد الله / الف مبروك
محمد / هى مش خطوبه بصراحه هو فى فاتحه و ربط كلام ابويا الله يرحمه كان قارى فتحتنا مع ابوها قبل ما يموت
عبد الله / الله يرحمه
محمد / بس ابوها بقي منه لله عمال يحطلنا العقده فى المنشار اشي مهر و شبكه و جهاز و شغل تطفيش دا حاكم عليا لا اشوفها و لا اكلمها
عبد الله / يمكن عشان قرايه الفاتحه و كدا لما تخطبها اكيد الوضع هيتغير يعني
محمد / وربنا انت طيب ... هو بس عاوزلها حد مرتاح اصل ابويا الله يرحمه كان عنده ارض كتير و عز ياما بس راحوا
عبد الله / ربنا يعوض عليكوا
محمد / قول يارب ... تعرف كان محتاج عمليه زراعه كبد اخويا اتبرعله بفص من عنده و روحنا مستشفي كبير فى مصر خدت مننا الشئ الفلانى و بعنا ارض و اتمرمطنا و ياريته فى الاخر جه بفايده دا حتى اخويا تعب جامد جاله ميكروب كدا عشان اوضه العمليات ما كانتش نضيفه و دوخنا بيه السبع دوخات و فى الاخر ارتاح
عبد الله / البقاء لله
محمد / انت ما سمعتش عن الحكايه دى دا الكبير قلب الدنيا و قفل المستشفي و صاحبها هرب على بلاد بره 
عبد الله / هيهرب من ربنا فين
محمد / كان نفسي ادخل طب عشان ما حدش يشوف اللى شوفناه بس فرقت معايا على درجتين و نص قولت مش مهم ادخل صيدله و اهو برده اخدم الغلابه
عبد الله / ربنا يعملك اللى فيه الخير
محمد / بس الكبير شكله بيحبك اوى
عبد الله / و انا كمان بحبه اوى بصراحه الزنايته كلهم يتحبوا
محمد / طب ما تتوسطلى عنده يكلم الراجل حمايا ده يحنن قلبه عليا شويه
عبد الله/ طب ما تكلمه انت الكبير عمره ما رفض حاجه لحد
محمد / انا ما بقبلش حسنه من حد و لو قولت للكبير مش هيكلمه هيديني انا فلوس و يقولى هاتلها اللى هم عاوزينه و انا ظروفى معروفه هردله الفلوس دى ازاى و امتى
عبد الله/ انا طبعا ما اعرفش لسه الدنيا هنا بتمشي ازاى بس تمام هحطيله الحوار ده و اقوله وجهه نظرك
محمد / لا ما تقولوش يزعل منى يقولى عامل تكليف و انت زى ابنى ربنا وحده اللى يعلم غلاوته بس انا عمرى ما خدت حاجه من حد مين ما كان دا انا اكلها بمش و لا انى اخد جنيه من حد
عبد الله / عشان كدا بحب البلد دى اوى
محمد يبتسم و عبد الله يبص من الشباك
........................
فى اوضه اجتماعات فى وزاره الداخليه
ظباط و رتب قاعدين و ظابط بيعرض
ظابط ١ / بعد التحريات للاسف تم اثبات تعاطى تمانين فى الميه منهم للبى كاى و ربنا وحده اللى يعلم العشرين الباقين هل فعلا قضاء و قدر و لا اسرهم بينكروا حفاظا على سمعه المتوفى
ظابط ٢ / يمكن ما يعرفوش يا فندم
ظابط ١ / احتمال وارد برده ... الفتره اللى فاتت كثفنا التحريات عن مناطق البى كاى و كلها خاليه تماما و دا متوقع دورنا اننا نعرف الاماكن الجديده اللى بيتباع فيها الدوا ده كان بيتباع جوه الصيدليات بصفته مسكنات او مقويات دورنا الفتره الجايه اننا نركز اكتر على الناحيه دى ..  عاوز تعامل جاد مع اى محضر او بلاغ بخصوص الموضوع ده .. القيادات كلها بتاكد على اهميه القضاء على البى كاى على مستوى الجمهورية و تستقبل تقارير يوميه
ظابط ٣ / يا فندم انا رايي اننا نقضي عليه من المنبع و كل التحريات بتشير لمكان واحد
ظابط ٢ / للاسف مفيش دليل واحد ملموس معترف بيه على الكلام ده و احنا دوله قانون يا عصام بيه
عصام يهز راسه
ظابط ١ / الفيلا إللى قاعده فيها ملك لعضو مهم فى مجلس الشعب و للاسف من احزاب المعارضه و اديكوا شوفتوا اللى حصل اليومين اللى فاتوا
ظابط ٤ / اصلا مستحيل تكون بتصنع و تخزن الكميه دى كلها فى مكان واحد
ظابط ١ / و دى نقطة مهمه جدا و اللى كلنا لازم نشتغل عليها الفتره الجايه فين بؤر التصنيع
ظابط ٢ / اسمحلى يا فندم احنا برده لازم نكثف و نزود نقط التفتيش على كل الطرق و ما نلغيش احتمال انها بتكون بتنقل بين المحافظات
عصام / تعديل صغير بعد اذنك ... ليه ما تكونش ليها اماكن تصنيع فى جميع المحافظات
ظابط ١ / ما افتكرش مصر مش بلد صغيره اوى عشان تشكيل واحد يسيطر عليها كلها و فى الفتره الصغيره دى
عصام / انا والله ليا وجهه نظر فى الموضوع ده لو تسمحولى ... التنظيم ده مش جديد اللى يوصل للعدد دا كله من عناصر الداخليه و يا عالم مين تانى براها يبقي اكيد قعد فتره طويله يشتغل على الموضوع و انا رايي ان ممكن تكون الاداره اللى جديده
ظابط ٥ / و ليه ما تكونش فرضت نفوزها بالسيطره على التنظيمات الصغيره اللى كانت موجوده اصلا و متوغله فى السوق
ظابط ١ / كلها احتمالات لازم ناخدها فى الاعتبار و نشتغل عليها من غير اى تاخير و هرفعها كلها فى التقرير بتاعى ان شاء الله
.........................