البر التانى بقلم / لولو_محمد (كامله )

الحلقه ٦٢

((((((( البر التانى ))))))
#لولو_محمد
الحلقه ٦٢
حامد / هعمل ايه يعني اديني بدور عليه فى كل السكك اللى اعرفها بس لحد ما الاقيه هعمل ايه يعني هاكل طوب انا و عيالى و اديك شايف الواد اترفد من شغله
محمود / و ممدوح كمان بس ما تشيلش هم ان شاء الله لما المحل يتفتح يجوا يشتغلوا معايا لحد ما ربنا يكرمهم بشغلانه كويسه
حامد / طب و انا و البنات و ام البنات انت عارف ان مرتب الحكومه لا بيشفع و لا بينفع و انى كنت داخل فى اخر عمليه دى بتقلى كله و اداينت لطوب الارض و جمعيات بالهبل
محمود / والله يا حامد زى ما انت شايف المحل على البلاطه و انا لسه النهرده بايع شقه يوسف بالخساره عشان اوضبه و افرشه و لسه حالا قايل للمهندس يلمه باقل القليل عشان مفيش فلوس و لو المحل ما اتفتحش كلنا هنعض فى الارض العمليه اللى فاتت ما عورتكش لوحدك كلنا اتلطينا معاك
حامد / يعني مش هتقدر تساعدنى
محمود / لو تصبر لما المحل يتفتح اديك عيني بس انا ما بعتش شقه ابنى و مغضبه منى و مبيته بره البيت من امبارح عشان اديك الفلوس و يبقي كانك يا ابو زيد ما غزيت و لا انت ايه رايك دا انا حتى عارض عربيتي و عربيه يوسف للبيع عشان تسند معانا فى المصاريف باى حاجه
حامد / طب و العمل
محمود / العمل عمل ربنا هنصبر فى ايدنا ايه تانى
حامد / ان كنت انا هصبر عليك الناس مش هتصبر عليا و انا مش حمل بهدله
محمود / انا قولتلك اللى عندى و اديك شايف الظروف غير كدا انت عارف انا عمرى ما اتاخر عنكوا
حامد / تمام ... ما دام انت شايف كدا انا هشوف مشترى لنصيبي
.........................
محمود / نصيبك فى ايه
حامد / فى المحل نصيبي فى المحل تلت المحل
محمود / تلت انهى محل ... المحل ده ... انت بتتكلم جد يا حامد انت واعى للى بتقوله
حامد / ايوه انا ليا تلت المحل ده
محمود / دا باماره ايه انت فاكر انى عشان كنت ناوى اديكوا نسبه من الارباح تبقوا شركاتى طب ما دام انت يا خويا شريك فى المحل ما تدفع فى تصليحه
حامد / ليه و هو انا اللى حرقته مش انت و ابنك السبب انت المسؤول يبقي لازم تعوضني
محمود / و احنا كنا قولنالك انك السبب فى الفلوس اللى ضاعت كنا قولنالك عوضنا انت عارف احنا خسرنا كام فى حوار العربيات بتاعك ده
حامد / انا هتحبس يا محمود
محمود / الاول قولتلك اصبر دلوقت بقولك مليش دعوه اديكوا صباعى تطمعوا فى دراعى عينك فى رزقى و رزق عيالى شقايا و تعبي سنين و انا بكحت فى الصخر و اديكوا و فى الاخر تقول التلت طب باماره ايه التلت فهمنى
حامد / انا و انت و حمدى حق ربنا ورثنا
محمود / دا انت فاجر يا اخى اقسم بالله ... فاجر
محمود يسيب حامد و يمشي
حامد / حقى هاخده يا محمود مش هسيبه هاخده
......................
فى سرايا الجارحى
مغاورى / قولتلكوا مختار طرى بسبب عيشته مع المصراويه ضحكتوا عليا اهو راح جابله واحده تمشي كلمتها عليه
شاهين / مش داخله دماغى ابدا الحكايه دى ناصر مش هيضحى بالساهل بمختار كلنا عارفين هو شاطر قد ايه فى الشغلانه دى دا كفايا سيطه اللى بيسمع فى كل طلعه بيطلعها
بنت / و لا اللى عمله فى بتوع اللعب البلاستيك
شاهين / الحكايه دى وراها انه
خديجه / ما ورهاش هند بتخاف من ضرب النار و هو ما بيقدرش على زعلها خيرته بينها و بين السلاح اختارها هى
شاب / الزنايته كلمتهم واحده مستحيل يكون بيسكتها لحد ما يتجوزها ما دام ساب السلاح يبقي سابه
مغاورى / فيها ايه يعني ست هند دى دونا عن اى حرمه تانيه يضحي عشانها بالشكل ده
خديجه / القلب و ما يريد حبها
مغاورى / ما تلمى روحك يا بت
شاهين / ما غلطتش يا مغاورى معاها حق و هو ايه يخليه يتنازل الا عشان بيحبها و خاطرها غالى عنده
مغاورى / صحيح عباده طالب ايدك احنا قولناله انك بتصلى استخاره
شاهين يبص لمغاورى و يبص لخديجه
شاهين / عباده راجل ابن حلال
خديجه / عباده ما يتعيبش يا ابا بس
شاهين / زى ما قولنا للناس صلى استخاره و الخيره فيما اختاره الله يا بنتي
خديجه / اللى تشوفه حضرتك
مغاورى / و الله لحد امبارح كنت اقولك ارفضي لكن بعد اللى حصل تبقي عبيطه لو رفضتيه
شاهين / مغاورى
مغاورى / كدا عباده هيبقي الكبير و لو رفضتيه تبقي انتى الخسرانه
خديجه / جواز مصلحه كمان يعني مش بس صالونات لا و كمان مصلحه
مغاورى يقوم يقف و يرزع على السفره
مغاورى / و انتى كنتى ناويه على جواز حب و سرمحه و لا ايه
خديجه / ليه و هى هند و مختار اتسرمحوا انا عاوزه واحد يحبني مش يتجوزنى عشان انا بنت شاهين الزيني زى ما انت بتفكر كدا هو كمان اكيد بيفكر كدا
شاهين / عباده متقدملك من قبل ما مختار يسيب السلاح و نعرف انه هيبقي الكبير و بعدين ناصر لسه بصحته و عافيته يعني عباده لسه قدامه كتير على ما يبقي الكبير و يا عالم مين هيدفن مين ربنا يدينا الصحه جميعا
الكل / امين
شاهين / فكرى فى الراجل لروحه و زى ما قولت صلى استخاره
خديجه / هفكر فيه ازاى و انا ما اعرفوش انا علاقتى بعباده من اللى بسمعه وسط الكلام
مغاورى / انا من الاول قولت العلام هيفتح عنيكوا و يقلعكوا برقع الحياه و ادى اللى خدناه
خديجه / و انا قولت ايه
شاهين / خلاص خلصنا
مغاورى / انت هتسكت على كلامها ده
شاهين / انا هكلم عباده و اخليه يجي السرايا هنا و تتكلموا
مغاورى / ايه الكلام ده يا ابا
شاهين / اللى سمعته
شاهين يقوم و يسيب المكان و مغاورى بيبص لخديجه و هى بتتهرب بعنيها منه
.........................
فى الجنينه الورانيه
مختار و هند قاعدين على المرجيحه و مختار بيمرجحها برجله و كل شويه يبص لفوق الشبابيك مقفله و مختار لابس صعيدى
هند / لا بس اصلي استغربت لما لقيتك هنا بعد كل اللى حصل امبارح
مختار / و هو ايه اللى حصل امبارح غير الحفله اللذيذه بتاعتى
هند / تحب ندخل جوه بدل لوحه رقبتك كل شويه دى
مختار / بفكر اجيب قناص اوقفه هناك اللى يفتح شباكه ينشه و بعدين انا انش القناص
هند / هو بيت العيله كدا مفهوم الخصوصيه فيه مختلف
مختار / احنا لسه مخطوبين المفروض ما فيش خصوصيه اصلا
هند / يعني هتفرق اوى بعد الجواز
هند تبص الناحيه التانيه
مختار / هتفرق
هند تبصله
مختار / كل حاجه هتفرق بعد الجواز
هند / نرجع لموضوعنا عشان السكه دى هتاخدنا فى سكه تانيه و انا لسه مش متاكده اوى عاوزه اروح هناك دلوقت و لا استني شويه
مختار / لا بالله عليكي استني شويه عشان انا لو روحت مش هعرف ارجع
هند تبتسم و تغطى وشها بايدها
مختار / الفرامل باظت منى خالص
هند / و جايلى انا افرملك !!! نرجع لموضوعنا انت ليه ما روحتش تلعب معاهم
مختار / عشان انا وعدتك انى مش هسمح لحد يفرق بينا
هند / ايه !!
مختار / اقولك ايه بس .. هروح يتحرق دمى و يتحفل عليا و ارجع ... الناس هنا اهلى ... فاهمين ... فاهمين انتى بالنسبالى ايه و انا .. بالنسبالك ايه ... فاهمين انك من مكان تانى ... فاهمين انى دى مش نهايه الدنيا و ان مش ده اللى هيقل منى
هند / ما فيش حاجه فى الدنيا هتقل منك
مختار يبتسم
مختار / مش هكدب عليكي لسه جوايا هنا حاجه متمسكه بالسلاح فى جوايا حاجه بتقولى هيجي يوم و تفهمى
هند / و ان ماجاش اليوم ده
مختار / يبقي على العهد
مختار يبص الناحيه التانيه
هند / ما تزود السرعه شويه ايه الملل ده
مختار / مش عوزانى اقلبها بالمره في ايه يا حجه الحق عليا يعنى
هند / خلاص خلاص خلينا زى ما احنا ... ايه المعامله دى
مختار يبص فوق
هند / بقولك ايه قوم نلف بالعربيه انا رقبتنى وجعتنى
مختار / والله بقول كدا من الصبح قومى
مختار و هند يروحوا ناحيه العربيه يقابلوا انتصار
انتصار / الله انتوا رايحين فين دا انا لسه كنت جايه اناديكي تنقى الحاجات الجديده
هند / على زوقك الحلو ده بقي يا قمر
انتصار / عيني
هند تركب العربيه مختار يشاور لانتصار تبصله و هى مبتسمه مختار يسوق و يمشي
..........................
فى شقه محمود
اسراء / يخربيت بجاحته
محمود / تخيلى لا و الفاجر بيقول التلت طب قول الربع تتبلع
اسراء / و لا مليم قولتلك اخواتك دول ما فيش منهم خير و انت تقولى ابويا موصيني اهلى اخواتى اهم افتكروها حق مكتسب
محمود / انا دمى محروق من ساعتها و مش طايق نفسي
اسراء / انا اللى قلبي واكلنى على يوسف اوى كلمت كل صحابه كلمت كل اللى نعرفهم حتى كلمته من رقم غريب و خليت اخواته يكلموه مش بيرد
محمود / هو كان معاه فلوس قد ايه و هو نازل
اسراء / ما اعرفش بس اكيد مش كتير
محمود / كويس اما نشوف هيقعدوه قد ايه
اسراء / يعني هتسيبه يا محمود
محمود / خليه يغير جو و يهدى
اسراء / جبت جموديه القلب دى منين
محمود / مش جموديه يا اسراء تعب تعبت كل حاجه حواليا بايظه و واقف بطولى
اسراء / شده و تزول ان شاء الله ... تعرف انا اللى قالقنى انه يكون لسه بيفكر فى هند و يسافر وراها
محمود يبصلها و يقوم يدخل اوضته و يقفل الباب و اسراء قاعده تضرب كف على كف
....................
فى ارض زراعيه كبيره
هند و مختار بيتمشوا و بياكلوا دره مشوى
مختار / طب الارض اللى هناك دى مزروعه ايه
هند / سمسم
مختار / جدعه لا اللعبه دى سهله عليكى
هند / ما فيش اخبار عن النتيجه
مختار/ يا اختى ندخل و بعدين ندور على النتيجه و الجيش و الافلام اللى مستنيانا
هند / انا كنت سقطت حوار الجيش ده خالص هنعمل ايه
مختار / هنعمل ايه فى ايه اللى فى نصيبي هاخده
هند / طب و انا
مختار / مالك
هند / هعمل ايه من غيرك
مختار / اعمليلى حله محشي كبيره و برام ملوخيه انا بعشق الملوخيه فى الفخار بصي انا بحب الطبيخ فى الفخار الاكل بوجه عام فى الفخار طعمه بيبقي احلى
هند / فخار ايه انت هتنزل اجازتك تاكل
مختار / ما انا هبقي هفتان
هند / سعد زغلول قال مفيش فايده و لكنكم تحبون مصطفى كامل
مختار / لا ياس مع الحياه و لا حياه مع الياس
هند / ايوه هو ده ... الدره ده حلو اوى
مختار / الف هنا
هند / هو انت فى الفرح هتلبس صعيدي زى عريس امبارح
مختار / لو مش هيضايقك
هند / انا عادى المهم بس تحضر
مختار / يا شيخه
هند / هههههههههههه بهزر
صوت كلاكس عربيه مختار يبص يلاقي عباده بيركن و العربيه بينزل منها ماجد و هشام
ماجد / ابو المخاميييييخ
مختار / اوعااااا
هند تشد كم مختار يبصلها
هند / عم عارفين
مختار / جايين زياره يوجبوا الفرح و يروحوا
هند / يعني ما يعرفوش
مختار / و مش هيعرفوا
هند تهز راسها ماجد و هشام يدخلوا يحضنوا مختار و يسلموا عليه
هشام / سلامتك يا هند كنا هنموت من القلق عليكي والله
هند / الله يسلمك
ماجد / المهم احنا مش هنطول عليكوا يعني و نبقي عازول و كدا خدوا راحتكوا
مختار / و دا من ايه يعني ان شاء الله
ماجد / ابن عمك بيقول عاملين عيش شمسي و ويكا يعني خليك فى عروستك
مختار / هههههههههههههههههه ماشي يا عم الله يسهلوا
ماجد / الله يسهلك انت يا عم ... عن اذنك يا هند
هند / سلام
ماجد و هشام يمشوا مع عباده
هند / انا بقول نروح احنا كمان و لا ايه
مختار / ايه جوعتى و لا ايه
هند / لا بس الفلاحين بيبصوا علينا
مختار يبص وراه يلاقي تلت فلاحين واقفين
راجل ١ / الف مبروك يا عريسنا
مختار / عقبال عندكوا جميعا ... انا بقول نلحق العيش الشمسي و هو سخن
هند / انا بقول كدا برده
هند و مختار يمشوا
..........................
فى المضيفه
الشباب قاعدين و قدامهم صوانى اكل
ماجد / يا عم اقسم بالله ما عرفتك
مختار / حالا نشوفلكوا اتنين
عبد الله / اريح من الكاجوال بكتير بس صعبه شويه فى ركوب الخيل هما محترفين لكن انا بتكعبلنى لسه
هشام / انتوا عملتوا ايه مع عمامكوا
عبد الله / ما عملناش ماما اتنازلت و الموضوع خلص
مختار / و عندنا فرح و هيصه و عاوزين نولعها
ماجد / امال احنا هنا ليه يا اسطا بص احنا عاوزين نخلص الغدى ده نشيله نحبس بالحلو فنجزع فنحدق بحته فطيره مشلتته كدا مع شويه مش بدوده نكتم عليها بكبايه شاى صعيدى التقيل الحبر ده و بعدين نطلع نفرش فى الغيط نشوى دره و نمص قصب
هشام / دا فى ذهب و لم يعد الكلام ده
عباده / و انا مش هكسرلك كلمه انا مربط على شويه دبايح للحنه و الفرح الجنينه دى كلها هتتفرش صوانى اكل كدا دا فرح الغالى
عباده يخبط على ضهر مختار مختار يبتسم
ماجد / انا كدا اطمنت على اجازتى نطمن بقي على الدنيا ايه النظام
مختار / عملتوا ايه فى الانترفيو بتاعكوا
هشام / فستك احنا شوفنا كام حوار كدا هنقدم فيهم برده
عباده / على فكره الارض هنا كبيره و لو تحبوا
هشام / صعب اوى يا عباده اهلى و كدا على العموم فى اراضي زراعيه كتير فى محيط القاهره يعني و صوبات زراعيه و الحاجات دى
ماجد / بقوله على المشروعات الجديده نقدم فيها و لا نسال فى حوار الاستصلاح الزراعى
هشام / يا عم ابعدنى عن الحكومه خالص
ماجد / اهو من اخر يوم فى الامتحانات و احنا فى الحوار ده
مختار / فى قدامكوا وقت تفكروا انتوا عاوزين تعملوا ايه
امين / ابويا ليه واحد صاحبه فى العياط لو عاوزين اخليه يساله لو محتاج مهندسين للارض بتاعته
هشام / كتر خيرك يا عم بس
مختار / بقولك ايه ما تقفلش البيبان سبها لله و سيب كل الطرق قدامك و ربنا هيقدملك اللى فيه الخير
ماجد / امين ... ايه الرغيف اللى ما بيخلصش دا يا عم
الكل يضحك
............................
فى اوضه مريم
البنات مشغلين اغانى و ام داوود بتعملهم بديكير واحده واحده و كل واحده حاطه رجليها فى طبق بلستيك فيه مايه و شيري بتتفرج
انتصار تدخل
مريم / خبطى يا ماما خضيتينا
انتصار / الرجاله كلهم خرجوا خدوا راحتكوا مفيش فى السرايا جنس راجل ... احنا نقلنا حاجه مختار فى المضيفه مع الشباب و حطينا حاجتكوا فى اوضته
هند / حاجتنا ايه
انتصار / ما كنتش بكلمك يا قلبي كنت بكلم شريهان
مريم / طب ما كنتوا طلعتوا حاجه عمى فوق بدل ما تفضل طالعه نازله
انتصار / الجديد كدا كدا فوق فى اوضه هند القديم بقي يبقي يشوف هيعمل فيه ايه هيخلى ايه و لا هيطلع ايه لله هو حر
شيري / عاوزين نفضي التلاجه اللى فوق
انتصار / حصل فضيتها كلها بس مش هملاها غير بعد الحنه عشان الفاكهه و الحاجه تبقي صابحه
سماح / ما تيجوا نعمل افتكاسه فى الحنه
فاتن / قولى يا جهبز هنفتكس ايه
سماح / نعمل هندى مثلا و نلبس سوارى و كدا
هند / انا عايشه من الخطوبه للنهرده و انا بحلم اللبس الفستان الاحمر فافتكسوا فى اى مناسبه تانيه
سماح / هو انتى هتلبسي بدى تحت الفستان و لا هتسبيه مكشوف
هند / بفكر اسيبه مكشوف ايه رايكوا مش هنبقي بنات بس و لا ايه
شيري / انا بقول خلى البدى عشان الصور
انتصار / انا بقول كدا برده
هند تبص لمريم بنظره خيبه امل و تهز راسها
انتصار / بقولك يا اختى عوزاكى فى كلمتين
شيري تهز راسها و تطلع بره مع انتصار يروحوا اوضه مختار
انتصار / شوفى لو الاوضه ناقصها حاجه قوليلى
شيري / كتر خيرك بس اهى حاجه تفى بالغرض لحد الجمعه و كدا كدا احنا مروحين
انتصار / اخص عليكي و نهون عليكي يبقي انتى لسه زعلانه من فاطمه على فكره هى كدا غشيمه و ما بتبقاش عارفه هى بتقول ايه بس طيبه
شيري / الموضوع مش موضوع زعل بس هنصبح على هند و نطمن عليها هنقعد ليه بعد كدا
انتصار / بقولك ايه انتى فاكره دخول الحمام زى خروجه الاوضه دى بقت بتاعتك انتى و ياسمينا و خلص الكلام احنا خلاص خدنا عليكوا و ما نقدرش نستغنى عنكوا دا مختار عمل المراجيح مخصوص عشان ياسمينا تقومى تاخديها و تمشي
شيري / انا مش عارفه اقولك ايه
انتصار / ما تقوليش احنا بنحب الزحمه بس الزحمه الحلوه زحمه الاهل هو احنا ما نقدرش نبني بدل السرايا اتنين بس لا بنحب دوشه العيال و زنقه الستات بنحب البيت يبقي علاطول مليان ناس كدا ربنا ما يكتب علينا ننقص ابدا
شيري / احلى لمه ربنا يديمها عليكوا نعمه
انتصار / انتوا خلاص بقيتوا مننا انتى و عبد الله و ياسمينا احنا ما نقدرش نستغنى عنكوا لو لينا غلاوه عندك ما تمشيش
شيري / لحد امتى
انتصار / هو احنا قعدتنا وحشه اوى كدا
شيري / بالعكس و ربنا يشهد بس ... انا محرجه منكوا اوى انا ما اتعودتش حد يصرف عليا و على عيالي مختار هيصرف على مراته لكن احنا ...
انتصار / مصاريف ايه اللى بتتكلمى عنها طب والله ازعل ياريتك قولتى همشي عشان زعلانه اهون
شيري / انتى مش مكانى يا انتصار
انتصار / مهو مفيش بينا الكلام ده ... لا اله الا الله بصي يا ستى انا هتكلم مع الكبير و ان شاء الله يلاقيلك حل يريحك ماشي
شيري / سبيها لله خلينا بس فى الفرح
انتصار / انا مش عوزاكى تشيلى هم هند خالص اقسم بالله زى بناتى بالظبط و مختار جدع و ابن حلال و هيشيلها فى عنيه
شيري تبص فى الارض و تبص لانتصار
شيري / انا مش عاوزه من الدنيا اكتر من كدا و ربنا العالم
انتصار تطبطب على شيري
انتصار / شوفى كدا لو الاوضه ناقصها حاجه نلحق نكملها
..........................
بالليل فى الجنينه
ماجد و هشام بيوصلوا السماعات
مختار / طب ما جوه كويس لزمتها ايه الفضايح دى
ماجد / بقولك ايه انت مش هتتجوز كل يوم ما تقول حاجه يا عباده
عباده / سبكوا منه دا نكدى احنا عاوزين نولعها
عبد الله / للصبح
عيل صغير يدخل و يشد عبد الله من جلبيته
العيل / سى عبد الله سى عبد الله
عبد الله / اؤمر يا سيد الكل خير
العيل / الكبير عاوزك فى مكتبه جوه انت و سى عباده
عباده / خير
العيل / ما اعرفش
مختار / تعالوا نشوف فى ايه على ما يركبوا البتاعه دى دا لو عرفوا يركبوها النهرده
ماجد / اهو ده اللى بناخده منك
مختار / ههههههههههههههه يلا يلا
مختار و عباده و عبد الله يدخلوا السرايا و يروحوا مكتب الكبير مختار يخبط
ناصر / ادخل
مختار يفتح الباب يلاقي سليمان و شاكر قاعدين يتخض
ناصر / تعالوا يا رجاله تعالوا
التلاته يدخلوا
عبد الله / قالولى ان حضرتك عاوزنى
ناصر / ما نتحرمش تعال اقعد
عبد الله يقعد و هو مهتم
ناصر / الحجه ام عبد الله مش مبسوطه معانا هنا و عاوزه تروح
عبد الله يبص لمختار
مختار / حد ضايقها تانى بحاجه
مختار يبص لشاكر
شاكر / بتقول انت تصرف على مراتك لكن هى و عبد الله و ياسمينا ما ينفعش
عبد الله يبص فى الارض
ناصر / انا فكرت يا عبد الله و لقيت حل كويس انت راجلهم دلوقت و احنا هنا ما عندناش اكتر من الشغل
عبد الله / و انا موافق
ناصر يبتسم
ناصر / طب مش تعرف هتشتغل ايه الاول
عبد الله / اى حاجه انا موافق ... انا مش عاوز امشي
ناصر / انت على راسنا يا عبد الله حتى من غير شغل خالص و ربنا يشهد انت فى غلاوه مختار و عباده بالظبط
عبد الله / عارف بس انا فعلا مش صغير و عاوز اشتغل
ناصر / تمام هنعدى الفرح و عباده هيشوفلك شغله على قدك فى الشونه تلم بيها مصروفك لحد الدراسه ما تبدا و هيظبطلك فى الاجازات
عباده / ما تقلقش يا كبير عبد الله فى عيني
عبد الله يبص لعباده و هو سعيد مختار يطبطب على ضهره عبد الله يبصله
......................
فى اوضه فاطمه
فاطمه بتقلع شاكر عبايته و تعلقها على الشماعه
فاطمه / و دا هيعرف يشتغل ايه ده دا لا ليه فى الشيل و لا الحط
شاكر / يتعلم مهو ما عدش صغير
فاطمه / و انت فاكر ان ناصر هيشغله بجد
شاكر / الواد راجل و هيسد
فاطمه / الواد مصراوى و طرى
شاكر / هو بس لسه ما لقاش فرصه يثبت نفسه
فاطمه / لتكون فاكر يا خويا اكمنه لبس الجلابيه و العبايه بقي صعيدي الواد طرى و مش هيستحمل شغل الشونه
شاكر / بكره نقعد جنب الحيطه و نسمع الظيطه اخبارك انتى ايه
فاطمه / على حطه ايدك من التليفزيون للموبايل للسرير
شاكر / و انتى كدا بتفرحيني يعني
فاطمه / مش بقيت بنت البطه السوده و ست شريهان الفرخه ام كشك
...........................