البر التانى بقلم / لولو_محمد (كامله )

الحلقه ١٠٥

((((((( البر التانى )))))))
#لولو_محمد
الحلقه ١٠٥
ناصر / بوس ايد ابوك و خليه يسامحك
عباده يبوس ايد شاكر هند تنزل من فوق
انتصار / تعالى يا حبيبتي ما رضيناش نصحيكي مختار قال انك نمتى متاخر قولنا نسيبك ترتاحى
هند / تسلمي
عباده / ادخل ؟
ناصر / اخر فرصه ليك
عباده يهز راسه و يطلع فوق الغفير يستاذن و يدخل
الغفير / لا مؤاخذه يا كبير الحج شاهين مستنى جنابك فى المضيفه انت و الحج شاكر
عباده ينزل من فوق ناصر يبصله و يتنهد
ناصر / يا ترى جاى ليه يا عباده
عباده يبص فى الارض و يروحوا التلاته و مختار يروح وراهم
فاطمه / السكه اللى تودى ما لو ما كانوش عملوا كل ده ما كانش حاجه من دى حصلت
انتصار / خلاص يا فاطمه
فاطمه / ان ما جوزته ست ستها ما ابقاش فاطمه
فاطمه تروح المطبخ و هى متعصبه و الكل بيبص لبعضه
........................
فى المضيفه
شاهين قاعد هو و مغاورى و رجاله كتير و ناصر و شاكر و مختار و عباده
ناصر / والله يا حج انا ما عارف اقولك ايه
عباده / اول و اخر مره والله ما هكررها
شاهين / كدا احسن للكل و بعدين الحاجات دى قسمه و نصيب
مختار / يا حج شاهين
شاكر / خلاص يا مختار ... لعله خير
عباده / ايوه يابا بس
شاكر / الجواز زى ما الحج شاهين قال قسمه و نصيب و ان كانلك نصيب فيها هتتلف تلف و ارجعلك
راجل / ليه هى خديجه بايره و لا ايه
شاكر / يبقي مالوش نصيب فيها
ناصر / خلاص يا رجاله ما يصحش كدا
الراجل / و هو اللى سى عباده عمله اللى يصح اوى
عباده / غلطت و بعترف بغلطى و عهد عليا مش هكررها
شاهين / تكررها و لا ما تكررهاش دى حاجه ترجعلك احنا جبنالك حاجتك و كل شئ قسمه و نصيب
ناصر / تمام يا حج اللى تشوفوه
شاهين يشاور للرجاله يمشوا عباده و مغاورى يبصوا لبعض و الكل يمشي و الزنايته واقفين يبصوا لبعض
شاكر / انا رايح ابص على الارض
شاكر يمشي
ناصر / تعال يا عباده نتمشي شويه بالعربيه عاوز اشوف المدرسه الجديده وصلوا فى بناها لحد فين
عباده / تمام يا حج اتفضل
مختار / اجى معاكوا
ناصر / تعال
ناصر و مختار و عباده يمشوا
امين / يروحوا يتشطروا على سى عباس بتاعهم اللى مش عاتق
سليمان / امين
امين / ايه؟ قولت حاجه غلط مش دى الحقيقه جايين نافشين ريشهم و بيتنطوا على ايه قال على راى المثل اللى بيته من ازاز
شاب / والله انا كمان شايفها تلكيكه عمايلهم من يوم المخزن اللى اتحرق و هى لا تسر عدوا و لا حبيب و ما عمالين يماطلوا اياكش عباده يزهق و يفسخ هو لحد ما جاتلهم على الطبطاب
سليمان / و مين اللى جبهالهم مش عباده مش معنى ان عباس بيغلط ان عباده يغلط زيه و مش معنى ان ماجده راضيه بعمايل عباس ان خديجه مجبره ترضي
راجل / و فى الاول و الاخر كل شئ قسمه و نصيب
امين / بس حسيت ان عباده ما زعلش ان الخطوبه اتفسخت
الشاب / ما قولتلك كانت مساله وقت مش اكتر اكيد هو كمان كان فاهم كدا و مستنى
سليمان / فضوها سيره الحكايه دى و ما تتكلموش فيها تانى و سبوها على الله
امين / ايوه بس
سليمان / خلاص يا امين خلصنا ما تعصبنيش عليك على الصبح و انتوا يا رجاله كل واحد يشوف شغله سيبه اللت ده للحريم ما يصحش كده يلا
الكل يتحرك و سليمان يمشي و هو متعصب
.........................
فى عربيه عباده
ناصر / و هتجيبهم منين الناس دول بقي ان شاء الله
مختار / و هى تعرف كل رجالتنا اللى فى مصر و اسكندريه يعني
ناصر / و الرجاله دى وزرها على مين
عباده/ انا متاكد يا كبير ان ده اول الخيط انا متاكد اننا لو
ناصر / انت بتقول ان البنت اللى هناك عارفاك و انكوا اول مره تروحوا قدمولكوا الخدمه دى مع ان ممكن كنتوا تبقوا حكومه
عباده / يعني منطقى ابقي اول مره اروح و اول تلت دقايق ليا فى المكان و ينزلنى تحت و حريم و كدا مش الاول اسكر شويه و اتفرج على الرقاصات و لا اى حاجه
مختار / ما يمكن المكان مشهور بكده و الناس بتجيله من كل حته عشان ده يا عباده
ناصر / بصوا يا رجاله انا مش مرتاح اننا نجبر حد على حاجه زى دى سكر و حريم و قله ادب و مسخره هم هيعملوها عشانا
مختار / رجالتنا مش كلهم ملايكه برده يا كبير فى منهم اللى بيعملوا كدا فعلا
ناصر / و انا ما اعرفش حاجه ليه عنهم دول
عباده / عشان هم مش مقصرين فى شغلهم خالص يا كبير فخلاص ربنا بيحاسب كل واحد على عمله
ناصر / الكلام ده ما بيمشيش عندى الرجاله دى
مختار / الرجاله دى هى الحل الوحيد قدامنا عشان ندخل المكان و نخرج و نعرف اللى بيحصل فيه
عباده / انا متاكد انهم بيتكلموا عربى مع انهم اكدولى انهم اجانب و ما بيتكلموش عربى و خد راحتك ليه اكد على خد راحتك لو ما كانش عاوزنى اتكلم
ناصر / الراجل ده جرى عليك اول ما دخلت صح
عباده / ايوه
ناصر / حطه تحت عينك الاول
مختار/ يا كبير احنا فى عرض كل يوم و بعدين احنا بقالتا شهر بحاله بنلف حوالين نفسنا عشان نوصل بس للنقطه دى خلينا نمشي الاتنين فى وقت واحد خلينا نحط كل اللى داخل و اللى خارج تحت عنينا و كمان خلينا ندخل على قد ما نقدر جواهم احنا كمان ممكن نستخدم الموضوع ده لصالحنا
ناصر / ازاى يعني
مختار / والله يا كبير انا عندى افكار كتير فى الموضوع ده بس انت اديني الاذن و صدقني مش هتندم
ناصر / مفيش اذن قبل ما اسمع و افهم و اقتنع
عباده / قوله كل حاجه يا مختار و اهو يمكن يكون له راى تانى
ناصر / او يمكن يكون الكبير و المفروض انكوا ما تعملوش حاجه الا اما ترجعوله
عباده / لا مؤاخذه يا كبير والله ما اقصد
ناصر / اتكلم يا مختار قول بتفكر في ايه
مختار / هقولك يا كبير
.........................
فى شقه محمود
يوسف / صدقني يا بابا الكافيه ده
محمود / يا يوسف انا مش معترض انا ما عييش
يوسف / احنا ممكن ناخد قرض بضمان المحل
محمود / يا يوسف
يوسف / دلوقت فى تسهيلات كويسه جدا على القروض للشباب
محمود / انا ما اقدرش اجازف بالمحل دا الحاجه الوحيده اللى بقيالنا
يوسف / يا بابا افهمنى احنا هناخد القرض و نعمل كافيه كبير يسندنا مع المحل
محمود / يا ابني الكافيهات ماليه البلد دا فى كل شارع اتنين و تلاته
يوسف / طب ما المحلات كمان ماليه البلد مش انت اللى دايما تقول الارزاق على الله
محمود / بس المحل دى شغلانتنا من زمان و فاهمينها انما الكافيه ده
يوسف / يا بابا ما انتوا اول ما فتحتوا المحل كنتوا لسه بتجربوا برده
محمود / لا يا حبيبي شوف انا قبلها اشتغلت كام سنه فى محل جدك و اتعلمت و شربت اصول الصنعه و بعد كدا فتحت مش فتحت و بعد كدا اتعلم و يا بختك يا ابو بخيت
يوسف / يا بابا صدقنى دى مكسبها مضمون ميه الميه خصوصا الماتشات بص فى دراسه الجدوى اللى انا عاملها
محمود / دراسه جدوى ايه هو انت بتسمى اللى انت عامله ده دراسه جدوى يا ابني انت حاسب تكلفه معلقه الشاى و السكر و نبيعها بكذا فى كام زبون فى اليوم طب فين الكهربا و الميه والعماله و ايجار المكان و التراخيص و الحى و الدعايا
يوسف / ما كل ده انا حاطه فى المصاريف فى الاول
محمود / بس الحاجات دى مش بتدفع مره واحده و تسكت و يا سيدى انت درست المنطقه دى يعني انت حددت ان يدخلك ميه و خمسين زبون فى اليوم على اساس ايه
يوسف / يا بابا دا القهوه البلدى بيبقي قاعد فيها و لا خمسين واحد
محمود / مهو سعر الشاى فى القهوه البلدى دى ما يجيش ربع سعر نفس كبايه الشاى عندك
يوسف / مهو قاعد فى مكان انضف و خدمه احسن
محمود / يبقي اكيد عدد الزباين عندك اقل
يوسف / مهو الناس دى مش هتبقي قاعده فى نفس الوقت دا على مدار اليوم يعني
محمود / يا يوسف يا حبيبي انا مقدر تعبك و حماسك انت لو بس توجهه المكان الصح
يوسف/ انت ليه علاطول بتحبطنى كدا انا عملت كل حاجه عشان ارضيك نزلت اشتغلت فى المحل و وقفت زى البياعين لما رجلى ورمت عشان تديني يوميتى و رايح جاى مواصلات عشان انت بعت عربيتي عايش معاكوا عشان بعتوا شقتى و برده مش عاجبك
محمود / يادى شقتك شقتك هكتبلك اللى احنا عايشين فيها دى يا سيدى اياكش تنزل من على ودانى بقي
يوسف / و انا هستفيد ايه بالشقه دى ما انتوا عايشين فيها
محمود / انت مش عاوز شقه تتجوز فيها
يوسف / لا كنت هاجرها و لا ابيعها و افتح الكافتريا بتاعتى
محمود / و هتعيش فين ان شاء الله و لا هتتجوز فين ان شاء الله
يوسف / جرا ايه يا بابا ما انا لازم يبقي عندى شغل عشان اتجوز
محمود / ما انت عندك شغل وبتقبض منه كويس الحمد لله
يوسف / انت فاكر ان اليوميه الهبله دى تفتح بيت
محمود / ده اللى عندى عندك شغلانه احسن روح اشتغلها بس بعيد عن دماغى ... و ادى ام اللقمه اللى ما عدناش عارفين نحطها فى بقنا فى البيت ده
محمود يسيب البيت و يمشي
يوسف / عاجبك كدا يا ماما
اسراء / يا ابني قولتلك استنى لما الظروف تتحسن شويه
يوسف / تتحسن ايه بس و استني ايه استني لما عمرى يضيع وانا قاعد جنبكوا
اسراء / شوفت بقي لو كنت سمعت كلامى من الاول ادى اللى اخدناه من ست هند
يوسف / يوووووه بقي دى ما بقتش عيشه
يوسف يسيب البيت و يمشي
اسراء / يعني هو انا اللى عايشه وسطيكوا ... قرفتونى
............................
فى اوضه خديجه
خديجه بتتكلم فى التليفون
خديجه / انا خلاص اخدت قرارى
هند / انا عذراكى و عارفه ان عباده غلط بس هو حلف مش هيكررها ما لوش خاطر عندك تسامحيه
خديجه / انتى مش مكانى لو كان مختار اللى عمل كدا
هند / جابولى صور مختار و ما صدقتش عيني قولت عمره ما يعمل كدا و فعلا طلعت مزقوقه عليه
خديجه / بس عباده راح هناك بمزاجه
هند / من خنقته شيطانه غواه و الحمد لله رجع و ما غلطش لحقناه
خديجه / غصب عنى يا هند ما تضغطيش عليا لو سمحتى
هند / هم بيضغطوا عليكي فى البيت هم اللى عاوزين الجوازه تبوظ ؟
خديجه / لا دا كان قرارى انا و ارجوكى يا هند كفايا بقي
هند / طب فكرى تانى
خديجه / انتى عامله ايه و معادك مع الدكتوره امتى
هند / تمام فهمت
خديجه / انتى غاليه عندى يا هند و كلكوا غالين و ما كنتش اتمنى ابدا ان الامور توصل للمرحله دى
هند / ان شاء الله كل حاجه ترجع زى ما كانت
خديجه / ان شاء الله هستاذنك عشان ورايا حاجات فى البيت عاوزه اعملها
هند / تمام ... مع السلامه
خديجه تقفل و تبتسم و تقوم تفتح الباب و تنزل تحت
........................
فى فيلا فيرا
مغاورى قاعد مع فيرا فى المكتب
فيرا / يوم الخميس يناسبك ؟
مغاورى / يناسبني هتطلعى كميه قد ايه ؟
فيرا / عشر صناديق كل صندوق وزنه عشره كيلو
مغاورى / مش كتير دول ؟
فيرا / انتوا مش بتقولوا ان سرقت اسرق جمل
مغاورى / و السلاح ؟
فيرا / كل السلاح اللى انت طلبته بنفس المواصفات و الكميه
مغاورى / تمام هبعتلك الموقع بكره لما اجهز كل حاجه و اشوف الرجاله
فيرا / مفيش مشكله خد وقتك
مغاورى يقوم يقف
فيرا / انت لسه ما شربتش الشاى بتاعك
مغاورى / كتر خيرك مره تانيه
فيرا / سمعت اللى حصل مع عباده
مغاورى / اسمعى يا بنت الناس اللى بينا و بينك شغل انما الحاجات العائليه ما لكيش دخل بيها
فيرا / خلاص خلاص انا بس كنت اقصد ان الحمد لله ما عدش في صله بينكوا تشفعلهم فكنت بفكرك بطلبى
مغاورى / انا هستلم السلاح و اطلعلك الحاجه بتاعتك اكتر من كدا ما لكيش عندى حاجه و مش عاوز منك حاجه
فيرا / انت شايف كدا ؟
مغاورى / ما تخلينيش اقولك يلعن الشغل على اللى عاوزين يشتغلوه بقي
فيرا / خلاص خلاص ما كنتش اعرف انك عصبى اوى كدا
مغاورى / انا عصبى
فيرا تحط ايديها على صدره و تقرب و تبص فى عنيه و تتكلم برقه
فيرا / خلاص .. حقك عليا
مغاورى يشد ايدها بعنف و يسيبها و يمشي و هى بتضحك
.........................
فى سرايا الزنايته تانى يوم
الرجاله متجمعه فى المكتب و مختار ماسك خريطه و بيشاور
مختار / لو دخلنا البضاعه عن طريق مطروح من ليبيا و مشينا بيها فى الصحره
عباده / دى مسافه كبيره اوى و ما تضمنش الطريق
شاكر / صعب تامن كل السكه يا مختار و السواقين و الرجاله مش هيستحملوا
ناصر / يبقي الحاجه تفضل فى مطروح و ننقلها خفافى خفافى
مختار / احنا لينا مخازن فى اسكندريه ممكن نقسم الحاجه بين مطروح و اسكندريه
عباده / طب ما ندخل الحاجه من السودان اقرب
مختار / كل السكك القديمه ما عدتش امان لازم ندور على سكك جديده بعيد عن عنين الكل خصوصا الجوارحه
عباده / بس كدا الشغل اللى كان هيخلص فى يوم هيخلص فى شهر
امين / و هياخد رجاله اكتر و مصاريف ددطططمختار / مفيش حل تانى قدامى اللى قدامه حل يتفضل
شاطر ض/ واد يا عباده فاكر الفيلم الاجنبى اللى كانوا حاطين مرايات فى العربيات الكونتاينر
عباده / انهى ده
شاكر / لما كانوا مخبيبن الحاجه فى العربيه من جوه و سادينها
عباده / بس دى كانت صناديق صغيره
ناصر / نفككها و نخليها حتت صغيره و نجمعها هنا
عباده / كدا الشهر بقى سنه
مختار / و اللى يخلصلك الحوار ده فى اقل من اسبوع
عباده / ازاى يعني
مختار / هقولكوا الاول هنجيب الحاجه من مطروح زى ما قولنا و بعد كدا نحطها فى المخزن بتاعنا و هناك الرجاله يفكوها و ....
........................
فى الصحرا يوم الخميس
مغاورى واقف و فى رجاله بتنقل صناديق من عربيه لعربيه و كل شويه يبص فى الساعه
مغاورى / طولتوا اوى فى ايه يا رجاله
راجل / خلصنا يا كبير
مغاورى / يلا
الرجاله يركبوا العربيات و يمشوا و عربيه فيرا تمشي فى الصحرا كتير تليفون السواق يرن
السواق / يس ... وى جست كروست ذا بوردر ... ون اور تيل ( ايوه .. عدينا الحدود .. قدامنا ساعه و ..)
فجاه العربيه تنفجر و بعيد فى وسط الصحرا شاب ملثم عنيه زرقا قاعد على ركبته و شايل ار بى جى على كتفه يقوم يقف و يمشي شويه لحد عربيه يركبها و يمشي
............................
فى فيلا فيرا
فيرا نايمه فى جاكوزى و بتشرب كاس يدخل راجل تشاورله يستنى و تشرب حبه و تحط الكاسه مكانها و تشاورله يطلع بره يطلع تتنهد و تقوم تلبس البرنص و الكاس فى ايدها و تروح تمسك التليفون و تتصل بحد
فيرا / اى نيد يور هيلب ( محتاجه مساعدتك )
.......................
فى سرايا الجوارحه
مغاورى داخل يلاقي عباس خارج
مغاورى / انت بتعمل ايه هنا
عباس / باخد هدومى
مغاورى / و انت كل ده ما كنتش اخدتها
عباس / بقولك ايه يا مغاورى خليك محضر خير انا كل اللى ليا فى البيت ده
مغاورى / انت صحيح ابن عمتى و جوز اختى بس كلنا جبنا اخرنا منك
عباس / و هى اول مره يعني اشمعن المرادى اللى عملتوا عشانها كل ده و لا عشان فتنا على سى عباده
مغاورى / كدا كدا الجوازه دى ما كانتش هتتم و انت عارف انها مساله وقت مش اكتر
عباس / امال ايه بقي ايه اللى جد
مغاورى / نورت يا عباس بالاذن عشان انا راجع تعبان
عباس / كان فى طلعه النهرده و لا ايه مش عوايدك ترجع متاخر اوى كدا
مغاورى / تصبح على خير يا عباس
مغاورى يسيب عباس و يطلع فوق عباس يمشي و يبص لفوق يلاقي ماجده باصه من الشباك يشاورلها و يركب العربيه و يمشي و ماجده متابعاه من فوق باب اوضتها يخبط تروح تفتح تلاقي مغاورى
ماجده / كان بياخد غيار نضيف و يشوف العيال
مغاورى / كنت فاكر انك هتاخدى العيال و تروحى تعيشي مع عباس
ماجده تبص فى الارض
مغاورى / غيرتى رايك و لا هو اللى ما رضيش ياخدكوا
ماجده / هيرتب مكان لينا هو دلوقت قاعد فى المكتب و مش هينفع ياخدنا دلوقت
مغاورى يمسك دقن ماجده و يخليها تبصله
مغاورى / تاكلى شوكلاته كنت جايبها للبت خديجه بس انتى اولى بيها
مغاورى يطلع شكولاته من جيبه و يديها لماجده
مغاورى / ابقي اجيبلها غيرها
ماجده / خليهالها انا عامله رجيم
مغاورى / يا شيخه بلا رجيم بلا كلام فاضي هو انتى فيكي حاجه كلى و ربربى و سيبك من الهبل ده انتى حلوه فى كل حالاتك
ماجده / هات
ماجده تاخدها و تاكلها مغاورى يبص جوه
مغاورى / العيال نايمين
ماجده / من بدرى
مغاورى / طب ما تيجي تقعدى معايا نتفرج على فيلم و لا حاجه
ماجده / شكلك راجع تعبان خليها وقت تانى
مغاورى / الحق يتقال و جعان و ما فيش غيرك صاحى دلوقت ما تخلى عندك دم و تعمليلى لقمه حلوه من ايديكى
ماجده / من عنيا
ماجده تروح تجيب طرحه و تحطها على راسها و تنزل و مغاورى ينزل وراها
.....................
فى اوضه هند
مختار واقف بيتكلم فى التليفون
مختار / والله كان نفسي استقبلك بنفسي بس للاسف انت عارف الظروف
شاب / عارف عارف المهم طمنى على الارنب بتاعى عامل ايه خلف و لا لسه
مختار / ما تبقاش طماع دا احنا حتى هنطبخهولك على ملوخيه خضره
شاب / عشان غلاوتك انت بس
مختار / المهم انا هبقي على اتصال بيك طول الوقت
الشاب / مفيش داعى انا وقت اللزوم هكلمك
مختار / بس بسرعه قبل الاكل ما يبرد
الشاب / ما تقلقش
مختار / حبيبي ... اسيبك بقي عشان زمانك تعبان و محتاج ترتاح
الشاب /سلام
مختار يقفل و يبص على هند نايمه يروح ياخدها فى حضنه تلف و تحط راسها فى حضنه يعدل الغطا عليها و يناموا
........................
فى مطبخ الجوارحه
مغاورى قاعد قدامه صينيه فيها فطير و عسل و جبنه و بيض عيون
مغاورى / انا ان ما كانش الفطير يغرق ايدي سمنه كدا ما اعترفش بيه ... تسلم ايدك الصراحه
ماجده / الف هنا احمرلك بطاطستين
مغاورى / لا كدا رضا اوى تعالى انتى بس كلى معايا و افتحى نفسي
ماجده / لا ما هو مش عشان اخدت الشيكولاتايه هبوظ باقي اليوم ان ما كانش عشان الرجيم يبقي عشان الكولسترول
مغاورى / ادى اللى خدناه من خديجه و علامها يا بت سيبك من الكلام ده ما طول عمرنا بناكل و ما بيحصلناش حاجه
ماجده / خلاص بقي يا مغاورى انا لو جعانه هاكل
مغاورى / براحتك اللى ياكل على درسه ... اعملى شاى اعملى شاى
ماجده / عنيا حاضر
مغاورى / هو عباس هنا بقاله قد ايه
ماجده / ما طولش زى ما قولت يادوب غير هدمته و بص على العيال و مشي
مغاورى / واطى من يومه ... ما سالش علينا ؟
ماجده / لا واخد على خاطره منكوا
مغاورى / له حق والله !!
ماجده تبص فى الارض
مغاورى / انتى عوزاه يرجع ؟
ماجده / اللى تشوفوه
مغاورى/ انتى انتى ... انتى عاوزه ايه ؟
ماجده تبص لمغاورى و تبتسم و تبص فى الارض
مغاورى / عوزاه يرجع ؟
ماجده / يرجع ... يرجع لعياله ... ليرجع لامه ... لاخواته و اهله
مغاورى/ و انتى ؟
ماجده تبص لمغاورى و تبتسم
ماجده / مفتكرش ان عمره هيرجعلى يا مغاورى مهما اعمل عمره ما هيرجع
مغاورى يغمس لقمه كبيره مليانه عسل و يحطها ناحيه بق ماجده
مغاورى / ما دام مهما تعملى عمره ما هيرجع يبقي تبطلى تحاولى
ماجده / ما انا بطلت من زمان
مغاورى / امال كل ده بتعمليه لمين الرجيم و الشعر و الحاجات دى كلها لمين
ماجده / لنفسي هو عشان هو مش شايفني و لا عاوزنى ادفن نفسي يعني اللبس و ادلع روحى انا حلوه و صغيره و الف من يتمنانى ان كان هو مش عارف قيمتي ان كانت الدنيا كلها مش عارفه قيمتي انا عرفاها
مغاورى يبتسم
ماجده / انا رميت طوبه عباس من زمان بس ما رميتش طوبه نفسي و على راي امى عدنه مات و لا مسافر انا لسه عايشه
مغاورى / يديكى طوله العمر
ماجده / انا ما بعملش ده عشانه انا ما بعملش ده عشان حد انا بحب نفسي و بحب ادلعها
مغاورى / و بيليق عليكي الدلع على فكره
ماجده تبصله بطرف عينها
مغاورى / طب والله بتكلم جد هو اللى فقرى طب تصدقى و تؤمنى بايه
ماجده / لا اله الا الله
مغاورى/ انا لو مراتى ما عملتليش اللى انتى بتعمليه ده و دلعتنى كدا انا هطلقها
ماجده / و انا كل ما اقول كبر و عقل
مغاورى / كبير و سيد العاقلين يا بت هو اكمنى باخد و بدى معاكى فى الكلام و لا ايه دا انا اخد شكولاتى وقتى
ماجده / اتاكلت خلاص
مغاورى / الف هنا
ماجده / انت شكلك فايق و رايق خير
مغاورى / والله كنت جاى تعبان بس القاعده معاكى نستنى الدنيا يخليكي ليا يا ست الكل ... الحمد لله شبعت
ماجده / الف هنا يلا اطلع ارتاح و انا هشطب هنا و اطلع وراك
مغاورى / تصبحى على خير
مغاورى يبوس راسها تبعدها
ماجده / اغسل بقك الاول
مغاورى يشدها بغباوه
مغاورى / اللحوس براحتى انتى فاهمه و لا لا
ماجده / يلاهوى عليك خلعت رقبتى
مغاورى / دلعناكوا اتمرعتوا علينا
....................................