البر التانى بقلم / لولو_محمد (كامله )

الحلقه ١١١

((((((( البر التانى ))))))))
#لولو_محمد
الحلقه ١١١
فيرا / سورى انا كنت متوتره و انت زنان
رشيد / طب متاكده انك مش هتعوزى حاجه من العبد لله قبل ما يمشي حاجه كدا كدا كدا
فيرا / امشي يا رشيد لما احتاجك هبقي ابعتلك
رشيد / هى بقت كدا خلاص .. خلصت مصلحتى من عند جارتى يعني
فيرا / رشيد
رشيد / ماشي خلاص
رشيد يروح ناحيه الباب شاب يديله الموبايل فيرا تبص فى التاب
فيرا / استني .. العربيه اختفت
..........................
رشيد / ازاى يعني اعملى ريفريش للنت يمكن فصل و لا بيحمل
فيرا / نت ايه اللى بتتكلم عنه العربيه مش ظاهره خالص عندى
فيرا تمسك الموبايل و تتصل بحد
فيرا / غير متاح
رشيد / يمكن الحته دى ما فيهاش شبكه
فيرا / شبكه ايه احنا بنشتغل على القمر الصناعى علاطول
رشيد / يعني ايه يعني
فيرا / لو طلع اللى فى بالى
فيرا تجز على سنانها و تكتم جواها و تتصل بحد تانى
فيرا / زديس فى ايديت .. فوزميت كوماندو اى اسليديتي ميزتا ( هبعتلك موقع خد فريق و استكشفه )
فيرا تبص لرشيد مركز معاها
.....................
فى المستشفى
الكل متجمع حوالين الدكتور
الدكتور / الحمد لله الاشاعه اللى عملناها بتقول ان ما فيش اصابات خطيرة نقلق منها و احنا اتعاملنا مع الباقي الحمد لله بس برده لازم يفضوا تحت الملاحظه على الاقل اربعه و عشرين ساعه لحد ما نطمن خالص على حوار الارتجاج اللى قولت لحضرتك عليه
ناصر / كتر خيرك يا دكتور تاعبينك معانا
الدكتور يمشي و ناصر يروح يقعد جنب شاكر كاتم الغضب جواه
ناصر / الحمد لله الدكتور طمنى هيخرجوا بكره ... هم كويسين بس زياده اطمئنان يعنى
شاكر / اللى حصل ده حصل ازاى يا ناصر
ناصر / مش عارف اقولك ايه يا عمى والله
شاكر / سمعت الرجاله سمعت قالوا ايه
ناصر / خلينا نطمن على رجالتنا الاول و بعد كدا
تليفون ناصر يرن
ناصر / و ادى سليمان اهو ... السلام عليكوا
سليمان / كلو تمام يا كبير و كلنا بخير و راجعين السرايا يا كبير
ناصر / لما توصل طمنى
سليمان / لما اوصل اطمنك !! انت مش فى السرايا و لا ايه ؟
ناصر / اه فى مشوار كدا هبقي اقولك عليه بعدين
سليمان/ تمام يا كبير لا اله الا الله
ناصر يقفل و يبص فى الارض
ناصر / كلو تمام يا عمى الحمد لله
شاكر / لما تبقي تقدر ترفع عينك فى وش هند و تقولها الحقيقه ابقي قولى كلو تمام
شاكر يسيب المكان و يمشي و ناصر بيبص عليه
..................
فى المخزن عند فيرا
فيرا رايحه جايه فى المكان و هى متوتره تليفونها يرن
فيرا / تيل مى اجود نيوز ( قولى اخبار كويسه )
صوت راجل / مكتار . اباده اند ابدالله ان ذا اى سي يو ( مختار و عباده و عبد الله فى العنايه المركزه )
فيرا / ادواردو ؟
الراجل / استيل اللايف ثانكس تو ذا بى كاى ( لسه عايش بفضل بى كاى )
فيرا / كيب مى اب دايتد ( بلغنى لو فى جديد )
فيرا تقفل الخط
رشيد / خير وصلوا
فيرا / لسه مش هم
رشيد ينفخ تليفون فيرا يرن
فيرا / بود تو يوفيرناى ( طمنى )
راجل / سيا كامندو بلا ابيتا .. امشينا زورفالاس ( كل الفريق اتقتل و العربيه انفجرت )
فيرا الغضب يبان عليها و تسند على كرسي و تجز على سنانها رشيدي متابع و ساكت فيرا تقفل الخط و تتصل بحد تانى
فيرا / برينج زيم تو مى اللايف ( هاتهملى احياء )
الراجل / هو ( مين ؟)
فيرا / اول زاير ومين ( كل ستاتهم )
رشيد عنيه توسع و يبص حواليه
....................
فى سرايا الزنايته
انتصار شايله صينيه عليها قرص تروح ناحيه الغفر اللى على البوابه
غفير 1/ تسلم ايدك يا ست الستات تعبتى روحك
انتصار / سخنه و طازه الف هنا
غفير 2 ياخد واحده
غفير 2/ والله جايه فى وقتها لسه كنت بقوله اعملنا كبايتين شاى
انتصار / الف هنا مش ناقصكوا اى حاجه
غفير 1/ تسلمى يا ست الكل
انتصار تبتسم و ترجع السرايا و العيال بتجرى ناحيه الجنينه الورانيه
انتصار / بالراحه يا عيال لحد يتعور
العيال ما تردش و تجرى و هى تبتسم فجاه عربيه نص نقل محمله رجاله لابسين صعيدي بسلاح تكسر البوابه و الرجاله ينزلوا منها يضربوا نار على الغفر انتصار عينها توسع و تجرى على جوه الرجاله ينتشروا فى الجنينه و يقتلوا باقى الغفر سماح و مريم و العيال يطلعوا من الجنينه الورانيه يشوفوا المنظر قدام السرايا يرجعوا انتصار تطلع من الفرنده و فى ايدها رشاش تضرب فى الرجاله الرجاله تتفرق و فى منهم يروح الجنينه الورانيه فاطمه تطلع من السرايا و تضرب بالنار فى الرجاله
....................
فى الجنينه الورانيه
مريم و سماح يزقوا العيال و يخلوهم يجروا مفيش مكان يخبوهم فيه يبصوا لبعض و يبصوا وراهم الرجاله حصلوهم
راجل 1/ احنا مش ناويين ناذى حد اسمعوا الكلام و اركبوا معانا
مريم / ودعت اهلك قبل ما تيجي تتهجم على حريم الزنايته
راجل 1/ ما تخلينيش ائذيكي يا بنت الناس امشوا معايا بالزوق احسنلكوا
ولد صغير / و ان ما مشيوش هتعمل ايه
راجل ٢ يضرب نار فى الارض تحت رجلين الولد الولد ما يتحركش
راجل ٢ / المره الجايه فى قلبك احنا مش هناذى الحريم انما انت ما لكش عازه
راجل ٢ يرفع السلاح لفوق و ينشن على صدر الولد ما بيتحركش
.......................
ناحيه قهوه
رجاله قاعدين بيشربوا شاى و يتكلموا
راجل ١ / اقسم بالله شوفتها بعيني الراجل كان زى الطور و التلاته نازلين فيه ضرب و فى الاخر رقدهم
راجل ٢ / بس مش اصول دى يعني راجل غريب يضرب ابن بلدك و انت واقف تتفرج
راجل ١ / و احنا هنقدر عليه بقولك رقد عباده و مختار و بعدين ما سى مغاورى كان موجود و ما عملش حاجه
راجل ٣ / ما تنساش انهم متخانقين برده يعني
راجل ٢ / و لو يا سعد الله برده انا و ابن عمى على الغريب و بعدين دا راجل بطوله و الكتره تغلب الشجاعه و لا ايه يا مجاهد
مجاهد / اللى يشوف غير اللى يسمع دا اقل واجب مبلبعله شريطين تلاته دا خرج ماشي لا متسند و لا حتى بيزك
راجل ٤ / المنظر كان مرعب يا رجاله دا طوح سى عباده كانه بيمرجح عيل صغير و لا سى مختار انا خفت يموت فى ايده
راجل ٢ / كل ده و انتوا واقفين تتفرجوا يا خساره على الرجاله
راجل ١ / و احنا بايدنا ايه نعمله اللعبه معروفه و ياما بيحصل فيها و فيها حكم الحكم ما ادخلش ندخل احنا ليه و الراجل كان بيلعب لوحده ضد تلاته و كلو قانونى و سى مغاورى كان واقف و بيتفرج و ساكت عاوزنا احنا اللى ندخل
راجل يدخل بيجرى و هو بيصرخ
الراجل / يا اهل البلد الهجامه دخلوا سرايا الزنايته و الحريم لوحدهم جواها يا اهل البلد ... اللحقوا يا اهل البلد ... حريم الزنايته بينضرب عليهم نار يا اهل البلد
الرجاله تبص لبعض و الكل يجرى من كل حته
.......................
فى سرايا الزنايته
هند تنزل تجرى من فوق و ماسكه مسدس فى ايدها فاتن تلحقها قبل ما تطلع من الباب
فاتن / استنى انتى رايحه فين خليكي جوه
هند / فاطمه لوحدها بره انتى حامل خليكي جوه لكن انا هخرج
فاتن / فوقى يا هند طلوعك هيبقي زى قلته انتى تقدرى تقتلى روح يا هند هتطلعى و تتخشبي خليكي جوه لسه بدرى عليكي
فاطمه تدخل بتنهج و تقفل الباب فاتن تبصلها و تتكلم بفزع
فاطمه / ما عرفتش اوصل للجنينه و سلاحى فضي
هند و فاتن يبصولها
فاطمه / الراجل بياخد بالطلقتين تلاته و يكمل عادى ايه الناس دى
انتصار تنزل تجرى من فوق تجرى على الباب فاطمه تمنعها  انتصار تصرخ فيها
فاطمه / على فين بطولك كدا هتموتى
انتصار / عيالي بره ... عيالي اوعى
فاطمه / مش هسيبك
هند / هو مفيش سلاح تانى
فاتن / باب المخزن فى الجنينه مفيش جوه السرايا
هند تبص للمسدس فى ايدها و فاطمه و انتصار ماسكين فى بعض هند تفتح الباب و تطلع بره و تنشن فى الدماغ يقعوا انتصار تطلع تجرى وراها و تجرى على المخزن
......................
فى الجنينه الورانيه
صوت ضرب النار شغال و الراجل منشن على قلب الولد
الولد / اضرب و لا خايف
راجل ٢ يضرب طلقه فى رجل الولد يقع فى الارض سماح توطى عليه و الكل يصرخ مريم تجرى على الراجل تجيبه من وشه و هى بتصرخ و نازله فيه ضرب بايديها الاتنين ما بيتهزش
مريم / يا ابن الكلب يا ابن الكلب يا واطى
الراجل يمسك مريم من ايديها و يحاول يشدها و هى بتحاول تفلت منه و تفلفص فى الارض التانى يدخل يشد سماح من فوق الولد العيال الصغيره كلها تجرى عليهم و يشدوا مريم و سماح و هم بيصرخوا كلهم
.......................
عند باب المخزن
انتصار توصل تلاقي المخزن مقفول بقفل تبص وراها هند سلاحها فضي و الرجاله كتير تحدف المسدس فى دماغ واحد ما يتهزش و بيجروا عليها تحاول تضرب واحد بوكس يمسك ايدها تلف نفسها و تقلبه فى الارض التانى يشيلها من ضهرها و الاول يقوم يمسك رجليها و هى بتصرخ فاطمه تطلع من جوه شايله سكاكين المطبخ و الستات يطلعوا كلهم بالمقشات و العصيان و السكاكين و يشتبكوا مع الرجاله انتصار تشيل طوبه كبيره من الارض و تحاول تكسر القفل عربيه مغاورى تخبط العربيه النص نقل و ينزل منها بمسدسين و يضرب كل الرجاله فى راسهم يوقعوا رجاله كتير تدخل وراه انتصار تفتح المخزن و صوت ضرب النار يقف انتصار تبص وراها الستات بيقوموا بعض من الارض و مغاورى و رجاله كتير مالين السرايا صوت طلقه من الجنينه الورانيه الكل يجرى يلاقوا سماح فى الارض و مريم نايمه فوقيها بتصرخ فيهم 
مريم / دى بنت يا ولاد الكلب
الاتنين رجاله واقفين بيبصوا لبعض
راجل ١ / ما كانش قصدى طلعت غلط
مغاورى يدخل يضربهم بالنار طلقات كتير و هو بيقرب ناحيتهم لحد ما يقعوا و يجرى على سماح و الكل وراه مغاورى يبص يلاقي سماح واخده طلقه فى بطنها و مريم ضاغطه بايديها على الجرح
مغاورى / هى حصلت يا ولاد الكلب
فاطمه تجرى تقعد على ركبها و تشدها فى حضنها
فاطمه / سمااااح بنتى
سماح بتعيط
سماح / اللحقيني يا اما انا بموت
مغاورى / لا مش هتموتى لا قومى قومى
مغاورى يشيل سماح من حضن فاطمه ما تمنعوش و يلف يلاقي هند ماسكه مسدس و منشنه عليه و هى بتنهج و تعيط
هند / سبها
مغاورى / هوديها المستشفي لازم تتلحق
هند / و انت بقي اللى هتلحقها ان شاء الله
انتصار تنزل سلاح هند
انتصار / لو بينا ايه هيلحقها
هند / انتى ازاى واثقه فيه اوى كدا هيخطفها من وسطينا
انتصار / عشان انا اللى مربياه ... اللحقها يا مغاورى
مغاورى يجرى بيها و راجل تانى يدخل يشيل الولد و يجرى ورا مغاورى و فاطمه قاعده فى الارض بتعيط و مش طبيعيه و مريم بتطبطب عليها
فاطمه / بنتى ... البت اللى حلتى هتضيع منى ... هقول لابوها ايه ..  البت راحه
انتصار تشد فاطمه من على الارض و تهزها جامد
انتصار / انتى هتولولى و لا ايه البت لسه عايشه و هتعيش
فاطمه تورى انتصار ايدها و تصرخ
فاطمه / دا دم بنتى اللى فى ايدي يا انتصار دم بنتى
انتصار تضربها بالقلم
انتصار / بنتنا كلنا و هتعيش و انجرى قدامى على المستشفي
انتصار تشد فاطمه و يمشوا خطوتين و تبص للكل
انتصار / ادخلوا السرايا و اقفلوا عليكوا الباب
هند / انا جايه معاكوا
انتصار / لا المخزن مفتوح حملوا سلاح للسرايا من جوه و اقفلوا عليكوا الباب على ما الرجاله يوصلوا
فاتن / حاضر
فاطمه / البت راحت البت اللى حلتى راحت
انتصار / اتحركى يا فاطمه اتحركى
انتصار تشد فاطمه و يمشوا و فاتن تبص على العيال و تتاكد ان كلهم بخير
فاتن / حد اتعور حد تانى فيه حاجه
هند عينها على الرجاله اللى واقفه
هند / فاتن ... ام عمر
فاتن تروحلها هند تبص على الرجاله فاتن تبصلهم
راجل / احنا هنقف على البوابه لحد ما الكبير و الرجاله يوصلوا ما تشيلوش هم يا ست ام عمر
فاتن تهز راسها
فاتن / على السرايا يا عيال على السرايا ... يلا يا هند
هند تتحرك ناحيه السرايا تلاقي الرجاله بتشيل الجثث و تحملهم على العربيه النص نقل تتخشب و تقف و الدموع تبدا تنزل منها و هى عينها على الجثث فاتن تدخل العيال و الستات تشيل صناديق سلاح من المخزن تدخلها السرايا و فاتن على الباب بتبص على هند و هى متخشبه و بتعيط تروحلها
فاتن / يلا يا هند تعالى جوه احسن
هند تبصلها
فاتن / اول مره فى البلد دى حد يهاجم بيت فيه حريم و اطفال و اللى عملوا كدا ممكن يعملوها تانى
هند ترفع ايديها بالراحه ايديها ترتعش و الدموع بتنزل من عنيها و صوتها مبحوح
هند / انا ... انا
فاتن / انتى ايه ؟
هند تبص على الجثث و تبلع ريقها فاتن تمسك وش هند بين ايديها و تخليها تبصلها
فاتن / انتى عملتى الصح حميتي روحك و حميتينا
هند تحاول تبص على الجثث فاتن تجبرها تبصلها
فاتن / اهدى اهدى
هند تهز راسها فاتن تاخدها فى حضنها و تحاول تحركها ناحيه السرايه هند تقع فى الارض مغمى عليها
......................
فى عربيه مغاورى
سماح نايمه على الكنبه ورا بتعيط من الوجع و مغاورى طاير
سماح / مغاورى
مغاورى / هنوصل يا سماح هانت هنوصل
سماح / انا خايفه اموت اوى
مغاورى / مش هتموتى مش هيجرالك حاجه هتخفى و تبقي زى الفل
سماح / انا خايفه يجوا يكملوا عليا
مغاورى / الراجل منهم يقربلك
صمت مغاورى يبص ورا يلاقي سماح بتفقد الوعى يزعق فيها
مغاورى / سمااااح
سماح ما بتردش
مغاورى / سماح ... سماح
مغاورى يفرمل العربيه و يبص ورا سماح فاقده الوعى
مغاورى / لا لا لا مش هتموتى لا
مغاورى يعدل نفسه فى الكرسي و يطير بالعربيه
......................
قدام المستشفى
مغاورى يركن العربيه و ينزل يشيل سماح الكل يجري عليه و ياخدوها منه على ترولى مغاورى يمسك الدكتور من هدومه
مغاورى / هتعيش انت فاهم
الدكتور يهز راسه مغاورى يسيبه ياخدوا سماح على جوه و هو واقف بيلف حوالين نفسه عربيه تانيه تفرمل و ينزل منها الراجل و يشيل الولد مغاورى يجرى عليه و ياخده منه
الولد / سماح عامله ايه
مغاورى / هتبقي كويسه يا بطل يا بخت عم سليمان بيك
الولد يبتسم مغاورى يحطه على ترولى و ياخدوه جوه
شاهين يدخل المستشفى
شاهين / ايه اللى حصل ده يا مغاورى
مغاورى / هنعرف يا بويا هنعرف
مغاورى يسيب المكان و يمشي زى الطور الهايج عربيه تقف و فاطمه وانتصار ينزلوا منها
انتصار / البت عامله ايه يا مغاورى
مغاورى ما يردش و يطير بالعربيه فاطمه تجرى على المستشفي تلاقي شاهين
فاطمه / بنتى فين بنتى  
شاهين / اهدى يا ام عباده هتبقي كويسه ان شاء الله ما تقلقيش
انتصار / ما شوفتش ناصر يا خويا
شاهين / انا لسه واصل ما شوفتش حد اكلمهولك
انتصار / ياريت جينا كدا لا موبايل و لا حاجه
شاهين / ما تقلقيش يا ست الكل اطلبهولك و لحد ما يجي رقبتى ليكي
انتصار / تسلم و تعيش يا خويا تسلم و تعيش
شاهين يتصل على ناصر فاطمه تجرى على الاستقبال
فاطمه / ابوس ايدك يا بنتى
البنت / اؤمريني يا ام عباده حالا اخدك لاؤضه سى عباده
فاطمه تبصلها باستغراب و تبص لانتصار
فاطمه / هو عباده لحق يجي امتى
البنت / الله !! امال انتى جايه لمين يا ست الكل
فاطمه / هو عباده فى المستشفي عباده ابنى انا هنا فى المستشفي
انتصار تدخل و تبص لفاطمه
البنت / ايوه يا ام عباده جابوه امبارح هو و سى مختار و معاهم سى عبد الله اخو الست هند
انتصار / انتى بتقولى ايه انتى انتى بتقولى ايه
شاهين / اهدى يا ست الكل انا هفهمك كل حاجه
انتصار / انا مش عاوزه  افهم حاجه اوضتهم فين اوضتهم فين انطقى
البنت تبص لشاهين و تفهم انها عكت الدنيا
.......................
قدام بيت شيري
عربيه ناصر تقف و وراها عربيتين و ينزل منها و وراه رجاله كتير ناصر يطلع يجرى يخبط على الباب ما حدش يرد يرزع جامد ما حدش يرد ست من فوق تنزل تجرى
الست / سى ناصر اهلا و سهلا اهلا و سهلا
ناصر / الحجه ام عبد الله
الست / لسه ما جاتش من الحضانه خير يا خويا فى حاجه و لا ايه
ناصر / تشكرى بالاذن
ناصر ينزل يجرى يبص لاتنين رجاله
ناصر / هتفضلوا هنا يمكن ترجع تجيبوها على البيت هى و البت الصغيره مش هتقولولها حاجه قولولها بس الكبير عاوزك انتوا فاهمين
الراجل ١ / اوامرك يا كبير
ناصر / مين فيكوا يعرف الحضانه دى تطلع فين
راجل ٢ / انا عارف يا كبير فى شارعنا
ناصر / بسرعه على هناك
الكل يركب و ناصر يسوق بسرعه
......................
فى الحضانه
شيري واقفه وسط العيال باب الحضانه يخبط بفزع شيري تجرى تفتح الباب تلاقي ست
الست / اللحقي يا ام عبد الله اللحقي الرجاله هجموا على سرايا الزنايته و الحريم لوحديهم
شيري / انتى بتقولى ايه
الست / اول ما سمعت الخبر جيتلك جرى
شيري تيجي تجرى
الست / و البت الصغيره
شيري ترجع تبص على ياسمينا بتجرى وسط العيال شيري تجرى تروح تشيلها و تنزل تجرى و الست بتجرى وراها اول ما توصل فى الشارع تنادى عليها و هى بتجرى وراها
الست / يا حجه ام عبد الله يا حجه استني هتروحى المشوار ده كله على رجلك تعالى معايا عربيه
شيري تقف و ترجعلها
شيري / ربنا يباركلك
الست تبتسم و شيرى تركب ورا هى و ياسمينا و الست تركب قدام
الست / اطلع على السرايا
راجل بدى بيلدينج يهز راسه حاضر و يسوق و شيري ورا متوتره
شيري / بسرعه يا خويا اللهى لا يسيئك
الست / ما تقلقيش يا ست الكل هنلحقهم ان شاء الله
شيري تهز راسها و تبص من الشباك و العربيه بتتحرك
..................
فى المستشفى
فاطمه و انتصار و وراهم شاهين يجروا فى الكوريدور ناحيه اوضه واقف قدامها اربع رجاله ينتبهوا لما يشوفوا انتصار و فاطمه داخلين يبصوا لبعض
انتصار / هى دى الاوضه
شاب ١ يهز راسه و يفتحلها الباب تشوف التلاته تقع فى الارض و فاطمه تسندها
....................
فى المخزن عند فيرا
فيرا رايحه جايه و رشيد متابعها
رشيد / انا عارف ان الوقت مش مناسب يس لامؤاخذه يعني
فيرا تطلع مسدس و تضرب طلقتين على رشيد واحده يمينه و واحده شماله
فيرا / ما تخلينيش ازعلهم عليك
رشيد / ياريت كان عندى اللى يزعل عليا
فيرا تبصله تليفونها يرن تغمض عينها و تحاول تهدى و ترد
فيرا / طمنى
الراجل / انا عملت اللى امرتى بيه بس
فيرا / فشلت ..  بس فشلت مش كدا
الراجل / اهل البلد ادخلوا انا قولتك شوفى اى حاجه غير الحريم
فيرا / لو البنات دول ما كانوش عندى النهرده انا هاجى بنفسي اخد بناتك انت سامعنى و لا لا
الراجل / انا عملت كل اللى امرتيني بيه انا عملت كل اللى
فيرا تقفل السكه
رشيد / شكل المكالمه ما كانتش ولا بود
فيرا تبصله بغضب
رشيد / انا خلصت شغلى سبيني امشي و اعملى اللى يريحك انا مالى بكل ده
رساله توصل لفيرا تبص فى الموبايل
////////
مامه هند و اختها معانا و احنا فى الطريق للفيلا
////////
فيرا تبتسم و تتنهد
فيرا / اخيرا حد فى البلد دى عمل حاجه صح و فلحت معاه انا فى حياتى ما شوفتش افشل من المصريين
رشيد / ما تجيبي رجاله من بلدك ما دام احنا مش عاجبين
فيرا / ليه و انا هبله اجازف برجالتى خليهم مصريين فى بعض يخلصوا على بعض خلى البلد تنضف
رشيد / خلاص ما تزعليش بقي اما اللى انتى عوزاه ما يتمش
فيرا / واضح فعلا ان ما عندكش اللى يزعل عليك
رشيد / و لا عندى اللى ازعل عليه فيا تقتليني يا تسبيني امشي عشان زهقت
فيرا / و ان ما سبتكش تمشي هتعمل ايه يعني
رشيد يقوم يقف و و يعدل هدومه و يروح ناحيه الباب الرجاله تقفل عليه الطريق يبص لفيرا تشاورلهم يوسعوا يبتسم و يحيها براسه و يمشي فيرا تروح تقف فى جنب و تنفخ و هى متعصبه
......................