البر التانى بقلم / لولو_محمد (كامله )

الحلقه ١٤١

(((((( البر التانى ))))))
#لولو_محمد
الحلقه ١٤١
على مدخل البلد
غفر واقفين فارس يعدى بعربيته يركن و ينزل منها
فارس / مساء الخير يا رجاله
غفير ١ / مساء النور يا فارس باشا
فارس / انا لسه جديد هنا و مش واخد على الجو ده انتوا عارفين ان دا شارع عمومى يعني مش من حقكوا انكوا تنصبوا كمين هنا
غفير ٢ / كمين ايه يا باشا احنا حيالله بنشرب شاى اصبلك كبايه
غفير ١ / و بعدين احنا لا منعنا حد يطلع و لا حد يدخل و زى ما سعاتك قولت قاعدين فى ملك الحكومه و مفيش قانون يمنع اننا نقعد نشرب شاى
غفير ٢ / سكرك ايه يا فارس بيه
فارس / مره تانيه عشان مستعجل
فارس يسوق و يطلع بره البلد غفير ٢ يطلع موبايله
الغفير / ايوه يا سي مغاورى ... فارس باشا خرج بره البلد
....................

على النيل
مختار و هند قاعدين فى العربيه مختار بيشرب سفن و هند بتاكل شيبسي
هند / المنظر من هنا تحفه
مختار / اجمل حته فى البلد
هند / لا و انت عامل حسابك و شارى حلويات و مظبط الدنيا كنت عارف اننا هنيجي النهرده و لا ايه و لا يكونش البيه بيجي هنا من ورايا
مختار / باجى هنا من وراكى
هند / افندم !!!
مختار / لما بكون مضايق و عاوز ابعد عن الناس باجى هنا و الحاجات دى مش حاجتى اصلا
هند / بتهزر
مختار / والله ما بتاعتى ... بتاعه عبد الله كان شاريها لمريم و نسيها قولت رزقنا بقى انا اساسا كنت ناسيها لولاكش انتى لما ركبتى شوفيتها ... هبقى اجبله بدالها بقى
هند تبتسم و تبص الناحيه التانيه و ترجع تبصله
هند / بطلت تطلع على السطوح انت
مختار / متراقب
هند / ههههههههههههههههههه
مختار / هتسبيني اطلع يعنى
هند / هطلع معاك
مختار / يبقى سريرنا اولى بينا
هند / اتلم
مختار / الله !!!
هند / بقالى ياما اوى ما خرجتش بجد مش عارفه اشكرك ازاى
مختار / احنا بس ننول الرضا
هند تبتسم و تبص الناحيه التانيه مختار يمد ايده و ياخد شيبسيايه الناحيه التانيه بعيد فارس يركن العربيه و يبتسم
فارس / من يومى مرزق
فارس يرجع بالعربيه و يركن بعيد و ينزل و يفتح شنطه العربيه فيها واحد نايم
فارس / اتز يور لكى داى ذا تارجت ايذ هير ( النهرده يوم سعدك الهدف هنا )
شاب ينزل من العربيه
فارس / دونت فورجيت وى نيد زيم اللايف ( ما تنساش احنا عاوزينهم عايشين )
الشاب / زيم ( هم )
فارس يبص على عربيه مختار مختار نزل منها و راح سند على الكابوت و هند راحت سندت معاه و بصوا على النيل الشاب يبص لفارس و يهز راسه و يبتسم فارس يروح يفتح الباب الورانى و يرفع الكنبه تحتها اسلحه الشاب ياخد مسدسين و خزنتين و يحطهم فى جيبه فارس يقفل الكنبه
فارس / دونت مايك هير انجرى ( ما تزعلهاش منك )
الشاب يهز راسه فارس يركب العربيه و يبعد اكتر و الشاب يدارى و يتحرك و مختار و هند قاعدين بيضحكوا فجاه الشاب يضرب طلقه على العجله اليمين الورانيه مختار يزق هند من راسها لتحت و ينزل معاها و يحط ايده على ضهره ما يلاقيش المسدس يبص لهند بنظره صدمه الطلقه التانيه فى العجله الشمال ورا هند تبص لمختار يبتسم
مختار / مهما حصل ما تتحركيش من هنا تمام
مختار يجى يقوم تمسكه من هدومه كذا طلقه فى شنطه العربيه واحده منهم تيجي فى الازاز الورانى تكسره و هند تصرخ فى مختار
هند / هتروح فين و انت من غير سلاح 
مختار / هجيب سلاحى من العربيه
هند / هيقتلوك
مختار / هستناهم يعنى
صوت ضرب نار كتير و فجاه سكوت
مغاورى / مختار
مختار / مغاورى
مختار يبص لهند و يبتسم و يقوم يقف يبص يلاقى مغاورى و الشاب نايم فى الارض 
مغاورى / انت كويس ؟ هى كويسه ؟ فيكوا حاجه ؟
مختار يوصل لمغاورى
مختار / الحمد لله جت سليمه
مغاورى يديله بالبوكس يوقعه فى الارض
مغاورى / انت غبى ياله خارج بيها من غير حراسه
هند تجرى على مختار
هند / مختار ... انت اتجننت
هند تقوم مختار من الارض
مغاورى / و انتوا ما شاء الله على عقلكوا ان كنتى انتى و لا جوزك
هند / و انت مالك
مختار / هند
هند / انت كويس
مختار يهز راسه و يبص لمغاورى
مختار / شكرا
مغاورى يبص لهند هند تبص الناحيه التانيه
مغاورى / عرفت ان فارس خارج بره البلد
نور جاى من بعيد التلاته يبصوا عربيه فارس جايه عليهم
مغاورى / جبنا فى سيره الكلب
فارس يفرمل و ينزل من العربيه و يطلع مسدسه مختار يجيب هند ورا ضهره
فارس / ايه اللى بيحصل هنا
مختار / زى ما انت شايف الحيوان ده كان بيحاول يقتلنى و يسلم مغاورى
فارس يبص على هند مداريه فى ضهر مختار و يبص على العربيه
فارس / و انت ايه اللى خرجكوا السعادى
مختار / هو فى حظر تجوال و انا ما عنديش خبر بيه و لا ايه ... يا باشا
فارس / انت قولى ... غفر متنطورين فى كل حته .. مش انت اللى كنت لابس واقى ضد الرصاص اول ما اتقابلنا و مستهدف ... على العموم زى ما كلنا شايفين فى جريمه قتل حصلت و القانون
مغاورى / ياخد مجراه ... على راسنا ... بس زى ما الباشا شايف معانا حريم نروحها و احنا تحت امرك
فارس / دا على اساس انها ما حضرتش اللى حصل و لازم تشهد و لا ايه يا مغاورى بيه
مختار يبص لهند و يبص لفارس
مختار / و ماله يا باشا حقك و حق الحكومه
فارس يهز راسه و يبص على هند
.......................
فى سرايا الزنايته
كل الرجاله بتخرج من السرايا و تركب العربيات بسرعه و انتصار تطلع تقف و الفزع باين عليها عبد الله يفتح المضيفه و مش فاهم حاجه العربيات تجرى برا السرايا عبد الله يجرى على انتصار
عبد الله / هو فى ايه يا ام فاتن
انتصار تبص لعبد الله
عبد الله / حاجه حصلت هم رايحين فين كلهم كدا السعادى
انتصار / ما فيش حاجه يا ضنايا ادخل ارتاح زمانهم راجعين
عبد الله يبص على البوابه و يبص لانتصار و يهز راسه لا
عبد الله / فى حاجه حصلت فى حاجه كبيره حصلت
عبد الله يجرى على المضيفه يفتح الدرج و يطلع مسدسه انتصار تدخل المضيفه
انتصار / ما فيش حاجه يا عبد الله قولتلك ما فيش حاجه
عبد الله يبصلها
عبد الله / الرجاله كلهم خرجوا هروح اقعد على البوابه مع الغفر
انتصار تبتسم و تهز راسها عبد الله يبصلها
عبد الله / بس انا عارف ان فى حاجه حصلت
انتصار / مختار و هند خرجوا من غير ما يقولوا لحد و انضرب عليهم نار
عبد الله عنيه توسع انتصار تلحقه
انتصار / بس هم بخير ما اتخدشوش مغاورى لحقهم بس فارس الكلب خدهم على القسم يقفلوا المحضر
عبد الله يبص فى الارض
انتصار / ما تخافش والله بخير هم لو فيهم حاجه انا كنت هقف قدامك كدا
عبد الله يهز راسه و يطلع بره و انتصار تطلع وراه تشوفه بيقعد جنب الغفير و بيبص فى الكاميرات و يبص على انتصار تبتسمله يبص فى الكاميرات تانى تتنهد و تدخل السرايا
................................
فى القسم
فارس قاعد على المكتب و هند قاعده قدامه و فى واحد بيكتب المحضر
فارس / و انتوا متعودين تروحوا المكان ده كتير
هند / اول مره ... من فتره طويله جينا قبل كدا مره ... تقريبا
فارس / شكلك متوتره ... طبيعي بعد اللى حصل
فارس يقوم يقعد قدام هند
فارس / اطلبلك لمون
هند / شكرا مش عاوزه
فارس / كنتوا بتعملوا ايه هناك بقى فى وقت زى ده
هند / عادى بنتكلم
فارس / فى ايه ؟
هند / واحد و مراته هيتكلموا فى ايه ... و بعدين انت مش شايف انك بتسال اساله ما لهاش اى علاقه بالحادثه
فارس /  و انتى بقى اللى هتعرفيني شغلى و لا ايه
هند تبصله و تبص الناحيه التانيه على الراجل الراجل بيبص لفارس
فارس / انا مش مقتنع باللى حصل
هند تبص لفارس
فارس / ليه ما يكونش الجدع ده معرفه مثلا و انتى ...
هند / اياك تنطقها
فارس يبتسم و الراجل يبص لفارس تانى
هند / لو خلصت ممكن امشى ؟
فارس / تؤ لسه ما خلصتش
هند تبص الناحيه التانيه و تكتم جواها
فارس / انتى تعرفى الجدع اللى مات ده ؟
هند / قولتلك لا
فارس / امال اتهجم عليكوا ليه
هند / قولتلك قبل كدا ما اعرفش ... انت بتسال نفس الاسئله تانى ليه
فارس / انا هنا اللى بسال و انتى تجاوبى الراجل ده له اى علاقه بالست اياها
هند تبص لفارس
فارس / اول ما جيت البلد مختار قال انه مستهدف و عباده قال ان فى ست بتربط الرجاله من رقابيهم و تسحبهم وراها زى الكلاب
هند تبص فى الارض
هند / انا ما اعرفش انت بتتكلم عن ايه
فارس /  متاكده ؟
هند تبصله
فارس / مش خايفه على جوزك ؟ مش يمكن تتكرر تانى ؟
هند / انا ما اعرفش حاجه
فارس / يعنى مش عاوزه تعترفى
هند / بايه ؟ انا قولتلك الحقيقه خرجت مع جوزى و ده ضرب علينا نار حتى مختار ما كانش معاه سلاح يدافع عن نفسه و الحمد لله مغاورى قتله فين المشكله هنا فين
الباب  يتفتح و عسكرى يدخل و معاه كارت
فارس / خليه يدخل يا ابنى
العسكرى يخرج
فارس / انتى مش محتاجه محامى
عباس يدخل
عباس / عباس الجارحى
فارس / غنى عن التعريف اتفضل اتفضل
هند تبص لعباس و تبص فى الارض
فارس / ما كانش فى داعى يتعبوك و انت على ما سمعت كنت متصاب قريب
عباس / الحمد لله بقيت بخير تسلم
فارس / احنا خلصنا مع مدام هند تقدر تتفضل
هند تقوم تقف
فارس / تمضى بس على اقوالها
هند تروح تمضى
فارس / هنتقابل تانى يا مدام هند
هند تبصله و تبص لعباس
فارس / تمام يا متر احنا خلصنا تقدر تمشى بس ياريت ما تطلعيش بره البلد يمكن نبعت نجيبك
هند تبص لفارس
فارس / لو احتجنا ناخد اقوالك تانى و لا حاجه
هند تبص فى الارض و تهز راسها
فارس / تقدرى تتفضلى
هند تجرى تفتح الباب و تطلع بره تلاقى مختار واقف جنبه مغاورى و الناحيه التانيه الزنايته واقفين هند تروح ناحيه مختار العسكرى ينادى عليه
العسكرى / سى مختار ... فارس بيه عايزك
هند تقف وتبص لمختار يعدى من جنبها
مختار / روحى لناصر
مختار يدخل جوه و الباب يتقفل هند تروح ناحيه ناصر
امين / انتى كويسه الجدع ده عملك حاجه
هند تبص لناصر و الدموع تنزل من عنيها
ناصر / تعالى
الرجاله توسع و ناصر يمشى و هند وراه يروح يفتح العربيه و يركبها و امين واقف
ناصر / هاتلها حاجه ساقعه من الكشك
امين يهز راسه و يجرى
ناصر / انتى كويسه
هند / الجدع اللى جوه ده
ناصر / عملك حاجه
هند / مش راضى يصدق عاوز يتهمنا ان احنا اللى قتلناه .. دا بيسالنى عن فيرا
ناصر /  قولتيله ايه ؟
هند / قولتله انى ما اعرفش بيتكلم عن ايه
ناصر / جدعه
هند تعيط ناصر يشد مناديل من العلبه على التابلوه و يناول هند
ناصر / انشفى انتى مراه مختار الزيني ارفعى راسك
هند تبصله ناصر يناولها المناديل
ناصر / امسحى دموعك
هند تاخد المناديل و تمسح دموعها و تبص فى الارض امين يوصل و يديله ازازه سيفن ناصر ياخدها و يشاورله بدماغه امين يهز راسه و يمشى ناصر يناول هند الازازه
ناصر / اشربى ... هدى نفسك ... انا ممكن اروحك
هند / لا ... مختار
ناصر/ عارف عارف عشان كدا كنت هكمل و اقول انك مش هترضى تمشى و تسيبى مختار
هند / الجدع اللى جوه ده
ناصر / مش قدنا الجدع اللى جوه ده بطوله و احنا البلد بحالها و زياده
هند تبص لناصر
ناصر / لو حد هيخاف من التانى يبقى هو اللى يخاف مش احنا ... عرفتى ليه بدا بيكي
هند تهز راسها
ناصر / والله اللى عمرى ما حلفت بيه باطل لدفعه تمن دموعك دى بس اشربى انتى دلوقت و اهدى
هند تهز راسها و تشرب بق ناصر يبتسم و يهز راسه
...........................
فى القسم
مختار / انا قولتلك اللى حصل
فارس / يعنى مش الست اياها اللى بعتاه
مختار / ست مين
فارس / اللى بتربط الرجاله و تسحبهم وراها زى الكلاب
مختار / مش عارف انت بتتكلم عن مين
فارس / امال عباده كان بيتكلم عن مين
مختار / كان بيهزر
فارس / امال كنت لابس درع واقى ليه و قولتلى انك مستهدف ليه كلكوا كنتوا لابسين درع واقى يوميها ليه
مختار يبص لفارس فارس يبتسم
مختار / عشان مستهدف
فارس / حلو اوى جميل قولى بقى مين اللى مستهدفك
مختار / ما اعرفش الفتره اللى فاتت حصلت حوادث كتير فى البلد و اخرهم عباس
مختار يشاور على عباس
فارس / و مع كدا خدت المدام و خرجتوا فى ساعه زى دى و لوحدكوا على النيل لا و من غير قميص واقى كمان و لا انت ما بتلبسوش غير وسط الرجاله
مختار / غلطه ما كانش المفروض اعملها
فارس / ايه اللى خرجوا الوقت ده
مختار / قولتلك كنا بنغير جو اتخنقنا من السرايا بقالها ياما ما بتخرجش
فارس / ليه
مختار / تعبانه
فارس / خير كفاها الله الشر
مختار / كانت حامل و نزلت
فارس / اااااه بس انا لما كنت عندكوا كانت كويسه ما شاء الله
عباس / فارس باشا هو مختار او جماعته متهمين بحاجه
فارس / لا لا احنا بس بندردش بحاول بس افهم اللى حصل
مختار/ و انا شرحتلك اللى حصل و ما يتهياليش ان اقوالى فرقت عن اقوال مراتى و لا هتفرق عن اقوال مغاورى
فارس / اهو ده بقى حكايه تانيه انت و مراتك و خارجين سوا حقكوا طبعا خصوصا انكوا برده عرسان جداد مغاورى بقى كان بيعمل ايه هناك
مختار / نجده من ربنا لينا يتكتبلنا على ايديه عمر تانى
فارس / سبحان الله ... هقولك نفس الكلام اللى قولته لهند
مختار يبص لفارس
فارس / انا مش مقتنع باى حاجه من الحكايه دى
مختار / دى حاجه ترجعلك مسرح الجريمه قدامك عاين العربيه و الطلق اللى انضرب فيها طلع من سلاح مين و شوف السلاح ده عليه بصمات مين و الطلق اللى فى جسم ابن الكلب ده طلع من سلاح مين و انت تعرف الحقيقه
فارس / ما كل ده سهل يتلعب فيه
عباس / فارس باشا حضرتك بتتهم موكلى
فارس / ابدا ابدا قولتلك اننا بندردش بس
مختار / انا قولت الحقيقه
فارس يهز راسه
فارس / تمام يا مختار تعال امضى على اقوالك و امشى انا متاكد ان هند بره مستنياك
مختار يقوم يمضى
فارس / اعصابها تعبانه من الخضه بس الشهاده لله بت اسد
مختار يبصله
فارس / واحده غيرها كانت انهارت عن كدا
مختار / احنا صعايده و الحاجات دى
فارس / بس تحرياتى عنها انها مش من الصعيد من مصر
مختار / من عاشر القوم اربعين يوم يا فارس بيه
فارس / بجد طب والله طمنتنى انا كدا بقيت منكوا بقى و لا لسه عليا شويه
مختار / ممكن امشى و لا حضرتك محتاج منى حاجه تانى
فارس / ياريت تقول لهند ما تزعلش منى ان كنت ضغط عليها كدا و لا كدا انا بس كنت بشوف شغلى مش اكتر
مختار / ما يكونش عندك فكر
فارس يبتسم مختار يطلع بره و هو كاتم جواه و يبص لمغاورى امين يروحله
امين / ايه الاخبار
العسكرى ينده على مغاورى
العسكرى / سى مغاورى
مغاورى يقوم يدخل جوه و يعدى من جنب مختار
مختار / هند فين
امين / فى العربيه بره مع الكبير
مختار يطلع بره و هو بيتكلم فى التليفون
فيرا / ما تقولش وحشتك
مختار / قسما بالله لندمك على اللى عملتيه النهرده ده
فيرا / ما قولتلك مستنياك الا انت اتاخرت كدا ليه
مختار / هيجي عليكي اليوم اللى تندمى فيه على كل فرصه كان ممكن تقتليني فيها و ما قتلتنيش
فيرا / دول كتير اوى يا مختار حتى دلوقت و انت بتكلمنى بس انا مش هقتلك يا مختار انا هخليك انت اللى تموت نفسك
مختار يطلع بره القسم و يقف
مختار / عشم ابليس فى الجنه 
فيرا / هو مغاورى مقالكش انا نويالك على ايه ... اخص عليه
مختار / اعلى ما فى خيلك اركبيه
هند تشوف مختار تنزل من العربيه و هو عينه عليها 
فيرا / الاول هقتل كل حبايبك و هاخد هند و مريم و اخليك تشوفهم قدام عنيك و انا ببيعهم و لا اقولك انا مش هبيعهم انا هرميهم لكلابى يتسلوا عليهم و اخليك تتفرج عليهم
هند تتحرك ناحيه مختار
فيرا / هخليك تسمع صريخهم و ما تقدرش تعملهم حاجه و هنشوف بقى هتقدر تستحمل اللى بيحصل ده قد ايه
هند توصل لمختار
مختار / كان غيرك اشطر
مختار يقفل السكه
هند / انت كويس ؟
مختار يبتسم و يهز راسه و ياخدها ناحيه العربيه اول ما يوصل
ناصر / لما نروح حسابك معايا عسير
هند / انا اللى
ناصر / هند
هند تسكت و تبص على مختار و تبص فى الارض مختار يفتحلها الباب اللى ورا تركب يقفل الباب
ناصر / كنت بتكلم مين 
مختار /  بعدين
ناصر يبص على هند و يبتسم
ناصر / روحها و انا هستنى مغاورى و احصلك
مختار يهز راسه و يروح يركب و يسوق و ناصر متابعه
............................
فى القسم
مغاورى / للمره العاشره بقولك صدفه كنت معدى بالصدفه
فارس / سبحان الله
مغاورى / ربك بيسبب الاسباب ليهم عمر
فارس / يعنى انت مش شايف انها غريبه انك تخرج من البيت من غير سبب و تتمشى فى الشوارع
مغاورى / ما غريب الا الشيطان يا باشا دى عادتى بحب اعدى فى الشوارع بالليل اطمن على الناس
فارس / و هم نايمين
مغاورى / ما سيدنا عمر كان بيعمل كدا
فارس / ما شاء الله و انت بقى عمر عصرك و اوانك
مغاورى / استغفر الله اش جاب لجاب بس هو يعنى عشان مش هنقدر نبقى فى مقامه نقوم ما نخدوش قدوه
فارس / انا مش هكدب عليك انا لا ههدى و لا يرتاحلى بال الا اما اعرف مين الجدع ده
مغاورى / طب بالله عليك يا باشا لما تعرف تقولى و ياريت تقولى دخل البلد ازاى
فارس / هو مش من هنا
مغاورى / لا لو كان كنت عرفته و كنت دليتك و وفرت وقتك و تعبك
فارس / طب ما توفر عليا وقتى و تعبى و تقولى مين الست اللى مختار خايف منها اوى كدا
مغاورى / هههههههههههههههههههههه مختار ههههههههههه يخاف من ست .... والله ممكن بس هتبقى مراته
عباس / ههههههههههههههههههههههه
مغاورى / ما تفهمنيش غلط هى يبان عليها غلبانه بس هو بيعملها الف حساب والله
عباس / اصل ابوها الله يرحمه كان مامنه عليها قبل ما يموت
فارس / اه ما انا عارف الحكايه دى اهلها كانوا عاوزين يجوزوها لابن عمها غصب و حوار كدا الا صحيح هو مختار اللى حرق المحل بتاع عمها
مغاورى / انا ما عرفش اى حاجه عن الكلام اللى سعادتك بتقوله ده احنا من يوم ما عرفناها ما لهاش غير امها و اخواتها عبد الله و بت صغيره اسمها ياسمينا
فارس / تمام تمام بس انا ما بتكلمش عن هند بتكلم عن ست تانيه
.................