البر التانى بقلم / لولو_محمد (كامله )

الحلقه ٨٦

(((((( البر التانى )))))))
#لولو_محمد
الحلقه ٨٦

مغاورى / لو اعرف اقول بس اللى سمعته عنها غير اللى شوفته فى عنيها الست دى مش هتغدر بالطريقه اللى نعرفها الست دى حيه بجرس لسانها السم بيجرى فيه زى العسل فاهمنى
عباده / فاهمك
مغاورى / انا بفكر اطاوعها
عباده يرفع حاجبه
مغاورى / اللى مختار ما فلحش فيه مين عارف ؟
عباده / جربنا السكه دى مره و هى مش هبله تقع فى نفس الفخ مرتين
مغاورى / معاك حق بس هى كمان بتفكر زيك كدا مستحيل نهجم بنفس الطريقه مرتين
عباده / وجهه نظر برده
مغاورى / و ما تنساش ان احسن طريقه للدفاع هى الهجوم يا ابن عمى
عباده / انا معاك بس لازم الاول نشور الكبير
مغاورى / و ماله كلمه و قوله اللى حصل و اللى فيه الخير يقدمه ربنا
عباده يهز راسه مغاورى يقف خديجه تدخل شايله صينيه عليها كبايه شاى مغاورى ياخدها
مغاورى / من يد ما نعدمها
مغاورى ياخد الكبايه و يمشى و خديجه تقعد و عباده باين انه مضايق
خديجه / كنتوا بتتكلموا فى ايه ؟ قولتله حاجه ؟ قالك حاجه ؟
...........................
عباده يبصلها و هى متوتره
عباده / هو اللى حكالى و صدقينى على قد ما شال من على قلبى حمل كبير على قد ما حط حمل اكبر
خديجه / للدرجادى !! هو قالك ايه
عباده / ما تشغليش بالك هو انا جاى اقعد معاكى عشان نتكلم عن مغاورى يعنى
خديجه تبتسم و تبص فى الارض
عباده / هو ربنا مش هيكرمنا بقى و نحدد معاد الفرح و لا ايه
خديجه تبص الناحيه التانيه و تهز كتفها ما اعرفش
......................
فى اوضه هند بالليل
هند بتكوى هدوم مختار و هو ممدد على السرير بيتفرج على التليفزيون و سرحان
هند / لا و ماما بتقولى جاب ورقه و قلم و بدا يقسم المرتب مش عارف كام لايه و كام لايه و مصاريفه كام و البيت دا عاوز يعمل جزء كل شهر لمريم يجيبلها بيه هديه و لا حاجه بس ماما بتقوله يحوشهم و يجيب كل فتره حاجه عليها القيمه بدل ما يضيعهم تفاهات فى تفاهات على فكره ماما متحمسه اوى لحوار الحضانه ده بتقولى انها احسن حاجه ممكن تعملها هى كمان كانت مضايقه انها هتقعد طول النهار لوحدها لما ياسمينا تروح الحضانه اهى تلاقى حاجه تسليها و بصراحه انا كمان متحمسه اوى للموضوع الشغل هيبقي اكيد ارحم من البيت و الهم اللى بشوفه كل يوم النهرده بجد فاطمه دى كانت غريبه جدا بعتت جابت ام داوود و قعدوا اليوم كله فى اوضتها ما اعرفش بيعملوا ايه الوقت دا كله دا انا لما كنت عروسه ما قعدتش و لا مره فى الكوافير الوقت دا كله المهم طلعت صابغه شعرها و بتقول هتغيره فبقولها شعرك يقع بنصحها يعني بس انا مالى يعني انصحها ليه ما يقع و لا يروح فى داهيه انا مالى لازم انسحب من لسانى يعني تخيل تقول انى هشيط هى ما قالتش كدا طبعا بس انا فهماها يعني
هند تعلق الجلبيه على شماعه و تعلقها فى الدولاب و تروح تقعد جنب مختار على السرير و تجيب طبق تفاح و تقشر و تقطع فى طبق
هند / انا كويت كل حاجه فى حياتى ما فيش حاجه بتوقفنى كل الوقت ده اكوى قد جلاليبك ... بس بصراحه شكلك فيها بيبقي حلو اوى ... صحيح كنت هنسي ماما عاوزه تعزم مريم معانا على الغدى المره الجايه ايه رايك تبقي حلوه و لا ما ينفعش انا قولتلها هسالك ما اعرفش
مختار مش بيرد
هند / ما ردتش يعني ... مختار
مختار / نعم
هند / ايه يا ابنى ما بتردش عليا ليه للدرجادى الفيلم ده شادك
مختار / و لا حتى عارف الفيلم بيتكلم عن ايه ما علش يا ست الكل كنتى بتقولى ايه سرحت منك
هند / سرحت ايه يا معلم ما تقولش كدا قول سافرت منك ... مش مهم اللى شاغل عقلك خير
مختار / خير ان شاء الله ما تشغليش انتى بالك
هند / بيقولوا فى صيدليه جديده فتحت فى البلد كنت فاكره انها هتبقي بتاعه خديجه بس ما طلعتش كدا
مختار / ايوه خديجه هتشتغل فى تكليف الحكومه و بس مش هتفتح صيدليه
هند / مالك يا مختار
مختار يمد ايده و ياخد شريحه تفاح و ياكلها لهند و هو مبتسم هند تبتسم و تاكلها و تكمل تقشير مختار يربع ايديه تحت دماغه و يسند على السرير
مختار / نظره الواحد للدنيا بتتغير يوم عن التانى
هند تبصله
مختار / انا بحب اهلى جدا يا هند و بخاف عليهم بس اخر واحد مات من عيلتى كنت وقتها صغير ما افهمش يعني ايه موت او فراق او الكلام ده فعشت عمرى كله مش فاهم انى ما بخافش من حد او ما عنديش اللى ابكى عليه لحد ما جيتي انتى و فكرتيني ...  فوقتيني ... انا عندى حاجات كتير اخاف عليها و اعيط عليها لو راحت منى بدل الدموع دم يا هند
هند / ليه بتقول كدا
مختار / عشان الواحد ما عدش عارف مين حبيبه من عدوه او بمعنى تانى مش عارف حقاره عدوه هتوصله لايه
هند / بس انت مش لوحدك
مختار / احنا كتير اه بس عقولنا نضيفه عقولنا كلها كانت بتفكر بنفس الطريقه طريقه ان عدونا زينا هيضرب فى الوش او هيضرب راجل لراجل النهرده مغاورى لفت انتباه عباده لحاجه عمرى ما فكرت فيها
هند تحط الطبق جنبها و تنتبه
مختار / ان عدونا مش هيهجم بالطريقه دى عدونا احقر و اخبث بكتير من تفكيرنا النضيف و لازم نفكر زيه عشان نقدر نواجهه
هند / اممممم مش عارفه.... يعني ... بتفكر فى ايه ؟ ممكن تعمل ايه يعني ؟
مختار يبتسم
مختار / و لا حاجه ... للاسف مفيش فى ايدي حاجه اعملها مهما عملت انا و كل رجاله البلد سواء الزنايته او الجوارحه كلنا نفس الطينه ... ما حدش فينا هيعرف يجيب دماغ الحرمه دى
هند / والله لازم تضموا فاطمه للفريق قال على راى اللى قال ضرب البهايم بالعصا و ضرب النساء بالنساء
مختار / هههههههههههههههههههه ... انتى مشكله
هند تجيب طبق التفاح و تديه لمختار
هند / خد كل كل ما حدش واخد منها حاجه
مختار يمد ايده و ياكل و هو بيضحك و بيتفرج على التليفزيون
هند / لو اجتمعت الإنس والجن على أن يضروك بشيء لم يضروك إلا بشيء قد كتبه الله عليك
مختار / عليه الصلاه و السلام ... معاكى حق
مختار يبتسم و ياكل هند حته تفاحه تبتسم هى كمان و تاخد الطبق و تقشر تفاح تانى
.........................
فى فيلا فيرا
فيرا مفرود قدامها خريطه و المعلمين ملمومين حواليها
راجل ١ / المنطقه دى كلها مالناش اى سلطه عليها اى مشروع مش هيفيد اهل البلد ما بيسمحوش بيه اخرنا نادى بلايستايشن و كدا نبقي فجرنا يعني
فيرا تشاور على منطقه جنبها
فيرا / و هنا
راجل ١ / احنا فعلا بدئنا بفتح اكتر من نايت كلوب فى المناطق دى بس ما نضمنش الناس اللى هنا تيجي و سعادتك ماكده انك عاوزه سكان البلد دى بالتحديد
فيرا تبتسم و تسند على كتف راجل تانى
فيرا / ما تشغلش بالك بالموضوع ده المعلم قام بالواجب ... مش كدا يا معلم
راجل ٢ / دا من بعد خيرك يا ست الكل
فيرا / احنا فتحنا صيدليه هنا فى وسط البلد و هنبدا نوزع منها على الهادى خالص الناس اللى هتيجي النايت كلوبس هتبقي ناس عاوزه تعمل دماغ و دول النهرده و لا بكره هنجيبهم انما الناس اللى هتروح الصيدليه هتبقي شريحه اعلى و اكبر
راجل ١ / ازاى يعني دى هتبقي شريحه العيانين و دول هيفرقوا معانا فى ايه
فيرا تتنهد
فيرا / هشرحلك ... الدوا بتاعنا مش بيعمل دماغ الدوا اللى معانا مسكنات زى المورفينات كدا بتعمل ادمان اه لكن للاسف مش بتعمل دماغ تقوم تبيعها فى النايت كلوب و لا الاولى تبيع الكميا التانيه اللى بتعلى و زبونها بيطلبها بالاسم
الراجل يبص فى الارض و يهز راسه
فيرا / الراجل مش هيراجع ورا الصيدلى خصوصا فى الصعيد ... دراستى لثقافه الشعب المصرى الارياف و الصعيد بيحترموا اوى لقب دكتور حتى اكتر من الجيش و الشرطه بالعكس دول شبه بيقدسوهم على عكس المدينه و المناطق الراقيه الدكتور ما بيفرقش كتير عن المدرس و المهندس كلهم فى الاخر بيندرجوا فى الطبقه المطحونه من الشعب و الاحترام بيروح لافراد السلطات العليا او اللى معاهم فلوس
راجل ٢ / صح ... عليا الطلاق صح
فيرا / ميرسي ... و عشان كدا كل منطقه لازم تدرسها كويس قوى قبل ما تبدا توزع فيها عشان تعرف التكنيك و المنتج المناسب لكل منطقه
راجل ١ / انتى بتقولى كلام كبير قوي يا ست الكل بصراحه احنا ... عمرنا ما فكرنا ان الموضوع كبير اوى كدا احنا قدام فى الكار من ايام ما كنا صبيان عمر ما حد قالنا ندرس المناطق و لا الكلام ده
فيرا / ممارسه اى مهنه احسن طريقه عشان تتعلمها يا معلم لكن لو زودت الممارسه بالدراسه و العلم صدقنى هتبدع
راجل ١ / و انتى بقي دارسه البلد كلها على كدا هههههههههههههههههه
فيرا / شبر شبر مش عاوزه اقولك يا معلم انا تقريبا الفتره اللى فاتت اتفرغت بشكل كامل لمصر ... مصر سوق مفتوح
الرجاله تبص لبعض
راجل ٢ / انا لازم استاذن و ان شاء الله عن قريب هسمعك اخبار حلوه
فيرا / تمام يا معلم صحيح عجبنى اوى انك تجيب دكاتره من بره البلد
راجل ٢ / بصراحه قلقت من حوار انى اجس نبض دكاتره البلد احنا اغراب برده لا هيثقوا فينا و لا عارفين نبدا منين خفت نلبس فى الحيط و نتكشف من اول محاوله قولت الامن نجيب حد من طرفنا امان
فيرا / عشان كدا بقولك عجبنى ... هستناك بكره فى معادنا
راجل ٢ / على نار
فيرا تبتسم الراجل يمشى و فيرا بتوصله توشوش راجل ضخم على الباب يهز راسه فيرا تدخل و تروح تقعد مع راجل ١
فيرا / تمااااام ... فضينا لبعض ... ها قولى عملت ايه فى الريكلايمز بتوع النايت كلوب الجديد بتاعك
راجل ٢ / لا دا حوار ساهل الشمال مفيش اكتر منهم
فيرا / تؤ تؤ تؤ شمال ايه احنا عاوزين نفتح مكان ... فرز اول زى ما بتقولوا ... بناتك عندى ... بضاعه مستورده مش موجوده فى مصر كلها الا عندك انت
الباب يكره و تدخل ست بنات اجانب لابسين قمصان نوم قصيره الراجل يتعدل فى قعدته
راجل ٢ / حد يكره يا ست الكل طب دا انتى حتى زوقك طلع عالى اوى اوى
فيرا / ههههههههههههههههه لا دول مجرد عينه صغيره انا عندى منهم كتير اوى اطلب العدد اللى انت عاوزه و بكل الاشكال و الالوان احنا لازم نرضي جميع الازواق
راجل ٢ / و انتى طلعتى مزاجك عالى اوى يا ست الكل
فيرا / هههههههههههههههه
فيرا تشاور للبنات يروحوا يقعدوا حوالين الراجل و يدلعوا عليه فيرا تطلع بره و تقفل الباب
فيرا / هتعب قوى مع الاغبيه دول
فيرا تطلع فوق و هى مضايقه
..........................
 
فى منطقه الرمايه يوم جمعه بعد فتره بسيطه
هند بتضرب نار و مختار و عبد الله و مريم متابعينها بتضرب الهدف بس مش فى النص
مختار / حلو فى تحسن
مريم / دورى بقى
عبد الله / بالراحه علينا يا وحش
مختار / يلا يا بنت الكبير وريهم ضرب النار ازاى ارفعى راس الزنايته
مريم / وسعولى بقى لحسن الدم ضرب فى عروقى بعد الكلمتين دول
مختار / بتتمالسى عليا ماشى لينا بيت
هند / سيبها تركز بقى
مريم / قوليله
مريم تنشن تجيب كل الاهداف فى النص
مريم / الله عليك يا حبيب والديك
مختار / يا مشرفنى ... دورك يا عريس
عبد الله / لازم ؟
مريم / يلا بقى يا عبد الله
هند / يلا يا ابنى هتكون اسوء منى يعنى يلا
عبد الله يضرب كل الطلقات فى النص
مختار / يا عبد الله يا لعيييييييييييب
هند / ايه ده انت بتضرب حلو اوى
مختار / تلميذى انا قولت من اول يوم الواد عبد الله ده خليفتى فى الملاعب
عبد الله / بس ما تقولش واد
مختار يبصله
عبد الله / مش قدامها يعنى برستيجي و كدا
مريم تضحك و تبص الناحيه التانيه
عبد الله / اموت انا
مختار / انا واقف يا حبيبى ما تصغرنيش
هند / ما لو كل واحد ركز فى اللى معاه
مختار / من غير ما تكملى انا بتكلم على كدا اساسا الواد ده حلنجى و انا مش هعرف اللاحق
عبد الله / الكلام ده عليا ؟
مريم / دور تانى يلا انتوا جايين تتمرنوا و لا ترغوا
هند / نتمرن انا المرادى ناويه اغلبكوا كلكوا
مختار / لا و انتى الصادقه النهرده هنبدا التمرين على الاهداف المتحركه
هند / احلف
مختار / ههههههههههههههههه والله ثوانى .... تعال معايا يا عبد الله
مختار ياخد عبد الله و يدخلوا اوضه و يطلعوا منها شايلين كل واحد من ناحيه مجرى حديد و جواه قاعده متحركه طالع منها عصايه القاعده مربوطه بحبل من الناحيتين الحبل متوصل ببكره بايد يحطوها عند الاهداف
هند / ايه ده
مختار / ده اول مرحله بصى
مختار يلف البكره يسحب الحبل و القاعده تتحرك
مختار / طبعا انا كل ما لفيت اسرع الهدف هيتحرك اسرع فنبدا بابطئ سرعه ... هات علامه يا عبد الله
عبد الله يحط ورقه العلامات و يدبسها فى طرف العصايه من فوق و مختار يرجع الهدف فى النص
مختار / انا هلف و انتى نشنى
هند / لا طبعا انت هناك تعال جنبى
مختار / هتعورينى و لا ايه ما انا بعيد جدا عن الهدف اهو اضربى
هند / مختار لو سمحت تعال هنا
مريم / يا بنتى بينه و بين الهدف يجى خمسه متر دا بعيد جدا اضربى
هند / يا مريم ممكن اى حاجه تحصل انا مش هجازف دا رصاص يا مريم مش بمب
مختار / اضربى يا هند ما تخافيش انا بعيد اضربى
هند / انا مش هلعب اللعبه دى
مختار يروحلها و هو مضايق
مختار / احنا مش بنلعب احنا بنتمرن انا هلف البكره و انتى اضربى
هند / لا
مختار / بناقص .. اضربى انتى يا مريم
مختار يرجع يلف البكره و هند تقف مضايقه مختار يلف البكره بسرعه و العلامه بتتحرك بسرعه و مريم بتضرب نار تجيبهم كلهم
عبد الله / اللهم صلى على كامل النور
مريم/ تحب تجرب
عبد الله / هجرب بس لو هكا و لا هكا
مريم / ما تخافش بنغلط عشان نتعلم
عبد الله / باشا
عبد الله يبص على الهدف مختار رجعها فى مكانها و غير العلامه و بيكور العلامه القديمه بغل و بيرميها فى الارض و هند متبعاه مختار يروح ناحيه الايد و يلف بسرعه عبد الله يضرب يجيبهم كلهم
مريم / ما انت حلو اهو امال كنت بتغزى العين بقى و لا ايه
مختار / هند
هند / لا
عباده يدخل و يشاور لمختار يروحله
عباده / السلام عليكم
الكل / و عليكم السلام و رحمه الله و بركاته
مختار يروح ناحيه عباده و يقفوا فى جنب و مريم و عبد الله بيعمروا المسدسات رصاص و هم بيضحكوا سوا و هند قاعده مضايقه
مختار / خير
عباده / كلمت عبد الله؟
مختار / اه كلمته
عباده / نبهت عليه ما يقولش لحد
مختار / ايوه
عباده / مالك ؟
عباده يبص على هند باصه ناحيه الاهداف و مضايقه
عباده / هو التمرين كان وحش و لا ايه
مختار / خايفه تضرب و انا بلف البكر
عباده / حقها ما تضغطش عليها دا مجرد تمرين و لعب بالنسبالها
مختار يبص الناحيه التانيه
عباده / انا عارف انك معشم نفسك و بتمرنها كانها هتبقى واحده مننا بس فى الاول و الاخر هى حرمه مش مطلوب منها تشيل سلاح و لا تبقى بريفكس فى استخدامه يعنى يا ابن عمى
مختار / هنفضل فى الاهداف الثابته طول عمرنا يعنى
عباده / ارنبين و اطلقهم فى الارض
مختار / هترضى تضرب على الارانب يعنى
عباده / ما تقولش بقى
مختار / اصلا انا مش فارق معايا انها تضرب و لا ما تضربش انا مش عاوزها خايفه اوى كدا
عباده / تبقى عبيط يا ابن عمى لو فكرت فى كدا هتخاف هتخاف انت جوزها و اللى ما تخافش على جوزها يبقى ما بتحبوش و البت بتحبك
مختار / انت ليه بتبص تحت رجليك انا بمرنها عشان لو لا قدر الله
عباده / لما رجاله الزنايته يخلصوا ابقى شيل الهم دلوقت خف البت هتعيط فى ايدك انا اللى هقولك برضه امال راحت فين ايام الورد و الوقوف تحت البلكونات يا سى روميو
مختار / انا بتكلم جد
عباده / براحتك انا مالى صحيح ما لكش عندى اكتر من النصيحه انا ماشى
مختار / على فين
عباده / هو ايه اللى على فين رايحين للجوارحه انت ناسى اننا هنحدد معاد الفرح النهرده
مختار / اخيرا
عباده / والله الاوضه و اتفرشت و جهازها كمل العطله منين بقى انا شخصيا جاهز
مختار / هههههههههههههه ان شاء الله الخميس الجاى
عباده / ان شاء الله يلا بالاذن ... سلام يا جماعه
عبد الله / بسرعه كدا ما تيجي يا عم
عباده / مره تانيه ان شاء الله ... خف
عباده يضرب مختار على كتفه بالراحه مختار يهز راسه اه عباده يمشى مختار يبص ناحيه هند باصه الناحيه التانيه و بتهز رجلها بسرعه يروح يقعد جنبها
مختار / لو ضربنا تلت اربع ارانب هيصعبوا عليكي
هند تبصله
مختار / تعتبر اهداف متحركه برضها
هند / انا بخاف عليك على فكره انا مش هعيش يوم واحد لو جرالك حاجه
مختار يهز راسه
مختار / عارف بس انتى مكبره الموضوع جامد اوى بصراحه امال لو شوفتى واحد مثبتنى و حاطت المسدس على دماغى من ورا هتعملى ايه
هند / هعمل ايه فى ايه هموت طبعا انت بتهزر
مختار / يا مرك يا مختار ... يعنى مش هتضربيه فى دماغه و تنقذيني
هند / و لو جت فيك هتفرح ساعتها هتبقى يا فرحتك يا مختار يا سعدك يا هناك يا مختار
مختار / اه هبقى مبسوط انتى الوحيده اللى لو اتكتبلى اموت على ايد حد هيبقى انى اموت على ايدها بالنسبالى رحمه
هند / مش وقت كلام اهبل لو سمحت انا مش فى المود للتخاريف دى
هند تبص الناحيه التانيه و تدارى دموعها مختار يتنهد
مختار / طلع سبت ارانب من جوه يا عبد الله لو سمحت
عبد الله يهز راسه و يجرى على الاوضه
مختار / حقك عليا
هند تبصله
مختار / كل ده مش هيحصل يا هند بس ما فيش ضرر لو امنا نفسنا ما حدش عارف الدنيا مخبيالنا ايه تفتكرى لو لا قدر الله حصل مش هتندمى ان كان عندك فرصه تتعلمى و انتى خفتى و ضيعتيها
هند / انت شرير اوى بجد
مختار / لو مش عاوزه خلاص انا ما عدش عندى حاجه اعلمهالك اكتر من كدا الباقى كله اننا نغير العلامات و انتى تفضلى تضربى لحد ما تضمنى ان كل العلامات هتيجي فى النص بعد كدا تحصيل حاصل قومى احطلك العلامه عشان نلحق الشمس قبل ما تغيب
مختار يروح يغير العلامه و عبد الله يجيب الارانب و يحط السبت فى الارض مختار يشاورله يروح يشيل قصاده مجرى العلامه المتحركه و يرجعوه الاوضه و يرجعوا مختار يمسك مسدس و يفتح الخزنه يتاكد انها مليانه
مختار / يلا يا هند و لا ايه ؟
هند باصه فى الارض تتنهد و تقوم تاخد المسدس
مختار / اضربى
هند / هضرب عليهم فى القفص ؟
مختار يهز راسه و يروح يفتح السبت و يطلع تلت ارانب و يحط كل واحد فى حته و يطلع جزر و خس و يوزعهم بشكل عشوائى بعيد عن الارانب و يروح يقف جنب هند و الارانب تبدا تجرى ناحيه الاكل
مختار / اضربى
هند تستنى اول واحد يثبت و تضربه الاتنين التانين يجروا
مختار / اضربى
هند تضرب التانى و هو بيجرى تجيبه
مختار / اضربى يا هند مستنيه ايه
هند تضرب التالت تجيبه
مختار / جدعه ... يلا يا جماعه كفايا كدا النهرده
هند / هو الارانب دى هتروح فين ؟
مختار / الكلاب الليله هتاكل و تدعيلك يلا نروح
الكل يمشى و مريم تمشى جنب هند
مريم / انا كنت خايفه زيك كدا فى الاول
هند تبصلها
مريم / مره فى مره هتثقى فى نفسك و هتحاولى مره و اتنين و تلاته و هتجيبيها
هند / لو جراله حاجه
مريم / مش هيجراله حاجه ان شاء الله انتى بتعرفى تنشنى كويس
هند / ما حدش فاهمنى ما حدش حاسس باللى جوايا
مريم / والله حاسين و هو كمان حاسس على فكره ... طب لو كان حد تانى اللى بيلف غير عمى كنتى هتضربى ؟
هند / ما اعرفش ... بس اكيد برضه هخاف عليه برضه دا روح برضه
مريم / ما الارانب كانت روح برضه؟
هند / اقصد انسان يعنى
مريم / بس مش زى مختار مثلا ؟
هند / انتى عاوزه ايه يا مريم ؟
مريم / مش عاوزه خلاص
مختار و عبد الله يركبوا العربيه و مريم و هند يركبوا ورا و مختار يسوق و باين انه مضايق
....................
فى سرايا الجوارحه
شاهين / و انا مش هكسرلك كلمه يا حج شاكر الخميس الجاى كتب الكتاب و الدخله و الاربع باذن الله الحنه
شاكر / ايوه بقى يا حج شاهين اهو ده الكلام دا الواحد ريقه نشف
ناصر / فراق البنات مش بالساهل يا عمى اسالنى انا عمال ياجل عشان تفضل جنبه
شاهين / والله ابدا بس انتوا عارفين تجهيزات الحريم ما بتخلصش و جيل اليومين دول ليهم حركاتهم برده و لا ايه يا عريسنا
عباده / والله يا حج انا مستعجل فالحاجات دى كلها دلوقت بالنسبالى ما لهاش تلاتين لزمه
شاهين / هههههههههههههههههه الله يحظك يا عباده على العموم يا سيدى من هنا للخميس مش بعيد تعال على نفسك الكام يوم دول يا سيدى
عباده / بتيجي عليا جامد والله يا حج بس هاجى على نفسى و اصبر عشان خاطرك انت بس
شاهين / هههههههههههههههههههههه هقولك حاجه مش عارف كنت تعرفها و لا لا ابوك ده ايام شبابى كان حلانجى زيك كدا برضه ما كانش حد يقدر يغلبه فى الكلام
شاكر / بقولك ايه يا حج شاهين هتسيحلى هسيحلك ما احنا دافنينه سوا
مغاورى / ايه يا سيد الحجاج انت ليك زكريات انا ما اعرفهاش و لا ايه
ناصر / ابوك دا سيد الناس احنا بنهزر مع بعضينا
شاهين / هههههههههههههههههههه هزرنا كتير نتكلم فى الجد بقى ما دام كلنا متجمعين ... عملتوا ايه يا رجاله فى حوار اللى ما تتسما
مغاورى / كلمتها و قولتلها انى موافق اشتغل معاها بشرط لو اتعاملت معايا ما لهاش اى دخل بالزنايته انا زى الفريك ما ليش شريك و هاخد تلاته مليون دولار على كل تحويله
شاكر / و وافقت
مغاورى / وافقت طبعا ... البتاع اللى بتعمله ده الدوا شكلها عملت منه كميه كبيره لو قدرنا نعرف هى مخزناه فين و اتمسكت متلبسه بيه يبقى خلصنا منها ليوم الدين
عباده / هو ده بالظبط اللى محتاجينك تشتغل عليه يا مغاورى الفتره الجايه انك تعمل كل اللى تقدر عليه انك توصل لمكان التخزين احنا مش بس عاوزين نخلص منها احنا عاوزين نمنعها انها توزع الحاجات دى جوه مصر
ناصر / اللى فهمته من مختار انها ما كانش نيتها تصنع فى مصر على قد ما كان هدفها تبيع جوه مصر يعنى لو ما طلعتش الحاجات دى بره هتبيعها هنا
شاهين / و انت الصادق هى كدا كدا هتبيع هنا اللى هيطلع ده فايض التصدير
شاكر / لما هتدفع تلاته مليون دولار عشان تطلع فايض التصدير بره على كدا اللى وزعته جوه بكام
شاهين / احنا هنتحرك فى كل الاتجاهات دى يا رجاله عاوزين نفتح عنينا فى كل حته عاوزين نعرف عنها كل اللى نقدر عليه عشان لما نتحرك نتحرك مره واحده و ما نديلهاش فرصه تهرب مننا و ما تنسوش ان ليها عنين فى الحكومه مش عاوزين نكرر غلطنا تانى
عباده / ما يتهياليش انها حاطه البضاعه فى الفيلا اللى هى قاعده فيها و لا ان ده حتى مكان التصنيع ما افتكرش انها غبيه لدرجه انها تحط البيض كله فى سله واحده
مغاورى / ما تنساش ان ده برضه احتمال وارد على اساس يعنى تركز الحراسه كلها فى مكان واحد بدل ما تفرق رجالتها
ناصر / احنا عاوزين نشتغل فى كل الاتجاهات و عاوزين لو قدرنا نزرع اى حد من رجالتنا عندها يبقى حاجه حلوه برضه
مغاورى / امال انا ايه
ناصر / لا ما اقصدش انا اقصد يبقى من رجالتها يبقى جوه الفيلا او اى مكان
شاهين / هى فكره حلوه بس خطره و الحد ده لازم نبقى بنثق فيه اوى
شاكر / ايه رايكوا فى عبد الرحمن ابن زكريا
.....................